Read Библия Церковнославянская Второзако́нїе 13 Bible Online

Второзако́нїе 13 - Библия Церковнославянская bible

Второзако́нїе 13

¹А҆́ще же воста́нетъ въ тебѣ̀ проро́къ, и҆лѝ ви́дѧй со́нїе, и҆ да́стъ тебѣ̀ зна́менїе и҆лѝ чѹ́до,

²и҆ прїи́детъ зна́менїе и҆лѝ чѹ́до, є҆́же речѐ къ тебѣ̀, глаго́лѧ: и҆́демъ да послѹ́жимъ богѡ́мъ и҆ны҄мъ, и҆́хже не вѣ́сте:

³да не послѹ́шаете глагѡ́лъ проро́ка тогѡ̀, и҆лѝ ви́дѧщагѡ со́нъ то́й: ѩ҆́кѡ и҆скѹша́етъ гд҇ь бг҃ъ тво́й ва́съ, є҆́же ѹ҆вѣ́дѣти, а҆́ще лю́бите гд҇а бг҃а ва́шего всѣ́мъ се́рдцемъ ва́шимъ и҆ все́ю дѹше́ю ва́шею:

⁴в̾слѣ́дъ гд҇а бг҃а ва́шегѡ ходи́те, и҆ тогѡ̀ бо́йтесѧ, и҆ за́пѡвѣди є҆гѡ̀ сохрани́те, и҆ гла́са є҆гѡ̀ послѹ́шайте, и҆ томѹ̀ слѹжи́те, и҆ къ немѹ̀ прилѣпи́тесѧ:

⁵и҆ проро́къ то́й и҆лѝ ви́дѧй со́нъ да ѹ҆́мретъ: глаго́ла бо, є҆́же прельсти́ти тѧ̀ ѿ гд҇а бг҃а твоегѡ̀ и҆зве́дшагѡ тѧ̀ и҆з̾ землѝ є҆гѵ́петскїѧ, и҆зба́вльшагѡ тѧ̀ и҆з̾ рабо́ты, є҆́же соврати́ти тѧ̀ съ пѹтѝ, є҆го́же заповѣ́да тебѣ̀ гд҇ь бг҃ъ тво́й ходи́ти по немѹ̀: и҆ погѹби́те са́ми ѕло́е ѿ ва́съ сами́хъ.

⁶А҆́ще же помо́литъ тѧ̀ бра́тъ тво́й ѿ ѻ҆тца̀ твоегѡ̀ и҆лѝ ѿ ма́тере твоеѧ̀, и҆лѝ сы́нъ тво́й, и҆лѝ дще́рь твоѧ̀, и҆лѝ жена̀ твоѧ̀ ѩ҆́же на ло́нѣ твое́мъ, и҆лѝ дрѹ́гъ тво́й, ра́венъ дѹшѝ твое́й, ѡ҆́тай глаго́лѧ: и҆́демъ и҆ послѹ́жимъ богѡ́мъ и҆ны҄мъ, и҆́хже не ви́дѣлъ є҆сѝ ты̀ и҆ ѻ҆тцы̀ твоѝ,

⁷ѿ богѡ́въ ѩ҆зы́кѡвъ, и҆̀же ѡ҆́крестъ ва́съ, бли́з̾ сѹ́щихъ тебѣ̀, и҆лѝ да́льнихъ ѿ тебє̀, ѿ конца̀ землѝ до конца̀ землѝ,

⁸да не соизво́лиши є҆мѹ̀ и҆ не послѹ́шаеши є҆гѡ̀, и҆ да не пощади́тъ є҆гѡ̀ ѻ҆́ко твоѐ, и҆ не возлю́биши є҆гѡ̀, нижѐ прикры́еши є҆го̀:

⁹возвѣща́ѧ да возвѣсти́ши ѡ҆ не́мъ, и҆ рѹка̀ твоѧ̀ да бѹ́детъ на не́мъ въ пе́рвыхъ ѹ҆би́ти є҆го̀, и҆ рѹ́ки всѣ́хъ люді́й по́слѣжде:

¹⁰и҆ побїю́тъ є҆го̀ ка́менїемъ, и҆ ѹ҆́мретъ, ѩ҆́кѡ взыска́лъ є҆́сть ѿврати́ти тебѐ ѿ гд҇а бг҃а твоегѡ̀, и҆зве́дшагѡ тѧ̀ и҆з̾ землѝ є҆гѵ́петскїѧ, ѿ до́мѹ рабо́ты:

¹¹и҆ ве́сь ї҆и҃ль ѹ҆слы́шавъ ѹ҆бои́тсѧ, и҆ не приложи́тъ ктомѹ̀ сотвори́ти по словесѝ семѹ̀ ѕло́мѹ є҆́же въ ва́съ.

¹²А҆́ще же ѹ҆слы́шиши въ є҆ди́нѣмъ ѿ градѡ́въ твои́хъ, ѩ҆̀же гд҇ь бг҃ъ дае́тъ тебѣ̀, всели́тисѧ та́мѡ, глаго́лющихъ:

¹³и҆зыдо́ша мѹ҄жи беззако́ннїи ѿ ва́съ и҆ ѿврати́ша всѧ҄ живѹ́щыѧ во гра́дѣ и҆́хъ, глаго́люще: и҆́демъ, да послѹ́жимъ богѡ́мъ и҆ны҄мъ, и҆́хже не вѣ́сте,

¹⁴и҆ да взы́щеши и҆ вопроси́ши и҆ ѡ҆бы́щеши ѕѣлѡ̀, и҆ сѐ, и҆́стинно сло́во ѩ҆́вѣ, сотвори́сѧ ме́рзость сїѧ̀ въ ва́съ:

¹⁵ѹ҆бива́ѧ да ѹ҆бїе́ши всѧ҄ живѹ́щыѧ во гра́дѣ ѻ҆́нѣмъ ѹ҆бі́йствомъ меча̀, проклѧ́тїемъ проклени́те є҆го̀, и҆ всѧ҄ ѩ҆̀же въ не́мъ,

¹⁶и҆ всѧ҄ кѡры́сти є҆гѡ̀ собере́ши на распѹ҄тїѧ є҆гѡ̀, и҆ зажже́ши гра́дъ ѻ҆гне́мъ, и҆ всѧ҄ кѡры́сти є҆гѡ̀ всенаро́днѡ пред̾ гд҇емъ бг҃омъ твои́мъ, и҆ бѹ́детъ пѹ́стъ во вѣ́ки, не возгради́тсѧ по се́мъ:

¹⁷и҆ да ничто́же прилѣпи́тсѧ ѿ проклѧ́тїѧ рѹцѣ̀ твое́й, да ѿврати́тсѧ бг҃ъ ѿ ѩ҆́рости гнѣ́ва своегѡ̀: и҆ да́стъ тебѣ̀ мл҇ть и҆ поми́лѹетъ тѧ̀, и҆ ѹ҆мно́житъ тѧ̀, ѩ҆́коже гл҃а тебѣ̀, ѩ҆́коже клѧ́тсѧ гд҇ь ѻ҆тцє́мъ твои҄мъ,

¹⁸а҆́ще послѹ́шаеши гла́са гд҇а бг҃а твоегѡ̀, є҆́же храни́ти всѧ҄ за́пѡвѣди є҆гѡ̀, ѩ҆̀же а҆́зъ заповѣ́даю тебѣ̀ дне́сь, твори́ти до́брое и҆ ѹ҆го́дное пред̾ гд҇емъ бг҃омъ твои́мъ.