Read Библия Церковнославянская Второзако́нїе 32 Bible Online

Второзако́нїе 32 - Библия Церковнославянская bible

Второзако́нїе 32

¹Вонмѝ, нб҃о, и҆ возглаго́лю, и҆ да слы́шитъ землѧ̀ глаго́лы ѹ҆́стъ мои́хъ,

²да ча́етсѧ ѩ҆́кѡ до́ждь вѣща́нїе моѐ, и҆ да сни́дѹтъ ѩ҆́кѡ роса̀ глаго́ли моѝ, ѩ҆́кѡ тѹ́ча на тро́скотъ и҆ ѩ҆́кѡ и҆́ней на сѣ́но:

³ѩ҆́кѡ и҆́мѧ гд҇не призва́хъ, дади́те вели́чїе бг҃ѹ на́шемѹ.

⁴Бг҃ъ, и҆́стинна дѣла̀ є҆гѡ̀, и҆ всѝ пѹтїѐ є҆гѡ̀ сѹ́дъ: бг҃ъ вѣ́ренъ, и҆ нѣ́сть непра́вды въ не́мъ: првднъ и҆ прпдбенъ гд҇ь.

⁵Согрѣши́ша, не тогѡ̀ ча҄да порѡ́чнаѧ: ро́де стропти́вый и҆ развраще́нный,

⁶сїѧ҄ ли гд҇еви воздаетѐ, сі́и лю́дїе бѹ́їи и҆ не мѹ́дри; не са́мъ ли се́й ѻ҆ц҃ъ тво́й стѧжа́ тѧ, и҆ сотвори́ тѧ, и҆ созда́ тѧ;

⁷Помѧни́те дни҄ вѣ҄чныѧ, разѹмѣ́йте лѣ҄та ро́да родѡ́въ: вопросѝ ѻ҆тца̀ твоего̀, и҆ возвѣсти́тъ тебѣ̀, ста́рцы твоѧ҄, и҆ рекѹ́тъ тебѣ̀.

⁸Є҆гда̀ раздѣлѧ́ше вы́шнїй ѩ҆зы́ки, ѩ҆́кѡ разсѣ́ѧ сы́ны а҆да́мѡвы, поста́ви предѣ́лы ѩ҆зы́кѡвъ по числѹ̀ а҆́гг҃лъ бж҃їихъ,

⁹и҆ бы́сть ча́сть гд҇нѧ, лю́дїе є҆гѡ̀ ї҆а́кѡвъ, ѹ҆́же наслѣ́дїѧ є҆гѡ̀ ї҆и҃ль:

¹⁰ѹ҆довлѝ є҆го̀ въ пѹсты́ни, въ жа́жди зно́ѧ въ безво́днѣ: ѡ҆бы́де є҆го̀ и҆ наказа̀ є҆го̀, и҆ сохранѝ є҆го̀ ѩ҆́кѡ зѣ́ницѹ ѻ҆́ка:

¹¹ѩ҆́кѡ ѻ҆ре́лъ покры̀ гнѣздо̀ своѐ, и҆ на птенцы̀ своѧ҄ возжелѣ̀: просте́ръ крилѣ҄ своѝ и҆ прїѧ́тъ и҆̀хъ, и҆ под̾ѧ́тъ и҆̀хъ на ра҄мѹ своє́ю.

¹²Гд҇ь є҆ди́нъ вожда́ше и҆̀хъ, и҆ не бѣ̀ съ ни́ми бо́гъ чѹ́ждь:

¹³возведѐ ѧ҆̀ на си́лѹ землѝ, насы́ти и҆̀хъ жи҄тъ се́лныхъ: сса́ша ме́дъ и҆з̾ ка́мене и҆ є҆ле́й ѿ тве́рда ка́мене,

¹⁴ма́сло кра́вїе и҆ млеко̀ ѻ҆́вчее съ тѹ́комъ а҆́гнчимъ и҆ ѻ҆́внимъ сынѡ́въ ю҆́нчихъ и҆ ко́злихъ, съ тѹ́комъ пшени́чнымъ, и҆ кро́вь гро́здовѹ пїѧ́хѹ вїно̀.

¹⁵И҆ ѩ҆дѐ ї҆а́кѡвъ и҆ насы́тисѧ, и҆ ѿве́ржесѧ возлю́бленный: ѹ҆ты̀, ѹ҆толстѣ̀, разширѣ̀: и҆ ѡ҆ста́ви бг҃а сотво́ршаго є҆го̀, и҆ ѿстѹпѝ ѿ бг҃а сп҃са своегѡ̀.

¹⁶Прогнѣ́ваша мѧ̀ ѡ҆ чѹжди́хъ, и҆ въ ме́рзостехъ свои́хъ преѡгорчи́ша мѧ̀.

¹⁷Пожро́ша бѣсовѡ́мъ, а҆ не бг҃ѹ, богѡ́мъ, и҆́хже не вѣ́дѣша: но́ви и҆ секра́ти {неда́вни} прїидо́ша, и҆́хже не вѣ́дѣша ѻ҆тцы̀ и҆́хъ.

¹⁸Бг҃а ро́ждшаго тѧ̀ ѡ҆ста́вилъ є҆сѝ и҆ забы́лъ є҆сѝ бг҃а пита́ющаго тѧ̀.

¹⁹И҆ ви́дѣ гд҇ь, и҆ возревнова̀, и҆ раздражи́сѧ за гнѣ́въ сынѡ́въ и҆́хъ и҆ дще́рей,

²⁰и҆ речѐ: ѿвращѹ̀ лицѐ моѐ ѿ ни́хъ и҆ покажѹ̀, что̀ бѹ́детъ и҆̀мъ напослѣ́докъ, ѩ҆́кѡ ро́дъ развраще́нъ є҆́сть, сы́нове, и҆̀мже нѣ́сть вѣ́ры въ ни́хъ:

²¹ті́и раздражи́ша мѧ̀ не ѡ҆ бз҃ѣ, прогнѣ́ваша мѧ̀ во їдѡлѣхъ свои́хъ: и҆ а҆́зъ раздражѹ̀ и҆̀хъ не ѡ҆ ѩ҆зы́цѣ, ѡ҆ ѩ҆зы́цѣ же неразѹ́мливѣ прогнѣ́ваю и҆̀хъ:

²²ѩ҆́кѡ ѻ҆́гнь возгори́тсѧ ѿ ѩ҆́рости моеѧ̀, разжже́тсѧ до а҆́да преиспо́днѧгѡ, снѣ́стъ зе́млю и҆ жи҄та є҆ѧ̀, попали́тъ ѡ҆снова҄нїѧ го́ръ:

²³соберѹ̀ на ни́хъ ѕла҄ѧ, и҆ стрѣ́лы моѧ҄ сконча́ю въ ни́хъ:

²⁴та́юще гла́домъ и҆ снѣ́дїю пти́цъ, и҆ го́рбъ неисцѣ́ленъ: зѹ́бы ѕвѣрі́й послю̀ въ нѧ̀, съ ѩ҆́ростїю пресмыка́ющихсѧ по землѝ:

²⁵ѿвнѣ̀ ѡ҆безча́дитъ и҆̀хъ ме́чь, и҆ ѿ хра́мѡвъ и҆́хъ стра́хъ: ю҆́ноша съ дѣ́вою, ссѹ́щее съ соверше́ннымъ ста́рцемъ.

²⁶Рѣ́хъ: разсѣ́ю и҆̀хъ, ѹ҆ста́влю же ѿ человѣ҄къ па́мѧть и҆́хъ:

²⁷то́кмѡ за гнѣ́въ врагѡ́въ, да не долголѣ́тствѹютъ, и҆ да не налѧ́гѹтъ сѹпоста́ти, да не рекѹ́тъ: рѹка̀ на́ша высока̀, и҆ не гд҇ь сотворѝ сїѧ҄ всѧ҄:

²⁸ѩ҆́кѡ ѩ҆зы́къ погѹби́вый совѣ́тъ є҆́сть, и҆ нѣ́сть въ ни́хъ хѹдо́жества, не смы́слиша разѹмѣ́ти:

²⁹сїѧ҄ всѧ҄ да прїи́мѹтъ во грѧдѹ́щее лѣ́то.

³⁰Ка́кѡ пожене́тъ є҆ди́нъ ты́сѧщы, и҆ два̀ дви́гнета тмы҄, а҆́ще не бг҃ъ ѿдадѐ и҆̀хъ, и҆ гд҇ь предадѐ и҆̀хъ;

³¹Не сѹ́ть бо бо́зи и҆́хъ, ѩ҆́кѡ бг҃ъ на́шъ: врази́ же на́ши неразѹ́мливи.

³²Ѿ вїногра́дѡвъ бо содо́мскихъ вїногра́дъ и҆́хъ, и҆ розга̀ и҆́хъ ѿ гомо́рры: гро́здъ и҆́хъ гро́здъ же́лчи, гро́здъ го́рести и҆́хъ:

³³ѩ҆́рость ѕмїє́въ вїно̀ и҆́хъ, и҆ ѩ҆́рость а҆́спїдѡвъ неисцѣ́льна.

³⁴Не сїѧ҄ ли всѧ҄ собра́шасѧ ѹ҆ менє̀ и҆ запечатлѣ́шасѧ въ сокро́вищахъ мои́хъ;

³⁵Въ де́нь ѿмще́нїѧ возда́мъ, во вре́мѧ є҆гда̀ соблазни́тсѧ нога̀ и҆́хъ: ѩ҆́кѡ бли́з̾ де́нь поги́бели и҆́хъ, и҆ предстоѧ́тъ готѡ́ваѧ ва́мъ:

³⁶ѩ҆́кѡ сѹди́ти и҆́мать гд҇ь лю́демъ свои҄мъ, и҆ ѡ҆ рабѣ́хъ свои́хъ ѹ҆моле́нъ бѹ́детъ: ви́дѣ бо и҆̀хъ разсла́блєнны и҆ и҆ста́ѧвшѧ во вре́мѧ и҆ и҆знемо́гшѧ.

³⁷И҆ речѐ гд҇ь: гдѣ̀ сѹ́ть бо́зи и҆́хъ, на ни́хже ѹ҆пова́ша,

³⁸и҆́хже тѹ́къ же́ртвъ и҆́хъ ѩ҆дѧ́сте, и҆ пїѧ́сте вїно̀ тре́бъ и҆́хъ; да воскре́снѹтъ и҆ помо́гѹтъ ва́мъ, и҆ бѹ́дѹтъ ва́мъ покрови́тєли.

³⁹Ви́дите, ви́дите, ѩ҆́кѡ а҆́зъ є҆́смь, и҆ нѣ́сть бг҃ъ ра́звѣ менє̀: а҆́зъ ѹ҆бїю̀ и҆ жи́ти сотворю̀: поражѹ̀ и҆ а҆́зъ и҆сцѣлю̀, и҆ нѣ́сть и҆́же и҆́зметъ ѿ рѹкѹ̀ моє́ю:

⁴⁰ѩ҆́кѡ воздви́гнѹ на нб҃о рѹ́кѹ мою̀, и҆ кленѹ́сѧ десни́цею мое́ю, и҆ рекѹ̀: живѹ̀ а҆́зъ во вѣ́ки:

⁴¹ѩ҆́кѡ поѡстрю̀ ѩ҆́коже мо́лнїю ме́чь мо́й, и҆ прїи́метъ сѹ́дъ рѹка̀ моѧ̀, и҆ возда́мъ ме́сть врагѡ́мъ и҆ ненави́дѧщымъ мѧ̀ возда́мъ:

⁴²ѹ҆пою̀ стрѣ́лы моѧ҄ ѿ кро́ве, и҆ ме́чь мо́й снѣ́стъ мѧса̀ ѿ кро́ве ѩ҆́звеныхъ и҆ плѣне́нїѧ, ѿ гла́въ кнѧзе́й ѩ҆зы́ческихъ.

⁴³Возвесели́тесѧ, нб҃са̀, кѹ́пнѡ съ ни́мъ, и҆ да покло́нѧтсѧ є҆мѹ̀ всѝ а҆́гг҃ли бж҃їи: возвесели́тесѧ, ѩ҆зы́цы, съ людьмѝ є҆гѡ̀, и҆ да ѹ҆крѣпѧ́тсѧ є҆мѹ̀ всѝ сы́нове бж҃їи: ѩ҆́кѡ кро́вь сынѡ́въ свои́хъ ѿмща́етъ и҆ ѿмсти́тъ, и҆ возда́стъ ме́сть врагѡ́мъ и҆ ненави́дѧщымъ є҆го̀ возда́стъ: и҆ ѡ҆ч҇титъ гд҇ь зе́млю люді́й свои́хъ.

⁴⁴И҆ написа̀ мѡѷсе́й пѣ́снь сїю̀ въ то́й де́нь, и҆ наѹчѝ є҆́й сы́ны ї҆и҃лєвы: и҆ вни́де мѡѷсе́й къ лю́демъ и҆ глаго́ла всѧ҄ словеса̀ зако́на сегѡ̀ во ѹ҆́шы лю́демъ, са́мъ и҆ ї҆исѹ́съ наѵи́нъ.

⁴⁵И҆ сконча̀ мѡѷсе́й глаго́лѧ словеса̀ сїѧ҄ всѧ҄ всемѹ̀ ї҆и҃лю,

⁴⁶и҆ речѐ къ ни҄мъ: внемли́те се́рдцемъ ва́шимъ всѧ҄ словеса̀ сїѧ҄, ѩ҆̀же а҆́зъ засвидѣ́телствѹю ва́мъ дне́сь, ѩ҆̀же да заповѣ́сте сынѡ́мъ ва́шымъ, храни́ти и҆ твори́ти всѧ҄ словеса̀ зако́на сегѡ̀,

⁴⁷ѩ҆́кѡ не тще́тно сло́во сїѐ ва́мъ, занѐ сїѧ̀ жи́знь ва́ша, и҆ ра́ди сло́ва сегѡ̀ дѡ́лги дни҄ бѹ́дете на землѝ, на ню́же вы̀ прехо́дите ї҆ѻрда́нъ та́мѡ наслѣ́дити ю҆̀.

⁴⁸И҆ речѐ гд҇ь къ мѡѷсе́ю въ де́нь се́й, гл҃ѧ:

⁴⁹взы́ди на го́рѹ а҆варі́мъ, сїѧ̀ гора̀ нава́ѵъ, ѩ҆́же є҆́сть въ землѝ мѡа́вли прѧ́мѡ ї҆ерїхѡ́нѹ, и҆ ви́ждь зе́млю ханаа́ню, ю҆́же а҆́зъ даю̀ сынѡ́мъ ї҆и҃лєвымъ во ѡ҆бдержа́нїе:

⁵⁰и҆ сконча́йсѧ та́мѡ на горѣ̀, на ню́же восхо́диши, и҆ приложи́сѧ къ лю́демъ твои҄мъ, ѩ҆́коже ѹ҆́мре а҆арѡ́нъ бра́тъ тво́й на горѣ̀ ѡ҆́ръ и҆ приложи́сѧ къ лю́демъ свои҄мъ:

⁵¹поне́же не покори́стесѧ словесѝ моемѹ̀ въ сынѣ́хъ ї҆и҃левыхъ ѹ҆ воды̀ [пререка́нїѧ] ка́дисъ въ пѹсты́ни сі́нъ, поне́же не ѡ҆свѧти́сте менѐ въ сынѣ́хъ ї҆и҃левыхъ:

⁵²ѩ҆́кѡ прѧ́мѡ ѹ҆́зриши зе́млю, и҆ та́мѡ не вни́деши, ю҆́же даю̀ сынѡ́мъ ї҆и҃лєвымъ.