Read Библия Церковнославянская Сѹді́й ї҆сра́илевыхъ 7 Bible Online

Сѹді́й ї҆сра́илевыхъ 7 - Библия Церковнославянская bible

Сѹді́й ї҆сра́илевыхъ 7

¹И҆ ѡ҆бѹ́тренева ї҆ероваа́лъ, се́й є҆́сть гедеѡ́нъ, и҆ всѝ лю́дїе и҆̀же съ ни́мъ, и҆ ѡ҆полчи́шасѧ ѹ҆ и҆сто́чника а҆ра́дъ: и҆ по́лкъ мадїа́мль и҆ а҆мали́ковъ бѧ́ше є҆мѹ̀ съ сѣ́вера на хо́лмѣ мѡсѐ гаваа́ѳъ-а҆мѡрѐ въ доли́нѣ.

²И҆ речѐ гд҇ь къ гедеѡ́нѹ: мно́зи лю́дїе и҆̀же съ тобо́ю, сегѡ̀ ра́ди не преда́мъ мадїа́ма въ рѹ́кѹ и҆́хъ, да не когда̀ похва́литсѧ ї҆и҃ль на мѧ̀, глаго́лѧ: рѹка̀ моѧ̀ спасе́ мѧ:

³и҆ нн҃ѣ рцы̀ во ѹ҆́шы лю́демъ, глаго́лѧ: кто̀ боѧзли́въ и҆ ѹ҆жа́стивъ, да возврати́тсѧ и҆ да ѿи́детъ ѿ горы̀ галаа́довы. И҆ возврати́шасѧ ѿ люді́й два́десѧть двѣ̀ ты́сѧщы, и҆ де́сѧть ты́сѧщъ ѡ҆ста́шасѧ.

⁴И҆ речѐ гд҇ь къ гедеѡ́нѹ: є҆щѐ лю́дїе мно́зи сѹ́ть: сведѝ ѧ҆̀ на во́дѹ, и҆ и҆скѹшѹ̀ тебѣ̀ и҆̀хъ та́мѡ: и҆ бѹ́детъ є҆го́же а҆́ще рекѹ̀ тебѣ̀, се́й да и҆́детъ съ тобо́ю, то́й да по́йдетъ съ тобо́ю: и҆ всѧ́къ є҆го́же а҆́ще рекѹ̀ тебѣ̀, се́й да не по́йдетъ съ тобо́ю, то́й да не по́йдетъ съ тобо́ю.

⁵И҆ сведѐ лю́ди на во́дѹ, и҆ речѐ гд҇ь къ гедеѡ́нѹ: всѧ́къ и҆́же поло́четъ ѧ҆зы́комъ свои́мъ ѿ воды̀, ѩ҆́коже ло́четъ пе́съ, да поста́виши є҆го̀ ѻ҆со́бь: и҆ всѧ́къ и҆́же на кѡлѣ́нѹ паде́тъ пи́ти, ѿлѹчѝ є҆го̀ ѻ҆со́бь.

⁶И҆ бы́сть число̀ въ го́рстехъ лока́вшихъ ѧ҆зы́комъ три́ста мѹже́й: и҆ всѝ ѡ҆ста́вшїи лю́дїе преклони́шасѧ на кѡлѣ́на своѧ҄ пи́ти во́дѹ.

⁷И҆ речѐ гд҇ь къ гедеѡ́нѹ: тремѝ сты҄ мѹже́й лока́вшими во́дѹ спасѹ̀ ва́съ, и҆ преда́мъ мадїа́ма въ рѹ́кѹ твою̀: и҆ всѝ лю́дїе да по́йдѹтъ, кі́йждо на мѣ́сто своѐ.

⁸И҆ взѧ́ша себѣ̀ бра́шно ѿ люді́й въ рѹ́кѹ свою̀ и҆ ро́ги своѧ҄: и҆ всѧ́каго мѹ́жа ї҆и҃лтеска ѿпѹстѝ коего́ждо въ кѹ́щѹ свою̀, а҆ три́ста мѹже́й ѹ҆держа̀: по́лкъ же мадїа́мль бѧ́ше ни́же є҆гѡ̀ въ доли́нѣ.

⁹И҆ бы́сть въ тѹ̀ но́щь, и҆ речѐ къ немѹ̀ гд҇ь: воста́въ сни́ди ѿсю́дѹ ско́рѡ въ по́лкъ, ѩ҆́кѡ преда́хъ и҆̀хъ въ рѹ́кѹ твою̀:

¹⁰и҆ а҆́ще бои́шисѧ ты̀ сни́ти, сни́ди ты̀ и҆ фара̀ ра́бъ тво́й въ по́лкъ,

¹¹и҆ ѹ҆слы́шиши, что̀ возглаго́лютъ: и҆ по се́мъ ѹ҆крѣпѧ́тсѧ рѹ́цѣ твоѝ, и҆ сни́деши въ по́лкъ. И҆ сни́де са́мъ и҆ фара̀ ра́бъ є҆гѡ̀ въ ча́сть пѧтьдесѧ́тникѡвъ, и҆̀же бы́ша въ полцѣ̀.

¹²И҆ мадїа́мъ и҆ а҆мали́къ и҆ всѝ сы́нове восто́кѡвъ стоѧ́хѹ въ доли́нѣ ѩ҆́кѡ прѹ́зи мно́жествомъ, и҆ велблю́дѡмъ и҆́хъ не бѧ́ше числа̀, но бѧ́хѹ ѩ҆́кѡ песо́къ на краѝ морстѣ́мъ мно́жествомъ.

¹³И҆ вни́де гедеѡ́нъ, и҆ сѐ, мѹ́жъ повѣ́даше со́нъ по́дрѹгѹ своемѹ̀, и҆ речѐ: се́й со́нъ є҆го́же ви́дѣхъ, и҆ сѐ, тѣ́сто хлѣ́ба ѩ҆́чна валѧ́ющеесѧ въ полцѣ̀ мадїа́мли, и҆ привали́сѧ къ кѹ́щи мадїа́мли, и҆ побѝ ю҆̀, и҆ превратѝ ю҆̀, и҆ падѐ кѹ́ща.

¹⁴И҆ ѿвѣща̀ по́дрѹгъ є҆гѡ̀ и҆ речѐ: нѣ́сть (сїѐ тѣ́сто), но ме́чь гедеѡ́на сы́на ї҆ѡа́сова мѹ́жа ї҆и҃лева: предадѐ бг҃ъ въ рѹ́кѹ є҆гѡ̀ мадїа́ма и҆ ве́сь по́лкъ.

¹⁵И҆ бы́сть ѩ҆́кѡ ѹ҆слы́ша гедеѡ́нъ повѣ́данїе сна̀ и҆ разсѹжде́нїе є҆гѡ̀, и҆ поклони́сѧ гд҇еви, и҆ возврати́сѧ въ по́лкъ ї҆и҃левъ и҆ речѐ: воста́ните, ѩ҆́кѡ предадѐ гд҇ь въ рѹ́ки на́шѧ по́лкъ мадїа́мль.

¹⁶И҆ раздѣлѝ три́ста мѹже́й на трѝ нача҄лства, и҆ вдадѐ ро́ги въ рѹ́цѣ всѣ҄мъ, и҆ водоно́сы тщы̀, и҆ свѣщы̀ средѣ̀ водоно́сѡвъ,

¹⁷и҆ речѐ и҆̀мъ: менѐ смотри́те, и҆ та́кожде твори́те: и҆ сѐ, а҆́зъ вни́дѹ въ ча́сть полка̀, и҆ бѹ́детъ ѩ҆́коже сотворю̀, та́кожде сотвори́те:

¹⁸и҆ а҆́зъ вострѹблю̀ ро́гомъ, и҆ всѝ и҆̀же со мно́ю, да вострѹ́бите и҆ вы̀ въ ро́ги ѡ҆́крестъ всегѡ̀ полка̀, и҆ да рече́те: (ме́чь) бг҃ѹ и҆ гедеѡ́нѹ.

¹⁹И҆ вни́де гедеѡ́нъ и҆ сто̀ мѹже́й и҆̀же съ ни́мъ въ ча́сть полка̀ въ нача́лѣ стра́жи сре́днїѧ: и҆ ѹ҆бѹже́нїемъ возбѹди́ша стрегѹ́щихъ, и҆ вострѹби́ша въ ро́ги, и҆ срази́ша водоно́сы и҆̀же въ рѹка́хъ и҆́хъ.

²⁰И҆ вострѹби́ша трѝ нача҄лства въ ро́ги и҆ сокрѹши́ша водоно́сы, и҆ ѹ҆держа́ша въ лѣ́выхъ рѹка́хъ свои́хъ свѣщы̀, и҆ въ десны́хъ рѹка́хъ и҆́хъ ро́ги, въ нѧ́же трѹби́ти: и҆ возопи́ша: ме́чь гд҇еви и҆ гедеѡ́нѹ.

²¹И҆ ста́ша кі́йждо ѡ҆ себѣ̀ ѡ҆́крестъ полка̀: и҆ смѧте́сѧ ве́сь по́лкъ, и҆ возопи́ша, и҆ побѣго́ша.

²²И҆ вострѹби́ша въ три́ста рогѡ́въ: и҆ положѝ гд҇ь ме́чь мѹ́жа на по́дрѹга є҆гѡ̀ во все́мъ полцѣ̀, и҆ пробѣжѐ по́лкъ до виѳасе́тта, и҆ собра́сѧ до страны̀ а҆велмаѹ́ла и҆ къ тава́ѳѹ.

²³И҆ возопи́ша мѹ́жїе ї҆и҃лтестїи ѿ нефѳалі́ма и҆ ѿ а҆си́ра и҆ ѿ всегѡ̀ манассі́и, и҆ погна́ша в̾слѣ́дъ мадїа́ма.

²⁴И҆ посла̀ послы̀ гедеѡ́нъ во всю̀ го́рѹ є҆фре́млю, глаго́лѧ: сни́дите во срѣ́тенїе мадїа́мѹ и҆ ѹ҆держи́те и҆̀мъ во́дѹ до веѳира̀ и҆ ї҆ѻрда́на. И҆ воззва̀ всѧ́къ мѹ́жъ є҆фре́мль, и҆ пред̾ѿѧ́ша во́дѹ до веѳира̀ и҆ ї҆ѻрда́на,

²⁵и҆ ѩ҆́ша два̀ кнѧ҄зѧ мадїа҄млѧ, ѡ҆ри́ва и҆ зи́ва: и҆ ѹ҆би́ша ѡ҆ри́ва въ сѹ́рѣ, и҆ зи́ва ѹ҆би́ша во ї҆акефзи́вѣ: и҆ погна́ша мадїа́ма, и҆ главѹ̀ ѡ҆ри́ва и҆ зи́ва принесо́ша къ гедеѡ́нѹ ѿ ѻ҆́ноѧ страны̀ ї҆ѻрда́на.