Read Библия Церковнославянская Второзако́нїе 26 Bible Online

Второзако́нїе 26 - Библия Церковнославянская bible

Второзако́нїе 26

¹И҆ бѹ́детъ а҆́ще вни́деши въ зе́млю, ю҆́же гд҇ь бг҃ъ тво́й дае́тъ тебѣ̀ въ жре́бїй є҆́же наслѣ́дити ю҆̀, и҆ всели́шисѧ на не́й,

²и҆ да во́змеши ѿ нача́тка плодѡ́въ землѝ твоеѧ̀, ю҆́же гд҇ь бг҃ъ тво́й дае́тъ тебѣ̀ въ жре́бїй, и҆ вложи́ши въ ко́шницѹ, и҆ по́йдеши на мѣ́сто, є҆́же и҆збере́тъ гд҇ь бг҃ъ тво́й призыва́ти и҆́мѧ є҆гѡ̀ та́мѡ:

³и҆ прїи́деши къ жерцѹ̀, и҆́же бѹ́детъ въ ты҄ѧ дни҄, и҆ рече́ши къ немѹ̀: возвѣща́ю дне́сь гд҇еви бг҃ѹ твоемѹ̀, ѩ҆́кѡ внидо́хъ въ зе́млю, є҆́юже клѧ́тсѧ гд҇ь ѻ҆тцє́мъ на́шымъ да́ти на́мъ:

⁴и҆ да во́зметъ жре́цъ ѿ рѹкѹ̀ твоє́ю ко́шницѹ и҆ да положи́тъ ю҆̀ пред̾ ѻ҆лтаре́мъ гд҇а бг҃а твоегѡ̀:

⁵и҆ ѿвѣща́въ рече́ши пред̾ гд҇емъ бг҃омъ твои́мъ: сѷрі́ю ѡ҆ста́ви ѻ҆те́цъ мо́й и҆ сни́де во є҆гѵ́петъ и҆ ѡ҆бита̀ та́мѡ въ числѣ̀ ма́лѣмъ, и҆ бы́сть та́мѡ въ ѩ҆зы́къ вели́къ и҆ во мно́жество мно́го и҆ вели́ко:

⁶и҆ ѡ҆ѕло́биша на́съ є҆гѵ́птѧне, и҆ смири́ша ны̀, и҆ возложи́ша на ны̀ дѣла̀ жестѡ́каѧ:

⁷и҆ возопи́хомъ ко гд҇ѹ бг҃ѹ ѻ҆тє́цъ на́шихъ, и҆ ѹ҆слы́ша гд҇ь во́пль на́шъ и҆ ви́дѣ смире́нїе на́ше и҆ трѹ́дъ на́шъ и҆ ско́рбь на́шѹ,

⁸и҆ и҆зведѐ ны̀ гд҇ь и҆з̾ є҆гѵ́пта са́мъ крѣ́постїю свое́ю вели́кою и҆ рѹко́ю си́льною и҆ мы́шцею высо́кою, и҆ въ видѣ́нїихъ вели́кихъ и҆ въ зна́менїихъ и҆ въ чѹдесѣ́хъ,

⁹и҆ введѐ ны̀ въ мѣ́сто сїѐ, и҆ дадѐ на́мъ зе́млю сїю̀, зе́млю кипѧ́щѹю ме́домъ и҆ млеко́мъ:

¹⁰и҆ нн҃ѣ сѐ, принесо́хъ нача́тки ѿ плодѡ́въ землѝ, ю҆́же да́лъ мѝ є҆сѝ, гд҇и, зе́млю кипѧ́щѹю ме́домъ и҆ млеко́мъ. И҆ ѡ҆ста́виши є҆̀ пред̾ гд҇емъ бг҃омъ твои́мъ, и҆ поклони́шисѧ та́мѡ пред̾ гд҇емъ бг҃омъ твои́мъ,

¹¹и҆ возвесели́шисѧ ѡ҆ всѣ́хъ благи́хъ, ѩ҆̀же дадѐ тебѣ̀ гд҇ь бг҃ъ тво́й, и҆ до́мъ тво́й, и҆ леѵі́тъ, и҆ пришле́цъ и҆́же ѹ҆ тебє̀.

¹²Є҆гда́ же соверши́ши ѡ҆десѧти́ти всю̀ десѧти́нѹ плодѡ́въ землѝ твоеѧ̀ въ лѣ́то тре́тїе, вторѹ́ю десѧти́нѹ да да́си леѵі́тѹ и҆ прише́лцѹ и҆ сиротѣ̀ и҆ вдовѣ̀, и҆ ѩ҆дѧ́тъ во градѣ́хъ твои́хъ и҆ насы́тѧтсѧ:

¹³и҆ рече́ши пред̾ гд҇емъ бг҃омъ твои́мъ: ѡ҆чи́стихъ свѧта҄ѧ и҆з̾ до́мѹ моегѡ̀, и҆ да́хъ ѧ҆̀ леѵі́тѹ и҆ прише́лцѹ и҆ сиротѣ̀ и҆ вдовѣ̀, по всѣ҄мъ за́повѣдемъ твои҄мъ, ѩ҆̀же заповѣ́далъ є҆сѝ мнѣ̀: не престѹпи́хъ за́повѣди твоеѧ̀ и҆ не забы́хъ,

¹⁴и҆ не ѩ҆до́хъ въ болѣ́зни мое́й ѿ ни́хъ, не принесо́хъ ѿ ни́хъ въ нечи́стое, нижѐ да́хъ ѿ ни́хъ ѹ҆ме́ршемѹ: послѹ́шахъ гла́са гд҇а бг҃а моегѡ̀, сотвори́хъ, ѩ҆́коже заповѣ́далъ є҆сѝ мнѣ̀:

¹⁵при́зри съ нб҃сѐ ѿ хра́ма ст҃а́гѡ твоегѡ̀, и҆ блг҇вѝ лю́ди твоѧ҄ ї҆и҃лѧ и҆ зе́млю, ю҆́же да́лъ є҆сѝ и҆̀мъ ѩ҆́коже клѧ́лсѧ є҆сѝ ѻ҆тцє́мъ на́шымъ, да́ти на́мъ зе́млю кипѧ́щѹю ме́домъ и҆ млеко́мъ.

¹⁶Въ се́й де́нь заповѣ́да тебѣ̀ гд҇ь бг҃ъ тво́й сотвори́ти всѧ҄ ѡ҆правда҄нїѧ сїѧ҄ и҆ сѹдбы҄: и҆ сохрани́те и҆ сотвори́те ѧ҆̀ ѿ всегѡ̀ се́рдца ва́шегѡ и҆ ѿ всеѧ̀ дѹшѝ ва́шеѧ.

¹⁷Гд҇а и҆збра́лъ є҆сѝ дне́сь бы́ти тебѣ̀ въ бг҃а, и҆ ходи́ти во всѣ́хъ пѹте́хъ є҆гѡ̀ и҆ храни́ти ѡ҆правда҄нїѧ и҆ за́пѡвѣди и҆ сѹдбы҄ є҆гѡ̀, и҆ послѹ́шати гла́са є҆гѡ̀.

¹⁸И҆ гд҇ь и҆збра̀ ва́съ дне́сь, да бѹ́дете є҆мѹ̀ лю́ди и҆збра́ннїи, ѩ҆́коже речѐ тебѣ̀, храни́ти всѧ҄ за́пѡвѣди є҆гѡ̀,

¹⁹и҆ бы́ти тебѣ̀ вы́шше всѣ́хъ ѩ҆зы҄къ, и҆́же сотвори́ тѧ и҆мени́та и҆ хва́льна и҆ сла́вна, бы́ти ва́мъ лю́демъ ст҃ы҄мъ гд҇ѹ бг҃ѹ ва́шемѹ, ѩ҆́коже гл҃а.