Read Библия Церковнославянская Второзако́нїе 29 Bible Online

Второзако́нїе 29 - Библия Церковнославянская bible

Второзако́нїе 29

¹Сїѧ҄ словеса̀ завѣ́та, ѩ҆̀же завѣща̀ гд҇ь мѡѷсе́ю ѹ҆ста́вити сынѡ́мъ ї҆и҃лєвымъ въ землѝ мѡа́вли, кромѣ̀ завѣ́та, є҆го́же завѣща̀ и҆̀мъ въ хѡри́вѣ.

²И҆ призва̀ мѡѷсе́й всѧ҄ сы́ны ї҆и҃лєвы и҆ речѐ къ ни҄мъ: вы̀ ви́дѣсте всѧ҄, є҆ли҄ка сотворѝ гд҇ь въ землѝ є҆гѵ́петстѣй пред̾ ва́ми фараѡ́нѹ и҆ всѣ҄мъ слѹга́мъ є҆гѡ̀ и҆ все́й землѝ є҆гѡ̀,

³и҆скѹшє́нїѧ вели҄каѧ, ѩ҆̀же ви́дѣста ѻ҆́чи твоѝ, зна́мєнїѧ и҆ чѹдеса̀ вели҄каѧ ѡ҆́наѧ, рѹ́кѹ крѣ́пкѹю и҆ мы́шцѹ высо́кѹю:

⁴и҆ не дадѐ гд҇ь бг҃ъ ва́мъ се́рдца разѹмѣ́ти и҆ ѻ҆че́съ ви́дѣти и҆ ѹ҆ше́съ слы́шати, да́же до днѐ сегѡ̀:

⁵и҆ води́лъ ва́съ четы́редесѧть лѣ́тъ по пѹсты́ни: не ѡ҆бетша́ша ри҄зы ва́шѧ, и҆ сапо́зи ва́ши не сотро́шасѧ на нога́хъ ва́шихъ:

⁶хлѣ́ба не ѩ҆до́сте, вїна̀ и҆ сїке́ра не пи́сте, да позна́ете, ѩ҆́кѡ се́й гд҇ь бг҃ъ ва́шъ:

⁷и҆ прїидо́сте до сегѡ̀ мѣ́ста: и҆ и҆зы́де сиѡ́нъ ца́рь є҆севѡ́нскїй и҆ ѡ҆́гъ ца́рь васа́нскїй во срѣ́тенїе на́мъ на бра́нь,

⁸и҆ порази́хомъ и҆̀хъ на бра́ни, и҆ прїѧ́хомъ зе́млю и҆́хъ: и҆ да́хъ ю҆̀ во жре́бїй рѹви́мѹ и҆ га́дѹ и҆ полѹпле́мени манассі́инѹ.

⁹И҆ сохрани́те твори́ти всѧ҄ словеса̀ завѣ́та сегѡ̀ твори́ти ѧ҆̀, да разѹмѣ́ете всѧ҄, є҆ли҄ка сотворитѐ.

¹⁰Вы̀ ста́сте всѝ дне́сь пред̾ гд҇емъ бг҃омъ ва́шимъ, племенонача҄лницы ва́ши и҆ старѣ҄йшины ва́ши, и҆ сѹдїи҄ ва́ши и҆ писмовводи́тєли ва́ши, всѧ́къ мѹ́жъ ї҆и҃лтескъ,

¹¹и҆ жєны̀ ва́шѧ и҆ ча҄да ва҄ша, и҆ пришле́цъ и҆́же посредѣ̀ полка̀ ва́шегѡ, ѿ древосѣ́чца ва́шегѡ да́же до водоно́сца ва́шегѡ,

¹²є҆́же прейтѝ въ завѣ́тъ гд҇а бг҃а ва́шегѡ и҆ въ клѧ҄твы є҆гѡ̀, є҆ли҄ка завѣща́етъ гд҇ь бг҃ъ тво́й къ тебѣ̀ дне́сь:

¹³да поста́витъ тѧ̀ себѣ̀ въ лю́ди, и҆ то́й бѹ́детъ тебѣ̀ бг҃ъ, ѩ҆́коже тебѣ̀ речѐ и҆ ѩ҆́коже клѧ́тсѧ ѻ҆тцє́мъ твои҄мъ, а҆враа́мѹ и҆ ї҆саа́кѹ и҆ ї҆а́кѡвѹ.

¹⁴И҆ не ва́мъ є҆ди҄нѣмъ а҆́зъ завѣ́тъ се́й и҆ клѧ́твѹ сїю̀ завѣщава́ю,

¹⁵но и҆ здѣ̀ сѹ́щымъ съ ва́ми дне́сь, пред̾ гд҇емъ бг҃омъ ва́шимъ, и҆ не сѹ́щымъ съ ва́ми здѣ̀ дне́сь.

¹⁶ѩ҆́кѡ вы̀ вѣ́сте, ка́кѡ жи́хомъ въ землѝ є҆гѵ́петстѣй и҆ ка́кѡ проидо́хомъ посредѣ̀ ѩ҆зы́кѡвъ, и҆̀хже преидо́сте,

¹⁷и҆ ви́дѣсте ме́рзѡсти и҆́хъ и҆ кѹмі́ры и҆́хъ, дре́во и҆ ка́менїе, сребро̀ и҆ зла́то, ѩ҆̀же сѹ́ть ѹ҆ ни́хъ.

¹⁸Є҆да̀ кто̀ є҆́сть въ ва́съ мѹ́жъ и҆лѝ жена̀, и҆лѝ ѻ҆те́чество и҆лѝ пле́мѧ, є҆гѡ́же се́рдце ѹ҆клони́сѧ ѿ гд҇а бг҃а ва́шегѡ, и҆тѝ є҆́же слѹжи́ти богѡ́мъ ѩ҆зы́кѡвъ ѻ҆́ныхъ; є҆да̀ кі́й є҆́сть въ ва́съ ко́рень горѣ̀ прораста́ющь въ же́лчи и҆ го́рести;

¹⁹И҆ бѹ́детъ а҆́ще ѹ҆слы́шитъ словеса̀ клѧ́твы сеѧ̀ и҆ похва́литсѧ въ се́рдцы свое́мъ, глаго́лѧ: преподо́бно мнѣ̀ да бѹ́детъ, ѩ҆́кѡ въ прельще́нїи се́рдца моегѡ̀ пойдѹ̀, да не погѹби́тъ грѣ́шникъ безгрѣ́шнаго (съ собо́ю):

²⁰не восхо́щетъ бг҃ъ мл҇тивъ бы́ти є҆мѹ̀, но тогда̀ разгори́тсѧ гнѣ́въ гд҇ень и҆ ре́вность є҆гѡ̀ на человѣ́ка того̀: и҆ прилѣпѧ́тсѧ є҆мѹ̀ всѧ҄ клѧ҄твы завѣ́та сегѡ̀, пи҄санныѧ въ кни́зѣ зако́на сегѡ̀: и҆ потреби́тъ гд҇ь и҆́мѧ є҆гѡ̀ ѿ поднебе́сныѧ,

²¹и҆ ѿлѹчи́тъ є҆го̀ гд҇ь на ѕла҄ѧ ѿ всѣ́хъ сынѡ́въ ї҆и҃левыхъ, по всѣ҄мъ клѧ́твамъ завѣ́та напи́саннагѡ въ кни́зѣ зако́на сегѡ̀.

²²И҆ рече́тъ ро́дъ и҆́нъ, сы́нове ва́ши, и҆̀же воста́нѹтъ по ва́съ, и҆ чѹжды́й и҆́же прїи́детъ ѿ землѝ дале́кїѧ, и҆ ѹ҆́зрѧтъ ѩ҆́звы землѝ ѻ҆́ныѧ и҆ недѹ́ги є҆ѧ̀, ѩ҆̀же посла̀ гд҇ь на ню̀,

²³жѹ́пелъ и҆ со́ль сожже́ннѹю: всѧ̀ землѧ̀ є҆ѧ̀ не насѣ́етсѧ, ни прозѧ́бнетъ, нижѐ возни́кнетъ на не́й всѧ́къ ѕла́къ: ѩ҆́коже ѡ҆прове́ржесѧ содо́мъ и҆ гомо́рръ, а҆дама̀ и҆ севѡі́мъ, ѩ҆̀же ѡ҆прове́рже гд҇ь въ ѩ҆́рости и҆ гнѣ́вѣ свое́мъ.

²⁴И҆ рекѹ́тъ всѝ ѩ҆зы́цы: почто̀ сотворѝ гд҇ь си́це землѝ се́й; ка́ѧ ѩ҆́рость гнѣ́ва вели́каѧ сїѧ̀;

²⁵И҆ рекѹ́тъ: ѩ҆́кѡ ѡ҆ста́виша завѣ́тъ гд҇а бг҃а ѻ҆тє́цъ свои́хъ, є҆го́же завѣща̀ ѻ҆тцє́мъ и҆́хъ, є҆гда̀ и҆зведѐ и҆̀хъ ѿ землѝ є҆гѵ́петскїѧ,

²⁶и҆ ше́дше послѹжи́ша богѡ́мъ и҆ны҄мъ, и҆ поклони́шасѧ и҆̀мъ, и҆́хже не вѣ́дѧхѹ, и҆ не дадѐ и҆̀мъ ничто́же ни є҆ди́нъ:

²⁷и҆ разгнѣ́васѧ ѩ҆́ростїю гд҇ь на зе́млю тѹ̀, є҆́же навестѝ на ню̀ по всѣ҄мъ клѧ́твамъ завѣ́та, пи҄саннымъ въ кни́гахъ зако́на сегѡ̀:

²⁸и҆ и҆з̾ѧ́тъ и҆̀хъ гд҇ь ѿ землѝ и҆́хъ ѩ҆́ростїю и҆ гнѣ́вомъ, и҆ прогнѣ́ванїемъ вели́кимъ ѕѣлѡ̀, и҆ и҆зве́рже и҆̀хъ въ зе́млю и҆́нѹ ѩ҆́коже нн҃ѣ.

²⁹Та҄йнаѧ гд҇еви бг҃ѹ на́шемѹ, на́мъ же ѩ҆влє́ннаѧ и҆ ча́дѡмъ на́шымъ во вѣ́ки, твори́ти всѧ҄ словеса̀ зако́на сегѡ̀.