Read Библия Церковнославянская Сѹді́й ї҆сра́илевыхъ 5 Bible Online

Сѹді́й ї҆сра́илевыхъ 5 - Библия Церковнославянская bible

Сѹді́й ї҆сра́илевыхъ 5

¹И҆ воспѣ̀ деввѡ́ра и҆ вара́къ сы́нъ а҆вїнее́мовъ въ то́й де́нь, и҆ речѐ:

²внегда̀ нача́ти вождѡ́мъ во ї҆и҃ли, въ произволе́нїи люді́й, благослови́те гд҇а.

³Ѹ҆слы́шите, ца́рїе, и҆ внѹши́те, кнѧ҄зи: а҆́зъ гд҇еви воспою̀ и҆ пою̀ бг҃ѹ ї҆и҃левѹ.

⁴Гд҇и, во и҆схо́дѣ твое́мъ ѿ сиі́ра, внегда̀ воздвиза́тисѧ тебѣ̀ ѿ села̀ є҆дѡ́мова, землѧ̀ потрѧсе́сѧ, и҆ не́бо возмѹти́сѧ, и҆ ѡ҆́блацы и҆ска́паша во́дѹ:

⁵го́ры подвиго́шасѧ ѿ лица̀ гд҇а є҆лѡї̀, та́ѧ сїна̀ ѿ лица̀ гд҇а бг҃а ї҆и҃лева.

⁶Во дни҄ самега́ра сы́на а҆на́ѳова, во дни҄ ї҆аи́ли, ѡ҆скѹдѣ́ша пѹтїѐ, и҆ и҆до́ша въ пѹти҄ кри҄вы, и҆ и҆до́ша въ пѹти҄ развращє́нны:

⁷ѡ҆скѹдѣ́ша живѹ́щїи во ї҆и҃ли, ѡ҆скѹдѣ́ша до́ндеже воста̀ деввѡ́ра, до́ндеже воста̀ ма́ти во ї҆и҃ли:

⁸и҆збра́ша бо́ги нѡ́вы, ѩ҆́кѡ хлѣ́бъ ѩ҆́ченъ, тогда̀ воева́ша гра́ды кнѧзе́й: щи́тъ не ѩ҆ви́сѧ, нижѐ копїѐ въ четы́редесѧти ты́сѧщахъ во ї҆и҃ли.

⁹Се́рдце моѐ на ѹ҆чинє́ннаѧ во ї҆и҃ли: си́льнїи люді́й, благослови́те гд҇а.

¹⁰Ѣ҆́здѧщїи на ѻ҆слѧ́техъ бѣ́лыхъ въ полѹ́дне, и҆ сѣдѧ́щїи на сѹди́щи, и҆ ходѧ́щїи на пѹти҄ со́нмѡвъ, провѣща́йте.

¹¹Гла́съ пле́щѹщихъ посредѣ̀ веселѧ́щихсѧ: та́мѡ дадѧ́тъ пра́вдѹ. Гд҇и, пра҄вды ѹ҆крѣпѝ во ї҆и҃ли: тогда̀ разыдо́шасѧ во гра́ды своѧ҄ лю́дїе гд҇ни.

¹²Воста́ни, воста́ни, деввѡ́ра: воста́ни, воста́ни, глаго́ли съ пѣ́снїю: воста́ни, вара́че, и҆ плѣнѝ плѣ́нъ тво́й, сы́не а҆вїнее́мль.

¹³Тогда̀ возвели́чисѧ си́ла є҆гѡ̀: гд҇ь смирѝ мнѣ̀ крѣ́пльшыѧ менє̀.

¹⁴Лю́дїе є҆фрє́мли ѹ҆томи́ша и҆̀хъ въ доли́нѣ: бра́тъ тво́й венїамі́нъ въ лю́дехъ твои́хъ: ѿ менє̀ махі́ръ снидо́ша взыскѹ́ющїи, и҆ ѿ завѹлѡ́на ѹ҆крѣплѧ́ющїисѧ въ ски́птрѣ повѣствова́нїѧ пи́сменника.

¹⁵И҆ нача҄лницы во ї҆ссаха́рѣ съ деввѡ́рою и҆ вара́комъ: та́кѡ вара́къ ѿпѹстѝ пѣ́шихъ свои́хъ въ доли́нѹ, въ раздѣлє́нїѧ рѹви́мѡва, вели҄ка и҆спыта҄нїѧ се́рдца.

¹⁶Вскѹ́ю мѝ сѣди́ши посредѣ̀ мосфаѳе́мѡвъ, слы́шати звизда́нїе востава́ющихъ проитѝ въ раздѣлє́нїѧ рѹви҄млѧ; вє́лїѧ и҆спыта҄нїѧ се́рдца.

¹⁷Галаа́дъ, ѡ҆б̾ ѻ҆нѹ̀ странѹ̀ ї҆ѻрда́на всели́сѧ: и҆ да́нъ, вскѹ́ю ѡ҆бита́еши въ корабле́хъ; а҆си́ръ ѡ҆бита̀ при бре́зѣхъ морски́хъ, и҆ въ раздѣле́нїихъ свои́хъ всели́сѧ.

¹⁸Завѹлѡ́нъ, лю́дїе ѹ҆кори́ша дѹ́шѹ свою̀ на сме́рть: и҆ нефѳалі́мъ на высота́хъ села̀.

¹⁹И҆ прїидо́ша къ немѹ̀ ца́рїе, и҆ ѡ҆полчи́шасѧ, тогда̀ воева́ша ца́рїе ханаа́нстїи во ѳанаа́хѣ, ѹ҆ воды̀ магеддѡ̀: мно́жества сребра̀ не взѧ́ша.

²⁰Ѿ небесѐ ѡ҆полчи́шасѧ ѕвѣ́зды, ѿ чи́на своегѡ̀ ѡ҆полчи́шасѧ съ сїса́рою.

²¹Водоте́чь кїсѡ́новъ и҆зве́рже и҆̀хъ, водоте́чь кадимі́нъ, водоте́чь кїсѡ́новъ: попере́тъ є҆го̀ дѹша̀ моѧ̀ си́льнаѧ.

²²Тогда̀ ѿсѣко́шасѧ кѡпы́та кѡ́нскаѧ ѿ топта́нїѧ си́льныхъ є҆гѡ̀.

²³Проклина́йте мазѡ́ра, речѐ а҆́гг҃лъ гд҇ень, проклѧ́тїемъ проклени́те живѹ́щихъ въ не́мъ, ѩ҆́кѡ не прїидо́ша въ по́мощь гд҇ню, въ по́мощь (гд҇ню) въ си́льныхъ.

²⁴Да благослови́тсѧ въ жена́хъ ї҆аи́ль, жена̀ хаве́ра кїне́ева, ѿ же́нъ въ кѹ́щи да благослови́тсѧ:

²⁵воды̀ просѝ ѹ҆ неѧ̀, и҆ дадѐ є҆мѹ̀ млеко̀ въ ча́ши: преимѹ́щихъ принесѐ ма́сло кра́вїе:

²⁶рѹ́кѹ свою̀ лѣ́вѹю къ колѹ̀ прострѐ, и҆ десни́цѹ свою̀ ко мла́тѹ рабо́тающихъ, и҆ ѹ҆бѝ сїса́рѹ: разбѝ главѹ̀ є҆гѡ̀, и҆ поразѝ, прободѐ скра҄нїѧ є҆гѡ̀:

²⁷междѹ̀ нога́ма є҆ѧ̀ повали́сѧ: падѐ ѹ҆трѹжде́нъ, и҆ ѹ҆́мре посредѣ̀ но́гъ є҆ѧ̀, и҆ та́мѡ падѐ бѣ́днѣ.

²⁸Ѻ҆ко́нцемъ взира́ше ма́ти сїса́рина, ѻ҆кно́мъ сквозѣ̀ реше́ткѹ, что̀ заме́дли колесни́ца є҆гѡ̀ прїитѝ; вскѹ́ю ѹ҆ме́длиша стопы҄ колесни́цъ є҆гѡ̀;

²⁹Мѹ́дрїи нача́лствѹющїи є҆ѧ̀ ѿвѣща́ша є҆́й, и҆ сама̀ ѿвѣщава́ше словеса̀ своѧ҄ себѣ̀:

³⁰не ѡ҆брѧ́щѹтъ ли є҆гѡ̀ раздѣлѧ́юща кѡры́сти, ѹ҆дрѹжа́юща дрѹгѡ́мъ на главѹ̀ мѹ́жа си́льна; кѡры́сти ша́рѡвъ сїса́рѣ, кѡры́сти ша́рѡвъ разли́чїѧ, ша́ры и҆спещре́нныхъ, сїѧ҄ вы́и є҆гѡ̀ кѡры́сти.

³¹Та́кѡ да поги́бнѹтъ всѝ вразѝ твоѝ, гд҇и: и҆ лю́бѧщїи є҆го̀, ѩ҆́коже восто́къ со́лнца въ си́лѣ свое́й.

³²И҆ бы́сть въ поко́и землѧ̀ четы́редесѧть лѣ́тъ.