Read Библия Церковнославянская Второзако́нїе 2 Bible Online

Второзако́нїе 2 - Библия Церковнославянская bible

Второзако́нїе 2

¹И҆ возврати́вшесѧ воздвиго́хомсѧ въ пѹсты́ню, пѹте́мъ мо́рѧ чермна́гѡ, ѩ҆́коже гл҃а гд҇ь ко мнѣ̀: и҆ ѡ҆бходи́хомъ го́рѹ сиі́ръ дни҄ мнѡ́ги.

²И҆ речѐ гд҇ь ко мнѣ̀:

³довлѣ́етъ ва́мъ ѡ҆бхожда́ти го́рѹ сїю̀: возврати́тесѧ ѹ҆̀бо къ сѣ́верѹ:

⁴и҆ лю́демъ заповѣ́ждь, глаго́лѧ: вы̀ пройди́те сквозѣ̀ предѣ́лы бра́тїи ва́шеѧ, сынѡ́въ и҆са́ѵовыхъ, живѹ́щихъ въ сиі́рѣ, и҆ ѹ҆боѧ́тсѧ ва́съ и҆ ѹ҆жа́снѹтсѧ ѕѣлѡ̀:

⁵не сотвори́те съ ни́ми ра́ти: не да́хъ бо ва́мъ ѿ землѝ и҆́хъ нижѐ стопы̀ ногѝ, ѩ҆́кѡ во жре́бїй да́хъ сынѡ́мъ и҆са́ѵѡвымъ го́рѹ сиі́ръ:

⁶сребро́мъ пи́щѹ кѹпи́те себѣ̀ ѹ҆ ни́хъ и҆ ѩ҆ди́те, и҆ во́дѹ въ мѣ́рѹ возми́те ѿ ни́хъ на цѣнѣ̀ и҆ пі́йте:

⁷и҆́бо гд҇ь бг҃ъ тво́й блг҇вѝ тебѐ во всѧ́комъ дѣ́лѣ рѹкѹ̀ твоє́ю: разѹмѣ́й, ка́кѡ проше́лъ є҆сѝ пѹсты́ню вели́кѹю и҆ стра́шнѹю сїю̀: сѐ, четы́редесѧть лѣ́тъ гд҇ь бг҃ъ тво́й съ тобо́ю, и҆ не востре́бовалъ є҆сѝ словесѐ.

⁸И҆ минѹ́хомъ бра́тїю свою̀ сы́ны и҆са҄ѵли, живѹ́щыѧ въ сиі́рѣ, ѹ҆ пѹтѝ а҆ра́вскагѡ ѿ є҆лѡ́на и҆ ѿ гесїѡ́нъ-гаве́ра, и҆ возврати́вшесѧ преидо́хомъ пѹ́ть въ пѹсты́ню мѡа́влю.

⁹И҆ речѐ гд҇ь ко мнѣ̀: не совраждѹ́йтесѧ мѡаві́тѡмъ и҆ не сотвори́те съ ни́ми ра́ти: не да́хъ бо ва́мъ ѿ землѝ и҆́хъ во жре́бїй, сынѡ́мъ бо лѡ́тѡвымъ да́хъ а҆рои́ръ наслѣ́дити.

¹⁰Ѻ҆ммі́ны пре́жде сѣдѧ́хѹ на не́й, наро́дъ вели́къ и҆ мно́гъ и҆ крѣ́покъ ѩ҆́коже є҆накі́ми:

¹¹рафаі́ны глаго́лютсѧ и҆ сі́и, ѩ҆́коже и҆ є҆накі́ми: и҆ мѡаві́ти прозыва́ютъ ѧ҆̀ ѻ҆ммі́ны.

¹²И҆ въ сиі́рѣ сѣдѧ́ше хорре́й пре́жде, но сы́нове и҆са́ѵѡвы потреби́ша ѧ҆̀ и҆ и҆скорени́ша ѧ҆̀ ѿ лица̀ своегѡ̀: и҆ всели́шасѧ вмѣ́стѡ и҆́хъ, и҆́мже ѡ҆́бразомъ сотворѝ ї҆и҃ль землѝ наслѣ́дїѧ своегѡ̀, ю҆́же дадѐ гд҇ь и҆̀мъ.

¹³Нн҃ѣ ѹ҆̀бо вы̀ воста́ните и҆ воздви́гнитесѧ, и҆ пройди́те де́брь заре́товѹ.

¹⁴И҆ дни҄, въ нѧ́же ѿидо́хомъ ѿ ка́дисъ-варнѝ до́ндеже преидо́хомъ де́брь заре́товѹ, три́десѧть и҆ ѻ҆́смь лѣ́тъ, до́ндеже падѐ ве́сь ро́дъ мѹже́й вои́нскихъ ѿ полка̀, ѩ҆́коже клѧ́тсѧ и҆̀мъ гд҇ь бг҃ъ.

¹⁵И҆ рѹка̀ бж҃їѧ бѧ́ше на ни́хъ, погѹби́ти ѧ҆̀ ѿ полка̀, до́ндеже падо́ша.

¹⁶И҆ бы́сть внегда̀ падо́ша всѝ мѹ҄жи во́инстїи ѹ҆мира́юще ѿ среды̀ люді́й,

¹⁷и҆ речѐ гд҇ь ко мнѣ̀, гл҃ѧ:

¹⁸ты̀ пре́йдеши дне́сь предѣ҄лы мѡа́влими а҆рои́ръ:

¹⁹и҆ прише́дше бли́з̾ сынѡ́въ а҆мма́нихъ, не совраждѹ́йтесѧ и҆̀мъ и҆ не сотвори́те съ ни́ми ра́ти: не да́мъ бо тебѣ̀ ѿ землѝ сынѡ́въ а҆мма́нихъ во жре́бїй, ѩ҆́кѡ сынѡ́мъ лѡ́тѡвымъ да́хъ ю҆̀ во жре́бїй.

²⁰Землѧ̀ рафаі́нска воз̾именѹ́ютсѧ: рафаі́ни бо на не́й пре́жде живѧ́хѹ: а҆ммані́тѧне же прозыва́ютъ и҆̀хъ зоммі́нъ:

²¹ѩ҆зы́къ вели́къ и҆ мно́гъ и҆ крѣ́покъ, ѩ҆́коже и҆ є҆накі́ми: и҆ погѹбѝ ѧ҆̀ гд҇ь ѿ лица̀ и҆́хъ, и҆ прїѧ́ша наслѣ́дїе и҆ всели́шасѧ вмѣ́стѡ и҆́хъ да́же до сегѡ̀ днѐ:

²²ѩ҆́коже сотвори́ша сынѡ́мъ и҆са́ѵѡвымъ живѹ́щымъ въ сиі́рѣ, и҆́мже ѡ҆́бразомъ потреби́ша хорре́а ѿ лица̀ своегѡ̀ и҆ наслѣ́диша и҆̀хъ, и҆ всели́шасѧ вмѣ́стѡ и҆́хъ да́же до сегѡ̀ днѐ:

²³и҆ є҆ѵе́є живѹ́щїи во а҆сирѡ́ѳѣ да́же до га́зы, и҆ каппадо́ки и҆зше́дшїи и҆з̾ каппадокі́и потреби́ша ѧ҆̀, и҆ всели́шасѧ вмѣ́стѡ и҆́хъ.

²⁴Нн҃ѣ ѹ҆̀бо воста́ните и҆ воздви́гнитесѧ, и҆ прейди́те вы̀ де́брь а҆рнѡ́ню: сѐ, преда́хъ въ рѹ́цѣ твоѝ сиѡ́на царѧ̀ є҆севѡ́нѧ а҆морре́йска и҆ зе́млю є҆гѡ̀: начнѝ наслѣ́довати, сотворѝ съ ни́мъ ра́ть дне́шнїй де́нь:

²⁵начина́й даѧ́ти тре́петъ тво́й и҆ стра́хъ тво́й пред̾ лице́мъ всѣ́хъ ѩ҆зы́кѡвъ сѹ́щихъ под̾ небесе́мъ, и҆̀же слы́шавше и҆́мѧ твоѐ возмѧтѹ́тсѧ, и҆ болѣ́знь прїи́мѹтъ ѿ лица̀ твоегѡ̀.

²⁶И҆ посла́хъ послы̀ ѿ пѹсты́ни кедамѡ́ѳъ къ сиѡ́нѹ царю̀ є҆севѡ́ню словесы̀ ми́рными, глаго́лѧ:

²⁷да пройдѹ̀ сквозѣ̀ зе́млю твою̀: по пѹтѝ пройдѹ̀, не совращѹ́сѧ ни на де́сно, ни на лѣ́во:

²⁸пи́щѹ на цѣнѣ̀ да́си мѝ, и҆ ѩ҆́мъ: и҆ во́дѹ на цѣнѣ̀ да́си мѝ, и҆ пїю̀: то́чїю нога́ма мои́ма да прейдѹ̀:

²⁹ѩ҆́коже сотвори́ша мѝ сы́нове и҆са҄ѵли живѹ́щїи въ сиі́рѣ и҆ мѡаві́ти живѹ́щїи во а҆рои́рѣ, до́ндеже прейдѹ̀ ї҆ѻрда́нъ на зе́млю, ю҆́же гд҇ь бг҃ъ на́шъ дае́тъ на́мъ.

³⁰И҆ не восхотѣ̀ сиѡ́нъ ца́рь є҆севѡ́нь, да про́йдемъ сквозѣ̀ є҆го̀, ѩ҆́кѡ ѡ҆жесточѝ гд҇ь бг҃ъ на́шъ дѹ́хъ є҆гѡ̀ и҆ ѹ҆крѣпѝ се́рдце є҆гѡ̀, да преда́стсѧ въ рѹ́цѣ твоѝ ѩ҆́коже во дне́шнїй де́нь.

³¹И҆ речѐ гд҇ь ко мнѣ̀: сѐ, нача́хъ предаѧ́ти пред̾ лице́мъ твои́мъ сиѡ́на царѧ̀ є҆севѡ́нѧ а҆морре́йска и҆ зе́млю є҆гѡ̀, и҆ начина́й наслѣ́дити зе́млю є҆гѡ̀.

³²И҆ и҆зы́де сиѡ́нъ ца́рь є҆севѡ́нь проти́вѹ на́мъ са́мъ и҆ всѝ лю́дїе є҆гѡ̀ на бра́нь во ї҆а́ссѹ:

³³и҆ предадѐ є҆го̀ гд҇ь бг҃ъ на́шъ пред̾ лице́мъ на́шимъ въ рѹ́цѣ на́ши: и҆ ѹ҆би́хомъ є҆го̀, и҆ сы́ны є҆гѡ̀ и҆ всѧ҄ лю́ди є҆гѡ̀:

³⁴и҆ ѡ҆держа́хомъ всѧ҄ гра́ды є҆гѡ̀ во ѻ҆́но вре́мѧ, и҆ разори́хомъ всѧ́къ гра́дъ, ктомѹ̀ и҆ жєны̀ и҆́хъ и҆ дѣ́ти и҆́хъ не ѡ҆ста́вихомъ жи҄вы:

³⁵то́кмѡ ско́тъ плѣни́хомъ себѣ̀, и҆ кѡры́сти градѡ́въ взѧ́хомъ.

³⁶И҆з̾ а҆рои́ра, и҆́же є҆́сть при ѹ҆́стїи водоте́чи а҆рнѡ́ни, и҆ гра́дъ и҆́же є҆́сть въ де́бри, и҆ да́же до горы̀ галаа́довы, не бы́сть гра́дъ ѹ҆цѣлѣ́вый ѿ на́съ: всѧ҄ предадѐ гд҇ь бг҃ъ на́шъ въ рѹ́цѣ на́ши:

³⁷то́кмѡ въ землѝ сынѡ́въ а҆мма́нихъ не пристѹпа́хомъ ко всѣ҄мъ прилежа́щымъ къ водоте́чи ї҆аво́ковѣ и҆ ко градѡ́мъ и҆̀же въ гора́хъ, ѩ҆́коже повелѣ̀ на́мъ гд҇ь бг҃ъ на́шъ.