Read Библия Церковнославянская А҆пока́лѷѱїсъ 10 Bible Online

А҆пока́лѷѱїсъ 10 - Библия Церковнославянская bible

А҆пока́лѷѱїсъ 10

¹И҆ ви́дѣхъ и҆́наго а҆́гг҃ла крѣ́пка сходѧ́ща съ нб҃сѐ, ѡ҆болче́на во ѡ҆́блакъ, и҆ дѹга̀ над̾ главо́ю (є҆гѡ̀), и҆ лицѐ є҆гѡ̀ ѩ҆́кѡ со́лнце, и҆ но́зѣ є҆гѡ̀ ѩ҆́кѡ столпѝ ѻ҆́гнени,

²и҆ и҆мѣ́ѧше въ рѹцѣ̀ свое́й кни́гѹ разгибе́нѹ: и҆ поста́ви но́гѹ свою̀ деснѹ́ю на мо́ри, а҆ шѹ́юю на землѝ,

³и҆ возопѝ гла́сомъ вели́кимъ, ѩ҆́кѡ ле́въ рыка́ѧ: и҆ є҆гда̀ возгласѝ, глаго́лаша се́дмь громѡ́въ гла́сы своѧ҄.

⁴И҆ є҆гда̀ возгласи́ша {глаго́лаша} се́дмь громѡ́въ гла́сы своѧ҄, хотѣ́хъ писа́ти: и҆ слы́шахъ гла́съ съ нб҃сѐ гл҃ющь мѝ: запечатлѣ́й, ѩ҆̀же глаго́лаша се́дмь громѡ́въ, и҆ сегѡ̀ не пишѝ.

⁵И҆ а҆́гг҃лъ, є҆го́же ви́дѣхъ стоѧ́ща на мо́ри и҆ на землѝ, воздви́же рѹ́кѹ свою̀ на не́бо

⁶и҆ клѧ́тсѧ живѹ́щимъ во вѣ́ки вѣкѡ́въ, и҆́же созда̀ не́бо и҆ ѩ҆̀же на не́мъ, и҆ зе́млю и҆ ѩ҆̀же на не́й, и҆ мо́ре и҆ ѩ҆̀же въ не́мъ, ѩ҆́кѡ лѣ́та ѹ҆жѐ не бѹ́детъ:

⁷но во дни҄ гла́са седма́гѡ а҆́гг҃ла, є҆гда̀ и҆́мать вострѹби́ти, тогда̀ сконча́етсѧ та́йна бж҃їѧ, ѩ҆́коже бл҃говѣстѝ свои́ми рабы҄ про҇рѡ́ки.

⁸И҆ гла́съ є҆гѡ̀ слы́шахъ съ небесѐ па́ки гл҃ющь со мно́ю, и҆ гл҃а: и҆дѝ и҆ прїимѝ кни́жицѹ разгнѹ́тѹю въ рѹцѣ̀ а҆́гг҃ла стоѧ́щагѡ на мо́ри и҆ на землѝ.

⁹И҆ и҆до́хъ ко а҆́гг҃лѹ, глаго́лѧ є҆мѹ̀: да́ждь мѝ кни́жицѹ. И҆ речѐ мѝ: прїимѝ и҆ снѣ́ждь ю҆̀: и҆ горька̀ бѹ́детъ во чре́вѣ твое́мъ, но во ѹ҆стѣ́хъ тѝ сладка̀ бѹ́детъ ѩ҆́кѡ ме́дъ.

¹⁰И҆ прїѧ́хъ кни́гѹ ѿ рѹкѝ а҆́гг҃ла и҆ снѣдо́хъ ю҆̀: и҆ бѣ̀ во ѹ҆стѣ́хъ мои́хъ ѩ҆́кѡ ме́дъ сладка̀: и҆ є҆гда̀ снѣдо́хъ ю҆̀, горька̀ бѧ́ше во чре́вѣ мое́мъ.

¹¹И҆ речѐ мѝ: подоба́етъ тѝ па́ки про҇ро́чествовати въ лю́дехъ и҆ во племенѣ́хъ, и҆ во ѩ҆зы́цѣхъ и҆ въ царе́хъ мно́зѣхъ.