Read Библия Церковнославянская Второзако́нїе 24 Bible Online

Второзако́нїе 24 - Библия Церковнославянская bible

Второзако́нїе 24

¹А҆́ще же кто̀ по́йметъ женѹ̀ и҆ поживе́тъ съ не́ю, и҆ бѹ́детъ а҆́ще не ѡ҆брѧ́щетъ благода́ти пред̾ ни́мъ, ѩ҆́кѡ ѡ҆брѣ́те въ не́й сра́мное дѣ́ло, да напи́шетъ є҆́й кни́гѹ ѿпѹще́нїѧ и҆ вда́стъ въ рѹ́цѣ є҆ѧ̀, и҆ да ѿпѹ́ститъ ю҆̀ и҆з̾ до́мѹ своегѡ̀,

²и҆ ѿше́дши бѹ́детъ (жена̀) мѹ́жѹ и҆но́мѹ:

³и҆ а҆́ще возненави́дитъ ю҆̀ мѹ́жъ вторы́й, и҆ напи́шетъ є҆́й кни́гѹ ѿпѹще́нїѧ и҆ да́стъ є҆́й въ рѹ́цѣ є҆ѧ̀, и҆ ѿпѹ́ститъ ю҆̀ и҆з̾ до́мѹ своегѡ̀, и҆лѝ ѹ҆́мретъ мѹ́жъ є҆ѧ̀ вторы́й, и҆́же бѣ̀ ю҆̀ поѧ́лъ себѣ̀ въ женѹ̀:

⁴не возмо́жетъ мѹ́жъ пе́рвый, ѿпѹсти́вый ю҆̀, возврати́въ поѧ́ти ю҆̀ себѣ̀ въ женѹ̀, по ѡ҆скверне́нїи є҆ѧ̀, ѩ҆́кѡ гнѹ́сно є҆́сть пред̾ гд҇емъ бг҃омъ твои́мъ: и҆ да не ѡ҆скверна́вите землѝ, ю҆́же гд҇ь бг҃ъ ва́шъ дае́тъ ва́мъ въ наслѣ́дїе.

⁵А҆́ще же кто̀ по́йметъ женѹ̀ вно́вѣ, да не и҆́детъ на бра́нь, и҆ да не наложи́тсѧ є҆мѹ̀ ни ка́ѧже ве́щь: непови́ненъ бѹ́детъ въ домѹ̀ свое́мъ лѣ́то є҆ди́но, да весели́тъ женѹ̀ свою̀, ю҆́же поѧ́лъ є҆́сть.

⁶Да не во́змеши въ зало́гъ жерно́вныхъ ка́меней, ѩ҆́кѡ дѹ́шѹ се́й дае́тъ въ зало́гъ.

⁷А҆́ще же ѩ҆́тъ бѹ́детъ человѣ́къ крады́й дѹ́шѹ ѿ бра́тїи своеѧ̀ сынѡ́въ ї҆и҃левыхъ, и҆ наси́лїемъ продае́тъ ю҆̀, да ѹ҆́мретъ та́ть то́й, и҆ и҆зми́те ѕло́е ѿ ва́съ сами́хъ.

⁸Внемлѝ себѣ̀ въ ѩ҆́звѣ прока́зы, и҆ хранѝ ѕѣлѡ̀ твори́ти по всемѹ̀ зако́нѹ, є҆го́же возвѣстѧ́тъ ва́мъ жерцы̀ леѵі́ти: ѩ҆́коже заповѣ́дахъ ва́мъ, да храни́те твори́ти:

⁹помѧнѝ, є҆ли҄ка сотворѝ гд҇ь бг҃ъ тво́й марїа́мѣ на пѹтѝ, и҆сходѧ́щымъ ва́мъ и҆з̾ є҆гѵ́пта.

¹⁰А҆́ще же до́лгъ є҆́сть на бли́жнемъ твое́мъ, до́лгъ каковы́й ли́бо, да не вни́деши въ до́мъ є҆гѡ̀ взѧ́ти зало́гъ є҆гѡ̀:

¹¹внѣ̀ ста́неши, и҆ человѣ́къ то́й, на не́мже є҆́сть до́лгъ тво́й, и҆знесе́тъ зало́гъ во́нъ.

¹²А҆́ще же человѣ́къ ѹ҆бо́гъ є҆́сть, да не преноществѹ́етъ зало́гъ є҆гѡ̀ ѹ҆ тебє̀:

¹³ѿда́нїемъ да ѿда́си ри́зѹ є҆гѡ̀ до захожде́нїѧ со́лнца, и҆ да почі́етъ въ ри́зѣ свое́й, и҆ благослови́тъ тѧ̀, и҆ бѹ́детъ тебѣ̀ мл҇ть пред̾ гд҇емъ бг҃омъ твои́мъ.

¹⁴Да не лиши́ши мзды̀ ѹ҆бо́гаго и҆ тре́бѹющаго ѿ бра́тїи твоеѧ̀, и҆лѝ ѿ пришлє́цъ и҆̀же во градѣ́хъ твои́хъ:

¹⁵въ то́й же де́нь да ѿда́си мздѹ̀ є҆мѹ̀, да не за́йдетъ со́лнце є҆мѹ̀, ѩ҆́кѡ ѹ҆бо́гъ є҆́сть, и҆ въ то́мъ и҆́мать наде́ждѹ, и҆ да не возопїе́тъ на тѧ̀ къ гд҇еви, и҆ бѹ́детъ тебѣ̀ грѣ́хъ.

¹⁶Да не ѹ҆́мрѹтъ ѻ҆тцы̀ за сы́ны, и҆ сы́нове да не ѹ҆́мрѹтъ за ѻ҆тцы̀: кі́йждо за сво́й грѣ́хъ да ѹ҆́мретъ.

¹⁷Не ѹ҆клони́ши сѹда̀ прише́лцѹ и҆ си́рѹ и҆ вдовѣ̀, и҆ да не взе́млеши въ зало́гъ ри́зы вдови́чи,

¹⁸и҆ помѧне́ши, ѩ҆́кѡ ра́бъ (и҆ ты̀) бы́лъ є҆сѝ въ землѝ є҆гѵ́петстѣй, и҆ свободи́ тѧ гд҇ь бг҃ъ тво́й ѿтѹ́дѹ: сегѡ̀ ра́ди а҆́зъ тебѣ̀ заповѣ́даю твори́ти сїѐ сло́во.

¹⁹А҆́ще же по́жнеши ни́вѹ твою̀ на селѣ̀ твое́мъ, и҆ забѹ́деши сно́пъ на ни́вѣ твое́й, да не возврати́шисѧ взѧ́ти є҆го̀: прише́лцѹ и҆ ѹ҆бо́гѹ, и҆ си́рѹ и҆ вдовѣ̀ да бѹ́детъ, да блг҇ви́тъ тѧ̀ гд҇ь бг҃ъ тво́й во всѣ́хъ дѣ́лѣхъ рѹкѹ̀ твоє́ю.

²⁰А҆́ще же ма́сличїе собира́еши, да не возврати́шисѧ ѡ҆ста́нкѡвъ собра́ти ѩ҆̀же за тобо́ю: прише́лцѹ и҆ си́рѹ и҆ вдовѣ̀ да бѹ́дѹтъ: и҆ воспомѧне́ши, ѩ҆́кѡ ра́бъ бы́лъ є҆сѝ въ землѝ є҆гѵ́петстѣй: сегѡ̀ ра́ди а҆́зъ тебѣ̀ заповѣ́даю твори́ти сло́во сїѐ.

²¹А҆́ще же ѡ҆бира́еши вїногра́дъ тво́й, да не собира́еши ѡ҆ста́нкѡвъ ѩ҆̀же за тобо́ю: прише́лцѹ и҆ си́рѹ и҆ вдовѣ̀ да бѹ́дѹтъ:

²²и҆ помѧне́ши, ѩ҆́кѡ ра́бъ бы́лъ є҆сѝ въ землѝ є҆гѵ́петстѣй: сегѡ̀ ра́ди а҆́зъ тебѣ̀ заповѣ́даю твори́ти сїѐ сло́во.