Read Библия Церковнославянская Посла́нїе ї҆а́кѡвле 4 Bible Online

Посла́нїе ї҆а́кѡвле 4 - Библия Церковнославянская bible

Посла́нїе ї҆а́кѡвле 4

¹Ѿкѹ́дѹ бра҄ни и҆ сва҄ры въ ва́съ; не ѿсю́дѹ ли, ѿ сласте́й ва́шихъ, вою́ющихъ во ѹ҆́дѣхъ ва́шихъ;

²Жела́ете, и҆ не и҆́мате: ѹ҆бива́ете и҆ зави́дите, и҆ не мо́жете ѹ҆лѹчи́ти: сварѧ́етесѧ и҆ бо́рете, и҆ не и҆́мате, занѐ не про́сите:

³про́сите, и҆ не прїе́млете, занѐ ѕлѣ̀ про́сите, да въ сласте́хъ ва́шихъ и҆ждиве́те.

⁴Прелюбодѣ́є и҆ прелюбодѣ҄йцы, не вѣ́сте ли, ѩ҆́кѡ любы̀ мі́ра сегѡ̀ вражда̀ бг҃ѹ є҆́сть, и҆́же бо восхо́щетъ дрѹ́гъ бы́ти мі́рѹ, вра́гъ бж҃їй быва́етъ.

⁵И҆лѝ мнитѐ, ѩ҆́кѡ всѹ́е писа́нїе глаго́летъ: къ за́висти жела́етъ дѹ́хъ, и҆́же всели́сѧ въ ны̀;

⁶Бо́лшѹю же дае́тъ блгдть: тѣ́мже глаго́летъ: гд҇ь гѡ́рдымъ проти́витсѧ, смирє́ннымъ же дае́тъ блгдть.

⁷(За҄ 56.) Повини́тесѧ ѹ҆̀бо бг҃ѹ, проти́витесѧ же дїа́волѹ, и҆ бѣжи́тъ ѿ ва́съ.

⁸Прибли́житесѧ бг҃ѹ, и҆ прибли́житсѧ ва́мъ: ѡ҆чи́стите рѹ́цѣ, грѣ҄шницы, и҆спра́вите сердца̀ ва҄ша, двоедѹ́шнїи:

⁹постражди́те и҆ слези́те и҆ пла́читесѧ: смѣ́хъ ва́шъ въ пла́чь да ѡ҆брати́тсѧ, и҆ ра́дость въ сѣ́тованїе:

¹⁰смири́тесѧ пред̾ гд҇емъ, и҆ вознесе́тъ вы̀.

¹¹Не ѡ҆клевета́йте дрѹ́гъ дрѹ́га, бра́тїе: ѡ҆клевета́ѧй бо бра́та, и҆лѝ ѡ҆сѹжда́ѧй бра́та своего̀, ѡ҆клевета́етъ зако́нъ и҆ ѡ҆сѹжда́етъ зако́нъ: а҆́ще же зако́нъ ѡ҆сѹжда́еши, нѣ́си творе́цъ зако́на, но сѹдїѧ̀.

¹²Є҆ди́нъ є҆́сть законополо́жникъ и҆ сѹдїѧ̀, могі́й спастѝ и҆ погѹби́ти: ты́ же кто̀ є҆сѝ ѡ҆сѹжда́ѧй дрѹ́га;

¹³Слы́шите нн҃ѣ, глаго́лющїи: дне́сь и҆лѝ ѹ҆́трѣ по́йдемъ во ѡ҆́нъ гра́дъ, и҆ сотвори́мъ тѹ̀ лѣ́то є҆ди́но, и҆ кѹ́плю дѣ́емъ и҆ приѡбрѣте́нїе:

¹⁴и҆̀же не вѣ́сте, что̀ ѹ҆́трѣ слѹчи́тсѧ: ка́ѧ бо жи́знь ва́ша, па́ра бо є҆́сть, ѩ҆́же вма́лѣ ѩ҆влѧ́етсѧ, пото́мъ же и҆счеза́етъ.

¹⁵Вмѣ́стѡ є҆́же бы глаго́лати ва́мъ: а҆́ще гд҇ь восхо́щетъ, и҆ жи́ви бѹ́демъ, и҆ сотвори́мъ сїѐ и҆лѝ ѻ҆́но:

¹⁶нн҃ѣ же хва́литесѧ въ горды́нехъ ва́шихъ: всѧ́ка хвала̀ такова̀ ѕла̀ є҆́сть.

¹⁷Вѣ́дѹщемѹ ѹ҆̀бо добро̀ твори́ти, и҆ не творѧ́щемѹ, грѣ́хъ є҆мѹ̀ є҆́сть.