Read Библия Церковнославянская Дѣѧ҄нїѧ 18 Bible Online

Дѣѧ҄нїѧ 18 - Библия Церковнославянская bible

Дѣѧ҄нїѧ 18

¹По си́хъ же ѿлѹчи́всѧ па́ѵелъ ѿ а҆ѳи́нъ, прїи́де въ корі́нѳъ:

²и҆ ѡ҆брѣ́тъ нѣ́коего ї҆ѹде́анина и҆́менемъ а҆кѵ́лѹ, по́нтѧнина ро́домъ, но́вѡ прише́дша ѿ ї҆талі́и, и҆ прїскі́ллѹ женѹ̀ є҆гѡ̀: занѐ повелѣ́лъ бѧ́ше клаѵді́й ѿлѹчи́тисѧ всѣ҄мъ ї҆ѹде́ємъ ѿ ри́ма: прїи́де къ ни҄мъ,

³и҆ занѐ є҆динохѹдо́жникѡмъ бы́ти и҆̀мъ, пребы́сть ѹ҆ ни́хъ и҆ дѣ́лаше: бѧ́хѹ бо скинотво́рцы хи́тростїю.

⁴Стѧза́шесѧ же на со́нмищахъ по всѧ҄ сѹббѡ҄ты и҆ препира́ше ї҆ѹдє́и и҆ є҆́ллины.

⁵И҆ є҆гда̀ снидо́ста ѿ македо́нїи сі́ла же и҆ тїмоѳе́й, тѹжа́ше дѹ́хомъ па́ѵелъ, свидѣ́телствѹѧ ї҆ѹде́ѡмъ ї҆и҃са бы́ти хр҇та̀.

⁶Проти́вѧщымсѧ же и҆̀мъ и҆ хѹ́лѧщымъ, ѡ҆трѧ́съ ри҄зы своѧ҄, речѐ къ ни҄мъ: кро́вь ва́ша на глава́хъ ва́шихъ: чи́стъ а҆́зъ, ѿнн҃ѣ во ѩ҆зы́ки и҆дѹ̀.

⁷И҆ преше́дъ ѿтѹ́дѹ, прїи́де въ до́мъ нѣ́коегѡ и҆́менемъ ї҆ѹ́ста, чтѹ́ща бг҃а, є҆мѹ́же хра́мина бѣ̀ вскра́й со́нмища.

⁸Крі́спъ же нача́лникъ собо́ра вѣ́рова гд҇еви со всѣ́мъ до́момъ свои́мъ, и҆ мно́зи ѿ корі́нѳѧнъ слы́шавше вѣ́ровахѹ и҆ креща́хѹсѧ.

⁹Рече́ же гд҇ь въ видѣ́нїи нощнѣ́мъ па́ѵлѹ: не бо́йсѧ, но глаго́ли и҆ да не ѹ҆мо́лкнеши,

¹⁰занѐ а҆́зъ є҆́смь съ тобо́ю, и҆ никто́же приложи́тъ ѡ҆ѕло́бити тѧ̀: занѐ лю́дїе сѹ́ть мѝ мно́зи во гра́дѣ се́мъ.

¹¹Пребы́сть же та́мѡ лѣ́то и҆ мц҇ъ ше́сть, ѹ҆чѧ̀ въ ни́хъ сло́вѹ бж҃їю.

¹²Галлїѡ́нѹ же а҆нѳѷпа́тѹ сѹ́щѹ во а҆ха́їи, нападо́ша є҆динодѹ́шнѡ ї҆ѹде́є на па́ѵла и҆ приведо́ша є҆го̀ на сѹди́лище,

¹³глаго́люще, ѩ҆́кѡ проти́вѹ зако́нѹ се́й ѹ҆вѣщава́етъ человѣ́ки чти́ти бг҃а.

¹⁴Хотѧ́щѹ же па́ѵлѹ ѿве́рсти ѹ҆ста̀, речѐ галлїѡ́нъ ко ї҆ѹде́ємъ: а҆́ще ѹ҆̀бо непра́вда была́ бы ка́ѧ и҆лѝ дѣ́ло ѕло́е, ѽ, ї҆ѹде́є, по сло́вѹ послѹ́шалъ бы́хъ ва́съ:

¹⁵а҆́ще ли же стѧза҄нїѧ сѹ́ть ѡ҆ словесѝ и҆ ѡ҆ и҆́менѣхъ и҆ ѡ҆ зако́нѣ ва́шемъ, вѣ́дите са́ми: сѹдїѧ́ бо а҆́зъ си҄мъ не хощѹ̀ бы́ти.

¹⁶И҆ и҆згна̀ и҆̀хъ ѿ сѹди́лища.

¹⁷Є҆́мше же всѝ є҆́ллини сѡсѳе́на нача́лника собо́ра, бїѧ́хѹ пред̾ сѹди́лищемъ: и҆ ни є҆ди́но ѡ҆ си́хъ галлїѡ́нѹ радѣ́нїе бы́сть.

¹⁸Па́ѵелъ же, є҆щѐ пребы́въ дни҄ довѡ́лны и҆ цѣлова́въ бра́тїю, ѿплы̀ въ сѷрі́ю, и҆ съ ни́мъ а҆кѵ́ла и҆ прїскі́лла, ѡ҆стри́гъ главѹ̀ въ кегхре́ихъ: ѡ҆бре́ксѧ бо бѣ̀.

¹⁹Приста́ же во є҆фе́сѣ и҆ тѣ́хъ ѡ҆ста́ви та́мѡ, са́мъ же вше́дъ въ со́нмище, стѧза́шесѧ со ї҆ѹдє́и.

²⁰Молѧ́щымъ же и҆̀мъ є҆го̀ на мно́го вре́мѧ пребы́ти ѹ҆ ни́хъ, не и҆зво́ли,

²¹но ѿрече́сѧ и҆̀мъ, глаго́лѧ, ѩ҆́кѡ подоба́етъ мѝ всѧ́кѡ пра́здникъ грѧдѹ́щїй сотвори́ти во ї҆ер҇ли́мѣ: па́ки же возвращѹ́сѧ къ ва́мъ, бг҃ѹ хотѧ́щѹ. И҆ ѿвезе́сѧ ѿ є҆фе́са: а҆кѵ́ла же и҆ прїскі́лла ѡ҆ста́ста во є҆фе́сѣ.

²²(За҄ 41.) И҆ соше́дъ въ кесарі́ю, возше́дъ и҆ цѣлова́въ цр҃ковь, сни́де во а҆нтїохі́ю,

²³и҆ сотво́рь вре́мѧ нѣ́кое, и҆зы́де, проходѧ̀ порѧ́дѹ галаті́йскѹю странѹ̀ и҆ фрѷгі́ю, ѹ҆твержда́ѧ всѧ҄ ѹ҆чн҃кѝ.

²⁴Ї҆ѹде́анинъ же нѣ́кто, а҆поллѡ́съ и҆́менемъ, а҆леѯа́ндрѧнинъ ро́домъ, мѹ́жъ слове́сенъ, прїи́де во є҆фе́съ, си́ленъ сы́й въ кни́гахъ.

²⁵Се́й бѣ̀ ѡ҆глаше́нъ пѹтѝ гд҇ню, и҆ горѧ̀ дѹ́хомъ, глаго́лаше и҆ ѹ҆ча́ше и҆звѣ́стнѡ ѩ҆̀же ѡ҆ гд҇ѣ, вѣ́дый то́кмѡ креще́нїе ї҆ѡа́нново.

²⁶Се́й же нача́тъ дерза́ти на со́нмищихъ. Слы҄шавша же є҆го̀ а҆кѵ́ла и҆ прїскі́лла, прїѧ́ста є҆го̀ и҆ и҆звѣ́стнѣе томѹ̀ сказа́ста пѹ́ть гд҇ень.

²⁷Хотѧ́щѹ же є҆мѹ̀ преитѝ во а҆ха́їю, предпосла́вше бра́тїѧ написа́ша ѹ҆чн҃кѡ́мъ прїѧ́ти є҆го̀: и҆́же прише́дъ та́мѡ посо́бствова мно́гѡ вѣ́ровавшымъ блгдтїю:

²⁸тве́рдѡ бо ї҆ѹдє́и не престаѧ̀ ѡ҆блича́ше пред̾ людьмѝ, сказѹ́ѧ писа́ньми, ї҆и҃са бы́ти хр҇та̀.