Read Библия Церковнославянская Второзако́нїе 17 Bible Online

Второзако́нїе 17 - Библия Церковнославянская bible

Второзако́нїе 17

¹Да не пожре́ши гд҇еви бг҃ѹ твоемѹ̀ телца̀ и҆лѝ ѻ҆вча́те, на не́мже є҆́сть поро́къ, всѧ́къ глаго́лъ ѕо́лъ: ѩ҆́кѡ ме́рзость гд҇еви бг҃ѹ твоемѹ̀ є҆́сть.

²А҆́ще же ѡ҆брѧ́щетсѧ ѹ҆ тебє̀ во є҆ди́нѣмъ ѿ градѡ́въ твои́хъ, ѩ҆̀же гд҇ь бг҃ъ тво́й дае́тъ тебѣ̀, мѹ́жъ и҆лѝ жена̀, и҆́же сотвори́тъ лѹка́вое пред̾ гд҇емъ бг҃омъ твои́мъ, престѹпи́ти завѣ́тъ є҆гѡ̀:

³и҆ ше́дше послѹ́жатъ богѡ́мъ и҆ны҄мъ и҆ покло́нѧтсѧ и҆̀мъ, со́лнцѹ, и҆лѝ лѹнѣ̀, и҆лѝ всѧ́комѹ ѩ҆̀же ѿ красоты̀ небе́сныѧ, и҆́хже не повелѣ́хъ тебѣ̀:

⁴и҆ возвѣсти́тсѧ тебѣ̀, и҆ взы́щеши ѕѣлѡ̀, и҆ сѐ, и҆́стинно бы́сть сло́во, ме́рзость сотвори́сѧ сїѧ̀ во ї҆и҃ли:

⁵да и҆зведе́ши человѣ́ка того̀, и҆лѝ женѹ̀ тѹ̀, и҆̀же сотвори́ша дѣ́ло ѕло́е сїѐ, пред̾ двє́ри, и҆ побїе́те и҆̀хъ ка́менїемъ, и҆ да ѹ҆́мрѹтъ.

⁶При двою̀ свидѣ́телехъ и҆лѝ при тре́хъ да ѹ҆́мретъ: ѹ҆мира́ѧй да не ѹ҆́мретъ при є҆ди́нѣмъ свидѣ́тели:

⁷и҆ рѹка̀ свидѣ́телей да бѹ́детъ на не́мъ въ пе́рвыхъ, ѹ҆мертви́ти є҆го̀, и҆ рѹка̀ всѣ́хъ люді́й по́слѣжде: и҆ и҆зми́те ѕло́е ѿ ва́съ самѣ́хъ.

⁸А҆́ще же неѹдоборѣши́мо сло́во ѹ҆ тебє̀ въ сѹдѣ̀ междѹ̀ кро́вїю и҆ кро́вїю, и҆ междѹ̀ сѹдо́мъ и҆ сѹдо́мъ, и҆ междѹ̀ ѩ҆́звою и҆ ѩ҆́звою, и҆ междѹ̀ прѣ́нїемъ и҆ прѣ́нїемъ, словеса̀ сѹ҄днаѧ въ градѣ́хъ твои́хъ, и҆ воста́въ взы́деши на мѣ́сто, є҆́же и҆збере́тъ гд҇ь бг҃ъ тво́й призва́ти и҆́мѧ є҆гѡ̀ та́мѡ:

⁹и҆ прїи́деши къ жерцє́мъ леѵі́тѡмъ, и҆ къ сѹдїѝ, и҆́же бѹ́детъ въ ты҄ѧ дни҄, и҆ взыска́вше возвѣстѧ́тъ тебѣ̀ сѹ́дъ:

¹⁰и҆ сотвори́ши по словесѝ, є҆́же возвѣстѧ́тъ тебѣ̀ ѿ мѣ́ста, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ, и҆ да сохрани́ши ѕѣлѡ̀ твори́ти всѧ҄, є҆ли҄ка законоположа́тсѧ тебѣ̀:

¹¹по зако́нѹ и҆ по сѹдѹ̀, є҆го́же рекѹ́тъ тебѣ̀, сотвори́ши, да не ѹ҆клони́шисѧ ѿ словесѐ, є҆́же и҆звѣстѧ́тъ тебѣ̀, ни на де́сно, ни на лѣ́во.

¹²И҆ человѣ́къ, и҆́же сотвори́тъ въ го́рдости, є҆́же не послѹ́шати жерца̀ предстоѧ́щагѡ слѹжи́ти во и҆́мѧ гд҇а бг҃а твоегѡ̀, и҆лѝ сѹдїѝ, и҆́же въ ты҄ѧ дни҄ бѹ́детъ, да ѹ҆́мретъ человѣ́къ то́й, и҆ да и҆́змеши ѕло́е ѿ ї҆и҃лѧ:

¹³и҆ всѝ лю́дїе ѹ҆слы́шавше ѹ҆боѧ́тсѧ, и҆ не бѹ́дѹтъ нече́ствовати ктомѹ̀.

¹⁴А҆́ще же вни́деши въ зе́млю, ю҆́же гд҇ь бг҃ъ тво́й дае́тъ тебѣ̀ въ жре́бїй, и҆ прїи́меши ю҆̀, и҆ всели́шисѧ на не́й, и҆ рече́ши: поста́влю кнѧ́зѧ над̾ собо́ю, ѩ҆́коже и҆ про́чїи ѩ҆зы́цы, и҆̀же ѡ҆́крестъ менє̀:

¹⁵поставлѧ́ѧ да поста́виши над̾ собо́ю кнѧ́зѧ, є҆го́же и҆збере́тъ гд҇ь бг҃ъ тво́й, ѿ бра́тїи твоеѧ̀ да поста́виши над̾ собо́ю кнѧ́зѧ, не возмо́жеши поста́вити над̾ собо́ю кнѧ́зѧ человѣ́ка чѹжда́го, ѩ҆́кѡ не бра́тъ тво́й є҆́сть.

¹⁶Ѻ҆ба́че да не ѹ҆мно́житъ себѣ̀ ко́ней, нижѐ да возврати́тъ люді́й во є҆гѵ́петъ, ѩ҆́кѡ да не ѹ҆мно́житъ себѣ̀ ко́ней: гд҇ь же речѐ ва́мъ: не приложи́те возврати́тисѧ пѹте́мъ си́мъ ктомѹ̀:

¹⁷и҆ да не ѹ҆мно́житъ себѣ̀ же́нъ, да не преврати́тсѧ се́рдце є҆гѡ̀: и҆ сребра̀ и҆ зла́та да не ѹ҆мно́житъ себѣ̀ ѕѣлѡ̀.

¹⁸И҆ бѹ́детъ є҆гда̀ сѧ́детъ на престо́лѣ вла́сти своеѧ̀, да напи́шетъ себѣ̀ второзако́нїе сїѐ въ кни́зѣ ѿ жерцє́въ леѵі́тѡвъ,

¹⁹и҆ бѹ́детъ съ ни́мъ, и҆ да чте́тъ ю҆̀ во всѧ҄ дни҄ житїѧ̀ своегѡ̀, да наѹчи́тсѧ боѧ́тисѧ гд҇а бг҃а своегѡ̀ и҆ храни́ти всѧ҄ за́пѡвѣди сїѧ҄ и҆ ѡ҆правда҄нїѧ сїѧ҄, твори́ти ѧ҆̀:

²⁰да не возвы́ситсѧ се́рдце є҆гѡ̀ ѿ бра́тїи є҆гѡ̀, да не престѹ́питъ ѿ за́повѣдїй ни на де́сно, ни на лѣ́во, ѩ҆́кѡ да бѹ́детъ мнѡ́га лѣ҄та во вла́сти свое́й, то́й и҆ сы́ны є҆гѡ̀ съ ни́мъ, въ сынѣ́хъ ї҆и҃левыхъ.