Read Библия Церковнославянская Второзако́нїе 16 Bible Online

Второзако́нїе 16 - Библия Церковнославянская bible

Второзако́нїе 16

¹Хранѝ мц҇ъ но́выхъ (плодѡ́въ), и҆ да сотвори́ши па́схѹ гд҇еви бг҃ѹ твоемѹ̀, ѩ҆́кѡ въ мц҇ѣ но́выхъ и҆зше́лъ є҆сѝ и҆з̾ є҆гѵ́пта но́щїю.

²И҆ да пожре́ши па́схѹ гд҇еви бг҃ѹ твоемѹ̀, ѻ҆́вцы и҆ гѡвѧ́да на мѣ́стѣ, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ.

³Да не снѣ́си въ ню̀ ква́снагѡ: се́дмь дні́й да ѩ҆́си въ ню̀ ѡ҆прѣсно́ки, хлѣ́бъ ѡ҆ѕлобле́нїѧ, ѩ҆́кѡ со тща́нїемъ и҆зыдо́сте и҆з̾ є҆гѵ́пта, да помина́ете де́нь и҆схо́да ва́шегѡ ѿ землѝ є҆гѵ́петскїѧ всѧ҄ дни҄ житїѧ̀ ва́шегѡ:

⁴да не ѩ҆ви́тсѧ тебѣ̀ ква́сно во всѣ́хъ предѣ́лѣхъ твои́хъ се́дмь дні́й, и҆ да не преноществѹ́етъ ѿ мѧ́съ, ѩ҆̀же пожре́ши въ ве́черъ въ пе́рвый де́нь, до ѹ҆́трїѧ.

⁵Не возмо́жеши жре́ти па́схи ни въ є҆ди́нѣмъ ѿ градѡ́въ твои́хъ, ѩ҆̀же гд҇ь бг҃ъ тво́й дае́тъ тебѣ̀:

⁶но то́кмѡ на мѣ́стѣ, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ тѹ̀, та́мѡ пожре́ши па́схѹ въ ве́черъ при захожде́нїи со́лнца, во вре́мѧ въ не́же и҆зше́лъ є҆сѝ и҆з̾ землѝ є҆гѵ́петскїѧ:

⁷и҆ свари́ши, и҆ и҆спече́ши, и҆ снѣ́си на мѣ́стѣ, и҆дѣ́же и҆збере́тъ гд҇ь бг҃ъ тво́й: и҆ возврати́шисѧ заѹ́тра, и҆ по́йдеши въ до́мъ тво́й.

⁸Ше́сть дні́й да ѩ҆́си ѡ҆прѣсно́ки, въ седмы́й же де́нь и҆схо́дный пра́здникъ гд҇еви бг҃ѹ твоемѹ̀: да не сотвори́ши въ не́мъ всѧ́кагѡ дѣ́ла, кромѣ̀ ѩ҆̀же сѹ́ть дѹшѝ.

⁹Се́дмь седми́цъ всецѣ́лыхъ да сочте́ши себѣ̀: въ нача́ло же твоегѡ̀ серпа̀ на жа́твѹ начнѝ и҆счислѧ́ти се́дмь седми́цъ,

¹⁰и҆ да сотвори́ши пра́здникъ седми́цъ гд҇еви бг҃ѹ твоемѹ̀, ѩ҆́коже рѹка̀ твоѧ̀ мо́жетъ, є҆ли҄ка да́стъ тебѣ̀, ѩ҆́коже блг҇ви́ тѧ гд҇ь бг҃ъ тво́й.

¹¹И҆ возвесели́шисѧ пред̾ гд҇емъ бг҃омъ твои́мъ ты̀ и҆ сы́нъ тво́й и҆ дще́рь твоѧ̀, и҆ ра́бъ тво́й и҆ раба̀ твоѧ̀, и҆ леѵі́тъ и҆́же во градѣ́хъ твои́хъ, и҆ пришле́цъ, и҆ сирота̀ и҆ вдова̀, ѩ҆̀же въ ва́съ, на мѣ́стѣ, и҆дѣ́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ:

¹²и҆ помѧне́ши, ѩ҆́кѡ ра́бъ бы́лъ є҆сѝ (ты̀) въ землѝ є҆гѵ́петстѣй, и҆ сохрани́ши и҆ сотвори́ши за́пѡвѣди сїѧ҄.

¹³Пра́здникъ кѹ́щей да сотвори́ши себѣ̀ се́дмь дні́й, є҆гда̀ собере́ши ѿ ни́вы твоеѧ̀ и҆ ѿ точи́ла твоегѡ̀:

¹⁴и҆ да возвесели́шисѧ въ пра́здницѣ твое́мъ ты̀ и҆ сы́нъ тво́й и҆ дщѝ твоѧ̀, ра́бъ тво́й и҆ раба̀ твоѧ̀, и҆ леѵі́тъ и҆ пришле́цъ, и҆ сирота̀ и҆ вдова̀, ѩ҆̀же во градѣ́хъ твои́хъ:

¹⁵се́дмь дні́й да пра́зднѹеши гд҇еви бг҃ѹ твоемѹ̀ на мѣ́стѣ, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ: а҆́ще же блг҇ви́тъ тѧ̀ гд҇ь бг҃ъ тво́й во всѣ́хъ плодѣ́хъ твои́хъ и҆ во всѧ́комъ дѣ́лѣ рѹ́къ твои́хъ, и҆ бѹ́деши веселѧ́сѧ.

¹⁶Въ трѝ времена̀ лѣ́та да ѩ҆ви́тсѧ всѧ́къ мѹ́жескъ по́лъ пред̾ гд҇емъ бг҃омъ твои́мъ, на мѣ́стѣ, є҆́же и҆збере́тъ гд҇ь бг҃ъ тво́й: въ пра́здникъ ѡ҆прѣсно́кѡвъ, и҆ въ пра́здникъ седми́цъ, и҆ въ пра́здникъ кѹ́щей: да не ѩ҆ви́шисѧ пред̾ гд҇емъ бг҃омъ твои́мъ то́щь:

¹⁷кі́йждо по си́лѣ рѹ́къ свои́хъ, по блг҇ве́нїю гд҇а бг҃а твоегѡ̀, є҆́же дадѐ тебѣ̀.

¹⁸Сѹдїи҄ и҆ книгѡ́чїи поста́виши себѣ̀ во всѣ́хъ градѣ́хъ твои́хъ, ѩ҆̀же гд҇ь бг҃ъ тво́й дае́тъ тебѣ̀ по племена́мъ, и҆ да сѹ́дѧтъ лю́демъ сѹ́дъ пра́ведный:

¹⁹да не ѹ҆клонѧ́тъ сѹда̀, нижѐ позна́ютъ лицѐ, нижѐ да во́змѹтъ дарѡ́въ: да́ры бо ѡ҆слѣплѧ́ютъ ѻ҆́чи мѹ́дрыхъ и҆ ѿме́щѹтъ словеса̀ пра́ведныхъ.

²⁰Пра́веднѣ пра́ведное гони́те, да поживетѐ, и҆ вше́дше наслѣ́дите зе́млю, ю҆́же гд҇ь бг҃ъ тво́й дае́тъ ва́мъ.

²¹Да не насади́ши себѣ̀ дѹбра́вы: всѧ́кагѡ дре́ва бли́з̾ ѻ҆лтарѧ̀ гд҇а бг҃а твоегѡ̀ да не сотвори́ши себѣ̀,

²²да не поста́виши себѣ̀ ка́пища, є҆́же возненави́дѣ гд҇ь бг҃ъ тво́й.