Read Библия Церковнославянская Ї҆исѹ́са Наѵи́на 11 Bible Online

Ї҆исѹ́са Наѵи́на 11 - Библия Церковнославянская bible

Ї҆исѹ́са Наѵи́на 11

¹Є҆гда́ же ѹ҆слы́ша ї҆аві́нъ ца́рь а҆сѡ́рскъ, посла̀ ко ї҆ѡва́вѹ царю̀ мадѡ́нскѹ, и҆ къ царю̀ семерѡ́нскѹ и҆ къ царю̀ а҆хїа́вскѹ,

²и҆ къ царє́мъ и҆̀же въ сїдѡ́нѣ вели́цѣмъ и҆ въ го́рнѣй, и҆ въ а҆́равѹ прѧ́мѡ хенере́ѳѹ, и҆ на полѧ́нѹ, и҆ въ нафеддѡ́ръ,

³и҆ къ примѡ́рскимъ ханане́амъ ѿ востѡ́къ, и҆ къ примѡ́рскимъ а҆морре́ѡмъ и҆ хетте́ѡмъ, и҆ ферезе́ѡмъ и҆ ї҆евѹсе́ѡмъ, и҆̀же на горѣ̀, и҆ є҆ѵе́ѡмъ, и҆ и҆̀же под̾ а҆ермѡ́номъ, въ зе́млю массифа̀.

⁴И҆ и҆зыдо́ша сі́и и҆ ца́рїе и҆́хъ съ ни́ми, лю́дїе мно́зи, ѩ҆́кѡ песо́къ и҆́же при краѝ мо́рѧ мно́жествомъ, и҆ ко́ни и҆ колєсни́цы мнѡ́ги ѕѣлѡ̀.

⁵И҆ снидо́шасѧ всѝ ца́рїе сі́и, и҆ прїидо́ша вкѹ́пѣ, и҆ ѡ҆полчи́шасѧ при водѣ̀ маррѡ́нъ воева́ти на ї҆и҃лѧ.

⁶И҆ речѐ гд҇ь ко ї҆исѹ́сѹ: не ѹ҆бо́йсѧ ѿ лица̀ и҆́хъ, ѩ҆́кѡ заѹ́тра въ се́й ча́съ а҆́зъ преда́мъ и҆̀хъ ѩ҆́звенныхъ пред̾ сы́ны ї҆и҃лєвы: ко́нємъ и҆́хъ жи҄лы пресѣче́ши и҆ колєсни́цы и҆́хъ да сожже́ши ѻ҆гне́мъ.

⁷И҆ прїи́де ї҆исѹ́съ и҆ всѝ лю́дїе вои́нстїи съ ни́мъ на ни́хъ къ водѣ̀ маррѡ́нстѣй внеза́пѹ, и҆ нападо́ша на нѧ̀ въ го́рнѣй.

⁸И҆ предадѐ и҆̀хъ гд҇ь под̾ рѹ́цѣ ї҆и҃лєвы: и҆ сѣкѹ́ще и҆̀хъ, прогна́ша да́же до сїдѡ́на вели́кагѡ и҆ до масрефѡ́ѳъ-маі́ма и҆ до по́ль масси́фскихъ къ восто́кѡмъ: и҆ и҆зсѣко́ша и҆̀хъ, до́ндеже не ѡ҆ста́сѧ въ ни́хъ ни є҆ди́нъ цѣ́лъ и҆ и҆збѣ́гшїй.

⁹И҆ сотворѝ и҆̀мъ ї҆исѹ́съ, ѩ҆́коже заповѣ́да є҆мѹ̀ гд҇ь: ко́нємъ и҆́хъ жи҄лы пресѣчѐ и҆ колєсни́цы и҆́хъ сожжѐ ѻ҆гне́мъ.

¹⁰И҆ ѡ҆брати́сѧ ї҆исѹ́съ въ то̀ вре́мѧ, и҆ взѧ̀ а҆сѡ́ръ, и҆ царѧ̀ є҆гѡ̀ ѹ҆бѝ мече́мъ: а҆сѡ́ръ бо бѣ̀ пре́жде ѡ҆блада́ющїй всѣ́ми ца́рствы си́ми:

¹¹и҆ и҆збѝ всѐ ды́шѹщее, є҆́же въ не́мъ бы́сть, ѻ҆́стрїемъ меча̀, и҆ потреби́ша всѧ҄, и҆ не ѡ҆ста́сѧ въ не́мъ всѐ ды́шѹщее: и҆ а҆сѡ́ръ запали́ша ѻ҆гне́мъ.

¹²И҆ всѧ҄ гра́ды ца́рствъ си́хъ и҆ всѧ҄ цари҄ и҆́хъ взѧ̀ ї҆исѹ́съ и҆ и҆збѝ ѧ҆̀ мече́мъ, и҆ потребѝ и҆̀хъ, ѩ҆́коже повелѣ̀ и҆̀мъ мѡѷсе́й ра́бъ гд҇ень.

¹³Но всѧ҄ гра́ды крѣ҄пки не запалѝ ї҆и҃ль, то́чїю а҆сѡ́ръ є҆ди́нъ запалѝ ї҆исѹ́съ.

¹⁴И҆ всѧ҄ кѡры́сти и҆́хъ и҆ всѧ҄ скоты̀ и҆́хъ плѣни́ша себѣ̀ сы́нове ї҆и҃лєвы: люді́й же всѣ́хъ потреби́ша мече́мъ, до́ндеже погѹби́ша и҆̀хъ, и҆ не ѡ҆ста́виша ѿ ни́хъ ни є҆ди́нагѡ ды́шѹщагѡ.

¹⁵ѩ҆́коже повелѣ̀ гд҇ь мѡѷсе́ю рабѹ̀ своемѹ̀, та́кѡ мѡѷсе́й заповѣ́да ї҆исѹ́сѹ: и҆ та́кѡ сотворѝ ї҆исѹ́съ, не престѹпѝ ни є҆ди́нагѡ же ѿ всѣ́хъ, ѩ҆̀же заповѣ́да гд҇ь мѡѷсе́ю.

¹⁶И҆ взѧ̀ ї҆исѹ́съ всю̀ зе́млю го́рнѹю и҆ всю̀ зе́млю наге́въ, и҆ всю̀ зе́млю госо́мскѹ, и҆ ра́внѹю, и҆ ѩ҆́же на за́падъ, и҆ го́рѹ ї҆и҃левѹ, и҆ по́лѧ ѩ҆̀же при горѣ̀,

¹⁷ѿ горы̀ хелха̀, и҆ ѩ҆́же восхо́дитъ къ сеі́рѹ, и҆ да́же до валга́да, и҆ по́ле лїва́на под̾ горо́ю а҆ермѡ́нъ: и҆ всѧ҄ цари҄ и҆́хъ взѧ̀ и҆ и҆збѝ.

¹⁸И҆ мнѡ́ги дни҄ сотворѝ ї҆исѹ́съ съ цари҄ си́ми бра́нь:

¹⁹и҆ не бѣ̀ ни є҆ди́нагѡ гра́да, є҆гѡ́же не предадѐ гд҇ь сынѡ́мъ ї҆и҃лєвымъ, кромѣ̀ є҆ѵе́а ѡ҆бита́ющагѡ въ гаваѡ́нѣ: всѣ́хъ взѧ́ша бра́нїю:

²⁰ѩ҆́кѡ гд҇емъ бы́сть ѹ҆крѣпи́тисѧ и҆́хъ се́рдцѹ, сопроти́витисѧ на бра́ни проти́вѹ ї҆и҃лѧ, да потребѧ́тъ и҆̀хъ, ѩ҆́кѡ да не да́стсѧ и҆̀мъ ми́лость, но да потребѧ́тсѧ, ѩ҆́коже гл҃а гд҇ь къ мѡѷсе́ю.

²¹И҆ прїи́де ї҆исѹ́съ въ то̀ вре́мѧ, и҆ потребѝ (всѧ҄) є҆накі́мы ѿ го́рныѧ, ѿ хеврѡ́на и҆ ѿ даві́ра и҆ ѿ а҆нѡ́ва, и҆ ѿ всеѧ̀ горы̀ ї҆и҃левы и҆ ѿ всеѧ̀ горы̀ ї҆ѹ́дины, съ гра҄ды и҆́хъ, и҆ потребѝ ѧ҆̀ ї҆исѹ́съ:

²²не ѡ҆ста́сѧ ни є҆ди́нъ є҆накі́мъ ѿ сынѡ́въ ї҆и҃левыхъ, но то́чїю въ га́зѣ и҆ въ ге́ѳѣ и҆ во а҆сидѡ́ѳѣ ѡ҆ста́шасѧ.

²³И҆ взѧ̀ ї҆исѹ́съ всю̀ зе́млю, ѩ҆́коже заповѣ́да гд҇ь мѡѷсе́ю: и҆ дадѐ ю҆̀ ї҆исѹ́съ въ наслѣ́дїе ї҆и҃лю, раздѣле́нїемъ по племенѡ́мъ и҆́хъ. И҆ преста̀ землѧ̀ вою́ема бы́ти.