Read Библия Церковнославянская Ко є҆вре́ємъ 7 Bible Online

Ко є҆вре́ємъ 7 - Библия Церковнославянская bible

Ко є҆вре́ємъ 7

¹Се́й бо мелхїседе́къ, цр҃ь сали́мскїй, сщ҃е́нникъ бг҃а вы́шнѧгѡ, и҆́же срѣ́те а҆враа́ма возвра́щшасѧ ѿ сѣ́ча царе́й и҆ блг҇вѝ є҆го̀,

²є҆мѹ́же и҆ десѧти́нѹ ѿ всѣ́хъ ѿдѣлѝ а҆враа́мъ, пе́рвѣе ѹ҆́бѡ сказѹ́етсѧ цр҃ь пра́вды, пото́мъ же цр҃ь сали́мскїй, є҆́же є҆́сть, цр҃ь ми́ра,

³без̾ ѻ҆тца̀, без̾ ма́тере, без̾ при́чта ро́да, ни нача́ла днє́мъ, ни животѹ̀ конца̀ и҆мѣ́ѧ, ѹ҆подо́бленъ же сн҃ѹ бж҃їю, пребыва́етъ сщ҃е́нникъ вы́нѹ.

⁴Ви́дите же, є҆ли́къ се́й, є҆мѹ́же и҆ десѧти́нѹ да́лъ є҆́сть а҆враа́мъ патрїа́рхъ ѿ и҆збра́нныхъ.

⁵И҆ прїе́млющїи ѹ҆́бѡ свѧще́нство ѿ сынѡ́въ леѵї҄инъ за́повѣдь и҆́мѹтъ ѡ҆десѧ́тствовати лю́ди по зако́нѹ, си́рѣчь, бра́тїю свою̀, а҆́ще и҆ ѿ чре́слъ а҆враа́мовыхъ и҆зше́дшѹю:

⁶не причита́емый же ро́домъ къ ни҄мъ, ѡ҆десѧ́тствова а҆враа́ма и҆ и҆мѹ́щаго ѡ҆бѣтова҄нїѧ блг҇вѝ:

⁷(За҄ 316.) без̾ всѧ́кагѡ же прекосло́вїѧ ме́ншее ѿ бо́лшагѡ бл҃гословлѧ́етсѧ.

⁸И҆ здѣ̀ ѹ҆́бѡ десѧти҄ны человѣ́цы ѹ҆мира́ющїи прїе́млютъ: та́мѡ же свидѣ́телствѹемый, ѩ҆́кѡ жи́въ є҆́сть.

⁹И҆ да си́це рекѹ̀, а҆враа́момъ и҆ леѵі́й, прїе́млѧй десѧти҄ны, десѧти҄ны да́лъ є҆́сть:

¹⁰є҆ще́ бо въ чре́слѣхъ ѻ҆́тчїихъ бѧ́ше, є҆гда̀ срѣ́те є҆го̀ мелхїседе́къ.

¹¹А҆́ще ѹ҆́бѡ соверше́нство леѵі́тскимъ свѧще́нствомъ бы́ло, лю́дїе бо на не́мъ взако́нени бы́ша: ка́ѧ є҆щѐ потре́ба по чи́нѹ мелхїседе́ковѹ и҆но́мѹ воста́ти свѧще́нникѹ, а҆ не по чи́нѹ а҆арѡ́новѹ глаго́латисѧ;

¹²прелага́емѹ бо свѧще́нствѹ, по нѹ́жди и҆ зако́нѹ премѣне́нїе быва́етъ.

¹³Ѡ҆ не́мже бо глаго́лютсѧ сїѧ҄, колѣ́нѹ и҆но́мѹ причасти́сѧ, ѿ негѡ́же никто́же пристѹпѝ ко ѻ҆лтарю̀:

¹⁴ѩ҆́вѣ бо, ѩ҆́кѡ ѿ колѣ́на ї҆ѹ́дова возсїѧ̀ гд҇ь на́шъ, ѡ҆ не́мже колѣ́нѣ мѡѷсе́й ѡ҆ свѧще́нствѣ ничесо́же глаго́ла.

¹⁵И҆ ли́шше є҆щѐ ѩ҆́вѣ є҆́сть, ѩ҆́кѡ по подо́бїю мелхїседе́ковѹ востае́тъ сщ҃е́нникъ и҆́нъ,

¹⁶и҆́же не по зако́нѹ за́повѣди плотскі́ѧ бы́сть, но по си́лѣ живота̀ неразрѹша́емагѡ.

¹⁷Свидѣ́телствѹетъ бо, ѩ҆́кѡ ты̀ є҆сѝ сщ҃е́нникъ во вѣ́къ по чи́нѹ мелхїседе́ковѹ.

¹⁸(За҄ 317.) Ѿлага́нїе ѹ҆́бѡ быва́етъ пре́жде бы́вшїѧ за́повѣди за не́мощное є҆ѧ̀ и҆ неполе́зное:

¹⁹ничто́же бо соверши́лъ зако́нъ: привведе́нїе же є҆́сть лѹ́чшемѹ ѹ҆пова́нїю, и҆́мже приближа́емсѧ къ бг҃ѹ.

²⁰И҆ по є҆ли́кѹ не без̾ клѧ́твы:

²¹ѻ҆ни́ бо без̾ клѧ́твы свѧще́нницы бы́ша, се́й же съ клѧ́твою чрез̾ глаго́лющаго къ немѹ̀: клѧ́тсѧ гд҇ь и҆ не раска́етсѧ: ты̀ є҆сѝ сщ҃е́нникъ во вѣ́къ по чи́нѹ мелхїседе́ковѹ:

²²по толи́кѹ лѹ́чшагѡ завѣ́та бы́сть и҆спорѹ́чникъ ї҆и҃съ.

²³И҆ ѻ҆нѝ мно́жайши свѧще́нницы бы́ша, занѐ сме́ртїю возбране́ни сѹ́ть пребыва́ти:

²⁴се́й же, зане́же пребыва́етъ во вѣ́ки, непрестѹ́пное и҆́мать сщ҃е́нство,

²⁵тѣ́мже и҆ сп҇тѝ до конца̀ мо́жетъ приходѧ́щихъ чрез̾ него̀ къ бг҃ѹ, всегда̀ жи́въ сы́й, во є҆́же хода́тайствовати ѡ҆ ни́хъ.

²⁶(За҄ 318.) Тако́въ бо на́мъ подоба́ше а҆рхїере́й: прпдбенъ, неѕло́бивъ, безскве́рненъ, ѿлѹче́нъ ѿ грѣ҄шникъ и҆ вы́шше нб҃съ бы́вый,

²⁷и҆́же не и҆́мать по всѧ҄ дни҄ нѹ́жды, ѩ҆́коже первосвѧще́нницы, пре́жде ѡ҆ свои́хъ грѣсѣ́хъ жє́ртвы приноси́ти, пото́мъ же ѡ҆ людски́хъ: сїе́ бо сотворѝ є҆ди́ною, себѐ прине́съ.

²⁸Зако́нъ бо человѣ́ки поставлѧ́етъ первосвѧще́нники, и҆мѹ́щыѧ не́мощь: сло́во же клѧ́твенное, є҆́же по зако́нѣ, сн҃а во вѣ́ки соверше́нна.