Read Библия Церковнославянская Второзако́нїе 3 Bible Online

Второзако́нїе 3 - Библия Церковнославянская bible

Второзако́нїе 3

¹И҆ ѡ҆брати́вшесѧ взыдо́хомъ пѹте́мъ и҆́же къ васа́нѹ: и҆ и҆зы́де ѡ҆́гъ ца́рь васа́нскїй проти́вѹ на́мъ, са́мъ и҆ всѝ лю́дїе є҆гѡ̀ съ ни́мъ на бра́нь во є҆драі́мъ.

²И҆ речѐ гд҇ь ко мнѣ̀: не ѹ҆бо́йсѧ є҆гѡ̀, ѩ҆́кѡ въ рѹ́цѣ твоѝ преда́хъ є҆го̀, и҆ всѧ҄ лю́ди є҆гѡ̀, и҆ всю̀ зе́млю є҆гѡ̀: и҆ сотвори́ши є҆мѹ̀, ѩ҆́коже сотвори́лъ є҆сѝ сиѡ́нѹ царю̀ а҆морре́йскѹ, и҆́же живѧ́ше во є҆севѡ́нѣ.

³И҆ предадѐ є҆го̀ гд҇ь бг҃ъ на́шъ въ рѹ́цѣ на́ши, и҆ ѡ҆́га царѧ̀ васа́нска, и҆ всѧ҄ лю́ди є҆гѡ̀: и҆ и҆зби́хомъ є҆го̀, до́ндеже не ѡ҆ста́сѧ ѿ негѡ̀ сѣ́мѧ:

⁴и҆ ѡ҆держа́хомъ всѧ҄ гра́ды є҆гѡ̀ во вре́мѧ ѻ҆́но, не бы́сть гра́да, є҆гѡ́же не взѧ́хомъ ѿ ни́хъ: шестьдесѧ́тъ градѡ́въ, всѧ҄ предѣ́лы а҆рго́ва царѧ̀ ѡ҆́га въ васа́нѣ,

⁵всѧ҄ гра́ды твє́рды, стѣ́ны высѡ́ки, врата̀ и҆ верєѝ, кромѣ̀ градѡ́въ ферезе́йскихъ мно́гихъ ѕѣлѡ̀:

⁶потреби́хомъ и҆̀хъ, ѩ҆́коже сотвори́хомъ сиѡ́нѹ царю̀ є҆севѡ́ню, и҆ потреби́хомъ всѧ҄ гра́ды, вкѹ́пѣ и҆ жєны̀ и҆́хъ и҆ ча҄да:

⁷и҆ всѧ҄ скоты̀, и҆ кѡры́сти гра҄дныѧ плѣни́хомъ себѣ̀,

⁸и҆ взѧ́хомъ въ то̀ вре́мѧ зе́млю ѿ рѹ́къ двѹ́хъ царе́й а҆морре́йскихъ, и҆̀же бы́ша ѡ҆б̾ ѡ҆́нъ по́лъ ї҆ѻрда́на, ѿ водоте́чи а҆рнѡ́ни, да́же и҆ до горы̀ а҆ермѡ́на.

⁹Фїнїкі́ане прозыва́ютъ а҆ермѡ́нъ санїѡ́ромъ, а҆морре́й же прозва̀ є҆го̀ сані́ромъ.

¹⁰Всѝ гра́ды мїсѡ́рѡвы, и҆ ве́сь галаа́дъ, и҆ ве́сь васа́нъ да́же до є҆́лхи и҆ є҆драі́ма, гра́ды ца́рствїѧ ѡ҆́гова въ васа́нѣ:

¹¹ѩ҆́кѡ то́чїю ѡ҆́гъ ца́рь васа́нскїй ѡ҆ста́сѧ ѿ рафаі́нѡвъ: сѐ, ѻ҆́дръ є҆гѡ̀ ѻ҆́дръ жєлѣ́зенъ, сѐ, то́й є҆́сть въ краегра́дїи {Гре́ч.: а҆́кра.} сынѡ́въ а҆мма́новыхъ: де́вѧть лакѡ́тъ долгота̀ є҆гѡ̀ и҆ четы́ри ла́кти широта̀ є҆гѡ̀ ла́ктемъ мѹ́жескимъ.

¹²И҆ зе́млю тѹ̀ наслѣ́дихомъ во ѻ҆́но вре́мѧ ѿ а҆рои́ра, и҆́же є҆́сть ѹ҆ ѹ҆́стїѧ водоте́чи а҆рнѡ́ни, и҆ по́лъ горы̀ галаа́довы: и҆ гра́ды є҆гѡ̀ да́хъ рѹви́мѹ и҆ га́дѹ:

¹³и҆ ѡ҆ста́вшее галаа́дово, и҆ всѐ васа́нское ца́рство ѡ҆́гово да́хъ полѹпле́мени манассі́инѹ, и҆ ве́сь предѣ́лъ а҆рго́ва, ве́сь васа́нъ ѻ҆́ный, землѧ̀ рафаі́нѧ вмѣни́тсѧ.

¹⁴И҆ ї҆аі́ръ сы́нъ манассі́инъ взѧ̀ всѧ҄ предѣ́лы а҆рго́ва, да́же до предѣ҄лъ гаргасі́нскихъ и҆ махаѳі́нскихъ: прозва̀ ѧ҆̀ по и҆́мени своемѹ̀ васа́нъ а҆ѵѡ́ѳъ ї҆аі́ръ, да́же до сегѡ̀ днѐ:

¹⁵и҆ махі́рѹ да́хъ галаа́дъ,

¹⁶и҆ рѹви́мѹ и҆ га́дови да́хъ ѿ галаа́да да́же до водоте́чи а҆рнѡ́ни, средѝ водоте́чи предѣ́лъ, и҆ да́же до ї҆аво́ка: водоте́ча предѣ́лъ сынѡ́въ а҆мма́нихъ:

¹⁷и҆ а҆́рава и҆ ї҆ѻрда́нъ предѣ́лъ ѿ махенере́ѳа и҆ да́же до мо́рѧ а҆ра́вскагѡ, мо́рѧ сла́нагѡ, под̾ а҆сидѡ́ѳомъ фазгѝ ѿ восто́ка.

¹⁸И҆ повелѣ́хъ ва́мъ во вре́мѧ ѻ҆́но, глаго́лѧ: гд҇ь бг҃ъ ва́шъ дадѐ ва́мъ зе́млю сїю̀ во жре́бїй: воѡрѹже́ни поиди́те пред̾ лице́мъ бра́тїи ва́шеѧ сынѡ́въ ї҆и҃левыхъ, всѧ́къ си́льный:

¹⁹то́чїю жєны̀ ва́шѧ и҆ дѣ́ти ва́шѧ и҆ ско́ти ва́шѧ, вѣ́мъ, ѩ҆́кѡ ско́тъ мно́гъ є҆́сть ва́мъ, да пребѹ́дѹтъ во градѣ́хъ ва́шихъ, ѩ҆̀же да́хъ ва́мъ:

²⁰до́ндеже ѹ҆поко́итъ гд҇ь бг҃ъ на́шъ бра́тїю ва́шѹ, ѩ҆́коже и҆ ва́съ, и҆ наслѣ́дѧтъ и҆ сі́и зе́млю, ю҆́же гд҇ь бг҃ъ ва́шъ дае́тъ и҆̀мъ ѡ҆б̾ ѻ҆нѹ̀ странѹ̀ ї҆ѻрда́на: и҆ возврати́тесѧ кі́йждо въ наслѣ́дїе своѐ є҆́же да́хъ ва́мъ.

²¹И҆ ї҆исѹ́сѹ заповѣ́дахъ во вре́мѧ ѻ҆́но, глаго́лѧ: ѻ҆́чи ва́ши ви́дѣша всѧ҄, є҆ли҄ка сотворѝ гд҇ь бг҃ъ на́шъ ѻ҆бои́мъ царє́мъ си҄мъ, та́кѡ сотвори́тъ гд҇ь бг҃ъ на́шъ всѣ҄мъ ца́рствѡмъ, и҆̀хже сквозѣ̀ ты̀ про́йдеши та́мѡ:

²²не ѹ҆бо́йтесѧ ѿ ни́хъ, ѩ҆́кѡ гд҇ь бг҃ъ на́шъ са́мъ побо́ретъ по ва́съ.

²³И҆ моли́хсѧ гд҇ви во ѻ҆́но вре́мѧ, глаго́лѧ:

²⁴гд҇и бж҃е, ты̀ нача́лъ є҆сѝ пока́зовати твоемѹ̀ рабѹ̀ крѣ́пость твою̀ и҆ си́лѹ твою̀, и҆ рѹ́кѹ крѣ́пкѹю и҆ мы́шцѹ высо́кѹю: кто́ бо є҆́сть бг҃ъ на нб҃сѝ и҆лѝ на землѝ, и҆́же сотвори́тъ, ѩ҆́коже сотвори́лъ є҆сѝ ты̀, и҆ по крѣ́пости твое́й;

²⁵преше́дъ ѹ҆̀бо ѹ҆ви́ждѹ зе́млю благѹ́ю сїю̀, ѩ҆́же ѡ҆б̾ ѻ҆нѹ̀ странѹ̀ ї҆ѻрда́на, го́рѹ сїю̀ бла́гѹ и҆ а҆нтїлїва́нъ.

²⁶И҆ презрѣ́ мѧ гд҇ь ва́съ ра́ди, и҆ не послѹ́ша менѐ, и҆ речѐ гд҇ь ко мнѣ̀: довлѣ́етъ тѝ, не приложѝ къ семѹ̀ глаго́лати словесѐ сегѡ̀:

²⁷взы́ди на ве́рхъ горы̀ и҆зсѣ́ченыѧ и҆ воззрѝ ѻ҆чи́ма твои́ма къ мо́рю и҆ сѣ́верѹ, и҆ ю҆́гѹ и҆ на восто́ки, и҆ ви́ждь ѻ҆чи́ма твои́ма, ѩ҆́кѡ не пре́йдеши ї҆ѻрда́на сегѡ̀:

²⁸и҆ заповѣ́ждь ї҆исѹ́сѹ, и҆ ѹ҆крѣпѝ є҆го̀, и҆ ѹ҆тѣ́ши є҆го̀: ѩ҆́кѡ се́й пре́йдетъ пред̾ лице́мъ люді́й си́хъ, и҆ се́й раздѣли́тъ и҆̀мъ въ наслѣ́дїе всю̀ зе́млю, ю҆́же є҆сѝ ви́дѣлъ.

²⁹И҆ пребы́хомъ во ю҆до́ли бли́з̾ до́мѹ фогѡ́рова.