Read Библия Церковнославянская Второзако́нїе 27 Bible Online

Второзако́нїе 27 - Библия Церковнославянская bible

Второзако́нїе 27

¹И҆ заповѣ́да мѡѷсе́й и҆ старѣ҄йшины сынѡ́въ ї҆и҃левыхъ, глаго́лѧ: сохрани́те всѧ҄ за́пѡвѣди сїѧ҄, є҆ли҄ки а҆́зъ заповѣ́даю ва́мъ дне́сь.

²И҆ бѹ́детъ въ ѻ҆́ньже де́нь пре́йдете ї҆ѻрда́нъ на зе́млю, ю҆́же гд҇ь бг҃ъ тво́й дае́тъ тебѣ̀ во жре́бїй, и҆ поста́виши себѣ̀ ка́менїе вели́ко и҆ ѡ҆бѣли́ши ѧ҆̀ мѣ́ломъ,

³и҆ напи́шеши на ка́менехъ тѣ́хъ всѧ҄ словеса̀ зако́на сегѡ̀, є҆гда̀ пре́йдете ї҆ѻрда́нъ, є҆гда̀ вни́дете въ зе́млю, ю҆́же гд҇ь бг҃ъ тво́й дае́тъ тебѣ̀, зе́млю кипѧ́щѹю ме́домъ и҆ млеко́мъ, ѩ҆́коже речѐ гд҇ь бг҃ъ ѻ҆тє́цъ твои́хъ тебѣ̀.

⁴И҆ бѹ́детъ є҆гда̀ пре́йдете ї҆ѻрда́нъ, да поста́вите ка́менїе сїѐ, ѩ҆̀же а҆́зъ повелѣва́ю ва́мъ дне́сь, въ горѣ̀ гева́лъ, и҆ побѣли́ши и҆̀хъ мѣ́ломъ:

⁵и҆ да сози́ждеши та́мѡ ѻ҆лта́рь гд҇еви бг҃ѹ твоемѹ̀, ѻ҆лта́рь ѿ ка́менїѧ: да не возложи́ши на ни́хъ желѣ́за:

⁶ка́менїемъ всецѣ́лымъ да сози́ждеши ѻ҆лта́рь гд҇еви бг҃ѹ твоемѹ̀ и҆ вознесе́ши на не́мъ всесожжє́нїѧ гд҇еви бг҃ѹ твоемѹ̀,

⁷и҆ пожре́ши же́ртвѹ спасе́нїѧ: и҆ ѩ҆́си, и҆ насы́тишисѧ та́мѡ, и҆ возвесели́шисѧ пред̾ гд҇емъ бг҃омъ твои́мъ,

⁸и҆ напи́шеши на ка́менїихъ си́хъ ве́сь зако́нъ се́й ѩ҆́вѣ ѕѣлѡ̀.

⁹И҆ глаго́ла мѡѷсе́й и҆ жерцы̀ леѵі́ти всемѹ̀ ї҆и҃лю, глаго́люще: молчѝ и҆ слы́ши, ї҆и҃лю, въ де́нь се́й ста́лсѧ є҆сѝ въ лю́ди гд҇еви бг҃ѹ твоемѹ̀:

¹⁰и҆ да послѹ́шаеши гла́са гд҇а бг҃а твоегѡ̀, и҆ да сотвори́ши всѧ҄ за́пѡвѣди є҆гѡ̀ и҆ ѡ҆правда҄нїѧ є҆гѡ̀, ѩ҆̀же а҆́зъ заповѣ́даю тебѣ̀ дне́сь.

¹¹И҆ заповѣ́да мѡѷсе́й лю́демъ въ то́й де́нь, глаго́лѧ:

¹²сі́и да ста́нѹтъ благословлѧ́ти лю́ди на горѣ̀ гарїзі́нъ, преше́дше ї҆ѻрда́нъ: сѷмеѡ́нъ, леѵі́й, ї҆ѹ́да, ї҆ссаха́ръ, ї҆ѡ́сифъ и҆ венїамі́нъ:

¹³и҆ сі́и да ста́нѹтъ на клѧ́твѹ на горѣ̀ гева́лъ: рѹви́мъ, га́дъ и҆ а҆си́ръ, завѹлѡ́нъ, да́нъ и҆ нефѳалі́мъ.

¹⁴И҆ ѿвѣща́вше рекѹ́тъ леѵі́ти всемѹ̀ ї҆и҃лю гла́сомъ вели́кимъ:

¹⁵про́клѧтъ человѣ́къ, и҆́же сотвори́тъ и҆зваѧ́нїе и҆ слїѧ́нїе, ме́рзость гд҇еви, дѣ́ло рѹ́къ хѹдо́жника, и҆ положи́тъ є҆̀ въ сокрове́нїи. И҆ ѿвѣща́вше всѝ лю́дїе рекѹ́тъ: бѹ́ди.

¹⁶Про́клѧтъ безче́стѧй ѻ҆тца̀ своего̀ и҆лѝ ма́терь свою̀. И҆ рекѹ́тъ всѝ лю́дїе: бѹ́ди.

¹⁷Про́клѧтъ прелага́ѧй предѣ́лы бли́жнѧгѡ своегѡ̀. И҆ рекѹ́тъ всѝ лю́дїе: бѹ́ди.

¹⁸Про́клѧтъ прельща́ѧй слѣ́паго въ пѹтѝ. И҆ рекѹ́тъ всѝ лю́дїе: бѹ́ди.

¹⁹Про́клѧтъ, и҆́же ѹ҆клони́тъ сѹ́дъ прише́лцѹ и҆ сиротѣ̀ и҆ вдовѣ̀. И҆ рекѹ́тъ всѝ лю́дїе: бѹ́ди.

²⁰Про́клѧтъ лежа́й съ жено́ю ѻ҆тца̀ своегѡ̀, ѩ҆́кѡ ѿкры́лъ є҆́сть покрове́нїе ѻ҆тца̀ своегѡ̀. И҆ рекѹ́тъ всѝ лю́дїе: бѹ́ди.

²¹Про́клѧтъ лежа́й со всѧ́кимъ ското́мъ. И҆ рекѹ́тъ всѝ лю́дїе: бѹ́ди.

²²Про́клѧтъ лежа́й съ сестро́ю свое́ю, дще́рїю ѻ҆тца̀ своегѡ̀ и҆лѝ дще́рїю ма́тере своеѧ̀. И҆ рекѹ́тъ всѝ лю́дїе: бѹ́ди.

²³Про́клѧтъ лежа́й съ те́щею свое́ю. И҆ рекѹ́тъ всѝ лю́дїе: бѹ́ди. Про́клѧтъ лежа́й съ сестро́ю жены̀ своеѧ̀. И҆ рекѹ́тъ всѝ лю́дїе: бѹ́ди.

²⁴Про́клѧтъ бїѧ́й бли́жнѧго съ ле́стїю. И҆ рекѹ́тъ всѝ лю́дїе: бѹ́ди.

²⁵Про́клѧтъ, и҆́же во́зметъ да́ры порази́ти дѹ́шѹ кро́ве непови́нныѧ. И҆ рекѹ́тъ всѝ лю́дїе: бѹ́ди.

²⁶Про́клѧтъ всѧ́къ человѣ́къ, и҆́же не пребѹ́детъ во всѣ́хъ словесѣ́хъ зако́на сегѡ̀, є҆́же твори́ти ѧ҆̀. И҆ рекѹ́тъ всѝ лю́дїе: бѹ́ди.