Read Библия Церковнославянская в҃ къ солѹ́нѧнѡмъ 3 Bible Online

в҃ къ солѹ́нѧнѡмъ 3 - Библия Церковнославянская bible

в҃ къ солѹ́нѧнѡмъ 3

¹Про́чее, моли́тесѧ ѡ҆ на́съ, бра́тїе, да сло́во гд҇не тече́тъ и҆ сла́витсѧ, ѩ҆́коже и҆ въ ва́съ,

²и҆ да и҆зба́вимсѧ ѿ ѕлы́хъ и҆ лѹка́выхъ человѣ҄къ: не всѣ́хъ бо є҆́сть вѣ́ра.

³Вѣ́ренъ же є҆́сть гд҇ь, и҆́же ѹ҆тверди́тъ ва́съ и҆ сохрани́тъ ѿ лѹка́вагѡ.

⁴Ѹ҆пова́емъ же на гд҇а ѡ҆ ва́съ, ѩ҆́кѡ, ѩ҆̀же повелѣва́емъ ва́мъ, и҆ творитѐ и҆ сотворитѐ.

⁵Гд҇ь же да и҆спра́витъ сердца̀ ва҄ша въ любо́вь бж҃їю и҆ въ терпѣ́нїе хр҇то́во.

⁶(За҄ 277.) Повелѣва́емъ же ва́мъ, бра́тїе, ѡ҆ и҆́мени гд҇а на́шегѡ ї҆и҃са хр҇та̀, ѿлѹча́тисѧ ва́мъ ѿ всѧ́кагѡ бра́та безчи́ннѡ ходѧ́ща, а҆ не по преда́нїю, є҆́же прїѧ́ша ѿ на́съ:

⁷са́ми бо вѣ́сте, ка́кѡ лѣ́по є҆́сть ва́мъ подо́битисѧ на́мъ: ѩ҆́кѡ не безчи́нновахомъ ѹ҆ ва́съ,

⁸нижѐ тѹ́не хлѣ́бъ ѩ҆до́хомъ ѹ҆ когѡ̀, но въ трѹдѣ̀ и҆ по́двизѣ, но́щь и҆ де́нь дѣ́лающе, да не ѡ҆тѧгчи́мъ никогѡ́же ѿ ва́съ:

⁹не ѩ҆́кѡ не и҆́мамы вла́сти, но да себѐ ѡ҆́бразъ да́мы ва́мъ, во є҆́же ѹ҆подо́битисѧ на́мъ.

¹⁰И҆́бо є҆гда̀ бѣ́хомъ ѹ҆ ва́съ, сїѐ завѣщава́хомъ ва́мъ: ѩ҆́кѡ а҆́ще кто̀ не хо́щетъ дѣ́лати нижѐ да ѩ҆́стъ.

¹¹Слы́шимъ бо нѣ҄кїѧ безчи́ннѡ ходѧ́щыѧ ѹ҆ ва́съ, ничто́же дѣ́лающыѧ, но лѹка́внѡ ѡ҆бходѧ́щыѧ:

¹²таковы҄мъ запреща́емъ и҆ мо́лимъ ѡ҆ гд҇ѣ на́шемъ ї҆и҃сѣ хр҇тѣ̀, да съ безмо́лвїемъ дѣ́лающе, сво́й хлѣ́бъ ѩ҆дѧ́тъ.

¹³Вы́ же, бра́тїе, не стѹжа́йте, до́брое творѧ́ще.

¹⁴А҆́ще же кто̀ не послѹ́шаетъ словесѐ на́шегѡ посла́нїемъ, сего̀ назна́менѹйте и҆ не примѣша́йтесѧ є҆мѹ̀, да посрами́тсѧ:

¹⁵и҆ не а҆́ки врага̀ и҆мѣ́йте є҆го̀, но наказѹ́йте ѩ҆́коже бра́та.

¹⁶Са́мъ же гд҇ь ми́ра да да́стъ ва́мъ ми́ръ всегда̀ во всѧ́цѣмъ ѡ҆́бразѣ: гд҇ь со всѣ́ми ва́ми.

¹⁷Цѣлова́нїе мое́ю рѹко́ю па́ѵлею, є҆́же є҆́сть зна́менїе во всѧ́цѣмъ посла́нїи, си́це пишѹ̀:

¹⁸блгдть гд҇а на́шегѡ ї҆и҃са хр҇та̀ со всѣ́ми ва́ми. А҆ми́нь.