Read Библия Церковнославянская Ї҆исѹ́са Наѵи́на 4 Bible Online

Ї҆исѹ́са Наѵи́на 4 - Библия Церковнославянская bible

Ї҆исѹ́са Наѵи́на 4

¹И҆ є҆гда̀ сконча́ша всѝ лю́дїе преходѧ́ще ї҆ѻрда́нъ, и҆ речѐ гд҇ь къ ї҆исѹ́сѹ, гл҃ѧ:

²поимѝ двана́десѧть мѹже́й ѿ люді́й, мѹ́жа є҆ди́наго ѿ коегѡ́ждо пле́мене,

³повелѝ и҆̀мъ, глаго́лѧ: возми́те ѿ среды̀ ї҆ѻрда́на, и҆дѣ́же стоѧ́ша но́зи жре́честїи, гото́выхъ двана́десѧть ка́меней, и҆ и҆зне́сше ѧ҆̀ съ собо́ю, положи́те въ полцѣ̀ ва́шемъ, и҆дѣ́же ста́нете та́мѡ въ нощѝ.

⁴И҆ призва́въ ї҆исѹ́съ двана́десѧть мѹже́й сла́вныхъ ѿ сынѡ́въ ї҆и҃левыхъ, є҆ди́наго ѿ коегѡ́ждо пле́мене, речѐ и҆̀мъ:

⁵и҆ди́те предо мно́ю пред̾ лице́мъ гд҇нимъ въ среди́нѹ ї҆ѻрда́на: и҆ взе́мъ ѿтѹ́дѹ кі́йждо ка́мень є҆ди́нъ да возложи́тъ на ра́мена своѧ҄, по числѹ̀ племе́нъ (сынѡ́въ) ї҆и҃левыхъ:

⁶да бѹ́дѹтъ ва́мъ сі́и въ зна́менїе посредѣ̀ ва́съ лежа́ще всегда̀, да є҆гда̀ вопро́ситъ тебѐ ѹ҆́трѡ сы́нъ тво́й, глаго́лѧ: что̀ сѹ́ть ка́менїе сїѐ ва́мъ;

⁷и҆ ты̀ возвѣсти́ши сы́нѹ твоемѹ̀, глаго́лѧ: ѩ҆́кѡ ѡ҆скѹдѣ̀ ї҆ѻрда́нъ рѣка̀ ѿ лица̀ кївѡ́та завѣ́та гд҇а всеѧ̀ землѝ, є҆гда̀ прехожда́ше є҆го̀, и҆ и҆зсѧ́че вода̀ ї҆ѻрда́нова: и҆ бѹ́дѹтъ ва́мъ ка́менїе сїѐ въ па́мѧть сынѡ́въ ї҆и҃левыхъ да́же до вѣ́ка.

⁸И҆ сотвори́ша та́кѡ сы́нове ї҆и҃лєвы, ѩ҆́коже заповѣ́да гд҇ь ї҆исѹ́сѹ: и҆ взе́мше двана́десѧть ка́меней ѿ среды̀ ї҆ѻрда́на, ѩ҆́коже заповѣ́да гд҇ь ї҆исѹ́сѹ въ сконча́нїи прехожде́нїѧ сынѡ́въ ї҆и҃левыхъ, и҆ принесо́ша и҆̀хъ съ собо́ю въ по́лкъ, и҆ положи́ша и҆̀хъ та́мѡ.

⁹Поста́ви же ї҆исѹ́съ и҆ дрѹгї҄ѧ двана́десѧть ка́меней въ са́мѣмъ ї҆ѻрда́нѣ на мѣ́стѣ, и҆дѣ́же стоѧ́хѹ но́зи жерцє́въ воздвиза́ющихъ кївѡ́тъ завѣ́та гд҇нѧ, и҆ сѹ́ть та́мѡ да́же до сегѡ̀ днѐ.

¹⁰Стоѧ́хѹ же жерцы̀ воздвиза́ющїи кївѡ́тъ завѣ́та гд҇нѧ во ї҆ѻрда́нѣ, до́ндеже сконча̀ ї҆исѹ́съ всѧ҄, є҆ли҄ка заповѣ́да гд҇ь ї҆исѹ́сѹ повѣ́дати лю́демъ, по всѣ҄мъ, є҆ли҄ка заповѣ́да мѡѷсе́й ї҆исѹ́сѹ: и҆ потща́шасѧ лю́дїе, и҆ преидо́ша.

¹¹И҆ бы́сть є҆гда̀ сконча́ша всѝ лю́дїе преходи́ти (ї҆ѻрда́нъ), пре́йде и҆ кївѡ́тъ завѣ́та гд҇нѧ, и҆ ка́менїе {Вмѣ́стѡ [ка́менїе] во и҆ны́хъ гре́ческихъ [жерцы̀].} пред̾ ни́ми.

¹²И҆ преидо́ша сы́нове рѹви҄мли и҆ сы́нове га́дѡвы и҆ по́лъ пле́мене манассі́ина ѹ҆стрѡ́ены пред̾ сынмѝ ї҆и҃лєвы, ѩ҆́коже заповѣ́да и҆̀мъ мѡѷсе́й:

¹³четы́редесѧть ты́сѧщъ воѡрѹже́ни на ра́ть преидо́ша пред̾ гд҇емъ на бра́нь ко гра́дѹ ї҆ерїхѡ́нѹ.

¹⁴Въ то́й де́нь возвели́чи гд҇ь ї҆исѹ́са пред̾ всѣ́мъ ро́домъ ї҆и҃левымъ: и҆ боѧ́хѹсѧ є҆гѡ̀, ѩ҆́коже боѧ́хѹсѧ мѡѷсе́а, є҆ли́ко вре́мѧ поживѐ.

¹⁵И҆ речѐ гд҇ь ко ї҆исѹ́сѹ, гл҃ѧ:

¹⁶заповѣ́ждь жерцє́мъ, воздвиза́ющымъ кївѡ́тъ завѣ́та свидѣ́нїѧ, и҆зстѹпи́ти и҆з̾ ї҆ѻрда́на.

¹⁷И҆ заповѣ́да ї҆исѹ́съ жерцє́мъ, глаго́лѧ: и҆зыди́те и҆з̾ ї҆ѻрда́на.

¹⁸И҆ бы́сть є҆гда̀ и҆зыдо́ша жерцы̀ воздвиза́ющїи кївѡ́тъ завѣ́та гд҇нѧ ѿ среды̀ ї҆ѻрда́на, и҆ поста́виша но́ги на сѹ́сѣ, и҆ ѹ҆стреми́сѧ вода̀ ї҆ѻрда́нова на мѣ́сто и҆ по́йде ѩ҆́коже вчера̀ и҆ тре́тїѧгѡ днѐ по всемѹ̀ кра́ю.

¹⁹И҆ лю́дїе взыдо́ша ѿ ї҆ѻрда́на въ десѧ́тый де́нь пе́рвагѡ мц҇а: и҆ ѡ҆полчи́шасѧ сы́нове ї҆и҃лєвы въ галга́лѣхъ на странѣ̀, ѩ҆́же на восто́къ со́лнца ѿ ї҆ерїхѡ́на.

²⁰И҆ двана́десѧть ка́мєнїѧ сїѧ҄, ѩ҆̀же взѧ̀ ѿ ї҆ѻрда́на, поста́ви ї҆исѹ́съ въ галга́лѣхъ, и҆ речѐ къ сынѡ́мъ ї҆и҃лєвымъ, глаго́лѧ:

²¹є҆гда̀ вопро́сѧтъ ва́съ сы́нове ва́ши, глаго́люще: что̀ сѹ́ть ка́менїе сїѐ;

²²возвѣсти́те сынѡ́мъ ва́шымъ: ѩ҆́кѡ по сѹ́хѹ пре́йде ї҆и҃ль ї҆ѻрда́нъ се́й,

²³и҆зсѹши́вшѹ гд҇ѹ бг҃ѹ ва́шемѹ во́дѹ ї҆ѻрда́ню пред̾ ни́ми, до́ндеже преидо́ша, ѩ҆́коже сотворѝ гд҇ь бг҃ъ ва́шъ чермно́мѹ мо́рю, є҆́же и҆зсѹшѝ гд҇ь бг҃ъ ва́шъ пред̾ ва́ми, до́ндеже преидо́хомъ:

²⁴да ѹ҆вѣ́дѧтъ всѝ ѩ҆зы́цы земні́и, ѩ҆́кѡ рѹка̀ гд҇нѧ крѣпка̀ є҆́сть, и҆ вы̀ да чте́те гд҇а бг҃а ва́шего во всѧ́кое вре́мѧ.