Read Библия Церковнославянская Сѹді́й ї҆сра́илевыхъ 10 Bible Online

Сѹді́й ї҆сра́илевыхъ 10 - Библия Церковнославянская bible

Сѹді́й ї҆сра́илевыхъ 10

¹И҆ воста̀ по а҆вїмеле́сѣ спастѝ ї҆и҃лѧ ѳѡла̀ сы́нъ фѹѝ, сы́нъ бра́та ѻ҆тца̀ є҆гѡ̀, мѹ́жъ ѿ ї҆ссаха́ра: и҆ се́й живѧ́ше въ самі́рѣ въ горѣ̀ є҆фре́мовѣ,

²и҆ сѹдѝ ї҆и҃лѧ лѣ́тъ два́десѧть трѝ, и҆ ѹ҆́мре, и҆ погребе́нъ бы́сть въ самі́рѣ.

³И҆ воста̀ по не́мъ ї҆аі́ръ галааді́тинъ, и҆ сѹдѝ ї҆и҃лѧ лѣ́тъ два́десѧть два̀:

⁴и҆ бы́ша є҆мѹ̀ сы́нове три́десѧть два̀ ѣ҆́здѧщїи на три́десѧти двѹ́хъ ѻ҆слѣ́хъ: и҆ гра́ды и҆̀мъ три́десѧть два̀: и҆ прозыва́хѹ и҆̀хъ гра́ды ї҆аі́рѡвы, да́же до дне́сь, и҆̀же сѹ́ть въ землѝ галаа́довѣ:

⁵и҆ ѹ҆́мре ї҆аі́ръ, и҆ погребе́нъ бы́сть въ камѡ́нѣ.

⁶И҆ приложи́ша сы́нове ї҆и҃лєвы твори́ти ѕло́е пред̾ гд҇емъ и҆ послѹжи́ша ваалі́мамъ и҆ а҆старѡ́ѳамъ и҆ богѡ́мъ сѵ҄рскимъ и҆ богѡ́мъ сїдѡ҄нскимъ и҆ богѡ́мъ мѡа҄влскимъ и҆ богѡ́мъ сынѡ́въ а҆ммѡ́нихъ и҆ богѡ́мъ и҆ноплеме́нникѡвъ: и҆ ѡ҆ста́виша гд҇а и҆ не рабо́таша є҆мѹ̀.

⁷И҆ разгнѣ́васѧ гд҇ь ѩ҆́ростїю на ї҆и҃лѧ и҆ предадѐ и҆̀хъ въ рѹ́кѹ фѷлїсті́мскѹ и҆ въ рѹ́кѹ сынѡ́въ а҆ммѡ́нихъ.

⁸И҆ ѡ҆ѕло́биша, и҆ сокрѹши́ша сынѡ́въ ї҆и҃левыхъ въ то̀ вре́мѧ ѻ҆смьна́десѧть лѣ́тъ, всѣ́хъ сынѡ́въ ї҆и҃левыхъ, и҆̀же ѡ҆б̾ ѻ҆нѹ̀ странѹ̀ ї҆ѻрда́на въ землѝ а҆морре́а и҆́же въ галаа́дѣ.

⁹И҆ преидо́ша сы́нове а҆ммѡ҄ни ї҆ѻрда́нъ воева́ти на ї҆ѹ́дѹ и҆ венїамі́на и҆ на до́мъ є҆фре́мовъ: и҆ ѡ҆скорбле́ни бы́ша сы́нове ї҆и҃лєвы ѕѣлѡ̀.

¹⁰И҆ возопи́ша сы́нове ї҆и҃лєвы ко гд҇ѹ, глаго́люще: согрѣши́хомъ тебѣ̀, ѩ҆́кѡ ѡ҆ста́вихомъ бг҃а на́шего и҆ рабо́тахомъ ваалі́мѹ.

¹¹И҆ речѐ гд҇ь къ сынѡ́мъ ї҆и҃лєвымъ: не ѿ є҆гѵ́пта ли и҆ ѿ а҆морре́а и҆ ѿ сынѡ́въ а҆ммѡ́нихъ и҆ ѿ фѷлїсті́ма

¹²и҆ ѿ сїдѡ́нѧнъ и҆ ѿ а҆мали́ка и҆ ѿ мадїа́ма, и҆̀же стѹжи́ша ва́мъ, и҆ возопи́сте ко мнѣ̀, и҆ сп҃со́хъ вы̀ ѿ рѹкѝ и҆́хъ;

¹³вы́ же ѡ҆ста́висте менѐ и҆ рабо́тасте богѡ́мъ и҆ны҄мъ: сегѡ̀ ра́ди не приложѹ̀ сп҇тѝ ва́съ:

¹⁴и҆ди́те и҆ возопі́йте къ богѡ́мъ, и҆̀хже и҆збра́сте себѣ̀, и҆ ті́и да спасѹ́тъ вы̀ во вре́мѧ ско́рби ва́шеѧ.

¹⁵И҆ рѣ́ша сы́нове ї҆и҃лєвы ко гд҇ѹ: согрѣши́хомъ, сотворѝ ты̀ на́мъ по всемѹ̀, є҆ли́кѡ ѹ҆го́дно пред̾ ѻ҆чи́ма твои́ма: то́чїю и҆зба́ви на́съ въ се́й де́нь.

¹⁶И҆ и҆зверго́ша бо́ги чѹжды҄ѧ ѿ среды̀ себє̀ и҆ послѹжи́ша гд҇еви є҆ди́номѹ: и҆ сжалѣ́сѧ дш҃а̀ є҆гѡ̀ ѡ҆ ѹ҆трѹжде́нїи ї҆и҃левѣ.

¹⁷И҆ взыдо́ша сы́нове а҆ммѡ҄ни, и҆ ѡ҆полчи́шасѧ въ галаа́дѣ: и҆ собра́шасѧ и҆ сы́нове ї҆и҃лєвы, и҆ ѡ҆полчи́шасѧ въ массифѣ̀.

¹⁸И҆ рѣ́ша лю́дїе кнѧ҄зи галаа́дстїи кі́йждо ко бли́жнемѹ своемѹ̀: мѹ́жъ, и҆́же на́чнетъ би́тисѧ съ сынмѝ а҆ммѡ́новыми, то́й бѹ́детъ кнѧ́зь всѣ҄мъ живѹ́щымъ въ галаа́дѣ.