Read Библия Церковнославянская Второзако́нїе 14 Bible Online

Второзако́нїе 14 - Библия Церковнославянская bible

Второзако́нїе 14

¹Сы́нове є҆стѐ гд҇а бг҃а ва́шегѡ: да не нарѣ́зѹетесѧ и҆ не возложи́те плѣ́ши междѹ̀ ѻ҆чи́ма ва́шима над̾ ме́ртвымъ:

²ѩ҆́кѡ лю́дїе свѧ́ти є҆стѐ гд҇еви бг҃ѹ ва́шемѹ, и҆ ва́съ и҆збра̀ гд҇ь бг҃ъ ва́шъ бы́ти ва́мъ лю́демъ и҆збра҄ннымъ є҆мѹ̀ ѿ всѣ́хъ ѩ҆зы́кѡвъ и҆̀же на лицы̀ землѝ.

³Да не снѣ́сте всѧ́кїѧ ме́рзости.

⁴Сїѧ҄ скоты̀ ѩ҆ди́те: телца̀ ѿ говѧ́дъ и҆ а҆́гнца ѿ ѻ҆ве́цъ и҆ козла̀ ѿ ко́зъ:

⁵є҆ле́нѧ и҆ се́рнѹ, и҆ бѹ́йвола и҆ ла́нѧ, и҆ зѹ́брѧ и҆ ѻ҆на́гра и҆ сайга́ка.

⁶Всѧ́къ ско́тъ на дво́е дѣлѧ̀ па́знѡкти, и҆ копы́то на дво́е копы́тѧ, и҆ ѿрыга́ѧ жва́нїе въ скотѣ́хъ, да ѩ҆́сте.

⁷И҆ си́хъ да не снѣ́сте ѿ ѿрыга́ющихъ жва́нїе и҆ ѿ дѣлѧ́щихъ па́знѡкти на дво́е, но копы́тъ не раздвоѧ́ющихъ: велблю́да и҆ за́ѧца и҆ хїрогрѵ́ллѧ: ѩ҆́кѡ ѿрыга́ютъ жва́нїе сі́и, но копы́тъ не раздвоѧ́ютъ, нечи҄ста сїѧ҄ ва́мъ сѹ́ть.

⁸И҆ свинїѝ, ѩ҆́кѡ на дво́е дѣли́тъ па́знѡкти и҆ кѡпы́та раздвоѧ́етъ, и҆ сїѧ̀ жва́нїѧ не ѿрыга́етъ, нечиста̀ сїѧ̀ ва́мъ є҆́сть: ѿ мѧ́съ и҆́хъ да не ѩ҆́сте, и҆ мертвечи́намъ и҆́хъ да не прикосне́тесѧ.

⁹И҆ сїѧ҄ да ѩ҆́сте ѿ всѣ́хъ ѩ҆̀же въ водѣ̀: всѧ҄, и҆̀мже сѹ́ть пе́рїе и҆ чешѹѧ̀, ѩ҆ди́те.

¹⁰И҆ всѣ́хъ, и҆̀мже нѣ́сть пе́рїѧ, ни чешѹѝ, да не ѩ҆́сте: нечи҄ста сѹ́ть ва́мъ.

¹¹Всѧ́кѹ пти́цѹ чи́стѹ да ѩ҆́сте.

¹²И҆ си́хъ да не ѩ҆́сте ѿ ни́хъ:

¹³ѻ҆рла̀ и҆ грѵ́фа и҆ ѻ҆рла̀ морска́гѡ,

¹⁴и҆ неѧ́сыти и҆ ї҆кті́на и҆ подо́бныхъ си҄мъ:

¹⁵и҆ вра́на и҆ врабїѧ̀, и҆ вы́пелицы и҆ сѹхола́плѧ, и҆ ѩ҆́стреба и҆ подо́бныхъ си҄мъ:

¹⁶и҆ вра́на нощна́гѡ и҆ лили́ка и҆ подо́бныхъ си҄мъ:

¹⁷и҆ є҆рѡді́а и҆ ле́бедѧ, и҆ ївїна и҆ катара́кта, и҆ вдо́да

¹⁸и҆ нощна́гѡ нетопырѧ̀, и҆ сыча̀ и҆ теслоно́са, и҆ харадрїо́на и҆ подо́бныхъ си҄мъ, и҆ порфѷрїѡ́на.

¹⁹Всѧ҄ га́ды пти҄чїѧ нечи҄ста сѹ́ть ва́мъ: да не ѩ҆́сте ѿ ни́хъ.

²⁰Всѧ́кѹ пти́цѹ чи́стѹ да ѩ҆́сте.

²¹Всѧ́кїѧ мертвечи́ны да не ѩ҆́сте: присе́лникѹ, и҆́же во градѣ́хъ твои́хъ, да да́сте, и҆ да ѩ҆́стъ, и҆лѝ да прода́сте стра́нникѹ: ѩ҆́кѡ лю́дїе свѧ́ти є҆стѐ гд҇еви бг҃ѹ ва́шемѹ. Да не свари́ши ѩ҆гнѧ́те во млецѣ̀ ма́тере є҆гѡ̀.

²²Десѧти҄ны да да́си ѿ всегѡ̀ плода̀ сѣ́мене своегѡ̀, пло́дъ ни́въ твои́хъ ѿ го́да до го́да,

²³и҆ да снѣ́си ѧ҆̀ пред̾ гд҇емъ бг҃омъ твои́мъ на мѣ́стѣ, и҆дѣ́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ: да принесе́ши десѧти́нѹ пшени́цы твоеѧ̀ и҆ вїна̀ твоегѡ̀ и҆ є҆ле́а твоегѡ̀, и҆ пе́рвенцы волѡ́въ твои́хъ и҆ ѻ҆ве́цъ твои́хъ, да наѹчи́шисѧ боѧ́тисѧ гд҇а бг҃а твоегѡ̀ всѧ҄ дни҄.

²⁴А҆́ще же дале́че бѹ́детъ пѹ́ть ѿ тебє̀ и҆ не возмо́жеши донестѝ и҆̀хъ, ѩ҆́кѡ дале́че мѣ́сто ѿ тебє̀, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ, ѩ҆́кѡ да блг҇ви́тъ тѧ̀ гд҇ь бг҃ъ тво́й:

²⁵и҆ прода́си сїѐ на цѣнѣ̀, и҆ во́змеши сребро̀ въ рѹ́кѹ твою̀, и҆ по́йдеши на мѣ́сто, є҆́же и҆збере́тъ гд҇ь бг҃ъ тво́й,

²⁶и҆ да́си сребро̀ за всѐ, на не́же пожела́етъ дѹша̀ твоѧ̀, на волы̀ и҆ ѻ҆́вцы, и҆лѝ на вїно̀, и҆лѝ на сїке́рѹ, и҆лѝ на всѐ, є҆гѡ́же жела́етъ дѹша̀ твоѧ̀, и҆ да снѣ́си та́мѡ пред̾ гд҇емъ бг҃омъ твои́мъ, и҆ возвесели́шисѧ ты̀ и҆ до́мъ тво́й.

²⁷И҆ леѵі́тъ и҆́же во градѣ́хъ твои́хъ, не ѡ҆ста́виши є҆гѡ̀, ѩ҆́кѡ нѣ́сть є҆мѹ̀ ча́сти ни жре́бїѧ съ тобо́ю:

²⁸по тре́хъ лѣ́тѣхъ да и҆знесе́ши всю̀ десѧти́нѹ жи҄тъ твои́хъ въ лѣ́то ѻ҆́но, да положи́ши ю҆̀ во градѣ́хъ твои́хъ:

²⁹и҆ прїи́детъ леѵі́тъ, ѩ҆́кѡ нѣ́сть є҆мѹ̀ ча́сти ни жре́бїѧ съ тобо́ю, и҆ пришле́цъ, и҆ сирота̀ и҆ вдова̀, ѩ҆̀же во градѣ́хъ твои́хъ, да ѩ҆дѧ́тъ и҆ насы́тѧтсѧ: да блг҇ви́тъ тѧ̀ гд҇ь бг҃ъ тво́й во всѣ́хъ дѣ́лѣхъ твои́хъ, ѩ҆̀же а҆́ще сотвори́ши.