Read Библия Церковнославянская Ѿ ї҆ѡа́нна 18 Bible Online

Ѿ ї҆ѡа́нна 18 - Библия Церковнославянская bible

Ѿ ї҆ѡа́нна 18

¹(И҆) сїѧ҄ ре́къ ї҆и҃съ, и҆зы́де со ѹ҆чн҃ки҄ свои́ми на ѡ҆́нъ по́лъ пото́ка ке́дрска, и҆дѣ́же бѣ̀ вертогра́дъ, въ ѻ҆́ньже вни́де са́мъ и҆ ѹ҆чн҃цы̀ є҆гѡ̀:

²вѣ́дѧше же [и҆] ї҆ѹ́да предаѧ́й є҆го̀ мѣ́сто, ѩ҆́кѡ мно́жицею собира́шесѧ ї҆и҃съ тѹ̀ со ѹ҆чн҃кѝ свои́ми.

³Ї҆ѹ́да ѹ҆̀бо прїе́мь спі́рѹ и҆ ѿ а҆рхїерє́й и҆ фарїсє́й слѹги҄, прїи́де та́мѡ со свѣти́лы и҆ свѣща́ми и҆ ѻ҆рѹ҄жїи.

⁴Ї҆и҃съ же вѣ́дый всѧ҄ грѧдѹ҄щаѧ на́нь, и҆зше́дъ речѐ и҆̀мъ: когѡ̀ и҆́щете;

⁵Ѿвѣща́ша є҆мѹ̀: ї҆и҃са назѡре́а. Гл҃а и҆̀мъ ї҆и҃съ: а҆́зъ є҆́смь. Стоѧ́ше же и҆ ї҆ѹ́да, и҆́же предаѧ́ше є҆го̀, съ ни́ми.

⁶Є҆гда́ же речѐ и҆̀мъ: а҆́зъ є҆́смь, и҆до́ша вспѧ́ть и҆ падо́ша на землѝ.

⁷Па́ки ѹ҆̀бо вопросѝ и҆̀хъ (ї҆и҃съ): когѡ̀ и҆́щете; Ѻ҆ни́ же рѣ́ша: ї҆и҃са назѡре́а.

⁸Ѿвѣща̀ ї҆и҃съ: рѣ́хъ ва́мъ, ѩ҆́кѡ а҆́зъ є҆́смь: а҆́ще ѹ҆̀бо менє̀ и҆́щете, ѡ҆ста́вите си́хъ и҆тѝ:

⁹да сбѹ́детсѧ сло́во, є҆́же речѐ, ѩ҆́кѡ и҆̀хже да́лъ є҆сѝ мнѣ̀, не погѹби́хъ ѿ ни́хъ ни когѡ́же.

¹⁰Сі́мѡнъ же пе́тръ, и҆мы́й но́жъ, и҆звлечѐ є҆го̀, и҆ ѹ҆да́ри а҆рхїере́ова раба̀, и҆ ѹ҆рѣ́за є҆мѹ̀ ѹ҆́хо десно́е: бѣ́ же и҆́мѧ рабѹ̀ ма́лхъ.

¹¹Речѐ ѹ҆̀бо ї҆и҃съ петро́ви, вонзѝ но́жъ въ но́жницѹ: ча́шѹ, ю҆́же дадѐ мнѣ̀ ѻ҆ц҃ъ, не и҆́мамъ ли пи́ти є҆ѧ̀,

¹²спі́ра же и҆ ты́сѧщникъ и҆ слѹги҄ ї҆ѹде́йстїи ѩ҆́ша ї҆и҃са и҆ свѧза́ша є҆го̀,

¹³и҆ ведо́ша є҆го̀ ко а҆́ннѣ пе́рвѣе: бѣ́ бо те́сть каїа́фѣ, и҆́же бѣ̀ а҆рхїере́й лѣ́тѹ томѹ̀:

¹⁴бѣ́ же каїа́фа да́вый совѣ́тъ ї҆ѹде́ѡмъ, ѩ҆́кѡ ѹ҆́не є҆́сть є҆ди́номѹ человѣ́кѹ ѹ҆мре́ти за лю́ди.

¹⁵По ї҆и҃сѣ же и҆дѧ́ше сі́мѡнъ пе́тръ и҆ дрѹгі́й ѹ҆чн҃къ: ѹ҆чн҃къ же то́й бѣ̀ зна́емь а҆рхїере́ови, и҆ вни́де со ї҆и҃сомъ во дво́ръ а҆рхїере́овъ:

¹⁶пе́тръ же стоѧ́ше при две́рехъ внѣ̀. И҆зы́де ѹ҆̀бо ѹ҆чн҃къ то́й, и҆́же бѣ̀ зна́емь а҆рхїере́ови, и҆ речѐ две́рницѣ, и҆ введѐ петра̀.

¹⁷Глаго́ла же раба̀ две́рница петро́ви: є҆да̀ и҆ ты̀ ѹ҆чн҃къ є҆сѝ чл҃вѣ́ка сегѡ̀; Глаго́ла ѻ҆́нъ: нѣ́смь.

¹⁸Стоѧ́хѹ же рабѝ и҆ слѹги҄ ѻ҆́гнь сотво́рше, ѩ҆́кѡ зима̀ бѣ̀, и҆ грѣ́ѧхѹсѧ: бѣ́ же съ ни́ми пе́тръ стоѧ̀ и҆ грѣ́ѧсѧ.

¹⁹А҆рхїере́й же вопросѝ ї҆и҃са ѡ҆ ѹ҆чн҃цѣ́хъ є҆гѡ̀ и҆ ѡ҆ ѹ҆ч҃нїи є҆гѡ̀.

²⁰Ѿвѣща̀ є҆мѹ̀ ї҆и҃съ: а҆́зъ не ѡ҆бинѹ́ѧсѧ гл҃ахъ мі́рѹ: а҆́зъ всегда̀ ѹ҆ча́хъ на со́нмищахъ и҆ въ це́ркви, и҆дѣ́же всегда̀ ї҆ѹде́є сне́млютсѧ, и҆ та́й не гл҃ахъ ничесѡ́же:

²¹что́ мѧ вопроша́еши; вопросѝ слы́шавшихъ, что̀ гл҃ахъ и҆̀мъ: сѐ, сі́и вѣ́дѧтъ, ѩ҆̀же рѣ́хъ а҆́зъ.

²²Сїѧ҄ же ре́кшѹ є҆мѹ̀, є҆ди́нъ ѿ предстоѧ́щихъ слѹ́гъ ѹ҆да́ри въ лани́тѹ ї҆и҃са, ре́къ: та́кѡ ли ѿвѣщава́еши а҆рхїере́ови;

²³Ѿвѣща̀ є҆мѹ̀ ї҆и҃съ: а҆́ще ѕлѣ̀ гл҃ахъ, свидѣ́телствѹй ѡ҆ ѕлѣ̀: а҆́ще ли до́брѣ, что́ мѧ бїе́ши;

²⁴Посла́ же є҆го̀ а҆́нна свѧ́зана къ каїа́фѣ а҆рхїере́ови.

²⁵Бѣ́ же сі́мѡнъ пе́тръ стоѧ̀ и҆ грѣ́ѧсѧ. Рѣ́ша же є҆мѹ̀: є҆да̀ и҆ ты̀ ѿ ѹ҆чн҃къ є҆гѡ̀ є҆сѝ; Ѻ҆́нъ (же) ѿве́ржесѧ и҆ речѐ: нѣ́смь.

²⁶Глаго́ла є҆ди́нъ ѿ ра҄бъ а҆рхїере́овыхъ, ю҆́жика сы́й, є҆мѹ́же пе́тръ ѹ҆рѣ́за ѹ҆́хо: не а҆́зъ ли тѧ̀ ви́дѣхъ въ вертогра́дѣ съ ни́мъ;

²⁷Па́ки ѹ҆̀бо пе́тръ ѿве́ржесѧ, и҆ а҆́бїе пѣ́тель возгласѝ.

²⁸(За҄ 59.) Ведо́ша же ї҆и҃са ѿ каїа́фы въ претѡ́ръ. Бѣ́ же ѹ҆́тро: и҆ ті́и не внидо́ша въ претѡ́ръ, да не ѡ҆сквернѧ́тсѧ, но да ѩ҆дѧ́тъ па́схѹ.

²⁹И҆зы́де же пїла́тъ къ ни҄мъ во́нъ и҆ речѐ: кѹ́ю рѣ́чь {винѹ̀} прино́сите на человѣ́ка сего̀;

³⁰Ѿвѣща́ша и҆ рѣ́ша є҆мѹ̀: а҆́ще не бы̀ (бы́лъ) се́й ѕлодѣ́й, не бы́хомъ пре́дали є҆го̀ тебѣ̀.

³¹Рече́ же и҆̀мъ пїла́тъ: поими́те є҆го̀ вы̀ и҆ по зако́нѹ ва́шемѹ сѹди́те є҆мѹ̀. Рѣ́ша же є҆мѹ̀ ї҆ѹде́є: на́мъ не досто́итъ ѹ҆би́ти ни кого́же:

³²да сло́во ї҆и҃сово сбѹ́детсѧ, є҆́же речѐ, назна́менѹѧ, ко́ею сме́ртїю хотѧ́ше ѹ҆мре́ти.

³³Вни́де ѹ҆̀бо па́ки пїла́тъ въ претѡ́ръ, и҆ пригласѝ ї҆и҃са, и҆ речѐ є҆мѹ̀: ты́ ли є҆сѝ цр҃ь ї҆ѹде́йскъ;

³⁴Ѿвѣща̀ є҆мѹ̀ ї҆и҃съ: ѡ҆ себѣ́ ли ты̀ сїѐ глаго́леши, и҆лѝ и҆ні́и тебѣ̀ реко́ша ѡ҆ мнѣ̀;

³⁵Ѿвѣща̀ пїла́тъ: є҆да̀ а҆́зъ жидови́нъ є҆́смь; ро́дъ тво́й и҆ а҆рхїере́є преда́ша тѧ̀ мнѣ̀: что̀ є҆сѝ сотвори́лъ;

³⁶Ѿвѣща̀ ї҆и҃съ: цр҇тво моѐ нѣ́сть ѿ мі́ра сегѡ̀: а҆́ще ѿ мі́ра сегѡ̀ бы́ло бы цр҇тво моѐ, слѹги҄ моѝ (ѹ҆́бѡ) подвиза́лисѧ бы́ша, да не пре́данъ бы́хъ бы́лъ ї҆ѹде́ѡмъ: нн҃ѣ же цр҇тво моѐ нѣ́сть ѿсю́дѹ.

³⁷Рече́ же є҆мѹ̀ пїла́тъ: ѹ҆̀бо цр҃ь ли є҆сѝ ты̀; Ѿвѣща̀ ї҆и҃съ: ты̀ глаго́леши, ѩ҆́кѡ цр҃ь є҆́смь а҆́зъ: а҆́зъ на сїѐ роди́хсѧ и҆ на сїѐ прїидо́хъ въ мі́ръ, да свидѣ́телствѹю и҆́стинѹ: (и҆) всѧ́къ, и҆́же є҆́сть ѿ и҆́стины, послѹ́шаетъ гла́са моегѡ̀.

³⁸Глаго́ла є҆мѹ̀ пїла́тъ: что̀ є҆́сть и҆́стина; И҆ сїѐ ре́къ, па́ки и҆зы́де ко ї҆ѹде́ѡмъ, и҆ глаго́ла и҆̀мъ: а҆́зъ ни є҆ди́ныѧ вины̀ ѡ҆брѣта́ю въ не́мъ:

³⁹є҆́сть же ѡ҆бы́чай ва́мъ, да є҆ди́наго ва́мъ ѿпѹщѹ̀ на па́схѹ: хо́щете ли ѹ҆̀бо, (да) ѿпѹщѹ̀ ва́мъ цр҃ѧ̀ ї҆ѹде́йска;

⁴⁰Возопи́ша же па́ки всѝ, глаго́люще: не сего̀, но вара́ввѹ. Бѣ́ же вара́вва разбо́йникъ.