Read Библия Церковнославянская Второзако́нїе 23 Bible Online

Второзако́нїе 23 - Библия Церковнославянская bible

Второзако́нїе 23

¹Да не вхо́дитъ ка́женикъ и҆ скопе́цъ въ со́нмъ гд҇ень.

²Нижѐ да вни́детъ блѹдоро́дный во хра́мъ гд҇ень до десѧ́тагѡ ро́да.

³Да не вни́детъ а҆ммані́тинъ и҆ мѡаві́тинъ въ хра́мъ гд҇ень: и҆ да́же до десѧ́тагѡ ро́да да не вхо́дитъ въ хра́мъ гд҇ень, и҆ да́же до вѣ́ка,

⁴поне́же не срѣто́ша ѻ҆нѝ ва́съ съ хлѣ҄бы и҆ водо́ю на пѹтѝ, и҆сходѧ́щымъ ва́мъ и҆з̾ землѝ є҆гѵ́петскїѧ, и҆ ѩ҆́кѡ наѧ́ша на тѧ̀ валаа́ма сы́на веѡ́рова ѿ месопота́мїи, да тѧ̀ проклене́тъ:

⁵и҆ не восхотѣ̀ гд҇ь бг҃ъ тво́й послѹ́шати валаа́ма, и҆ ѡ҆братѝ гд҇ь бг҃ъ тво́й клѧ҄твы въ блг҇ве́нїе, занѐ возлюби́ тѧ гд҇ь бг҃ъ тво́й:

⁶да не совѣща́еши ми҄рнаѧ и҆̀мъ и҆ полє́знаѧ и҆̀мъ во всѧ҄ дни҄ твоѧ҄ во вѣ́ки.

⁷Да не возгнѹша́ешисѧ ї҆дѹме́аниномъ, ѩ҆́кѡ бра́тъ тво́й є҆́сть: да не возгнѹша́ешисѧ є҆гѵ́птѧниномъ, ѩ҆́кѡ пришле́цъ бы́лъ є҆сѝ въ землѝ є҆гѡ̀:

⁸сы́нове а҆́ще родѧ́тсѧ и҆̀мъ, въ ро́дѣ тре́тїемъ да вни́дѹтъ въ хра́мъ гд҇ень.

⁹А҆́ще же и҆зы́деши ѡ҆полчи́тисѧ на врагѝ твоѧ҄, и҆ да сохрани́шисѧ ѿ всѧ́кагѡ сло́ва ѕла̀.

¹⁰А҆́ще бѹ́детъ ѹ҆ тебє̀ человѣ́къ, и҆́же не бѹ́детъ чи́стъ ѿ и҆злїѧ́нїѧ є҆гѡ̀ но́щїю, и҆ да и҆зы́детъ внѣ̀ полка̀, и҆ да не вни́детъ въ по́лкъ:

¹¹и҆ є҆гда̀ бѹ́детъ къ ве́черѹ, да ѡ҆мы́етъ тѣ́ло своѐ водо́ю, и҆ заше́дшѹ со́лнцѹ да вни́детъ въ по́лкъ.

¹²И҆ мѣ́сто тебѣ̀ да бѹ́детъ внѣ̀ полка̀, и҆ и҆зы́деши та́мѡ во́нъ:

¹³и҆ ры́лецъ да бѹ́детъ тебѣ̀ за по́ѧсомъ твои́мъ, и҆ бѹ́детъ є҆гда̀ сѧ́деши внѣ̀, и҆ да и҆скопа́еши и҆́мъ (ѩ҆́мѹ), и҆ наврати́въ покры́еши стыдѣ́нїе твоѐ въ не́й:

¹⁴ѩ҆́кѡ гд҇ь бг҃ъ тво́й хо́дитъ въ полцѣ̀ твое́мъ и҆збавлѧ́ти тѧ̀ и҆ преда́ти врагѝ твоѧ҄ въ рѹ́цѣ твоѝ пред̾ лице́мъ твои́мъ: и҆ да бѹ́детъ по́лкъ тво́й свѧ́тъ, и҆ да не ѩ҆ви́тсѧ ѹ҆ тебє̀ стыдѣ́нїе ве́щи, и҆ ѿврати́тсѧ ѿ тебє̀.

¹⁵Да не преда́си раба̀ господи́нѹ є҆гѡ̀, и҆́же прїи́де къ тебѣ̀ ѿ господи́на своегѡ̀:

¹⁶съ тобо́ю да ѡ҆бита́етъ, съ ва́ми да живе́тъ во всѧ́комъ мѣ́стѣ, и҆дѣ́же ѹ҆го́дно бѹ́детъ є҆мѹ̀: да не ѡ҆скорби́ши є҆гѡ̀.

¹⁷Да не бѹ́детъ блѹдни́ца ѿ дще́рей ї҆и҃левыхъ, и҆ да не бѹ́детъ блѹдни́къ ѿ сынѡ́въ ї҆и҃левымъ.

¹⁸Да не принесе́ши мзды̀ блѹдни́чи, нижѐ цѣны̀ пе́сїи въ до́мъ гд҇а бг҃а твоегѡ̀ на всѧ́къ ѡ҆бѣ́тъ, ѩ҆́кѡ ме́рзость сѹ́ть гд҇еви бг҃ѹ твоемѹ̀ и҆ ѻ҆боѧ̀.

¹⁹Да не да́си бра́тѹ твоемѹ̀ въ ли́хвѹ сребра̀ и҆ въ ли́хвѹ пи́щей и҆ въ ли́хвѹ всѧ́кїѧ ве́щи, є҆мѹ́же а҆́ще взаи́мъ да́си:

²⁰чѹжде́мѹ да да́си въ ли́хвѹ, бра́тѹ же твоемѹ̀ да не да́си въ ли́хвѹ, да блг҇ви́тъ тѧ̀ гд҇ь бг҃ъ тво́й во всѣ́хъ дѣ́лѣхъ твои́хъ на землѝ, въ ню́же вхо́диши та́мѡ наслѣ́дити ю҆̀.

²¹А҆́ще же ѡ҆бѣща́еши ѡ҆бѣ́тъ гд҇еви бг҃ѹ твоемѹ̀, да не ѹ҆ме́длиши возда́ти є҆го̀, ѩ҆́кѡ взыска́ѧ взы́щетъ гд҇ь бг҃ъ тво́й ѿ тебє̀, и҆ бѹ́детъ на тебѣ̀ грѣ́хъ:

²²а҆́ще же не восхо́щеши ѡ҆бѣща́ти, нѣ́сть тѝ грѣха̀.

²³И҆сходѧ҄щаѧ на ѹ҆́стъ твои́хъ сохранѝ и҆ сотворѝ, и҆́мже ѡ҆́бразомъ ѡ҆бѣща́лъ є҆сѝ гд҇еви бг҃ѹ твоемѹ̀ да́ръ, є҆го́же глаго́лалъ є҆сѝ ѹ҆ста́ми твои́ми.

²⁴А҆́ще же вни́деши на ни́вѹ бли́жнѧгѡ своегѡ̀, и҆ собере́ши въ рѹ́цѣ своѝ кла́сы, а҆ серпа̀ да не возложи́ши на ни́вѹ бли́жнѧгѡ.

²⁵А҆́ще же вни́деши въ вїногра́дъ бли́жнѧгѡ своегѡ̀, да ѩ҆́си гро́здїе, є҆ли́кѡ дѹшѝ твое́й насы́титисѧ, въ сосѹ́дъ же да не вложи́ши.