Read Библия Церковнославянская Посла́нїе ї҆а́кѡвле 5 Bible Online

Посла́нїе ї҆а́кѡвле 5 - Библия Церковнославянская bible

Посла́нїе ї҆а́кѡвле 5

¹Прїиди́те нн҃ѣ, бога́тїи, пла́читесѧ и҆ рыда́йте ѡ҆ лю́тыхъ ско́рбехъ ва́шихъ грѧдѹ́щихъ на вы̀.

²Бога́тство ва́ше и҆згнѝ, и҆ ри҄зы ва́шѧ мо́лїе поѧдо́ша.

³Зла́то ва́ше и҆ сре́бро и҆зоржа́вѣ, и҆ ржа̀ и҆̀хъ въ послѹ́шество на ва́съ бѹ́детъ, и҆ снѣ́сть плѡ́ти ва́шѧ а҆́ки ѻ҆́гнь: є҆го́же сниска́сте въ послѣ҄днїѧ дни҄.

⁴Сѐ, мзда̀ дѣ́лателей дѣ́лавшихъ ни҄вы ва́шѧ, ѹ҆держа́наѧ ѿ ва́съ, вопїе́тъ, и҆ вопїє́нїѧ жа́вшихъ во ѹ҆́шы гд҇а саваѡ́ѳа внидо́ша.

⁵Возвесели́стесѧ на землѝ, и҆ наслади́стесѧ: ѹ҆пита́сте сердца̀ ва҄ша а҆́ки въ де́нь заколе́нїѧ.

⁶Ѡ҆сѹди́сте, ѹ҆би́сте првднаго: не проти́витсѧ ва́мъ.

⁷Долготерпи́те ѹ҆̀бо, бра́тїе моѧ҄, до прише́ствїѧ гд҇нѧ. Сѐ земледѣ́лецъ жде́тъ честна́гѡ плода̀ ѿ землѝ, долготерпѧ̀ ѡ҆ не́мъ, до́ндеже прїи́метъ до́ждь ра́нъ и҆ по́зденъ:

⁸долготерпи́те ѹ҆̀бо и҆ вы̀, ѹ҆тверди́те сердца̀ ва҄ша, ѩ҆́кѡ прише́ствїе гд҇не прибли́жисѧ.

⁹Не воздыха́йте дрѹ́гъ на дрѹ́га, бра́тїе, да не ѡ҆сѹжде́ни бѹ́дете: сѐ, сѹдїѧ̀ пред̾ две́рьми стои́тъ.

¹⁰(За҄ 57.) Ѡ҆́бразъ прїими́те, бра́тїе моѧ҄, ѕлострада́нїѧ и҆ долготерпѣ́нїѧ про҇ро́ки, и҆̀же глаго́лаша и҆́менемъ гд҇нимъ.

¹¹Сѐ, блажи́мъ терпѧ́щыѧ. Терпѣ́нїе їѡвле слы́шасте, и҆ кончи́нѹ гд҇ню ви́дѣсте, ѩ҆́кѡ многомл҇тивъ є҆́сть гд҇ь и҆ ще́дръ.

¹²Пре́жде же всѣ́хъ, бра́тїе моѧ҄, не клени́тесѧ ни нб҃омъ, ни земле́ю, ни и҆но́ю ко́ею клѧ́твою: бѹ́ди же ва́мъ є҆́же є҆́й, є҆́й, и҆ є҆́же нѝ, нѝ: да не въ лицемѣ́рїе впаде́те.

¹³Ѕлостра́ждетъ ли кто̀ въ ва́съ; да моли́твѹ дѣ́етъ: благодѹ́шствѹетъ ли кто̀; да пое́тъ.

¹⁴Боли́тъ ли кто̀ въ ва́съ, да призове́тъ пресвѵ́теры церкѡ́вныѧ, и҆ да моли́твѹ сотворѧ́тъ над̾ ни́мъ, пома́завше є҆го̀ є҆ле́емъ во и҆́мѧ гд҇не:

¹⁵и҆ моли́тва вѣ́ры спасе́тъ болѧ́щаго, и҆ воздви́гнетъ є҆го̀ гд҇ь: и҆ а҆́ще грѣхѝ сотвори́лъ є҆́сть, ѿпѹ́стѧтсѧ є҆мѹ̀.

¹⁶И҆сповѣ́дайте ѹ҆̀бо дрѹ́гъ дрѹ́гѹ согрѣшє́нїѧ и҆ моли́тесѧ дрѹ́гъ за дрѹ́га, ѩ҆́кѡ да и҆сцѣлѣ́ете: мно́гѡ бо мо́жетъ моли́тва првднагѡ поспѣшествѹ́ема.

¹⁷И҆лїа̀ человѣ́къ бѣ̀ подобостра́стенъ на́мъ, и҆ моли́твою помоли́сѧ, да не бѹ́детъ до́ждь, и҆ не ѡ҆дождѝ по землѝ лѣ҄та трѝ и҆ мц҇ъ ше́сть:

¹⁸и҆ па́ки помоли́сѧ, и҆ не́бо до́ждь дадѐ, и҆ землѧ̀ прозѧбѐ пло́дъ сво́й.

¹⁹Бра́тїе, а҆́ще кто̀ въ ва́съ заблѹ́дитъ ѿ пѹтѝ и҆́стины, и҆ ѡ҆брати́тъ кто̀ є҆го̀,

²⁰да вѣ́сть, ѩ҆́кѡ ѡ҆брати́вый грѣ́шника ѿ заблѹжде́нїѧ пѹтѝ є҆гѡ̀ спасе́тъ дѹ́шѹ ѿ сме́рти и҆ покры́етъ мно́жество грѣхѡ́въ.