Read Библия Церковнославянская Ї҆исѹ́са Наѵи́на 8 Bible Online

Ї҆исѹ́са Наѵи́на 8 - Библия Церковнославянская bible

Ї҆исѹ́са Наѵи́на 8

¹И҆ речѐ гд҇ь ко ї҆исѹ́сѹ: не бо́йсѧ, нижѐ ѹ҆жаса́йсѧ: поимѝ съ собо́ю всѧ҄ мѹ́жы вои҄нскїѧ, и҆ воста́въ взы́ди въ га́й: сѐ, преда́хъ въ рѹ́цѣ твоѝ царѧ̀ га́йска и҆ зе́млю є҆гѡ̀, и҆ лю́ди є҆гѡ̀ и҆ гра́дъ є҆гѡ̀:

²и҆ да сотвори́ши га́ю и҆ царю̀ є҆гѡ̀, ѩ҆́коже сотвори́лъ є҆сѝ ї҆ерїхѡ́нѹ и҆ царю̀ є҆гѡ̀: и҆ плѣ́нъ є҆гѡ̀ и҆ скоты̀ є҆гѡ̀ да плѣни́ши себѣ̀: ѹ҆стро́й же себѣ̀ подса́дѹ гра́дѹ за собо́ю.

³И҆ воста̀ ї҆исѹ́съ и҆ всѝ мѹ́жїе вои́нстїи, да вни́дѹтъ въ га́й: и҆ и҆збра̀ ї҆исѹ́съ три́десѧть ты́сѧщъ мѹже́й вои́нскихъ си́льныхъ крѣ́постїю и҆ посла̀ и҆̀хъ но́щїю,

⁴и҆ заповѣ́да и҆̀мъ, глаго́лѧ: вы̀ скры́йтесѧ за гра́домъ: не дале́че бѹ́дите ѿ гра́да ѕѣлѡ̀, и҆ бѹ́дите всѝ гото́ви:

⁵а҆́зъ же и҆ всѝ лю́дїе и҆̀же со мно́ю пристѹ́пимъ ко гра́дѹ: и҆ бѹ́детъ є҆гда̀ и҆зы́дѹтъ живѹ́щїи въ гаѝ въ срѣ́тенїе на́мъ, ѩ҆́коже и҆ пре́жде, и҆ побѣ́гнемъ ѿ лица̀ и҆́хъ:

⁶и҆ є҆гда̀ и҆зы́дѹтъ в̾слѣ́дъ на́съ, ѿто́ргнемъ и҆̀хъ ѿ гра́да: и҆ рекѹ́тъ: бѣжа́тъ сі́и ѿ лица̀ на́шегѡ, ѩ҆́коже и҆ пре́жде:

⁷вы́ же воста́нете ѿ подса́ды, и҆ по́йдете во гра́дъ, и҆ преда́стъ є҆го̀ гд҇ь бг҃ъ на́шъ въ рѹ́цѣ ва́ши:

⁸и҆ бѹ́детъ є҆гда̀ во́змете гра́дъ, запали́те є҆го̀ ѻ҆гне́мъ, по словесѝ семѹ̀ сотвори́те: сѐ, заповѣ́даю ва́мъ.

⁹И҆ посла̀ и҆̀хъ ї҆исѹ́съ, и҆ и҆до́ша въ подса́дѹ: и҆ сѣдо́ша междѹ̀ веѳи́лемъ и҆ междѹ̀ га́їемъ, ѿ мо́рѧ га́їа.

¹⁰И҆ воста́въ ї҆исѹ́съ заѹ́тра, соглѧ́да лю́ди: и҆ взы́де са́мъ и҆ ста́рцы ї҆и҃лтестїи пред̾ людьмѝ въ га́й.

¹¹И҆ всѝ лю́дїе вои́нстїи съ ни́мъ взыдо́ша, и҆ и҆дѹ́ще прїидо́ша сопроти́въ гра́да ѿ восто́кѡвъ: и҆ подса҄ды гра́да ѿ мо́рѧ.

¹²И҆ ѡ҆полчи́шасѧ ѿ сѣ́вера га́їа, и҆ (бы́сть) де́брь междѹ̀ и҆́ми и҆ междѹ̀ га́їемъ. И҆ взѧ̀ ѩ҆́кѡ пѧ́ть ты́сѧщъ мѹже́й, и҆ положѝ и҆̀хъ на подса́дѹ междѹ̀ веѳи́лемъ и҆ га́їемъ ѿ за́пада га́їа.

¹³И҆ поста́виша лю́дїе ве́сь по́лкъ ѿ сѣ́вера гра́да, а҆ прѡ́чаѧ є҆гѡ̀ ѿ мо́рѧ гра́да. И҆ по́йде ї҆исѹ́съ въ но́щь ѻ҆́нѹ посредѣ̀ де́бри.

¹⁴И҆ бы́сть є҆гда̀ ѹ҆ви́дѣ ца́рь га́йскїй, потща́сѧ, и҆ воста̀ ра́нѡ и҆ и҆зы́де въ срѣ́тенїе и҆̀мъ прѧ́мѡ на бра́нь, са́мъ и҆ всѝ лю́дїе є҆гѡ̀ съ ни́мъ во вре́мѧ, пред̾ лице́мъ подса́ды: ѻ҆́нъ же не вѣ́дѧше, ѩ҆́кѡ подса́да є҆мѹ̀ є҆́сть за гра́домъ (є҆гѡ̀).

¹⁵И҆ ѹ҆ви́дѣ, и҆ ѿи́де ї҆исѹ́съ и҆ ве́сь лю́дъ ѿ лица̀ и҆́хъ, и҆ побѣжѐ пѹте́мъ пѹсты́ни.

¹⁶И҆ ѹ҆крѣпи́сѧ ве́сь лю́дъ гна́ти в̾слѣ́дъ и҆́хъ, и҆ погна́ша в̾слѣ́дъ сынѡ́въ ї҆и҃левыхъ, и҆ ѿстѹпи́ша ѿ гра́да.

¹⁷(И҆) не ѡ҆ста́сѧ никто́же въ гаѝ и҆ веѳи́ли, и҆́же не погна̀ в̾слѣ́дъ ї҆и҃лѧ: и҆ ѡ҆ста́виша гра́дъ ѿве́рстъ, и҆ гна́ша в̾слѣ́дъ ї҆и҃лѧ.

¹⁸И҆ речѐ гд҇ь ко ї҆исѹ́сѹ: прострѝ рѹ́кѹ твою̀ съ копїе́мъ, є҆́же въ рѹцѣ̀ твое́й, на гра́дъ, занѐ въ рѹ́кѹ твою̀ преда́хъ є҆го̀: и҆ подса҄ды воста́нѹтъ вско́рѣ ѿ мѣ́ста своегѡ̀. И҆ прострѐ ї҆исѹ́съ рѹ́кѹ свою̀ и҆ съ копїе́мъ на гра́дъ.

¹⁹И҆ подса҄ды воста́ша ско́рѡ ѿ мѣ́ста своегѡ̀: и҆ и҆зыдо́ша, є҆гда̀ прострѐ рѹ́кѹ, и҆ внидо́ша во гра́дъ, и҆ взѧ́ша є҆го̀: и҆ потща́вшесѧ запали́ша гра́дъ ѻ҆гне́мъ.

²⁰И҆ ѡ҆зрѣ́вшесѧ ѡ҆бита́тєли га́йстїи вспѧ́ть себє̀, ѹ҆зрѣ́ша ды́мъ восходѧ́щь ѿ гра́да до небесѐ, и҆ ктомѹ̀ не и҆мѣ́ша ка́мѡ побѣ́гнѹти, сѣ́мѡ и҆лѝ ѻ҆ва́мѡ: лю́дїе же бѣгѹ́щїи въ пѹсты́ню ѡ҆брати́шасѧ на гонѧ́щихъ.

²¹Ї҆исѹ́съ же и҆ ве́сь ї҆и҃ль ѹ҆ви́дѣша, ѩ҆́кѡ взѧ́ша подса҄ды гра́дъ, и҆ ѩ҆́кѡ восхо́дитъ ды́мъ гра́дный до небесѐ: и҆ ѡ҆брати́вшесѧ и҆зби́ша мѹже́й га́йскихъ.

²²И҆ сі́и и҆зыдо́ша и҆з̾ гра́да проти́вѹ и҆̀мъ, и҆ бы́ша посредѣ̀ полка̀ ї҆и҃лева, сі́и ѿсю́дѹ и҆ сі́и ѿѻнѹ́дѹ: и҆ и҆зби́ша и҆̀хъ, до́ндеже не ѡ҆ста́сѧ ни є҆ди́нъ ѿ ни́хъ цѣ́лъ, ни ѹ҆бѣжа̀.

²³И҆ царѧ̀ га́йска ѩ҆́ша жи́ва, и҆ приведо́ша є҆го̀ ко ї҆исѹ́сѹ.

²⁴И҆ бы́сть є҆гда̀ преста́ша сы́нове ї҆и҃лєвы сѣкѹ́ще всѣ́хъ сѹ́щихъ въ гаѝ и҆ сѹ́щихъ на полѧ́хъ и҆ на горѣ̀ и҆схо́да, и҆дѣ́же гони́ша и҆̀хъ, и҆ падо́ша всѝ ѻ҆́стрїемъ меча̀ на не́й до конца̀: и҆ ѡ҆брати́сѧ ї҆исѹ́съ въ га́й и҆ посѣчѐ и҆̀хъ мече́мъ.

²⁵И҆ бы́ша всѝ па́дшїи въ то́й де́нь ѿ мѹ́жеска по́лѹ и҆ до же́нска двана́десѧть ты́сѧщъ, всѝ живѹ́щїи въ гаѝ.

²⁶Ї҆исѹ́съ же не ѡ҆братѝ рѹкѝ своеѧ̀, ю҆́же прострѐ съ копїе́мъ, до́ндеже проклѧ̀ всѣ́хъ ѡ҆бита́ющихъ въ гаѝ.

²⁷Кромѣ̀ скотѡ́въ (и҆́хъ) и҆ и҆мѣ́нїѧ, ѩ҆̀же во гра́дѣ ѻ҆́нѣмъ, всѧ҄ плѣни́ша себѣ̀ сы́нове ї҆и҃лєвы по повелѣ́нїю гд҇ню, ѩ҆́коже повелѣ̀ гд҇ь ї҆исѹ́сѹ.

²⁸И҆ запалѝ гра́дъ ї҆исѹ́съ ѻ҆гне́мъ: зе́млю неѡбита́емѹ во вѣ́къ положѝ є҆го̀ да́же до сегѡ̀ днѐ.

²⁹И҆ царѧ̀ га́йска повѣ́си на дре́вѣ сѹгѹ́бѣмъ: и҆ бѧ́ше на дре́вѣ до ве́чера: и҆ заходѧ́щѹ со́лнцѹ повелѣ̀ ї҆исѹ́съ, и҆ снѧ́ша тѣ́ло є҆гѡ̀ съ дре́ва, и҆ поверго́ша є҆̀ въ ро́въ пред̾ враты̀ гра́да: и҆ насы́па над̾ ни́мъ грома́дѹ вели́кѹ ка́менїѧ да́же до сегѡ̀ днѐ.

³⁰Тогда̀ созда̀ ї҆исѹ́съ ѻ҆лта́рь гд҇ѹ бг҃ѹ ї҆и҃левѹ на горѣ̀ гева́лъ,

³¹ѩ҆́коже заповѣ́да мѡѷсе́й ра́бъ гд҇ень сынѡ́мъ ї҆и҃лєвымъ, и҆ ѩ҆́коже написа́сѧ въ зако́нѣ мѡѷсе́овѣ, ѻ҆лта́рь ѿ ка́менїй всецѣ́лыхъ, на ни́хже не возложи́сѧ желѣ́зо: и҆ вознесѐ та́мѡ всесожжє́нїѧ гд҇ѹ и҆ же́ртвѹ спасе́нїѧ.

³²И҆ написа̀ ї҆исѹ́съ на ка́менїихъ вторы́й зако́нъ, зако́нъ мѡѷсе́овъ, є҆го́же написа̀ пред̾ сы҄ны ї҆и҃левыми.

³³И҆ ве́сь ї҆и҃ль, и҆ ста́рцы и҆́хъ и҆ сѹдїи҄ и҆́хъ и҆ книгѡ́чїѧ и҆́хъ предходѧ́хѹ сю́дѹ и҆ сю́дѹ пред̾ кївѡ́томъ, и҆ жерцы̀ и҆ леѵі́ти воздвиза́ша кївѡ́тъ завѣ́та гд҇нѧ, прише́лецъ же и҆ тѹзе́мецъ: и҆̀же бы́ша полови́на и҆́хъ бли́з̾ горы̀ гарїзі́нъ, и҆ полови́на и҆́хъ бли́з̾ горы̀ гева́лъ, ѩ҆́коже заповѣ́да мѡѷсе́й ра́бъ гд҇ень блг҇ви́ти люді́й ї҆и҃левыхъ въ пе́рвыхъ.

³⁴И҆ по си́хъ та́кѡ прочтѐ ї҆исѹ́съ всѧ҄ словеса̀ зако́на сегѡ̀, благословє́нїѧ и҆ клѧ҄твы, по всемѹ̀ напи́санномѹ въ зако́нѣ мѡѷсе́овѣ.

³⁵Не бѧ́ше словесѐ ѿ всѣ́хъ, ѩ҆̀же заповѣ́да мѡѷсе́й ї҆исѹ́сѹ, є҆гѡ́же не прочтѐ ї҆исѹ́съ во ѹ҆́ши всегѡ̀ со́нма сынѡ́въ ї҆и҃левыхъ, мѹжє́мъ и҆ жена́мъ, и҆ дѣ́темъ и҆ прише́лцємъ приходѧ́щымъ ко ї҆и҃лю.