Read Библия Церковнославянская Ї҆исѹ́са Наѵи́на 3 Bible Online

Ї҆исѹ́са Наѵи́на 3 - Библия Церковнославянская bible

Ї҆исѹ́са Наѵи́на 3

¹И҆ воста̀ заѹ́тра ї҆исѹ́съ, и҆ воздвиго́шасѧ и҆з̾ сатті́на, и҆ прїидо́ша до ї҆ѻрда́на то́й и҆ всѝ сы́нове ї҆и҃лєвы, и҆ ста́ша та́мѡ пре́жде не́же прейтѝ.

²И҆ бы́сть по трїе́хъ дне́хъ, проидо́ша книгѡ́чїѧ чрез̾ по́лкъ,

³и҆ заповѣ́даша лю́демъ, глаго́люще: є҆гда̀ ѹ҆́зрите кївѡ́тъ завѣ́та гд҇а бг҃а на́шегѡ, и҆ жерцы̀ на́шѧ, и҆ леѵі́ты воздвиза́ющыѧ є҆го̀, да воздви́гнетесѧ и҆ вы̀ ѿ мѣ́стъ ва́шихъ и҆ по́йдете в̾слѣ́дъ є҆гѡ̀:

⁴но пода́лѣе да бѹ́детъ междѹ̀ ва́ми и҆ ѻ҆́нымъ, є҆ли́кѡ двѣ̀ ты́сѧщы лакѡ́тъ ста́нете: не прибли́житесѧ къ немѹ̀, да ѹ҆вѣ́сте пѹ́ть, по немѹ́же по́йдете: не ходи́сте бо пѹте́мъ тѣ́мъ ни вчера̀, ни тре́тїѧгѡ днѐ.

⁵И҆ речѐ ї҆исѹ́съ къ лю́демъ: ѡ҆чи́ститесѧ наѹ́трїе, ѩ҆́кѡ заѹ́тра сотвори́тъ въ ва́съ гд҇ь чѹ҄днаѧ.

⁶И҆ речѐ ї҆исѹ́съ къ жерцє́мъ: воздви́гните кївѡ́тъ завѣ́та гд҇нѧ и҆ пред̾иди́те пред̾ людьмѝ. И҆ взѧ́ша жерцы̀ кївѡ́тъ завѣ́та гд҇нѧ и҆ и҆до́ша пред̾ людьмѝ.

⁷И҆ речѐ гд҇ь ко ї҆исѹ́сѹ: въ се́й де́нь начина́ю возвыша́ти тѧ̀ пред̾ всѣ́ми сынмѝ ї҆и҃левыми, да ѹ҆вѣ́дѧтъ, ѩ҆́коже бѣ́хъ съ мѡѷсе́омъ, та́кѡ бѹ́дѹ и҆ съ тобо́ю:

⁸и҆ нн҃ѣ заповѣ́ждь жерцє́мъ воздвиза́ющымъ кївѡ́тъ завѣ́та, глаго́лѧ: є҆гда̀ вни́дете на ча́сть воды̀ ї҆ѻрда́на, и҆ во ї҆ѻрда́нѣ ста́нете.

⁹И҆ речѐ ї҆исѹ́съ сынѡ́мъ ї҆и҃лєвымъ: пристѹпи́те сѣ́мѡ, и҆ слы́шите сло́во гд҇а бг҃а ва́шегѡ:

¹⁰въ си́хъ ѹ҆вѣ́сте, ѩ҆́кѡ гд҇ь живѧ́й въ ва́съ и҆ потреблѧ́ѧй потреби́тъ ѿ лица̀ ва́шегѡ ханане́а и҆ хетте́а, и҆ ферезе́а и҆ є҆ѵе́а, и҆ гергесе́а и҆ а҆морре́а и҆ ї҆евѹсе́а:

¹¹сѐ, кївѡ́тъ завѣ́та гд҇а всеѧ̀ землѝ прехо́дитъ ї҆ѻрда́нъ:

¹²и҆збери́те себѣ̀ двана́десѧть мѹже́й ѿ сынѡ́въ ї҆и҃левыхъ, є҆ди́наго ѿ коегѡ́ждо пле́мене,

¹³и҆ бѹ́детъ є҆гда̀ почі́ютъ но́зи жерцє́въ воздвиза́ющихъ кївѡ́тъ завѣ́та гд҇а всеѧ̀ землѝ въ водѣ̀ ї҆ѻрда́на, вода̀ ї҆ѻрда́нова ѡ҆скѹдѣ́етъ, вода́ же низтекѹ́щаѧ ста́нетъ.

¹⁴И҆ бы́сть є҆гда̀ воздви́гнѹшасѧ лю́дїе ѿ кѹ́щъ свои́хъ прейтѝ ї҆ѻрда́нъ, жерцы́ же воздвиго́ша кївѡ́тъ завѣ́та гд҇нѧ пред̾ людьмѝ:

¹⁵є҆гда́ же внидо́ша жерцы̀ воздви́жѹще кївѡ́тъ завѣ́та гд҇нѧ во ї҆ѻрда́нъ, и҆ но́зи жерцє́въ воздвиза́ющихъ кївѡ́тъ завѣ́та гд҇нѧ ѡ҆мочи́шасѧ въ ча́сти воды̀ ї҆ѻрда́на, ї҆ѻрда́нъ же наполнѧ́шесѧ во всѧ҄ краи҄ своѧ҄, ѩ҆́коже во дни҄ жа́твы пшени́цы:

¹⁶и҆ ста́ша во́ды текѹ́щыѧ свы́ше, ста̀ ѡ҆гѹстѣ́нїе є҆ди́но ѿлѹчи́вшеесѧ дале́че ѕѣлѡ̀ ѕѣлѡ̀ ѿ а҆дамѝ гра́да да́же до страны̀ карїаѳїарі́ма: низтекѹ́щаѧ же низтечѐ въ мо́ре а҆ра́вско, въ мо́ре сла́ное, до́ндеже до конца̀ ѡ҆скѹдѣ̀.

¹⁷И҆ лю́дїе стоѧ́хѹ прѧ́мѡ ї҆ерїхѡ́нѹ. И҆ ста́ша жерцы̀ воздвиза́ющїи кївѡ́тъ завѣ́та гд҇нѧ на сѹ́сѣ посредѣ̀ ї҆ѻрда́на: и҆ всѝ сы́нове ї҆и҃лєвы прехожда́хѹ по сѹ́хѹ, до́ндеже сконча́ша всѝ лю́дїе преходѧ́ще ї҆ѻрда́нъ.