Read Библия Церковнославянская Второзако́нїе 10 Bible Online

Второзако́нїе 10 - Библия Церковнославянская bible

Второзако́нїе 10

¹Во ѻ҆́но вре́мѧ речѐ гд҇ь ко мнѣ̀: и҆стешѝ себѣ̀ двѣ̀ скрижа҄ли ка́мєнны ѩ҆́коже пє́рвыѧ, и҆ взы́ди ко мнѣ̀ на го́рѹ, и҆ да сотвори́ши себѣ̀ ковче́гъ древѧ́нъ:

²и҆ напишѹ̀ на скрижа́лехъ словеса̀, ѩ҆̀же бѧ́хѹ на скрижа́лехъ пе́рвыхъ, и҆̀хже сокрѹши́лъ є҆сѝ, и҆ да вложи́ши ѧ҆̀ въ ковче́гъ.

³И҆ сотвори́хъ ковче́гъ ѿ дре́въ негнїю́шихъ, и҆ и҆стеса́хъ двѣ̀ скрижа҄ли ка́мєнны ѩ҆́коже и҆ пє́рвыѧ, и҆ взыдо́хъ на го́рѹ: и҆ ѻ҆́бѣ скрижа҄ли во ѻ҆бою̀ рѹкѹ̀ моє́ю:

⁴и҆ написа̀ на скрижа́лехъ по писа́нїю пе́рвомѹ де́сѧть слове́съ, ѩ҆̀же гл҃а гд҇ь къ ва́мъ на горѣ̀ ѿ среды̀ ѻ҆гнѧ̀, и҆ дадѐ ѧ҆̀ гд҇ь мнѣ̀.

⁵И҆ ѡ҆брати́всѧ снидо́хъ съ горы̀, и҆ вложи́хъ скрижа҄ли въ ковче́гъ, є҆го́же сотвори́хъ: и҆ бѣ́ста тѹ̀, ѩ҆́коже повелѣ́ ми гд҇ь.

⁶И҆ сы́нове ї҆и҃лєвы воздвиго́шасѧ ѿ вирѡ́ѳа сынѡ́въ ї҆акі́млихъ въ мїсада́й: та́мѡ ѹ҆́мре а҆арѡ́нъ, и҆ погребе́нъ бы́сть тѹ̀, и҆ бы́сть жре́цъ є҆леаза́ръ сы́нъ є҆гѡ̀ вмѣ́стѡ є҆гѡ̀.

⁷Ѿтѹ́дѹ же воздвиго́шасѧ въ гадга́дъ, и҆ ѿ гадга́да до є҆тава́ѳа, землѝ водоте́чи во́дъ.

⁸Во ѻ҆́но вре́мѧ ѿдѣлѝ гд҇ь пле́мѧ леѵі́ино носи́ти ковче́гъ завѣ́та гд҇нѧ, предстоѧ́ти пред̾ гд҇емъ, слѹжи́ти и҆ моли́тисѧ и҆ благословлѧ́ти ѡ҆ и҆́мени є҆гѡ̀ до дне́шнѧгѡ днѐ:

⁹сегѡ̀ ра́ди нѣ́сть леѵі́тѡмъ ча́сти и҆ жре́бїѧ въ бра́тїи и҆́хъ: гд҇ь са́мъ жре́бїй и҆́хъ, ѩ҆́коже речѐ и҆̀мъ.

¹⁰И҆ а҆́зъ стоѧ́хъ на горѣ̀ четы́редесѧть дні́й и҆ четы́редесѧть ноще́й, и҆ послѹ́ша гд҇ь менѐ и҆ во вре́мѧ сїѐ, и҆ не восхотѣ̀ гд҇ь погѹби́ти ва́съ.

¹¹И҆ речѐ гд҇ь ко мнѣ̀: грѧдѝ, воздви́гнисѧ пред̾ людьмѝ си́ми, и҆ да вни́дѹтъ и҆ наслѣ́дѧтъ зе́млю, є҆́юже клѧ́хсѧ ѻ҆тцє́мъ и҆́хъ, да́ти ю҆̀ и҆̀мъ.

¹²И҆ нн҃ѣ, ї҆и҃лю, что̀ проси́тъ гд҇ь бг҃ъ тво́й ѹ҆ тебє̀, то́чїю є҆́же боѧ́тисѧ гд҇а бг҃а твоегѡ̀ и҆ ходи́ти во всѣ́хъ пѹте́хъ є҆гѡ̀, и҆ люби́ти є҆го̀ и҆ слѹжи́ти гд҇ѹ бг҃ѹ твоемѹ̀ ѿ всегѡ̀ се́рдца твоегѡ̀ и҆ ѿ всеѧ̀ дѹшѝ твоеѧ̀,

¹³храни́ти за́пѡвѣди гд҇а бг҃а твоегѡ̀ и҆ ѡ҆правда҄нїѧ є҆гѡ̀, є҆ли҄ка а҆́зъ заповѣ́даю тебѣ̀ дне́сь, да бла́го тебѣ̀ бѹ́детъ;

¹⁴Сѐ, гд҇а бг҃а твоегѡ̀ не́бо и҆ не́бо небесѐ, землѧ̀ и҆ всѧ҄ є҆ли҄ка сѹ́ть на не́й:

¹⁵ѻ҆ба́че ѻ҆тцы̀ ва́шы произво́ли гд҇ь люби́ти и҆̀хъ, и҆ и҆збра̀ сѣ́мѧ и҆́хъ по ни́хъ, ва́съ, па́че всѣ́хъ ѩ҆зы҄къ, въ де́нь се́й.

¹⁶И҆ ѡ҆брѣ́жите жестокосе́рдїе ва́ше, и҆ вы́и ва́шеѧ не ѡ҆жесточи́те ктомѹ̀:

¹⁷и҆́бо гд҇ь бг҃ъ ва́шъ се́й бг҃ъ богѡ́въ и҆ гд҇ь господе́й, бг҃ъ вели́кїй и҆ крѣ́пкїй и҆ стра́шный, и҆́же не диви́тсѧ лицѹ̀, нижѐ взе́млетъ да́ра:

¹⁸творѧ́й сѹ́дъ прише́лцѹ и҆ си́рѹ и҆ вдови́цѣ, и҆ лю́битъ прише́лца да́ти є҆мѹ̀ хлѣ́бъ и҆ ри́зѹ.

¹⁹И҆ возлюби́те прише́лца: прише́лцы бо бѣ́сте въ землѝ є҆гѵ́петстѣй.

²⁰Гд҇а бг҃а твоегѡ̀ да ѹ҆бои́шисѧ, и҆ томѹ̀ (*є҆ди́номѹ) послѹ́жиши, и҆ къ немѹ̀ прилѣпи́шисѧ, и҆ и҆́менемъ є҆гѡ̀ клене́шисѧ:

²¹то́й хвала̀ твоѧ̀ и҆ то́й бг҃ъ тво́й, и҆́же сотворѝ тебѣ̀ вели҄каѧ и҆ сла҄внаѧ сїѧ҄, ѩ҆̀же ви́дѣсте ѻ҆́чи твоѝ:

²²въ седми́десѧтихъ и҆ пѧтѝ дѹша́хъ снидо́ша ѻ҆тцы̀ твоѝ во є҆гѵ́петъ: нн҃ѣ же сотвори́ тѧ гд҇ь бг҃ъ тво́й ѩ҆́кѡ ѕвѣ́зды небє́сныѧ мно́жествомъ.