Read Библия Церковнославянская Ї҆исѹ́са Наѵи́на 14 Bible Online

Ї҆исѹ́са Наѵи́на 14 - Библия Церковнославянская bible

Ї҆исѹ́са Наѵи́на 14

¹И҆ сі́и наслѣ́довавшїи ѿ сынѡ́въ ї҆и҃левыхъ въ землѝ ханаа́нстѣй, и҆̀мже раздѣли́ша ю҆̀ въ наслѣ́дїе є҆леаза́ръ жре́цъ и҆ ї҆исѹ́съ сы́нъ наѵи́нъ и҆ кнѧ҄зи ѻ҆те́чествъ племе́нъ сынѡ́въ ї҆и҃левыхъ:

²по жре́бїємъ наслѣ́диша, ѩ҆́коже заповѣ́да гд҇ь мѡѷсе́омъ да́ти девѧтѝ племенѡ́мъ и҆ полпле́мени (манассі́инѹ),

³даде́ бо мѡѷсе́й наслѣ́дїе двѹ̀ племенѡ́мъ и҆ полпле́мени манассі́инѹ ѡ҆б̾ ѻ҆нѹ̀ странѹ̀ ї҆ѻрда́на: леѵі́тѡмъ же не дадѐ жре́бїѧ въ ни́хъ:

⁴зане́же бы́ша сы́нове ї҆ѡ́сифѡвы два̀ племена̀, манассі́ино и҆ є҆фре́мле: и҆ не даде́сѧ ча́сти въ землѝ леѵі́тѡмъ, но то́кмѡ гра́ды ѡ҆бита́ти, и҆ предгра҄дїѧ скотѡ́мъ и҆́хъ, и҆ скоты̀ и҆́хъ.

⁵ѩ҆́коже заповѣ́да гд҇ь мѡѷсе́ю, та́кѡ сотвори́ша сы́нове ї҆и҃лєвы и҆ раздѣли́ша зе́млю.

⁶И҆ прїидо́ша сы́нове ї҆ѹ҄дины ко ї҆исѹ́сѹ въ галга́лы. И҆ речѐ къ немѹ̀ хале́въ ї҆ефонні́инъ кенезе́й: ты̀ вѣ́си сло́во, є҆́же гл҃а гд҇ь къ мѡѷсе́ю человѣ́кѹ бж҃їю ѡ҆ мнѣ̀ и҆ ѡ҆ тебѣ̀ въ ка́дисъ-варнѝ:

⁷четы́редесѧти бо лѣ́тъ бѣ́хъ, є҆гда̀ посла́ мѧ мѡѷсе́й ра́бъ гд҇ень ѿ ка́дисъ-варнѝ соглѧ́дати зе́млю: и҆ ѿвѣща́хъ є҆мѹ̀ сло́во по се́рдцѹ є҆гѡ̀:

⁸бра́тїѧ моѧ҄ ходи́вшїи со мно́ю преврати́ша се́рдце люді́й, а҆́зъ же приложи́хсѧ послѣ́довати гд҇еви бг҃ѹ моемѹ̀:

⁹и҆ клѧ́тсѧ мѡѷсе́й въ то́й де́нь, глаго́лѧ: землѧ̀, на ню́же возше́лъ є҆сѝ, тебѣ̀ бѹ́детъ въ жре́бїй и҆ ча́дѡмъ твои҄мъ во вѣ́къ, ѩ҆́кѡ приложи́лсѧ є҆сѝ послѣ́довати гд҇ѹ бг҃ѹ моемѹ̀:

¹⁰и҆ нн҃ѣ препита́ мѧ гд҇ь, ѩ҆́коже речѐ, сїѐ четы́редесѧть и҆ пѧ́тое лѣ́то, ѿне́лѣже гл҃а гд҇ь сло́во сїѐ къ мѡѷсе́ю, и҆ хожда́ше ї҆и҃ль въ пѹсты́ни: и҆ нн҃ѣ сѐ, мѝ дне́сь ѻ҆́смьдесѧтъ и҆ пѧ́ть лѣ́тъ:

¹¹є҆щѐ є҆́смь дне́сь могі́й, ѩ҆́коже є҆гда̀ посла́ мѧ мѡѷсе́й: та́кѡ и҆ нн҃ѣ могѹ̀ входи́ти и҆ и҆сходи́ти на бра́нь:

¹²и҆ нн҃ѣ прошѹ̀ ѹ҆ тебє̀ горы̀ сеѧ̀, ѩ҆́коже речѐ гд҇ь въ де́нь ѡ҆́нъ, ѩ҆́кѡ ты̀ слы́шалъ є҆сѝ сло́во сїѐ въ де́нь ѻ҆́ный: нн҃ѣ же є҆накі́ми та́мѡ сѹ́ть, гра́ды твє́рды и҆ вели́цы: а҆́ще ѹ҆̀бо бѹ́детъ гд҇ь со мно́ю, потреблю̀ и҆̀хъ, ѩ҆́коже рече́ ми гд҇ь.

¹³И҆ благословѝ є҆го̀ ї҆исѹ́съ, и҆ дадѐ хеврѡ́нъ хале́вѹ сы́нѹ ї҆ефонні́инѹ, сы́нѹ кенезе́инѹ въ жре́бїй.

¹⁴Сегѡ̀ ра́ди бы́сть хеврѡ́нъ хале́вѹ ї҆ефонні́инѹ кенезе́инѹ въ жре́бїй да́же до днѐ сегѡ̀: поне́же возслѣ́дова повелѣ́нїю гд҇а бг҃а ї҆и҃лева.

¹⁵И҆́мѧ же хеврѡ́нѹ пре́жде бѧ́ше гра́дъ а҆рго́въ: митропо́ль є҆накі́млѧнъ се́й. И҆ почѝ землѧ̀ ѿ бра́ни.