Read Библия Церковнославянская Второзако́нїе 21 Bible Online

Второзако́нїе 21 - Библия Церковнославянская bible

Второзако́нїе 21

¹А҆́ще же ѡ҆брѧ́щетсѧ ѹ҆бїе́ный на землѝ, ю҆́же гд҇ь бг҃ъ дае́тъ тебѣ̀ наслѣ́дити, лежа́щь на по́ли, и҆ не вѣ́дѧтъ ѹ҆би́вшагѡ и҆̀:

²да и҆зы́дѹтъ ста́рцы и҆ сѹдїи҄ твоѝ и҆ да и҆змѣ́рѧтъ до градѡ́въ, и҆̀же ѡ҆́крестъ ѹ҆бїе́нагѡ:

³и҆ бѹ́детъ гра́дъ приближа́ѧйсѧ ѹ҆бїе́номѹ, и҆ да во́змѹтъ старѣ҄йшины гра́да тогѡ̀ ю҆́ницѹ ѿ говѧ́дъ, є҆́юже не дѣ́лано, и҆ ѩ҆́же ѩ҆рма̀ не понесѐ:

⁴и҆ да и҆зведѹ́тъ старѣ҄йшины гра́да тогѡ̀ ю҆́ницѹ въ де́брь сѹ́хѹ, ѩ҆́же не ѡ҆ра́нна, нижѐ насѣ́ѧна, и҆ да пресѣкѹ́тъ жи҄лы ю҆́ницы въ де́бри:

⁵и҆ да пристѹ́пѧтъ жерцы̀ леѵі́ти: ѩ҆́кѡ си́хъ и҆збра̀ гд҇ь бг҃ъ тво́й предстоѧ́ти є҆мѹ̀ и҆ благословлѧ́ти во и҆́мѧ є҆гѡ̀: и҆ во ѹ҆стѣ́хъ и҆́хъ да бѹ́детъ всѧ́кое прекосло́вїе и҆ всѧ́каѧ ѩ҆́зва:

⁶и҆ всѝ старѣ҄йшины гра́да тогѡ̀, приближа́ющїисѧ ѹ҆бїе́номѹ, да ѡ҆мы́ютъ рѹ́цѣ над̾ главо́ю ю҆́ницы, є҆́йже пресѣ́чєны сѹ́ть жи҄лы въ де́бри,

⁷и҆ ѿвѣща́вше да рекѹ́тъ: рѹ́цѣ на́ши не пролїѧ́ша кро́ве сеѧ̀, и҆ ѻ҆́чи на́ши не ви́дѣша:

⁸мл҇тивъ бѹ́ди лю́демъ твои҄мъ ї҆и҃лю, и҆̀хже и҆зве́лъ є҆сѝ, гд҇и, и҆з̾ землѝ є҆гѵ́петскїѧ, да не бѹ́детъ кро́вь непови́нна на лю́дехъ твои́хъ ї҆и҃ли: и҆ ѡ҆чи́ститсѧ и҆̀мъ кро́вь:

⁹ты́ же ѿи́меши кро́вь непови́ннѹ ѿ среды̀ себє̀, а҆́ще сотвори́ши до́брое и҆ ѹ҆го́дное пред̾ гд҇емъ бг҃омъ твои́мъ.

¹⁰А҆́ще же и҆зы́деши на бра́нь проти́вѹ врагѡ́мъ твои҄мъ, и҆ преда́стъ ѧ҆̀ гд҇ь бг҃ъ тво́й въ рѹ́цѣ твоѝ, и҆ плѣни́ши плѣ́нъ ѿ ни́хъ,

¹¹и҆ ѹ҆́зриши въ плѣ́нѣ женѹ̀ добрѹ̀ ѡ҆бли́чїемъ, и҆ возлю́биши ю҆̀, и҆ по́ймеши ю҆̀ себѣ̀ въ женѹ̀,

¹²и҆ введе́ши ю҆̀ внѹ́трь въ до́мъ тво́й, и҆ да ѡ҆брі́еши главѹ̀ є҆ѧ̀, и҆ да ѡ҆брѣ́жеши но́гти є҆ѧ̀,

¹³и҆ да совлече́ши ри҄зы плѣ҄нныѧ є҆ѧ̀ съ неѧ̀: и҆ да сѧ́детъ въ домѹ̀ твое́мъ, и҆ да пла́четсѧ ѻ҆тца̀ своегѡ̀ и҆ ма́тере своеѧ̀ мц҇ъ дні́й: и҆ по се́мъ вни́деши къ не́й, и҆ совокѹпи́шисѧ съ не́ю, и҆ бѹ́детъ тебѣ̀ жена̀.

¹⁴И҆ бѹ́детъ а҆́ще не восхо́щеши є҆ѧ̀, да ѿпѹ́стиши ю҆̀ свобо́днѹ, прода́жею же да не прода́си є҆ѧ̀ на цѣнѣ̀: да не ѿри́неши є҆ѧ̀, поне́же смири́лъ є҆сѝ ю҆̀.

¹⁵А҆́ще же бѹ́дѹтъ мѹ́жѹ двѣ̀ жєны̀, є҆ди́на ѿ ни́хъ люба̀, и҆ дрѹга́ѧ не люба̀, и҆ породѧ́тъ є҆мѹ̀ люба́ѧ и҆ нелюба́ѧ, и҆ бѹ́детъ сы́нъ перворожде́нный ѿ нелюби́мыѧ:

¹⁶и҆ бѹ́детъ въ ѻ҆́ньже де́нь раздѣли́тъ сынѡ́мъ свои҄мъ и҆мѣ́нїе своѐ, не возмо́жетъ пе́рвенцемъ бы́ти сы́нъ люби́мыѧ, презрѣ́въ сы́на нелюби́мыѧ пе́рвенца:

¹⁷но сы́на нелюби́мыѧ за пе́рвенца да призна́етъ, и҆ да́стъ є҆мѹ̀ сѹгѹ́бѡ ѿ всегѡ̀, є҆́же ѡ҆брѧ́щетсѧ є҆мѹ̀, ѩ҆́кѡ се́й є҆́сть нача́ло ча҄дъ є҆гѡ̀, и҆ семѹ̀ досто́итъ пе́рвенство.

¹⁸А҆́ще же комѹ̀ бѹ́детъ сы́нъ непокори́въ и҆ грѹби́тель, не послѹ́шаѧй гла́са ѻ҆тца̀ своегѡ̀ и҆ гла́са ма́тере своеѧ̀, и҆ нака́жѹтъ є҆го̀, и҆ не послѹ́шаетъ и҆́хъ,

¹⁹да во́змѹтъ є҆го̀ ѻ҆те́цъ є҆гѡ̀ и҆ ма́ти є҆гѡ̀, и҆ да и҆зведѹ́тъ є҆го̀ пред̾ старѣ҄йшины гра́да своегѡ̀ и҆ пред̾ врата̀ мѣ́ста своегѡ̀,

²⁰и҆ да рекѹ́тъ къ мѹжє́мъ гра́да своегѡ̀: сы́нъ на́шъ се́й непокори́въ є҆́сть и҆ грѹби́тель и҆ не слѹ́шаетъ рѣ́чи на́шеѧ, сластолю́бствѹѧ пїѧ́нствѹетъ:

²¹и҆ да побїю́тъ є҆го̀ мѹ́жїе гра́да тогѡ̀ ка́менїемъ, и҆ да ѹ҆́мретъ: и҆ и҆зми́те ѕло́е ѿ себє̀ сами́хъ, да и҆ про́чїи слы́шавше ѹ҆боѧ́тсѧ.

²²А҆́ще же бѹ́детъ на ко́мъ грѣ́хъ, сѹ́дъ сме́ртный, и҆ да ѹ҆́мретъ, и҆ повѣ́сите є҆го̀ на дре́вѣ,

²³да не пренощѹ́етъ тѣ́ло є҆гѡ̀ на дре́вѣ, но во гро́бѣ погреби́те є҆го̀ въ то́йже де́нь: ѩ҆́кѡ про́клѧтъ є҆́сть ѿ бг҃а всѧ́къ ви́сѧй на дре́вѣ: и҆ да не ѡ҆сквернитѐ землѝ, ю҆́же гд҇ь бг҃ъ тво́й дае́тъ тебѣ̀ во жре́бїй.