Read Библия Церковнославянская Ї҆исѹ́са Наѵи́на 23 Bible Online

Ї҆исѹ́са Наѵи́на 23 - Библия Церковнославянская bible

Ї҆исѹ́са Наѵи́на 23

¹И҆ бы́сть по дне́хъ мно́зѣхъ, є҆гда̀ ѹ҆поко́и гд҇ь бг҃ъ ї҆и҃лѧ ѿ всѣ́хъ врагѡ́въ є҆гѡ̀ и҆̀же ѡ҆́крестъ, и҆ ї҆исѹ́съ состарѣ́сѧ проше́дъ дни҄.

²И҆ созва̀ ї҆исѹ́съ всѧ҄ сы́ны ї҆и҃лєвы и҆ старѣ҄йшины и҆́хъ, и҆ кнѧ҄зи и҆́хъ и҆ сѹдїи҄ и҆́хъ и҆ книгѡ́чїѧ и҆́хъ, и҆ речѐ къ ни҄мъ: а҆́зъ состарѣ́хсѧ и҆ проидо́хъ дни҄:

³вы́ же ви́дѣсте всѧ҄, є҆ли҄ка сотворѝ гд҇ь бг҃ъ ва́шъ всѣ҄мъ ѩ҆зы́кѡмъ си҄мъ ѿ лица̀ ва́шегѡ, занѐ гд҇ь бг҃ъ на́шъ спобо́рствовавый на́мъ:

⁴ви́дите, ѩ҆́кѡ низверго́хъ ва́мъ ѩ҆зы́ки ѡ҆ста́вшыѧсѧ ва́мъ сїѧ҄ во жре́бїихъ племенѡ́мъ ва́шымъ, ѿ ї҆ѻрда́на всѧ҄ ѩ҆зы́ки потреби́хъ, и҆ ѿ мо́рѧ вели́кагѡ, є҆́же ѡ҆предѣли́тъ на за́падъ со́лнца:

⁵гд҇ь же бг҃ъ ва́шъ са́мъ потреби́тъ и҆̀хъ ѿ лица̀ ва́шегѡ, до́ндеже поги́бнѹтъ, и҆ по́слетъ на нѧ̀ ѕвѣ҄ри ди҄вїѧ, до́ндеже потреби́тъ и҆̀хъ и҆ цари҄ и҆́хъ ѿ лица̀ ва́шегѡ, и҆ наслѣ́дите зе́млю и҆́хъ, ѩ҆́коже гл҃а ва́мъ гд҇ь бг҃ъ ва́шъ:

⁶ѹ҆крѣпи́тесѧ ѹ҆̀бо ѕѣлѡ̀ храни́ти и҆ твори́ти всѧ҄ напи҄саннаѧ въ кни́гахъ зако́на мѡѷсе́ова, да не ѹ҆клоните́сѧ ѿ негѡ̀ на де́сно и҆лѝ на лѣ́во:

⁷ѩ҆́кѡ да не вни́дете во ѩ҆зы́ки ѡ҆ста́вшыѧсѧ сїѧ҄, и҆ и҆мена̀ богѡ́въ и҆́хъ да не воз̾именѹ́ютсѧ въ ва́съ, нижѐ да клене́тесѧ и҆́ми, нижѐ да послѹ́жите и҆̀мъ, нижѐ поклони́тесѧ и҆̀мъ:

⁸но то́кмѡ гд҇ѹ бг҃ѹ ва́шемѹ прилѣпи́тесѧ, ѩ҆́коже твори́сте до сегѡ̀ днѐ:

⁹и҆ потребѝ гд҇ь ѿ лица̀ ва́шегѡ ѩ҆зы́ки вели҄ки и҆ си҄льны, и҆ никто̀ противоста̀ ва́мъ до сегѡ̀ днѐ:

¹⁰є҆ди́нъ ѿ ва́съ прогна̀ ты́сѧщы, ѩ҆́кѡ гд҇ь бг҃ъ ва́шъ спобо́рствоваше ва́мъ, ѩ҆́коже гл҃а ва́мъ:

¹¹и҆ сохрани́те ѕѣлѡ̀ люби́ти гд҇а бг҃а ва́шего:

¹²а҆́ще бо ѿвратите́сѧ и҆ приложите́сѧ ко ѡ҆ста́вшымсѧ ѩ҆зы́кѡмъ си҄мъ, и҆̀же съ ва́ми, и҆ бра́ки сотворитѐ съ ни́ми, и҆ смѣсите́сѧ съ ни́ми, и҆ ѻ҆нѝ съ ва́ми,

¹³вѣ́дѣнїемъ ѹ҆вѣ́дите, ѩ҆́кѡ не приложи́тъ гд҇ь потреби́ти ѩ҆зы́ки сїѧ҄ ѿ лица̀ ва́шегѡ: и҆ бѹ́дѹтъ ва́мъ въ сѣ҄ти и҆ въ собла́зны, и҆ въ гвѡ́здїѧ въ пѧта́хъ ва́шихъ и҆ въ стрѣ́лы во ѻ҆чесѣ́хъ ва́шихъ, до́ндеже поги́бнете ѿ землѝ благі́ѧ сеѧ̀, ю҆́же дадѐ ва́мъ гд҇ь бг҃ъ ва́шъ:

¹⁴а҆́зъ же дне́сь ѿхождѹ̀ въ пѹ́ть, ѩ҆́коже и҆ всѝ и҆̀же на землѝ: и҆ позна́ете всѣ́мъ се́рдцемъ ва́шимъ и҆ дѹше́ю ва́шею, ѩ҆́кѡ ни є҆ди́но сло́во ѿпадѐ ѿ всѣ́хъ слове́съ благи́хъ, ѩ҆̀же речѐ гд҇ь бг҃ъ ва́шъ къ ва́мъ: всѧ҄ прихо́дѧтъ ва́мъ, и҆ не ра́знствова ѿ ни́хъ ни є҆ди́но сло́во:

¹⁵и҆ бѹ́детъ, и҆́мже ѡ҆́бразомъ прихо́дѧтъ на ва́съ всѧ҄ словеса̀ дѡ́браѧ, ѩ҆̀же гл҃а гд҇ь бг҃ъ къ ва́мъ, та́кѡ наведе́тъ гд҇ь на вы̀ всѧ҄ словеса̀ ѕла҄ѧ, до́ндеже потреби́тъ вы̀ ѿ землѝ благі́ѧ сеѧ̀, ю҆́же дадѐ ва́мъ гд҇ь бг҃ъ ва́шъ:

¹⁶внегда̀ престѹ́пите завѣ́тъ гд҇а бг҃а ва́шегѡ, є҆го́же заповѣ́да ва́мъ, и҆ ше́дше послѹ́жите богѡ́мъ и҆ны҄мъ и҆ покло́нитесѧ и҆̀мъ: и҆ разгнѣ́ваетсѧ ѩ҆́ростїю гд҇ь на вы̀, и҆ поги́бнете ско́рѡ ѿ землѝ благі́ѧ, ю҆́же дадѐ гд҇ь ва́мъ.