Read Библия Церковнославянская Второзако́нїе 34 Bible Online

Второзако́нїе 34 - Библия Церковнославянская bible

Второзако́нїе 34

¹И҆ взы́де мѡѷсе́й ѿ а҆равѡ́ѳа мѡа́влѧ на го́рѹ нава́ѵъ, на ве́рхъ фазга̀, ѩ҆́же є҆́сть прѧ́мѡ ї҆ерїхѡ́нѹ: и҆ показа̀ є҆мѹ̀ гд҇ь всю̀ зе́млю галаа́дскѹ да́же до да́на,

²и҆ всю̀ зе́млю нефѳалі́млю, и҆ всю̀ зе́млю є҆фре́мовѹ и҆ манассі́инѹ, и҆ всю̀ зе́млю ї҆ѹ́динѹ да́же до мо́рѧ послѣ́днѧгѡ,

³и҆ пѹсты́ню и҆ ѡ҆крє́стнаѧ (се́ла) ї҆ерїхѡ́на, гра́дъ фі́нїкѡвъ да́же до сигѡ́ра,

⁴и҆ речѐ гд҇ь къ мѡѷсе́ю: сїѧ̀ землѧ̀, є҆́юже клѧ́хсѧ а҆враа́мѹ и҆ ї҆саа́кѹ и҆ ї҆а́кѡвѹ, гл҃ѧ: сѣ́мени ва́шемѹ да́мъ ю҆̀: и҆ показа́хъ ю҆̀ ѻ҆чесе́мъ твои҄мъ, и҆ та́мѡ не вни́деши.

⁵И҆ сконча́сѧ та́мѡ мѡѷсе́й ра́бъ гд҇ень въ землѝ мѡа́вли сло́вомъ гд҇нимъ.

⁶И҆ погребо́ша є҆го̀ въ землѝ мѡа́вли бли́з̾ до́мѹ фогѡ́рова. И҆ не ѹ҆вѣ́да никто́же погребе́нїѧ є҆гѡ̀ да́же до днѐ сегѡ̀.

⁷Мѡѷсе́ю же бѣ̀ сто̀ и҆ два́десѧть лѣ́тъ, є҆гда̀ сконча́сѧ: не ѡ҆темнѣ́стѣ ѻ҆́чи є҆гѡ̀, ни и҆стлѣ́ста ѹ҆стнѣ̀ є҆гѡ̀.

⁸И҆ пла́кашасѧ сы́нове ї҆и҃лєвы мѡѷсе́а во а҆равѡ́ѳѣ мѡа́вли ѹ҆ ї҆ѻрда́на бли́з̾ ї҆ерїхѡ́на три́десѧть дні́й. И҆ сконча́шасѧ дні́е пла́ча сѣ́тованїѧ ѡ҆ мѡѷсе́и.

⁹И҆ ї҆исѹ́съ сы́нъ наѵи́нъ напо́лнисѧ дх҃а ра́зѹма: возложи́ бо мѡѷсе́й рѹ́цѣ своѝ на него̀. И҆ послѹ́шаша є҆гѡ̀ сы́нове ї҆и҃лєвы, и҆ сотвори́ша ѩ҆́коже заповѣ́да гд҇ь мѡѷсе́ю.

¹⁰И҆ не воста̀ ктомѹ̀ про҇ро́къ во ї҆и҃ли ѩ҆́коже мѡѷсе́й, є҆го́же позна̀ гд҇ь лице́мъ къ лицѹ̀,

¹¹во всѣ́хъ зна́менїихъ и҆ чѹдесѣ́хъ, є҆го́же посла̀ гд҇ь сотвори́ти ѧ҆̀ въ землѝ є҆гѵ́петстѣй фараѡ́нѹ и҆ рабѡ́мъ є҆гѡ̀ и҆ все́й землѝ є҆гѡ̀,

¹²ди҄внаѧ вели҄каѧ, и҆ рѹ́кѹ крѣ́пкѹю (и҆ мы́шцѹ высо́кѹю), ѩ҆̀же сотворѝ мѡѷсе́й пред̾ всѣ́мъ ї҆и҃лемъ.