Read Библия Церковнославянская Сѹді́й ї҆сра́илевыхъ 2 Bible Online

Сѹді́й ї҆сра́илевыхъ 2 - Библия Церковнославянская bible

Сѹді́й ї҆сра́илевыхъ 2

¹И҆ взы́де а҆́гг҃лъ гд҇ень ѿ галга́лъ къ [мѣ́стѹ пла́ча] и҆ къ веѳи́лю и҆ къ до́мѹ ї҆и҃левѹ, и҆ речѐ къ ни҄мъ: сїѧ҄ гл҃етъ гд҇ь: и҆зведо́хъ ва́съ и҆з̾ є҆гѵ́пта, и҆ введо́хъ ва́съ въ зе́млю, є҆́юже клѧ́хсѧ ѻ҆тцє́мъ ва́шымъ да́ти ва́мъ: и҆ реко́хъ: не разорю̀ завѣ́та моегѡ̀, и҆́же съ ва́ми, во вѣ́ки:

²и҆ вы̀ не завѣща́йте завѣ́та съ сѣдѧ́щими на землѝ се́й, нижѐ богѡ́мъ и҆́хъ да поклоните́сѧ, но и҆зва҄ѧннаѧ и҆́хъ сокрѹши́те, и҆ ѻ҆лтари҄ и҆́хъ раскопа́йте: и҆ не послѹ́шасте гла́са моегѡ̀, ѩ҆́кѡ сїѧ҄ сотвори́сте:

³и҆ а҆́зъ рѣ́хъ: не приложѹ̀ пресели́ти люді́й, и҆̀хже рѣ́хъ и҆згна́ти, нижѐ ѿимѹ̀ и҆́хъ ѿ лица̀ ва́шегѡ, и҆ бѹ́дѹтъ ва́мъ въ те́рнїе, и҆ бо́зи и҆́хъ бѹ́дѹтъ ва́мъ въ собла́знъ.

⁴И҆ бы́сть є҆гда̀ глаго́ла а҆́гг҃лъ гд҇ень словеса̀ сїѧ҄ ко всѣ҄мъ сынѡ́мъ ї҆и҃лєвымъ, и҆ воздвиго́ша лю́дїе гла́съ сво́й, и҆ воспла́кашасѧ.

⁵И҆ сегѡ̀ ра́ди прозва́сѧ и҆́мѧ мѣ́стѹ томѹ̀ пла́чь: и҆ пожро́ша та́мѡ гд҇еви.

⁶И҆ ѿпѹстѝ ї҆исѹ́съ лю́ди, и҆ ѿидо́ша сы́нове ї҆и҃лєвы кі́йждо въ до́мы своѧ҄ и҆ кі́йждо въ наслѣ́дїе своѐ наслѣ́дити зе́млю.

⁷И҆ рабо́таша лю́дїе гд҇еви во всѧ҄ дни҄ ї҆исѹ́сѡвы и҆ во всѧ҄ дни҄ старѣ́йшинъ, є҆ли́цы пожи́ша мнѡ́ги дни҄ со ї҆исѹ́сомъ, є҆ли́цы разѹмѣ́ша всѐ дѣ́ло гд҇не вели́кое, є҆́же сотворѝ ї҆и҃лю.

⁸И҆ сконча́сѧ ї҆исѹ́съ сы́нъ наѵи́нъ ра́бъ гд҇ень, сы́нъ ста̀ и҆ десѧтѝ лѣ́тъ.

⁹И҆ погребо́ша є҆го̀ въ предѣ́лѣхъ наслѣ́дїѧ є҆гѡ̀ въ ѳамнаѳаре́сѣ, въ горѣ̀ є҆фре́мли, ѿ сѣ́вера горы̀ гаа́съ:

¹⁰и҆ ве́сь ро́дъ ѡ҆́нъ приложи́шасѧ ко ѻ҆тцє́мъ свои҄мъ. И҆ воста̀ ро́дъ дрѹгі́й по си́хъ, и҆̀же не позна́ша гд҇а и҆ дѣ́ла, є҆́же сотворѝ во ї҆и҃ли.

¹¹И҆ сотвори́ша сы́нове ї҆и҃лєвы ѕло́е пред̾ гд҇емъ и҆ послѹжи́ша ваа́лѹ,

¹²и҆ ѡ҆ста́виша гд҇а бг҃а ѻ҆тє́цъ свои́хъ, и҆зве́дшаго и҆̀хъ и҆з̾ землѝ є҆гѵ́петски, и҆ поидо́ша в̾слѣ́дъ богѡ́въ и҆ны́хъ, ѿ богѡ́въ ѩ҆зы́ческихъ, и҆̀же ѡ҆́крестъ и҆́хъ, и҆ поклони́шасѧ и҆̀мъ: и҆ разгнѣ́ваша гд҇а,

¹³и҆ ѡ҆ста́виша є҆го̀, и҆ послѹжи́ша ваа́лѹ и҆ а҆ста́ртѡмъ.

¹⁴И҆ разгнѣ́васѧ ѩ҆́ростїю гд҇ь на ї҆и҃лѧ и҆ предадѐ є҆го̀ въ рѹ́ки плѣнѧ́ющихъ, и҆ плѣни́ша и҆̀хъ: и҆ ѿдадѐ и҆̀хъ въ рѹ́ки врагѡ́въ и҆́хъ, и҆̀же ѡ҆́крестъ и҆́хъ, и҆ не возмого́ша ктомѹ̀ противоста́ти пред̾ лице́мъ врагѡ́въ свои́хъ, во всѣ́хъ въ ни́хже прохожда́хѹ.

¹⁵И҆ рѹка̀ гд҇нѧ бѧ́ше на ни́хъ во ѕла҄ѧ, ѩ҆́коже гл҃а гд҇ь и҆ ѩ҆́коже клѧ́тсѧ гд҇ь и҆̀мъ, и҆ ѡ҆ѕло́би и҆̀хъ ѕѣлѡ̀.

¹⁶И҆ возста́ви (и҆̀мъ) гд҇ь сѹдїи҄, и҆ и҆зба́ви и҆̀хъ гд҇ь ѿ рѹкѝ плѣнѧ́ющихъ ѧ҆̀.

¹⁷Но и҆ сѹді́й не послѹ́шаша, ѩ҆́кѡ соблѹди́ша в̾слѣ́дъ богѡ́въ и҆ны́хъ и҆ поклони́шасѧ и҆̀мъ, и҆ разгнѣ́ваша гд҇а: и҆ ѹ҆клони́шасѧ съ пѹтѝ ско́рѡ, по немѹ́же ходи́ша ѻ҆тцы̀ и҆́хъ послѹ́шати за́повѣдїй гд҇нихъ: не сотвори́ша та́кѡ.

¹⁸И҆ ѩ҆́кѡ возста́ви и҆̀мъ гд҇ь сѹді́й, и҆ бѧ́ше гд҇ь съ сѹдїе́ю, и҆ спасѐ ѧ҆̀ ѿ рѹкѝ врагѡ́въ и҆́хъ во всѧ҄ дни҄ сѹдїѝ: ѩ҆́кѡ ѹ҆мили́сѧ гд҇ь ѿ воздыха́нїѧ и҆́хъ, ѿ лица̀ вою́ющихъ на нѧ̀ и҆ ѡ҆ѕлоблѧ́ющихъ ѧ҆̀.

¹⁹И҆ бы́сть є҆гда̀ ѹ҆мира́ше сѹдїѧ̀, и҆ ѿвраща́хѹсѧ, и҆ па́ки растлѣва́хѹсѧ па́че ѻ҆тє́цъ свои́хъ, и҆дѹ́ще в̾слѣ́дъ богѡ́въ и҆ны́хъ слѹжи́ти и҆̀мъ и҆ покланѧ́тисѧ и҆̀мъ: не ѿверго́ша начина́нїй свои́хъ и҆ не ѿстѹпи́ша ѿ пѹті́й свои́хъ жесто́кихъ.

²⁰И҆ разгнѣ́васѧ ѩ҆́ростїю гд҇ь на ї҆и҃лѧ и҆ речѐ: поне́же ѡ҆ста́ви ро́дъ се́й завѣ́тъ мо́й, є҆го́же заповѣ́дахъ ѻ҆тцє́мъ и҆́хъ, и҆ не послѹ́шаша гла́са моегѡ̀,

²¹и҆ а҆́зъ не приложѹ̀ и҆згна́ти мѹ́жа ѿ лица̀ и҆́хъ ѿ си́хъ ѩ҆зы́кѡвъ, и҆̀хже ѡ҆ста́ви ї҆исѹ́съ сы́нъ наѵи́нъ на землѝ и҆ ѹ҆́мре,

²²є҆́же и҆скѹша́ти въ ни́хъ ї҆и҃лѧ, а҆́ще сохранѧ́тъ пѹ́ть гд҇ень ходи́ти въ не́мъ, ѩ҆́коже сохрани́ша ѻ҆тцы̀ и҆́хъ, и҆лѝ нѝ.

²³И҆ ѡ҆ста́ви гд҇ь ѩ҆зы́ки сїѧ҄ не и҆стреби́ти и҆́хъ вско́рѣ, и҆ не предадѐ и҆́хъ въ рѹ́кѹ ї҆исѹ́совѹ.