Read Библия Церковнославянская Ко є҆вре́ємъ 5 Bible Online

Ко є҆вре́ємъ 5 - Библия Церковнославянская bible

Ко є҆вре́ємъ 5

¹Всѧ́къ бо первосвѧще́нникъ, ѿ человѣ҄къ прїе́млемь, за человѣ́ки поставлѧ́етсѧ на слѹ҄жбы ѩ҆̀же къ бг҃ѹ, да прино́ситъ да́ры же и҆ жє́ртвы ѡ҆ грѣсѣ́хъ,

²спострада́ти могі́й невѣ́жствѹющымъ и҆ заблѹжда́ющымъ, поне́же и҆ то́й не́мощїю ѡ҆бложе́нъ є҆́сть:

³и҆ сегѡ̀ ра́ди до́лженъ є҆́сть ѩ҆́коже ѡ҆ лю́дехъ, та́кожде и҆ ѡ҆ себѣ̀ приноси́ти за грѣхѝ.

⁴(За҄.) И҆ никто́же са́мъ себѣ̀ прїе́млетъ че́сть, но зва́нный ѿ бг҃а, ѩ҆́коже и҆ а҆арѡ́нъ.

⁵Та́кѡ и҆ хр҇то́съ не себѐ просла́ви бы́ти первосщ҃е́нника, но гл҃авый къ немѹ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀:

⁶ѩ҆́коже и҆ и҆́ндѣ гл҃етъ: ты̀ є҆сѝ сщ҃е́нникъ во вѣ́къ по чи́нѹ мелхїседе́ковѹ.

⁷И҆́же во дне́хъ пл҃ти своеѧ̀ молє́нїѧ же и҆ мл҃твы къ могѹ́щемѹ сп҇тѝ є҆го̀ ѿ сме́рти съ во́племъ крѣ́пкимъ и҆ со слеза́ми прине́съ, и҆ ѹ҆слы́шанъ бы́въ ѿ бл҃гоговѣ́инства,

⁸а҆́ще и҆ сн҃ъ бѧ́ше, ѻ҆ба́че навы́че ѿ си́хъ, ѩ҆̀же пострада̀, послѹша́нїю,

⁹и҆ соверши́всѧ бы́сть всѣ҄мъ послѹ́шающымъ є҆гѡ̀ вино́венъ сп҇нїѧ вѣ́чнагѡ,

¹⁰нарѣче́нъ ѿ бг҃а первосщ҃е́нникъ по чи́нѹ мелхїседе́ковѹ.

¹¹(За҄ 312.) Ѡ҆ не́мже мно́гое на́мъ сло́во и҆ неѹдо́бь сказа́емое глаго́лати, поне́же не́мощни бы́сте слѹ҄хи.

¹²И҆́бо, до́лжни сѹ́ще бы́ти ѹ҆чи́телїе лѣ́тъ ра́ди, па́ки тре́бѹете ѹ҆чи́тисѧ, ка҄ѧ пи́смена нача́ла слове́съ бж҃їихъ: и҆ бы́сте тре́бѹюще млека̀, а҆ не крѣ́пкїѧ пи́щи.

¹³Всѧ́къ бо причаща́ѧйсѧ млека̀ неискѹ́сенъ сло́ва пра́вды, младе́нецъ бо є҆́сть:

¹⁴соверше́нныхъ же є҆́сть тве́рдаѧ пи́ща, и҆мѹ́щихъ чѹ҄вствїѧ ѡ҆бѹчє́на до́лгимъ ѹ҆че́нїемъ въ разсѹжде́нїе добра́ же и҆ ѕла̀.