Read Библия Церковнославянская Сѹді́й ї҆сра́илевыхъ 13 Bible Online

Сѹді́й ї҆сра́илевыхъ 13 - Библия Церковнославянская bible

Сѹді́й ї҆сра́илевыхъ 13

¹И҆ приложи́ша є҆щѐ сы́нове ї҆и҃лєвы твори́ти ѕло̀ пред̾ гд҇емъ: и҆ предадѐ ѧ҆̀ гд҇ь въ рѹ́кѹ фѷлїсті́мскѹ четы́редесѧть лѣ́тъ.

²И҆ бѧ́ше мѹ́жъ є҆ди́нъ ѿ сараѝ, ѿ пле́мене да́нова, и҆́мѧ же є҆мѹ̀ манѡ́е: и҆ жена̀ є҆мѹ̀ бѧ́ше непло́ды и҆ не ражда́ше.

³И҆ ѩ҆ви́сѧ а҆́гг҃лъ гд҇ень къ женѣ̀ и҆ речѐ къ не́й: сѐ, ты̀ непло́ды и҆ не ражда́ла є҆сѝ, и҆ зачне́ши и҆ роди́ши сы́на:

⁴и҆ нн҃ѣ блюди́сѧ, и҆ не пі́й вїна̀ и҆ сїке́ра, и҆ не ѩ҆́ждь всѧ́кагѡ нечи́стагѡ:

⁵ѩ҆́кѡ сѐ, ты̀ во ѹ҆тро́бѣ прїи́меши и҆ роди́ши сы́на: и҆ желѣ́зо на главѹ̀ є҆гѡ̀ не взы́детъ, ѩ҆́кѡ назѡре́й бг҃ови бѹ́детъ сїѐ ѻ҆троча̀ ѿ чре́ва: и҆ се́й на́чнетъ спаса́ти ї҆и҃лѧ и҆з̾ рѹкѝ фѷлїсті́мли.

⁶И҆ вни́де жена̀ и҆ речѐ мѹ́жѹ своемѹ̀, глаго́лющи: человѣ́къ бж҃їй прїи́де ко мнѣ̀, и҆ ѡ҆́бразъ є҆гѡ̀ ѩ҆́кѡ ѡ҆́бразъ а҆́гг҃ла бж҃їѧ, стра́шенъ ѕѣлѡ̀: и҆ вопроша́хъ є҆го̀, ѿкѹ́дѹ є҆сѝ; и҆ и҆́мене своегѡ̀ не повѣ́да мѝ,

⁷и҆ речѐ мнѣ̀: сѐ, ты̀ во ѹ҆тро́бѣ зачне́ши и҆ роди́ши сы́на: и҆ нн҃ѣ не пі́й вїна̀, ни сїке́ра, и҆ не ѩ҆́ждь всѧ́кагѡ нечи́стагѡ, ѩ҆́кѡ назѡре́й бг҃ѹ бѹ́детъ ѻ҆́трочищь ѿ ѹ҆тро́бы да́же до днѐ сме́рти своеѧ̀.

⁸И҆ помоли́сѧ манѡ́е ко гд҇ѹ и҆ речѐ: во мнѣ̀, гд҇и, человѣ́къ бж҃їй, є҆го́же посла́лъ є҆сѝ, да прїи́детъ є҆щѐ къ на́мъ и҆ наста́витъ ны̀, что̀ сотвори́мъ ѻ҆троча́ти ражда́ющемѹсѧ.

⁹И҆ послѹ́ша бг҃ъ моли́твы манѡ́евы: и҆ прїи́де па́ки а҆́гг҃лъ бж҃їй къ женѣ̀, сїѧ́ же сѣдѧ́ше на селѣ̀, и҆ манѡ́е мѹ́жъ є҆ѧ̀ не бѧ́ше съ не́ю.

¹⁰И҆ потща́сѧ жена̀, и҆ те́кши ско́рѡ повѣ́да мѹ́жѹ своемѹ̀, и҆ речѐ къ немѹ̀: сѐ, ѩ҆ви́сѧ мнѣ̀ мѹ́жъ, и҆́же приходи́лъ въ де́нь ѡ҆́нъ ко мнѣ̀.

¹¹И҆ воста́въ и҆́де манѡ́е в̾слѣ́дъ жены̀ своеѧ̀, и҆ прїи́де къ мѹ́жѹ и҆ речѐ є҆мѹ̀: ты́ ли є҆сѝ мѹ́жъ глаго́лавый къ женѣ̀ (мое́й); И҆ речѐ а҆́гг҃лъ: а҆́зъ.

¹²И҆ речѐ манѡ́е: нн҃ѣ ѹ҆̀бо да прїи́детъ сло́во твоѐ, кі́й бѹ́детъ сѹ́дъ ѻ҆троча́те, и҆ что̀ дѣла̀ є҆гѡ̀;

¹³И҆ речѐ а҆́гг҃лъ гд҇ень къ манѡ́ю: ѿ всѣ́хъ, ѩ҆̀же глаго́лахъ къ женѣ̀, да сохрани́тсѧ:

¹⁴ѿ всегѡ̀, є҆́же и҆схо́дитъ и҆з̾ вїногра́да, да не ѩ҆́стъ, и҆ вїна̀ и҆ сїке́ра да не пїе́тъ, и҆ всѧ́кагѡ нечи́стагѡ да не ѩ҆́стъ: и҆ всѧ҄, є҆ли҄ка заповѣ́дахъ є҆́й, да храни́тъ.

¹⁵И҆ речѐ манѡ́е ко а҆́гг҃лѹ гд҇ню: да ѹ҆держи́мъ тѧ̀ здѣ̀, и҆ сотвори́мъ пред̾ тобо́ю ко́злище ѿ ко́зъ.

¹⁶И҆ речѐ а҆́гг҃лъ гд҇ень къ манѡ́ю: а҆́ще мѧ̀ понѹ́диши, не бѹ́дѹ ѩ҆́сти хлѣ́ба твоегѡ̀: но а҆́ще сотвори́ши всесожже́нїе гд҇еви, то̀ вознесѝ є҆̀. Не вѣ́дѧше бо манѡ́е, ѩ҆́кѡ а҆́гг҃лъ гд҇ень то́й.

¹⁷И҆ речѐ манѡ́е ко а҆́гг҃лѹ гд҇ню: что̀ и҆́мѧ твоѐ; да є҆гда̀ сбѹ́детсѧ сло́во твоѐ, просла́вимъ тѧ̀.

¹⁸И҆ речѐ є҆мѹ̀ а҆́гг҃лъ гд҇ень: почто̀ сїѐ вопроша́еши и҆́мене моегѡ̀; и҆ то̀ є҆́сть чѹ́дно.

¹⁹И҆ взѧ̀ манѡ́е ко́злища ѿ ко́зъ и҆ же́ртвѹ, и҆ вознесѐ на ка́мень гд҇еви чѹ҄днаѧ творѧ́щемѹ: манѡ́е же и҆ жена̀ є҆гѡ̀ зрѧ́ста.

²⁰И҆ бы́сть є҆гда̀ пла́мень взы́де вы́ше ѻ҆лтарѧ̀ да́же до небесѐ, и҆ взы́де а҆́гг҃лъ гд҇ень въ пла́мени ѻ҆лтарѧ̀: манѡ́е же и҆ жена̀ є҆гѡ̀ смотрѧ́ста, и҆ падо́ста лице́мъ свои́мъ на зе́млю.

²¹И҆ не приложѝ ктомѹ̀ а҆́гг҃лъ гд҇ень ѩ҆ви́тисѧ манѡ́ю и҆ женѣ̀ є҆гѡ̀. Тогда̀ ѹ҆вѣ́дѣ манѡ́е, ѩ҆́кѡ а҆́гг҃лъ гд҇ень є҆́сть.

²²И҆ речѐ манѡ́е къ женѣ̀ свое́й: сме́ртїю ѹ҆́мремъ, ѩ҆́кѡ бг҃а ви́дѣхомъ.

²³И҆ речѐ є҆мѹ̀ жена̀ є҆гѡ̀: а҆́ще бы хотѣ́лъ гд҇ь ѹ҆мертви́ти на́съ, не бы̀ взѧ́лъ ѿ рѹ́къ на́шихъ всесожже́нїѧ и҆ же́ртвы, и҆ не бы̀ показа́лъ на́мъ си́хъ всѣ́хъ, и҆ не бы̀ слы҄шана сїѧ҄ сотвори́лъ на́мъ ѩ҆́коже нн҃ѣ.

²⁴И҆ родѝ жена̀ сы́на, и҆ наречѐ и҆́мѧ є҆мѹ̀ самѱѡ́нъ. И҆ возмѹжа̀ ѻ҆троча̀, и҆ блг҇вѝ є҆̀ гд҇ь:

²⁵и҆ нача̀ дх҃ъ гд҇ень ходи́ти съ ни́мъ въ полцѣ̀ да́новѣ, посредѣ̀ сараѝ и҆ посредѣ̀ є҆сѳао́ла.