Read Библия Церковнославянская Сѹді́й ї҆сра́илевыхъ 6 Bible Online

Сѹді́й ї҆сра́илевыхъ 6 - Библия Церковнославянская bible

Сѹді́й ї҆сра́илевыхъ 6

¹И҆ сотвори́ша сы́нове ї҆и҃лєвы ѕло́е пред̾ гд҇емъ, и҆ предадѐ и҆̀хъ гд҇ь въ рѹ́кѹ мадїа́млю се́дмь лѣ́тъ.

²И҆ ѹ҆крѣпи́сѧ рѹка̀ мадїа́млѧ на ї҆и҃лѧ: и҆ сотвори́ша себѣ̀ сы́нове ї҆и҃лєвы ѿ лица̀ мадїа́млѧ ѡ҆гра҄ды въ гора́хъ и҆ въ пеще́рахъ и҆ въ тверды́нехъ.

³И҆ бы́сть є҆гда̀ сѣ́ѧше мѹ́жъ ї҆и҃левъ, и҆ восхожда́ше мадїа́мъ и҆ а҆мали́къ и҆ сы́нове восто́чнїи, и҆ восхожда́хѹ на него̀,

⁴и҆ ѡ҆полча́хѹсѧ на ни́хъ, и҆ разорѧ́хѹ плоды̀ земны҄ѧ, до́ндеже вни́ти въ га́зѹ: и҆ не ѡ҆ставлѧ́хѹ бытїѧ̀ жи́зненнагѡ во ї҆и҃ли, и҆ ста́дъ и҆ телца̀ и҆ ѻ҆сла̀:

⁵ѩ҆́кѡ са́ми и҆ ско́ти и҆́хъ восхожда́хѹ, и҆ кѹ́щы и҆́хъ преноша́хѹ, и҆ прихожда́хѹ ѩ҆́кѡ прѹ́зи мно́жествомъ, и҆ самѣ҄мъ и҆ велблю́дѡмъ и҆́хъ не бѧ́ше числа̀: и҆ прихожда́хѹ на зе́млю ї҆и҃левѹ разори́ти ю҆̀.

⁶И҆ ѡ҆бнища̀ ї҆и҃ль ѕѣлѡ̀ ѿ лица̀ мадїа́млѧ.

⁷И҆ возопи́ша сы́нове ї҆и҃лєвы ко гд҇ѹ: и҆ бы́сть є҆гда̀ возопи́ша сы́нове ї҆и҃лєвы ко гд҇ѹ мадїа́ма ра́ди,

⁸и҆ посла̀ гд҇ь мѹ́жа про҇ро́ка къ сынѡ́мъ ї҆и҃лєвымъ, и҆ речѐ и҆̀мъ: сїѧ҄ гл҃етъ гд҇ь бг҃ъ ї҆и҃левъ: а҆́зъ є҆́смь и҆зведы́й ва́съ и҆з̾ є҆гѵ́пта, и҆ и҆зведо́хъ ва́съ и҆з̾ до́мѹ рабо́ты:

⁹и҆ и҆зба́вихъ ва́съ ѿ рѹкѝ є҆гѵ́петскїѧ и҆ ѿ рѹкѝ всѣ́хъ стѹжа́ющихъ ва́мъ: и҆ и҆згна́хъ ѧ҆̀ ѿ лица̀ ва́шегѡ, и҆ да́хъ ва́мъ зе́млю и҆́хъ,

¹⁰и҆ реко́хъ ва́мъ: а҆́зъ є҆́смь гд҇ь бг҃ъ ва́шъ, не ѹ҆бо́йтесѧ богѡ́въ а҆морре́йскихъ, въ ни́хже вы̀ живетѐ въ землѝ и҆́хъ: и҆ не послѹ́шасте гла́са моегѡ̀.

¹¹И҆ прїи́де а҆́гг҃лъ гд҇ень, и҆ сѣ́де под̾ дѹ́бомъ, и҆́же є҆́сть во є҆фра́ѳѣ, и҆́же бы́сть ї҆ѡа́са ѻ҆тца̀ є҆зрї̀. И҆ гедеѡ́нъ сы́нъ є҆гѡ̀ млача́ше пшени́цѹ на гѹмнѣ̀ є҆гѡ̀, бѣжа́ти ѿ лица̀ мадїа́млѧ.

¹²И҆ ѩ҆ви́сѧ є҆мѹ̀ а҆́гг҃лъ гд҇ень и҆ речѐ къ немѹ̀: гд҇ь съ тобо́ю, си́льный крѣ́постїю.

¹³И҆ речѐ къ немѹ̀ гедеѡ́нъ: во мнѣ̀, гд҇и мо́й: и҆ а҆́ще є҆́сть гд҇ь съ на́ми, и҆ вскѹ́ю ѡ҆брѣто́ша ны̀ всѧ҄ ѕла҄ѧ сїѧ҄; и҆ гдѣ̀ сѹ́ть всѧ҄ чѹдеса̀ є҆гѡ̀, є҆ли҄ка повѣ́даша на́мъ ѻ҆тцы̀ на́ши, глаго́люще: не и҆з̾ є҆гѵ́пта ли и҆зведѐ на́съ гд҇ь; и҆ нн҃ѣ ѿве́рже на́съ гд҇ь и҆ предадѐ на́съ въ рѹ́кѹ мадїа́млю.

¹⁴И҆ воззрѣ̀ на него̀ а҆́гг҃лъ гд҇ень и҆ речѐ є҆мѹ̀: и҆дѝ въ крѣ́пости твое́й се́й, и҆ спасе́ши ї҆и҃лѧ ѿ рѹкѝ мадїа́мли: и҆ сѐ, посла́хъ тѧ̀.

¹⁵И҆ речѐ къ немѹ̀ гедеѡ́нъ: во мнѣ̀, гд҇и, въ чесо́мъ спасѹ̀ ї҆и҃лѧ; сѐ, ты́сѧща моѧ̀ хѹ́ждша въ манассі́и, и҆ а҆́зъ є҆́смь мні́й въ домѹ̀ ѻ҆тца̀ моегѡ̀.

¹⁶И҆ речѐ къ немѹ̀ гд҇ь: поне́же а҆́зъ бѹ́дѹ съ тобо́ю, и҆ и҆збїе́ши мадїа́ма ѩ҆́кѡ мѹ́жа є҆ди́наго.

¹⁷И҆ речѐ къ немѹ̀ гедеѡ́нъ: и҆ а҆́ще ѡ҆брѣто́хъ благода́ть пред̾ ѻ҆чи́ма твои́ма, и҆ да сотвори́ши мнѣ̀ дне́сь зна́менїе, ѩ҆́кѡ ты̀ глаго́леши со мно́ю:

¹⁸не ѿидѝ ѿсю́дѹ, до́ндеже прїитѝ мнѣ̀ къ тебѣ̀, и҆ принесѹ̀ же́ртвѹ мою̀, и҆ пожрѹ̀ пред̾ тобо́ю. И҆ речѐ: а҆́зъ є҆́смь, преме́длю, до́ндеже ѡ҆брати́шисѧ ты̀.

¹⁹И҆ гедеѡ́нъ вни́де, и҆ сотворѝ ко́злище ѿ ко́зъ, и҆ че́тверть ї҆фї̀ мѹкѝ ѡ҆прѣсно́кѡвъ, и҆ мѧса̀ вложѝ въ ко́шницѹ, и҆ ю҆хѹ̀ влїѧ̀ въ горне́цъ: и҆ и҆знесѐ къ немѹ̀ под̾ дѹ́бъ, и҆ поклони́сѧ.

²⁰И҆ речѐ къ немѹ̀ а҆́гг҃лъ гд҇ень: возмѝ мѧса̀ и҆ хлѣ́бы прѣ҄сныѧ, и҆ положѝ ѹ҆ ка́мене ѻ҆́нагѡ, и҆ ю҆хѹ̀ бли́з̾ и҆злі́й. И҆ сотворѝ та́кѡ.

²¹И҆ прострѐ а҆́гг҃лъ гд҇ень коне́цъ жезла̀, и҆́же въ рѹцѣ̀ є҆гѡ̀, и҆ прикоснѹ́сѧ мѧсѡ́мъ и҆ хлѣ́бѡмъ прѣ҄снымъ: и҆ возгорѣ́сѧ ѻ҆́гнь и҆з̾ ка́мене, и҆ поѧдѐ мѧса̀ и҆ ѡ҆прѣсно́ки: и҆ а҆́гг҃лъ гд҇ень ѿи́де ѿ ѻ҆че́й є҆гѡ̀.

²²И҆ ви́дѣ гедеѡ́нъ, ѩ҆́кѡ а҆́гг҃лъ є҆́сть гд҇ень, и҆ речѐ гедеѡ́нъ: ѹ҆вы̀ мнѣ̀, гд҇и, гд҇и, ѩ҆́кѡ ви́дѣхъ а҆́гг҃ла гд҇нѧ лице́мъ къ лицѹ̀.

²³И҆ речѐ є҆мѹ̀ гд҇ь: ми́ръ тебѣ̀, не бо́йсѧ, не ѹ҆́мреши.

²⁴И҆ созда̀ та́мѡ гедеѡ́нъ же́ртвенникъ гд҇ѹ, и҆ назва̀ є҆го̀ [ми́ръ гд҇ень], да́же до днѐ сегѡ̀, є҆щѐ сѹ́щѹ є҆мѹ̀ во є҆фра́ѳѣ ѻ҆тца̀ є҆зрї̀.

²⁵И҆ бы́сть въ тѹ̀ но́щь, и҆ речѐ є҆мѹ̀ гд҇ь: возмѝ телца̀ ѹ҆пита́ннаго (ѿ скотѡ́въ) ѻ҆тца̀ твоегѡ̀, и҆ телца̀ втора́го седмѝ лѣ́тъ, и҆ разори́ши ѻ҆лта́рь ваа́ловъ, и҆́же є҆́сть ѻ҆тца̀ твоегѡ̀, и҆ дѹбра́вѹ, ѩ҆́же ѹ҆ негѡ̀, да посѣче́ши:

²⁶и҆ да согради́ши ѻ҆лта́рь гд҇еви бг҃ѹ твоемѹ̀ ѩ҆ви́вшемѹсѧ тебѣ̀ на верхѹ̀ (горы̀) маѡзї̀ во предчи́нїи: и҆ да по́ймеши телца̀ втора́го и҆ вознесе́ши всесожжє́нїѧ на дре́вѣхъ дѹбра́вы, ю҆́же посѣче́ши.

²⁷И҆ поѧ̀ гедеѡ́нъ де́сѧть мѹже́й ѿ рабѡ́въ свои́хъ, и҆ сотворѝ, ѩ҆́коже заповѣ́да є҆мѹ̀ гд҇ь. И҆ бы́сть ѩ҆́кѡ ѹ҆боѧ́сѧ до́мѹ ѻ҆тца̀ своегѡ̀ и҆ мѹже́й гра́да, є҆́же сотвори́ти во днѝ, и҆ сотворѝ но́щїю.

²⁸И҆ ѡ҆бѹ́треневаша мѹ́жїе гра́дстїи заѹ́тра: и҆ сѐ, раско́панъ ѻ҆лта́рь ваа́ловъ, и҆ дѹбра́ва ѩ҆́же ѹ҆ негѡ̀ посѣ́чена, и҆ ви́дѣша телца̀ втора́го вознесе́на на всесожже́нїе на ѻ҆лта́рь новосогражде́нный.

²⁹И҆ речѐ мѹ́жъ къ бли́жнемѹ своемѹ̀: кто̀ сотворѝ ве́щь сїю̀; И҆ вопроша́хѹ и҆ и҆ска́хѹ, и҆ позна́ша, ѩ҆́кѡ гедеѡ́нъ сы́нъ ї҆ѡа́совъ сотворѝ ве́щь сїю̀.

³⁰И҆ реко́ша мѹ́жїе гра́дстїи ко ї҆ѡа́сѹ: и҆зведѝ сы́на твоего̀, и҆ да ѹ҆́мретъ, ѩ҆́кѡ раскопа̀ ѻ҆лта́рь ваа́ловъ и҆ ѩ҆́кѡ посѣчѐ дѹбра́вѹ ѩ҆́же над̾ ни́мъ.

³¹И҆ речѐ ї҆ѡа́съ къ мѹжє́мъ воста́вшымъ на него̀: є҆да̀ вы̀ нн҃ѣ сѹ́дъ глаго́лете ѡ҆ ваа́лѣ; и҆лѝ вы̀ є҆го̀ спасетѐ; и҆́же а҆́ще кто̀ сотворѝ ѡ҆би́дѹ, да ѹ҆́мретъ до заѹ́трїѧ: а҆́ще бг҃ъ є҆́сть, да мсти́тъ себѣ̀, ѩ҆́кѡ раскопа̀ ѻ҆лта́рь є҆гѡ̀.

³²И҆ прозва̀ є҆го̀ въ то́й де́нь ї҆ероваа́ломъ, глаго́лѧ: да ѿмсти́тъ на не́мъ ваа́лъ, ѩ҆́кѡ раскопа̀ ѻ҆лта́рь є҆гѡ̀.

³³И҆ ве́сь мадїа́мъ и҆ а҆мали́къ и҆ сы́нове восто́кѡвъ снидо́шасѧ вкѹ́пѣ, и҆ преидо́ша (рѣкѹ̀), и҆ ѡ҆полчи́шасѧ въ доли́нѣ ї҆езрае́ль.

³⁴И҆ дх҃ъ бж҃їй ѹ҆крѣпѝ гедеѡ́на, и҆ вострѹбѝ ро́гомъ, и҆ возопѝ а҆вїезе́ръ в̾слѣ́дъ є҆гѡ̀.

³⁵И҆ посла̀ послы̀ ко всемѹ̀ манассі́ю, и҆ созва́сѧ и҆ се́й в̾слѣ́дъ є҆гѡ̀. Посе́мъ посла̀ послы̀ во а҆си́ръ и҆ въ завѹлѡ́нъ и҆ въ нефѳалі́мъ, и҆ взыдо́ша во срѣ́тенїе и҆̀мъ.

³⁶И҆ речѐ гедеѡ́нъ къ бг҃ѹ: а҆́ще ты̀ спаса́еши рѹко́ю мое́ю ї҆и҃лѧ, ѩ҆́коже гл҃алъ є҆сѝ,

³⁷сѐ, а҆́зъ положѹ̀ рѹно̀ ѻ҆́вчее на гѹмнѣ̀: и҆ а҆́ще бѹ́детъ роса̀ на рѹнѣ̀ то́чїю, и҆ по все́й землѝ сѹ́ша, ѹ҆разѹмѣ́ю, ѩ҆́кѡ спасе́ши рѹко́ю мое́ю ї҆и҃лѧ, ѩ҆́коже гл҃алъ є҆сѝ.

³⁸И҆ бы́сть та́кѡ: и҆ ѹ҆ра́ни гедеѡ́нъ наѹ́трїе, и҆ и҆сцѣдѝ рѹно̀, и҆ и҆стечѐ роса̀ и҆з̾ рѹна̀, и҆спо́лненъ ѻ҆крі́нъ воды̀.

³⁹И҆ речѐ гедеѡ́нъ къ бг҃ѹ: да не разгнѣ́ваетсѧ ѩ҆́рость твоѧ̀ на мѧ̀, и҆ возглаго́лю є҆щѐ є҆ди́ною, и҆ и҆скѹшѹ̀ є҆щѐ є҆ди́ною рѹно́мъ: да бѹ́детъ сѹ́ша на рѹнѣ̀ то́кмѡ, и҆ по все́й землѝ да бѹ́детъ роса̀.

⁴⁰И҆ сотворѝ бг҃ъ та́кѡ въ нощѝ то́й: и҆ бы́сть сѹ́ша на рѹнѣ̀ то́кмѡ, и҆ по все́й землѝ бы́сть роса̀.