Read Библия Церковнославянская Второзако́нїе 15 Bible Online

Второзако́нїе 15 - Библия Церковнославянская bible

Второзако́нїе 15

¹Въ седмо́е лѣ́то да сотвори́ши ѿпѹще́нїе.

²И҆ си́це за́повѣдь ѿпѹще́нїѧ: да ѡ҆ста́виши ве́сь до́лгъ тво́й, и҆́мже до́лженъ бли́жнїй тебѣ̀, и҆ ѿ бра́та своегѡ̀ не и҆стѧ́жеши, ѩ҆́кѡ нарече́сѧ ѿпѹще́нїе гд҇ѹ бг҃ѹ твоемѹ̀.

³Ѿ чѹжда́гѡ да и҆стѧ́жеши, є҆ли҄ка сѹ́ть твоѧ҄ ѹ҆ негѡ̀: бра́тѹ же твоемѹ̀ ѿпѹще́нїе да сотвори́ши до́лга твоегѡ̀.

⁴ѩ҆́кѡ не бѹ́детъ ѹ҆ тебє̀ недоста́точенъ: сегѡ̀ ра́ди словесѐ блг҇ве́нїемъ блг҇ви́тъ тѧ̀ гд҇ь бг҃ъ тво́й въ землѝ, ю҆́же тебѣ̀ гд҇ь бг҃ъ дае́тъ во жре́бїй прїѧ́ти ю҆̀.

⁵А҆́ще же слѹ́хомъ послѹ́шаете гла́са гд҇а бг҃а ва́шегѡ храни́ти и҆ твори́ти всѧ҄ за́пѡвѣди сїѧ҄, ѩ҆̀же а҆́зъ заповѣ́даю тебѣ̀ дне́сь, ѩ҆́кѡ гд҇ь бг҃ъ тво́й блг҇ви́лъ тѧ̀ є҆́сть, ѩ҆́коже гл҃а тебѣ̀,

⁶и҆ взаи́мъ да́си ѩ҆зы́кѡмъ мнѡ́гимъ, ты́ же не за́ймеши, и҆ ѡ҆блада́ти бѹ́деши ты̀ ѩ҆зы҄ки мно́гими, тобо́ю же не воз̾ѡблада́ютъ.

⁷А҆́ще же бра́тъ ѿ бра́тїи твоеѧ̀ бѹ́детъ тебѣ̀ недоста́точенъ во є҆ди́нѣмъ ѿ градѡ́въ твои́хъ въ землѝ, ю҆́же гд҇ь бг҃ъ тво́й дае́тъ тебѣ̀, да не ѿврати́ши се́рдца твоегѡ̀, нижѐ сожме́ши рѹкѝ твоеѧ̀ пред̾ бра́томъ твои́мъ тре́бѹющимъ:

⁸ѿверза́ѧ да ѿве́рзеши рѹ́кѹ твою̀ є҆мѹ̀, и҆ взаи́мъ да да́си є҆мѹ̀, є҆ли́кѡ про́ситъ, и҆ є҆ли́кѡ є҆мѹ̀ не доста́нетъ.

⁹Внемлѝ себѣ̀: да не бѹ́детъ сло́во та́йно въ се́рдцы твое́мъ беззако́нїѧ, глаго́лѧ: бли́з̾ є҆́сть седмо́е лѣ́то, лѣ́то ѿпѹще́нїѧ, и҆ возлѹка́внѹетъ ѻ҆́ко твоѐ бра́тѹ твоемѹ̀ тре́бѹющемѹ, и҆ не да́си є҆мѹ̀, и҆ возопїе́тъ на тѧ̀ ко гд҇ѹ, и҆ бѹ́детъ тебѣ̀ грѣ́хъ вели́къ:

¹⁰даѧ́нїемъ да да́си є҆мѹ̀, и҆ взаи́мъ да да́си є҆мѹ̀, є҆ли́кѡ воспро́ситъ, ѩ҆́коже тре́бѹетъ: и҆ не ѡ҆печа́лисѧ въ се́рдцы свое́мъ, даю́щѹ тѝ є҆мѹ̀, ѩ҆́кѡ сегѡ̀ ра́ди сло́ва блг҇ви́тъ тѧ̀ гд҇ь бг҃ъ тво́й во всѣ́хъ дѣ́лѣхъ твои́хъ, и҆ во все́мъ, на не́же возложи́ши рѹ́кѹ твою̀:

¹¹и҆́бо не ѡ҆скѹдѣ́етъ недоста́точный ѿ землѝ твоеѧ̀, сегѡ̀ ра́ди а҆́зъ заповѣ́даю тебѣ̀ твори́ти сло́во сїѐ, глаго́лѧ: ѿверза́ѧ ѿве́рзи рѹ́цѣ твоѝ бра́тѹ твоемѹ̀ ни́щемѹ и҆ просѧ́щемѹ на землѝ твое́й.

¹²А҆́ще же прода́стсѧ тебѣ̀ бра́тъ тво́й є҆вре́анинъ, и҆лѝ є҆вре́анынѧ, да порабо́таетъ тебѣ̀ ше́сть лѣ́тъ, и҆ въ седмо́е да ѿпѹ́стиши є҆го̀ свобо́дна ѿ себє̀:

¹³є҆гда́ же пѹ́стиши є҆го̀ свобо́дна ѿ себє̀, да не ѿпѹ́стиши є҆го̀ тща̀:

¹⁴напѹ́тное є҆мѹ̀ да ѹ҆гото́виши ѿ ѻ҆ве́цъ твои́хъ и҆ ѿ пшени́цы твоеѧ̀ и҆ ѿ вїна̀ твоегѡ̀: ѩ҆́коже блг҇ви́ тѧ гд҇ь бг҃ъ тво́й, да да́си є҆мѹ̀,

¹⁵и҆ помѧнѝ, ѩ҆́кѡ ра́бъ и҆ ты̀ бы́лъ є҆сѝ въ землѝ є҆гѵ́петстѣй, и҆ свободи́ тѧ гд҇ь бг҃ъ тво́й ѿтѹ́дѹ: сегѡ̀ ра́ди а҆́зъ заповѣ́даю тебѣ̀ твори́ти сло́во сїѐ.

¹⁶А҆́ще же рече́тъ къ тебѣ̀: не ѿидѹ̀ ѿ тебє̀, ѩ҆́кѡ возлюби́хъ тѧ̀ и҆ до́мъ тво́й, ѩ҆́кѡ добро̀ є҆мѹ̀ є҆́сть ѹ҆ тебє̀:

¹⁷да во́змеши ши́ло, и҆ проверти́ши є҆мѹ̀ ѹ҆́хо пред̾ две́рьми ѹ҆ степе́ни, и҆ бѹ́детъ тѝ ра́бъ во вѣ́ки: и҆ рабѣ̀ твое́й сотвори́ши та́кожде.

¹⁸Да не бѹ́детъ же́стоко пред̾ тобо́ю, ѿпѹща́ємымъ и҆̀мъ ѿ тебє̀ свобѡ́днымъ, поне́же годовѹ́ю мздѹ̀ нае́мничѹ рабо́та тебѣ̀ ше́сть лѣ́тъ: и҆ блг҇ви́тъ тѧ̀ гд҇ь бг҃ъ тво́й во все́мъ, є҆́же твори́ши.

¹⁹Всѧ́ко перворо́дное, є҆́же роди́тсѧ ѿ волѡ́въ твои́хъ и҆ ѿ ѻ҆ве́цъ твои́хъ, мѹ́жескъ по́лъ да ѡ҆свѧти́ши гд҇еви бг҃ѹ твоемѹ̀: да не дѣ́лаеши перворо́днымъ телце́мъ твои́мъ и҆ да не стриже́ши пе́рвенца во ѻ҆вца́хъ твои́хъ.

²⁰Пред̾ гд҇емъ бг҃омъ твои́мъ да ѩ҆́си ѧ҆̀ ѿ лѣ́та до лѣ́та, на мѣ́стѣ, и҆дѣ́же и҆збере́тъ гд҇ь бг҃ъ тво́й, ты̀ и҆ до́мъ тво́й.

²¹А҆́ще же бѹ́детъ на не́мъ поро́къ, хромо́та, и҆лѝ слѣпота̀, и҆ всѧ́кїй поро́къ ѕо́лъ, да не пожре́ши є҆гѡ̀ гд҇ѹ бг҃ѹ твоемѹ̀.

²²Во градѣ́хъ твои́хъ да снѣ́си ѧ҆̀: нечи́стый и҆ чи́стый ѹ҆ тебє̀ та́кожде да ѩ҆́стъ, ѩ҆́кѡ се́рнѹ и҆лѝ є҆ле́нѧ.

²³То́кмѡ кро́ве да не снѣ́сте: на зе́млю пролива́й ю҆̀ а҆́ки во́дѹ.