Read Библия Церковнославянская А҆пока́лѷѱїсъ 16 Bible Online

А҆пока́лѷѱїсъ 16 - Библия Церковнославянская bible

А҆пока́лѷѱїсъ 16

¹И҆ слы́шахъ гла́съ ве́лїй ѿ хра́ма гл҃ющь седми́мъ а҆́гг҃лѡмъ: и҆ди́те и҆ и҆злі́йте се́дмь фїа҄лъ ѩ҆́рости бж҃їѧ на зе́млю.

²И҆ и҆́де пе́рвый а҆́гг҃лъ и҆ и҆злїѧ̀ фїа́лъ сво́й на зе́млю: и҆ бы́сть гно́й ѕо́лъ и҆ лю́тъ на человѣ́цѣхъ и҆мѹ́щихъ начерта́нїе ѕвѣри́но и҆ кла́нѧющихсѧ ї҆кѡ́нѣ є҆гѡ̀.

³И҆ вторы́й а҆́гг҃лъ и҆злїѧ̀ фїа́лъ сво́й въ мо́ре: и҆ бы́сть кро́вь ѩ҆́кѡ мертвеца̀, и҆ всѧ́ка дѹша̀ жива̀ ѹ҆́мре въ мо́ри.

⁴И҆ тре́тїй а҆́гг҃лъ и҆злїѧ̀ фїа́лъ сво́й на рѣ́ки и҆ на и҆сто́чники водны҄ѧ: и҆ бы́сть кро́вь.

⁵И҆ слы́шахъ а҆́гг҃ла водна́го глаго́люща: првднъ є҆сѝ, гд҇и, сы́й и҆ и҆́же бѣ̀, и҆ прпдбнъ, ѩ҆́кѡ сїѧ҄ сѹди́лъ є҆сѝ:

⁶занѐ кро́вь ст҃ы́хъ и҆ про҇рѡ́къ и҆злїѧ́ша, и҆ кро́вь и҆̀мъ да́лъ є҆сѝ пи́ти: досто́йни бо сѹ́ть.

⁷И҆ слы́шахъ дрѹга́го ѿ ѻ҆лтарѧ̀ глаго́люща: є҆́й, гд҇и бж҃е вседержи́телю, и҆́стинни и҆ пра҄ви сѹди҄ твоѝ.

⁸И҆ четве́ртый а҆́гг҃лъ и҆злїѧ̀ фїа́лъ сво́й на со́лнце: и҆ дано̀ бы́сть є҆мѹ̀ ѡ҆палѧ́ти человѣ́ки ѻ҆гне́мъ.

⁹И҆ ѡ҆пали́шасѧ человѣ́цы зно́емъ вели́кимъ, и҆ хѹ́лиша и҆́мѧ бж҃їе, и҆́же и҆́мать ѡ҆́бласть на ѩ҆́звахъ си́хъ, и҆ не пока́ѧшасѧ да́ти є҆мѹ̀ сла́вы.

¹⁰И҆ пѧ́тый а҆́гг҃лъ и҆злїѧ̀ фїа́лъ сво́й на престо́лъ ѕвѣри́нъ: и҆ бы́сть ца́рство є҆гѡ̀ ѡ҆мраче́но, и҆ жва́хѹ ѧ҆зы́ки своѧ҄ ѿ болѣ́зни,

¹¹и҆ хѹ́лиша бг҃а нб҇наго ѿ болѣ́зни и҆ ѿ ѩ҆́звъ свои́хъ, и҆ не пока́ѧшасѧ ѿ дѣ́лъ свои́хъ.

¹²И҆ шесты́й а҆́гг҃лъ и҆злїѧ̀ фїа́лъ сво́й на рѣкѹ̀ вели́кѹ є҆ѵфра́тъ: и҆ и҆зсѧ́че вода̀ є҆ѧ̀, да ѹ҆гото́витсѧ пѹ́ть царє́мъ сѹ́щымъ ѿ востѡ́къ со́лнечныхъ.

¹³И҆ ви́дѣхъ и҆з̾ ѹ҆́стъ ѕмі́ѧ и҆ и҆з̾ ѹ҆́стъ ѕвѣ́рѧ и҆ и҆з̾ ѹ҆́стъ лжа́гѡ проро́ка дѹ́хи трѝ нечи҄стыѧ, ѩ҆́кѡ жа҄бы и҆сходѧ́щыѧ:

¹⁴сѹ́ть бо дѹ́си де́мѡнстїи творѧ́ще зна́мєнїѧ, и҆̀же и҆схо́дѧтъ къ царє́мъ всеѧ̀ вселе́нныѧ, собра́ти ѧ҆̀ на бра́нь въ де́нь то́й вели́кїй бг҃а вседержи́телѧ.

¹⁵Сѐ, грѧдѹ̀ ѩ҆́кѡ та́ть: бл҃же́нъ бдѧ́й и҆ блюды́й ри҄зы своѧ҄, да не на́гъ хо́дитъ и҆ ѹ҆́зрѧтъ срамотѹ̀ є҆гѡ̀.

¹⁶И҆ собра̀ и҆̀хъ на мѣ́сто нарица́емое є҆вре́йски а҆рмагеддѡ́нъ.

¹⁷И҆ седмы́й а҆́гг҃лъ и҆злїѧ̀ фїа́лъ сво́й на воздѹ́хъ: и҆ и҆зы́де гла́съ ве́лїй ѿ хра́ма небесѐ ѿ пр҇то́ла, гл҃ѧ: бы́сть.

¹⁸И҆ бы́ша блиста҄нїѧ и҆ гро́ми и҆ гла́си, и҆ бы́сть трѹ́съ вели́къ, ѩ҆ко́въ николи́же бы́сть, ѿне́лѣже бы́ша человѣ́цы на землѝ, толи́къ трѹ́съ, та́кѡ ве́лїй.

¹⁹И҆ бы́сть гра́дъ вели́къ въ трѝ ча҄сти, и҆ гра́ди ѩ҆зы́честїи падо́ша, и҆ вавѷлѡ́нъ вели́кїй помѧнове́нъ бы́сть пред̾ бг҃омъ, да́ти є҆мѹ̀ ча́шѹ вїна̀ ѩ҆́рости гнѣ́ва своегѡ̀.

²⁰И҆ всѧ́къ ѻ҆́стровъ бѣжа̀, и҆ го́ры не ѡ҆брѣто́шасѧ:

²¹и҆ гра́дъ вели́къ, ѩ҆́кѡ тала́нтесъ, сни́де съ небесѐ на человѣ́ки: и҆ хѹ́лиша человѣ́цы бг҃а ѿ ѩ҆́звы гра́дныѧ, ѩ҆́кѡ ве́лїѧ є҆́сть ѩ҆́зва є҆гѡ̀ ѕѣлѡ̀.