Read Библия Церковнославянская Второзако́нїе 33 Bible Online

Второзако́нїе 33 - Библия Церковнославянская bible

Второзако́нїе 33

¹И҆ сїѐ благослове́нїе, и҆́мже благословѝ мѡѷсе́й человѣ́къ бж҃їй сы́ны ї҆и҃лєвы пре́жде сконча́нїѧ своегѡ̀,

²и҆ речѐ: гд҇ь ѿ сїна́и прїи́де, и҆ ѩ҆ви́сѧ ѿ сиі́ра на́мъ, и҆ приспѣ̀ ѿ горы̀ фара́ни, и҆ прїи́де со тма́ми ст҃ы́хъ, ѡ҆деснѹ́ю є҆гѡ̀ а҆́гг҃ли съ ни́мъ,

³и҆ пощадѣ̀ лю́ди своѧ҄: и҆ всѝ ѡ҆свѧще́ннїи под̾ рѹка́ми твои́ми, и҆ сі́и под̾ тобо́ю сѹ́ть.

⁴И҆ прїѧ̀ ѿ слове́съ є҆гѡ̀ зако́нъ, є҆го́же заповѣ́да на́мъ мѡѷсе́й, наслѣ́дїе со́нмѹ ї҆а́кѡвлю:

⁵и҆ бѹ́детъ въ возлю́бленнѣмъ кнѧ́зь, собра́вшымсѧ кнѧзє́мъ людски҄мъ кѹ́пнѡ съ племены̀ ї҆и҃левыми.

⁶Да живе́тъ рѹви́мъ, и҆ да не ѹ҆́мретъ, и҆ сѷмеѡ́нъ да бѹ́детъ мно́гъ число́мъ.

⁷И҆ сїѐ ї҆ѹ́дѣ: ѹ҆слы́ши, гд҇и, гла́съ ї҆ѹ́динъ и҆ въ лю́ди є҆гѡ̀ вни́ди: рѹ́цѣ є҆гѡ̀ побо́рютъ по не́мъ, и҆ помо́щникъ на врагѝ є҆гѡ̀ да бѹ́деши.

⁸И҆ леѵі́ю речѐ: дади́те леѵі́ю ѩ҆влє́ннаѧ є҆гѡ̀, и҆ и҆́стинѹ є҆гѡ̀ мѹ́жѹ преподо́бнѹ, є҆го́же и҆скѹси́ша и҆скѹше́нїемъ, ѹ҆кори́ша є҆го̀ ѹ҆ воды̀ [пререка́нїѧ]:

⁹глаго́лѧй ѻ҆тцѹ̀ своемѹ̀ и҆ ма́тери свое́й: не ви́дѣхъ тебѐ: и҆ бра́тїи своеѧ̀ не позна̀, и҆ сынѡ́въ свои́хъ не ѹ҆вѣ́дѣ: сохранѝ словеса̀ твоѧ҄ и҆ завѣ́тъ тво́й соблюдѐ:

¹⁰ѩ҆вѧ́тъ ѡ҆правда҄нїѧ твоѧ҄ ї҆а́кѡвѹ и҆ зако́нъ тво́й ї҆и҃лю: возложа́тъ ѳѷмїа́мъ во гнѣ́вѣ твое́мъ всегда̀ на ѻ҆лта́рь тво́й:

¹¹блг҇вѝ, гд҇и, крѣ́пость є҆гѡ̀ и҆ дѣла̀ рѹкѹ̀ є҆гѡ̀ прїимѝ: поразѝ чресла̀ воста́вшихъ на него̀ врагѡ́въ є҆гѡ̀, и҆ ненави́дѧщїи є҆го̀ да не воста́нѹтъ.

¹²И҆ венїамі́нѹ речѐ: возлю́бленный гд҇емъ ѹ҆пова́ѧй всели́тсѧ (въ не́мъ), и҆ бг҃ъ ѡ҆сѣнѧ́етъ є҆го̀ во всѧ҄ дни҄, и҆ посредѣ̀ ра́менъ є҆гѡ̀ почѝ.

¹³И҆ ї҆ѡ́сифови речѐ: ѿ блг҇ве́нїѧ гд҇нѧ землѧ̀ є҆гѡ̀, ѿ красо́тъ небе́сныхъ и҆ росы̀, и҆ ѿ бе́зднъ и҆сто́чникѡвъ ни́зѹ,

¹⁴и҆ во вре́мѧ плодѡ́въ со́лнечныхъ ѡ҆браще́нїй, и҆ ѿ схожде́нїй мч҇ныхъ,

¹⁵и҆ ѿ верха̀ го́ръ нача́ла, и҆ ѿ верха̀ холмѡ́въ вѣ́чныхъ,

¹⁶и҆ по вре́мени землѝ и҆сполне́нїѧ: и҆ прїѧ҄тнаѧ ѩ҆ви́вшемѹсѧ въ кѹпинѣ̀, да прїи́дѹтъ на главѹ̀ ї҆ѡ́сифѹ, и҆ на версѣ̀ просла́вивыйсѧ въ бра́тїи.

¹⁷Перворо́дный ю҆нца̀ добро́та є҆гѡ̀, ро́зи є҆диноро́га ро́зи є҆гѡ̀: и҆́ми ѩ҆зы́ки и҆збоде́тъ вкѹ́пѣ да́же до кра́ѧ землѝ: сїѧ҄ тмы҄ є҆фре́мѡвы, и҆ сїѧ҄ ты́сѧщи манассї҄ины.

¹⁸И҆ завѹлѡ́нѹ речѐ: возвесели́сѧ, завѹлѡ́не, во и҆схо́дѣ твое́мъ, и҆ ї҆ссаха́ре, въ селе́нїихъ твои́хъ:

¹⁹ѩ҆зы́ки потребѧ́тъ: и҆ призове́те та́мѡ, и҆ пожре́те та́мѡ же́ртвѹ пра́вды: ѩ҆́кѡ бога́тство морско́е воздои́тъ тѧ̀, и҆ кѹ҄пли ѿ ѩ҆зы҄къ при мо́ри живѹ́щихъ.

²⁰И҆ га́дѹ речѐ: блг҇ве́нъ разширѧ́ѧй га́да: ѩ҆́кѡ ле́въ почѝ, сокрѹши́вый мы́шцѹ и҆ кнѧ́зѧ:

²¹и҆ ви́дѣ нача́тки своѧ҄, ѩ҆́кѡ та́мѡ раздѣли́сѧ землѧ̀, кнѧзе́й со́бранныхъ вкѹ́пѣ съ нача҄лники людски́ми: пра́вдѹ гд҇ь сотворѝ и҆ сѹ́дъ сво́й со ї҆и҃лемъ.

²²И҆ да́нѹ речѐ: да́нъ, скѵ́менъ льво́въ, и҆ и҆зско́читъ ѿ васа́на.

²³И҆ нефѳалі́мѹ речѐ: нефѳалі́мъ насыще́нїе прїѧ́тныхъ, и҆ да насы́титсѧ блг҇ве́нїемъ ѿ гд҇а: мо́ре и҆ ю҆́гъ наслѣ́дитъ.

²⁴И҆ а҆си́рѹ речѐ: блг҇ве́нъ ѿ {па́че} ча҄дъ а҆си́ръ, и҆ бѹ́детъ прїѧ́тенъ бра́тїи свое́й: ѡ҆мо́читъ въ є҆ле́й но́гѹ свою̀:

²⁵желѣ́зо и҆ мѣ́дь сапо́гъ є҆гѡ̀ бѹ́детъ, и҆ а҆́ки дни҄ твоѧ҄ крѣ́пость твоѧ̀.

²⁶Нѣ́сть ѩ҆́коже бг҃ъ возлю́бленнагѡ: восходѧ́й на нб҃о помо́щникъ тво́й, и҆ великолѣ́пый въ тве́рди:

²⁷и҆ покры́етъ тѧ̀ бж҃їе нача́ло, и҆ под̾ крѣ́постїю мы́шцей вѣ́чныхъ: и҆ ѿжене́тъ ѿ лица̀ твоегѡ̀ врага̀, гл҃ѧ: да поги́бнеши:

²⁸и҆ всели́тсѧ ї҆и҃ль ѹ҆пова́ѧ є҆ди́нъ на землѝ ї҆а́кѡвли въ вїнѣ̀ и҆ пшени́цѣ: и҆ не́бо є҆мѹ̀ ѡ҆́блачно росо́ю.

²⁹Блаже́нъ є҆сѝ, ї҆и҃лю: кто̀ подо́бенъ тебѣ̀, лю́дїе спаса́емїи ѿ гд҇а; защи́титъ помо́щникъ тво́й, и҆ ме́чь хвала̀ твоѧ̀: и҆ солжѹ́тъ тебѣ̀ вразѝ твоѝ, и҆ ты̀ на вы́ю и҆́хъ настѹ́пиши.