Read Библия Церковнославянская Сѹді́й ї҆сра́илевыхъ 8 Bible Online

Сѹді́й ї҆сра́илевыхъ 8 - Библия Церковнославянская bible

Сѹді́й ї҆сра́илевыхъ 8

¹И҆ реко́ша къ гедеѡ́нѹ мѹ́жїе є҆фрє́мли: что̀ сїѐ сотвори́лъ є҆сѝ на́мъ, ѩ҆́кѡ не позва́лъ є҆сѝ на́съ, є҆гда̀ ходи́лъ воева́ти на мадїа́ма; И҆ прѧ́хѹсѧ съ ни́мъ си́льнѡ.

²И҆ речѐ къ ни҄мъ (гедеѡ́нъ): что̀ сотвори́хъ нн҃ѣ ѩ҆́коже вы̀; не лѹ́чше ли грозде́цъ є҆фре́мль, не́жели ѡ҆бра́нїе вїногра́да а҆вїезе́рова;

³въ рѹ́кѹ ва́шѹ предадѐ гд҇ь кнѧ҄зи мадїа҄мли, ѡ҆ри́ва и҆ зи́ва: и҆ что̀ возмого́хъ сотвори́ти ѩ҆́коже вы̀; Тогда̀ ѹ҆толи́сѧ дѹ́хъ и҆́хъ ѿ негѡ̀, є҆гда̀ глаго́ла и҆̀мъ сло́во сїѐ.

⁴И҆ прїи́де гедеѡ́нъ ко ї҆ѻрда́нѹ, и҆ пре́йде са́мъ и҆ и҆̀же съ ни́мъ три́ста мѹже́й, а҆́лчни и҆ ѹ҆трѹжде́ни гонѧ́ще.

⁵И҆ речѐ мѹжє́мъ сокхѡ҄ѳскимъ: дади́те хлѣ́бы на пи́щѹ мѹжє́мъ си҄мъ и҆̀же со мно́ю, ѩ҆́кѡ а҆́лчни сѹ́ть: а҆́зъ же гоню̀ в̾слѣ́дъ зеве́а и҆ салма́на, царе́й мадїа́мскихъ.

⁶И҆ реко́ша кнѧ҄зи сокхѡ́ѳстїи: є҆да̀ рѹка̀ зеве́а и҆ салма́на нн҃ѣ въ рѹцѣ̀ твое́й, ѩ҆́кѡ дади́мъ во́ємъ твои҄мъ хлѣ́бы;

⁷И҆ речѐ гедеѡ́нъ: не та́кѡ: но є҆гда̀ преда́стъ гд҇ь зеве́а и҆ салма́на въ рѹ́кѹ мою̀, а҆́зъ сотрѹ̀ плѡ́ти ва́шѧ те́рнїемъ пѹсты́ннымъ и҆ волчца́ми.

⁸И҆ взы́де ѿтѹ́дѹ во фанѹи́лъ и҆ глаго́ла къ ни҄мъ та́кожде. И҆ ѿвѣща́ша є҆мѹ̀ мѹ́жїе фанѹи҄ли, ѩ҆́коже ѿвѣща́ша є҆мѹ̀ мѹ́жїе сокхѡ́ѳстїи.

⁹И҆ речѐ гедеѡ́нъ мѹжє́мъ фанѹи҄лскимъ, глаго́лѧ: є҆гда̀ возвращѹ́сѧ съ ми́ромъ, раскопа́ю сто́лпъ се́й.

¹⁰И҆ зеве́й и҆ салма́нъ бы́ша въ карка́рѣ, и҆ по́лкъ и҆́хъ съ ни́ми до пѧтьна́десѧти ты́сѧщъ (мѹже́й) ѡ҆ста́вшихсѧ ѿ всегѡ̀ полка̀ сынѡ́въ восто́чныхъ: и҆ ѹ҆ме́ршихъ бѧ́ше сто̀ и҆ два́десѧть ты́сѧщъ мѹже́й держа́щихъ ѻ҆рѹ́жїе.

¹¹И҆ взы́де гедеѡ́нъ пѹте́мъ живѹ́щихъ въ кѹ́щахъ ѿ восто́кѡвъ прѧ́мѡ на́вы и҆ ї҆егева́ла: и҆ и҆збѝ по́лкъ, по́лкъ же бѧ́ше наде́женъ.

¹²И҆ побѣго́ста зеве́й и҆ салма́нъ: и҆ гна̀ в̾слѣ́дъ и҆́хъ, и҆ поима̀ ѻ҆́ба царѧ҄ мадїа҄млѧ, зеве́а и҆ салма́на, и҆ ве́сь по́лкъ и҆́хъ смѧтѐ.

¹³И҆ возврати́сѧ гедеѡ́нъ сы́нъ ї҆ѡа́совъ ѿ ра́ти пре́жде восхо́да со́лнца,

¹⁴и҆ ѩ҆́тъ ѻ҆́трочища ѿ мѹже́й сокхѡ́ѳскихъ и҆ вопросѝ є҆го̀: и҆ вписа̀ ѿ негѡ̀ и҆мена̀ кнѧзе́й сокхѡ́ѳскихъ и҆ старѣ́йшинъ и҆́хъ, седми́десѧти и҆ седмѝ мѹже́й.

¹⁵И҆ прїи́де гедеѡ́нъ ко кнѧзє́мъ сокхѡ҄ѳскимъ и҆ речѐ и҆̀мъ: сѐ, зеве́й и҆ салма́нъ, и҆́хже ра́ди ѹ҆кори́сте мѧ̀, глаго́люще: є҆да̀ рѹка̀ зеве́а и҆ салма́на нн҃ѣ въ рѹцѣ̀ твое́й, ѩ҆́кѡ дади́мъ мѹжє́мъ твои҄мъ ѹ҆трѹ́ждшымсѧ хлѣ́бы;

¹⁶И҆ поѧ̀ кнѧ҄зи и҆ старѣ҄йшины гра́да, и҆ те́рнїе ѿ пѹсты́ни и҆ волчцы̀, и҆ сотрѐ и҆́ми мѹ́жы сокхѡ҄ѳски:

¹⁷и҆ сто́лпъ фанѹи́левъ раскопа̀, и҆ и҆збѝ мѹ́жы гра҄дскїѧ.

¹⁸И҆ речѐ къ зеве́ю и҆ салма́нѹ: каковѝ мѹ́жїе, и҆̀хже и҆зби́сте въ ѳавѡ́рѣ; И҆ рѣ́ша: ѩ҆́коже ты̀, та́кѡ ѻ҆нѝ, подо́бенъ ты̀ є҆сѝ и҆̀мъ, ѩ҆́кѡ подо́бїе сынѡ́въ царе́выхъ.

¹⁹И҆ речѐ гедеѡ́нъ: бра́тїѧ моѧ҄ и҆ сы́нове ма́тере моеѧ̀ сѹ́ть: жи́въ гд҇ь, а҆́ще бы́сте живи́ли и҆̀хъ, не ѹ҆би́лъ бы́хъ ва́съ.

²⁰И҆ речѐ ї҆еѳе́рѹ пе́рвенцѹ своемѹ̀: воста́въ ѹ҆бі́й и҆̀хъ. И҆ не и҆звлечѐ ѻ҆́трочищь меча̀ своегѡ̀: занѐ ѹ҆боѧ́сѧ, ѩ҆́кѡ мла́дъ бѧ́ше.

²¹И҆ речѐ зеве́й и҆ салма́нъ: воста́ни ѹ҆̀бо ты̀, и҆ сопроти́висѧ на́мъ: занѐ ѩ҆́кѡ мѹ́жъ си́ла є҆гѡ̀. И҆ воста̀ гедеѡ́нъ, и҆ ѹ҆бѝ зеве́а и҆ салма́на: и҆ взѧ̀ ѹ҆крашє́нїѧ, ѩ҆̀же на вы́ѧхъ велблю́дѡвъ и҆́хъ.

²²И҆ реко́ша мѹ́жїе ї҆и҃лстїи ко гедеѡ́нѹ: владѣ́й на́ми и҆ ты̀, и҆ сы́нове твоѝ, и҆ сы́нове сынѡ́въ твои́хъ, ѩ҆́кѡ ты̀ спа́слъ є҆сѝ на́съ ѿ рѹкѝ мадїа́мли.

²³И҆ речѐ къ ни҄мъ гедеѡ́нъ: не воз̾ѡблада́ю а҆́зъ ва́ми, и҆ не воз̾ѡблада́етъ сы́нъ мо́й ва́ми: гд҇ь да владѣ́етъ ва́ми.

²⁴И҆ речѐ къ ни҄мъ гедеѡ́нъ: попрошѹ̀ ѹ҆ ва́съ проше́нїѧ, и҆ да да́стъ мнѣ̀ всѧ́къ мѹ́жъ ѹ҆серѧ́зь ѿ плѣ́на своегѡ̀: ѩ҆́кѡ ѹ҆серѧ҄зи зла҄ты (мно́зи) бѧ́хѹ и҆̀мъ, занѐ ї҆сма́илтѧне бѧ́хѹ.

²⁵И҆ реко́ша: даю́ще дади́мъ. И҆ прострѐ ри́зѹ, и҆ вверго́ша тѹ̀ мѹ́жїе по ѹ҆серѧ́зю ѿ плѣ́на своегѡ̀.

²⁶И҆ бы́сть вѣ́съ ѹ҆серѧ҄зь златы́хъ, и҆̀хже и҆спросѝ, ты́сѧща и҆ се́дмь сѡ́тъ сї҄кль зла́та, кромѣ̀ плени́цъ и҆ мони́стъ (*є҆нфѡ́ѳовыхъ), и҆ ри́зъ багрѧ́ныхъ, ѩ҆̀же на царе́хъ мадїа́млихъ, и҆ кромѣ̀ чепе́й златы́хъ, ѩ҆̀же на вы́ѧхъ велблю́дѡвъ и҆́хъ.

²⁷И҆ сотворѝ ѿ ни́хъ гедеѡ́нъ є҆фѹ́дъ {Гре́ч.: є҆пѡмі́съ, славе́н.: нара́мникъ.}, и҆ поста́ви є҆го̀ во гра́дѣ свое́мъ во є҆фра́ѳѣ. И҆ соблѹдѝ ве́сь ї҆и҃ль по не́мъ та́мѡ: и҆ бы́сть гедеѡ́нѹ и҆ всемѹ̀ є҆гѡ̀ до́мѹ въ собла́знъ.

²⁸И҆ смири́сѧ мадїа́мъ пред̾ сы҄ны ї҆и҃левыми, и҆ не приложи́ша воздви́гнѹти главы̀ своеѧ̀. И҆ бы́сть въ поко́и землѧ̀ четы́редесѧть лѣ́тъ, во дни҄ гедеѡ́нѡвы.

²⁹И҆ и҆́де ї҆ероваа́лъ сы́нъ ї҆ѡа́совъ, и҆ сѣ́де въ домѹ̀ свое́мъ.

³⁰И҆ гедеѡ́нѹ бы́ша се́дмьдесѧтъ сынѡ́въ, и҆зше́дшїи ѿ чре́слъ є҆гѡ̀, ѩ҆́кѡ жєны̀ бѧ́хѹ мнѡ́ги є҆мѹ̀.

³¹И҆ подло́жница є҆гѡ̀ ѩ҆́же въ сїкі́мѣ и҆ сїѧ̀ родѝ є҆мѹ̀ сы́на, и҆ наречѐ и҆́мѧ є҆мѹ̀ а҆вїмеле́хъ.

³²И҆ ѹ҆́мре гедеѡ́нъ сы́нъ ї҆ѡа́совъ въ ста́рости бла́зѣ, и҆ погребе́сѧ во гро́бѣ ї҆ѡа́са ѻ҆тца̀ своегѡ̀, во є҆фра́ѳѣ, ѻ҆тца̀ є҆зрі́ева.

³³И҆ бы́сть є҆гда̀ ѹ҆́мре гедеѡ́нъ, и҆ соврати́шасѧ сы́нове ї҆и҃лєвы и҆ соблѹди́ша в̾слѣ́дъ ваалі́ма, и҆ сотвори́ша себѣ̀ со ваалвері́ѳомъ завѣ́тъ, да и҆̀мъ бѹ́детъ бо́гъ:

³⁴и҆ не воспомѧнѹ́ша сы́нове ї҆и҃лєвы гд҇а бг҃а своегѡ̀, и҆зба́вльшагѡ и҆̀хъ и҆з̾ рѹкѝ всѣ́хъ вра҄гъ и҆́хъ ѡ҆кре́стныхъ:

³⁵и҆ не сотвори́ша ми́лости съ до́момъ ї҆ероваа́ловымъ, се́й є҆́сть гедеѡ́нъ, по все́й благосты́ни є҆гѡ̀, ю҆́же сотворѝ со ї҆и҃лемъ.