Read Библия Церковнославянская Ѿ лѹкѝ 9 Bible Online

Ѿ лѹкѝ 9 - Библия Церковнославянская bible

Ѿ лѹкѝ 9

¹Созва́въ же ѻ҆бана́десѧте, дадѐ и҆̀мъ си́лѹ и҆ вла́сть на всѧ҄ бѣ́сы, и҆ недѹ́ги цѣли́ти:

²и҆ посла̀ и҆̀хъ проповѣ́дати цр҇твїе бж҃їе и҆ и҆сцѣли́ти болѧ́щыѧ.

³И҆ речѐ къ ни҄мъ: ничесѡ́же возми́те на пѹ́ть: ни жезла̀, ни пи́ры, ни хлѣ́ба, ни сребра̀, ни по двѣма̀ ри́зама и҆мѣ́ти:

⁴и҆ въ ѻ҆́ньже до́мъ вни́дете, тѹ̀ пребыва́йте и҆ ѿтѹ́дѹ и҆сходи́те:

⁵и҆ є҆ли́цы а҆́ще не прїе́млютъ ва́съ, и҆сходѧ́ще ѿ гра́да тогѡ̀, и҆ пра́хъ ѿ но́гъ ва́шихъ ѿтрѧси́те, во свидѣ́телство на нѧ̀.

⁶И҆сходѧ́ще же прохожда́хѹ сквозѣ̀ вє́си, благовѣствѹ́юще и҆ и҆сцѣлѧ́юще всю́дѹ.

⁷(За҄ 41.) Слы́ша же и҆́рѡдъ четвертовла́стникъ быва҄ющаѧ ѿ негѡ̀ всѧ҄ и҆ недоѹмѣва́шесѧ: занѐ глаго́лемо бѣ̀ ѿ нѣ́кихъ, ѩ҆́кѡ ї҆ѡа́ннъ воста̀ ѿ ме́ртвыхъ:

⁸ѿ и҆нѣ́хъ же, ѩ҆́кѡ и҆лїа̀ ѩ҆ви́сѧ: ѿ дрѹги́хъ же, ѩ҆́кѡ про҇ро́къ є҆ди́нъ ѿ дре́внихъ воскре́се.

⁹И҆ речѐ и҆́рѡдъ: ї҆ѡа́нна а҆́зъ ѹ҆сѣ́кнѹхъ: кто́ же є҆́сть се́й, ѡ҆ не́мже а҆́зъ слы́шѹ такова́ѧ; И҆ и҆ска́ше ви́дѣти є҆го̀.

¹⁰И҆ возвра́щшесѧ а҆п҇ли повѣ́даша є҆мѹ̀, є҆ли́ка сотвори́ша: и҆ пои́мъ и҆̀хъ, ѿи́де є҆ди́нъ {ѡ҆со́бь} на мѣ́сто пѹ́сто гра́да, нарица́емагѡ виѳсаі́да.

¹¹Наро́ди же разѹмѣ́вше, по не́мъ и҆до́ша: и҆ прїе́мъ и҆̀хъ, гл҃аше и҆̀мъ ѡ҆ цр҇твїи бж҃їи и҆ тре́бѹющыѧ и҆сцѣле́нїѧ цѣлѧ́ше.

¹²Де́нь же нача́тъ прекланѧ́тисѧ. (За҄ 42.) Пристѹ́пльше же ѻ҆бана́десѧте реко́ша є҆мѹ̀: ѿпѹстѝ наро́дъ, да ше́дше во ѡ҆крє́стныѧ вє́си и҆ се́ла вита́ютъ и҆ ѡ҆брѧ́щѹтъ бра́шно: ѩ҆́кѡ здѣ̀ въ пѹ́стѣ мѣ́стѣ є҆смы̀.

¹³Рече́ же къ ни҄мъ: дади́те и҆̀мъ вы̀ ѩ҆́сти. Ѻ҆ни́ же рѣ́ша: нѣ́сть ѹ҆ на́съ вѧ́щше, то́кмѡ пѧ́ть хлѣ҄бъ и҆ ры҄бѣ двѣ̀, а҆́ще ѹ҆̀бо не ше́дше мы̀ кѹ́пимъ во всѧ҄ лю́ди сїѧ҄ бра҄шна.

¹⁴Бѣ́хѹ бо мѹже́й ѩ҆́кѡ пѧ́ть ты́сѧщъ. Рече́ же ко ѹ҆чн҃кѡ́мъ свои҄мъ: посади́те и҆̀хъ на кѹ҄пы по пѧти́десѧтъ.

¹⁵И҆ сотвори́ша та́кѡ и҆ посади́ша и҆̀хъ всѧ҄.

¹⁶Прїи́мъ же пѧ́ть хлѣ҄бъ и҆ ѻ҆́бѣ ры҄бѣ, воззрѣ́въ на не́бо, блг҇вѝ и҆̀хъ, и҆ преломѝ, и҆ даѧ́ше ѹ҆чн҃кѡ́мъ предложи́ти наро́дѹ.

¹⁷И҆ ѩ҆до́ша и҆ насы́тишасѧ всѝ: и҆ взѧ́ша и҆збы́вшыѧ и҆̀мъ ѹ҆крѹ́хи ко́шѧ двана́десѧте.

¹⁸(За҄ 43.) И҆ бы́сть є҆гда̀ молѧ́шесѧ є҆ди́нъ, съ ни́мъ бѣ́хѹ ѹ҆чн҃цы̀: и҆ вопросѝ и҆̀хъ, гл҃ѧ: кого́ мѧ глаго́лютъ наро́ди бы́ти;

¹⁹Ѻ҆ни́ же ѿвѣща́вше рѣ́ша: ї҆ѡа́нна кр҇ти́телѧ: и҆ні́и же и҆лїю̀: дрѹзі́и же, ѩ҆́кѡ про҇ро́къ нѣ́кїй ѿ дре́внихъ воскре́се.

²⁰Рече́ же и҆̀мъ: вы́ же кого́ мѧ глаго́лете бы́ти; Ѿвѣща́въ же пе́тръ речѐ: хр҇та̀ бж҃їѧ.

²¹Ѻ҆́нъ же запре́щь и҆̀мъ, повелѣ̀ никомѹ́же глаго́лати сегѡ̀,

²²ре́къ, ѩ҆́кѡ подоба́етъ сн҃ѹ чл҃вѣ́ческомѹ мно́гѡ пострада́ти, и҆ и҆скѹше́нѹ {ѿве́рженѹ} бы́ти ѿ ста́рєцъ и҆ а҆рхїерє́й и҆ кни҄жникъ, и҆ ѹ҆бїе́нѹ бы́ти, и҆ въ тре́тїй де́нь воста́ти.

²³(За҄ 44.) Гл҃аше же ко всѣ҄мъ: а҆́ще кто̀ хо́щетъ по мнѣ̀ и҆тѝ, да ѿве́ржетсѧ себє̀, и҆ во́зметъ кре́стъ сво́й, и҆ послѣ́дѹетъ мѝ.

²⁴И҆́же бо а҆́ще хо́щетъ дѹ́шѹ свою̀ сп҇тѝ, погѹ́битъ ю҆̀: а҆ и҆́же погѹ́битъ дѹ́шѹ свою̀ менє̀ ра́ди, се́й сп҃се́тъ ю҆̀.

²⁵Что́ бо по́льзы и҆́мать человѣ́къ, прїѡбрѣ́тъ мі́ръ ве́сь, себе́ же погѹби́въ и҆лѝ ѿтщети́въ;

²⁶И҆́же бо а҆́ще постыди́тсѧ менє̀ и҆ мои́хъ слове́съ, сегѡ̀ сн҃ъ чл҃вѣ́ческїй постыди́тсѧ, є҆гда̀ прїи́детъ во сла́вѣ свое́й и҆ ѻ҆́ч҃ей и҆ ст҃ы́хъ а҆́гг҃лъ.

²⁷Глаго́лю же ва́мъ вои́стиннѹ: сѹ́ть нѣ́цыи ѿ здѣ̀ стоѧ́щихъ, и҆̀же не и҆́мѹтъ вкѹси́ти сме́рти, до́ндеже ви́дѧтъ цр҇твїе бж҃їе.

²⁸(За҄ 45.) Бы́сть же по словесѣ́хъ си́хъ ѩ҆́кѡ дні́й ѻ҆́смь, и҆ пое́мъ петра̀ и҆ ї҆ѡа́нна и҆ ї҆а́кѡва, взы́де на горѹ̀ помоли́тисѧ.

²⁹И҆ бы́сть є҆гда̀ молѧ́шесѧ, видѣ́нїе лица̀ є҆гѡ̀ и҆́но, и҆ ѡ҆дѣѧ́нїе є҆гѡ̀ бѣло̀ блиста́ѧсѧ.

³⁰И҆ сѐ мѹ҄жа два̀ съ ни́мъ глагѡ́люща, ѩ҆̀же бѣ́ста мѡѷсе́й и҆ и҆лїа̀,

³¹ѩ҆́вльшасѧ во сла́вѣ, глаго́ласта же и҆схо́дъ є҆гѡ̀, є҆го́же хотѧ́ше сконча́ти во ї҆ер҇ли́мѣ.

³²Пе́тръ же и҆ сѹ́щїи съ ни́мъ бѧ́хѹ ѡ҆тѧгче́ни сно́мъ: ѹ҆бѹ́ждшесѧ же ви́дѣша сла́вѹ є҆гѡ̀, и҆ ѻ҆́ба мѹ҄жа стоѧ҄ща съ ни́мъ.

³³И҆ бы́сть є҆гда̀ разлѹчи́стасѧ ѿ негѡ̀, речѐ пе́тръ ко ї҆и҃сѹ: наста́вниче, добро̀ є҆́сть на́мъ здѣ̀ бы́ти: и҆ сотвори́мъ сѣ҄ни трѝ, є҆ди́нѹ тебѣ̀, и҆ є҆ди́нѹ мѡѷсе́ови, и҆ є҆ди́нѹ и҆лїѝ: не вѣ́дый, є҆́же глаго́лаше.

³⁴Се́ же є҆мѹ̀ глаго́лющѹ, бы́сть ѡ҆́блакъ, и҆ ѡ҆сѣнѝ и҆̀хъ: ѹ҆боѧ́шасѧ же, вше́дше во ѡ҆́блакъ.

³⁵И҆ гла́съ бы́сть и҆з̾ ѡ҆́блака, глаго́лѧ: се́й є҆́сть сн҃ъ мо́й возлю́бленный, тогѡ̀ послѹ́шайте.

³⁶И҆ є҆гда̀ бы́сть гла́съ, ѡ҆брѣ́тесѧ ї҆и҃съ є҆ди́нъ. И҆ ті́и ѹ҆молча́ша, и҆ никомѹ́же возвѣсти́ша въ ты҄ѧ дни҄ ничесѡ́же ѿ тѣ́хъ, ѩ҆̀же ви́дѣша.

³⁷(За҄ 46.) Бы́сть же въ про́чїй де́нь, сше́дшымъ и҆̀мъ съ горы̀, срѣ́те є҆го̀ наро́дъ мно́гъ.

³⁸И҆ сѐ мѹ́жъ и҆з̾ наро́да возопѝ, глаго́лѧ: ѹ҆чи́телю, молю́тисѧ, при́зри на сы́на моего̀, ѩ҆́кѡ є҆диноро́денъ мѝ є҆́сть:

³⁹и҆ сѐ дѹ́хъ є҆́млетъ є҆го̀, и҆ внеза́пѹ вопїе́тъ, и҆ прѹжа́етсѧ {терза́етъ є҆го̀} съ пѣ́нами, и҆ є҆два̀ ѿхо́дитъ ѿ негѡ̀, сокрѹша́ѧ є҆го̀:

⁴⁰и҆ моли́хсѧ ѹ҆чн҃кѡ́мъ твои҄мъ, да и҆жденѹ́тъ є҆го̀: и҆ не возмого́ша.

⁴¹Ѿвѣща́въ же ї҆и҃съ речѐ: ѽ, ро́де невѣ́рный и҆ развраще́нный, доко́лѣ бѹ́дѹ въ ва́съ и҆ терплю̀ вы̀; приведи́ (ми) сы́на твоего̀ сѣ́мѡ.

⁴²Є҆ще́ же грѧдѹ́щѹ є҆мѹ̀, пове́рже є҆го̀ бѣ́съ и҆ стрѧсѐ. Запрети́ же ї҆и҃съ дѹ́хови нечи́стомѹ, и҆ и҆сцѣлѝ ѻ҆́трока, и҆ вдадѐ є҆го̀ ѻ҆тцѹ̀ є҆гѡ̀.

⁴³Дивлѧ́хѹсѧ же всѝ ѡ҆ вели́чїи бж҃їи. (За҄ 47.) Всѣ҄мъ же чѹдѧ́щымсѧ ѡ҆ всѣ́хъ, ѩ҆̀же творѧ́ше ї҆и҃съ, речѐ ко ѹ҆чн҃кѡ́мъ свои҄мъ:

⁴⁴вложи́те вы̀ во ѹ҆́шы ва́ши словеса̀ сїѧ҄: сн҃ъ бо чл҃вѣ́ческїй и҆́мать преда́тисѧ въ рѹ́цѣ человѣ́чєстѣ.

⁴⁵Ѻ҆ни́ же не разѹмѣ́ша глаго́ла сегѡ̀, бѣ́ бо прикрове́нъ ѿ ни́хъ, да не ѡ҆щѹтѧ́тъ є҆гѡ̀: и҆ боѧ́хѹсѧ вопроси́ти є҆го̀ ѡ҆ глаго́лѣ се́мъ.

⁴⁶Вни́де же помышле́нїе въ ни́хъ, кто̀ и҆́хъ вѧ́щшїй бы бы́лъ.

⁴⁷Ї҆и҃съ же вѣ́дый помышле́нїе серде́цъ и҆́хъ, прїе́мъ ѻ҆троча̀, поста́ви є҆̀ ѹ҆ себє̀

⁴⁸и҆ речѐ и҆̀мъ: и҆́же а҆́ще прїи́метъ сїѐ ѻ҆троча̀ во и҆́мѧ моѐ, менѐ прїе́млетъ: и҆ и҆́же а҆́ще менѐ прїе́млетъ, прїе́млетъ посла́вшаго мѧ̀: и҆́же бо ме́ншїй є҆́сть въ ва́съ, се́й є҆́сть вели́къ.

⁴⁹(За҄ 48.) Ѿвѣща́въ же ї҆ѡа́ннъ речѐ: наста́вниче, ви́дѣхомъ нѣ́коего ѡ҆ и҆́мени твое́мъ и҆згонѧ́ща бѣ́сы: и҆ возбрани́хомъ є҆мѹ̀, ѩ҆́кѡ вослѣ́дъ не хо́дитъ съ на́ми.

⁵⁰И҆ речѐ къ немѹ̀ ї҆и҃съ: не брани́те: и҆́же бо нѣ́сть на вы̀, по ва́съ є҆́сть.

⁵¹(За҄.) Бы́сть же є҆гда̀ скончава́хѹсѧ дні́е восхожде́нїю є҆гѡ̀, и҆ то́й ѹ҆твердѝ лицѐ своѐ и҆тѝ во ї҆ер҇ли́мъ:

⁵²и҆ посла̀ вѣ́стники пред̾ лице́мъ свои́мъ: и҆ и҆зше́дше внидо́ша въ ве́сь самарѧ́нскѹ, ѩ҆́кѡ да ѹ҆гото́вѧтъ є҆мѹ̀:

⁵³и҆ не прїѧ́ша є҆гѡ̀, ѩ҆́кѡ лицѐ є҆гѡ̀ бѣ̀ грѧдѹ́щее во ї҆ер҇ли́мъ.

⁵⁴Ви҄дѣвша же ѹ҆чн҃ка҄ є҆гѡ̀ ї҆а́кѡвъ и҆ ї҆ѡа́ннъ, рѣ́ста: гд҇и, хо́щеши ли, рече́ма, да ѻ҆́гнь сни́детъ съ небесѐ и҆ потреби́тъ и҆̀хъ, ѩ҆́коже и҆ и҆лїа̀ сотворѝ;

⁵⁵Ѡ҆бра́щьсѧ же запретѝ и҆́ма, и҆ речѐ: не вѣ́ста, ко́егѡ дѹ́ха є҆ста̀ вы̀:

⁵⁶сн҃ъ бо чл҃вѣ́ческїй не прїи́де дѹ́шъ человѣ́ческихъ погѹби́ти, но сп҇тѝ: и҆ и҆до́ша во и҆́нѹ ве́сь.

⁵⁷(За҄ 49.) Бы́сть же и҆дѹ́щымъ и҆̀мъ по пѹтѝ, речѐ нѣ́кїй къ немѹ̀: и҆дѹ̀ по тебѣ̀, а҆́може а҆́ще и҆́деши, гд҇и.

⁵⁸И҆ речѐ є҆мѹ̀ ї҆и҃съ: ли́си ѩ҆́звины и҆́мѹтъ, и҆ пти҄цы небє́сныѧ гнѣ́зда: сн҃ъ же чл҃вѣ́ческїй не и҆́мать гдѣ̀ главѹ̀ подклони́ти.

⁵⁹Рече́ же ко дрѹго́мѹ: ходѝ в̾слѣ́дъ менє̀. Ѻ҆́нъ же речѐ: гд҇и, повелѝ мѝ, (да) ше́дъ пре́жде погребѹ̀ ѻ҆тца̀ моего̀.

⁶⁰Рече́ же є҆мѹ̀ ї҆и҃съ: ѡ҆ста́ви мє́ртвыѧ погребстѝ своѧ҄ мертвецы̀: ты́ же ше́дъ возвѣща́й цр҇твїе бж҃їе.

⁶¹Рече́ же и҆ дрѹгі́й: и҆дѹ̀ по тебѣ̀, гд҇и: пре́жде же повелѝ мѝ ѿвѣща́тисѧ, и҆̀же сѹ́ть {попрости́тисѧ съ сѹ́щими} въ домѹ̀ мое́мъ.

⁶²Рече́ же къ немѹ̀ ї҆и҃съ: никто́же возло́жь рѹ́кѹ свою̀ на ра́ло и҆ зрѧ̀ вспѧ́ть, ѹ҆пра́вленъ є҆́сть въ цр҇твїи бж҃їи.