Read Библия Церковнославянская А҆пока́лѷѱїсъ 20 Bible Online

А҆пока́лѷѱїсъ 20 - Библия Церковнославянская bible

А҆пока́лѷѱїсъ 20

¹И҆ ви́дѣхъ а҆́гг҃ла сходѧ́ща съ небесѐ, и҆мѣ́юща клю́чь бе́здны и҆ ѹ҆́же вели́ко въ рѹцѣ̀ свое́й:

²и҆ ѩ҆́тъ ѕмі́ѧ, ѕмі́ѧ дре́внѧго, и҆́же є҆́сть дїа́волъ и҆ сатана̀, и҆ свѧза̀ и҆̀ на ты́сѧщѹ лѣ́тъ,

³и҆ въ бе́зднѹ затворѝ {вве́рже} є҆го̀, и҆ заключѝ є҆го̀, и҆ запечатлѣ̀ над̾ ни́мъ, да не прельсти́тъ ктомѹ̀ ѩ҆зы́ки, до́ндеже сконча́етсѧ ты́сѧща лѣ́тъ: и҆ по си́хъ подоба́етъ є҆мѹ̀ ѿрѣше́нѹ бы́ти на ма́ло вре́мѧ.

⁴И҆ ви́дѣхъ престо́лы и҆ сѣдѧ́щыѧ на ни́хъ, и҆ сѹ́дъ да́нъ бы́сть и҆̀мъ: и҆ дѹ́шы расте́саныхъ за свидѣ́телство ї҆и҃сово и҆ за сло́во бж҃їе, и҆̀же не поклони́шасѧ ѕвѣ́рю, ни ї҆кѡ́нѣ є҆гѡ̀, и҆ не прїѧ́ша начерта́нїѧ на челѣ́хъ свои́хъ и҆ на рѹцѣ̀ свое́й. И҆ ѡ҆жи́ша и҆ воцари́шасѧ со хр҇то́мъ ты́сѧщѹ лѣ́тъ:

⁵про́чїи же мертвецы̀ не ѡ҆жи́ша, до́ндеже сконча́етсѧ ты́сѧща лѣ́тъ. Сѐ воскр҇нїе пе́рвое.

⁶Бл҃же́нъ и҆ ст҃ъ, и҆́же и҆́мать ча́сть въ воскр҇нїи пе́рвѣмъ: на ни́хже сме́рть втора́ѧ не и҆́мать ѡ҆́бласти, но бѹ́дѹтъ ї҆ере́є бг҃ѹ и҆ хр҇тѹ̀ и҆ воцарѧ́тсѧ съ ни́мъ ты́сѧщѹ лѣ́тъ.

⁷И҆ є҆гда̀ сконча́етсѧ ты́сѧща лѣ́тъ, разрѣше́нъ бѹ́детъ сатана̀ ѿ темни́цы своеѧ̀ и҆ и҆зы́детъ прельсти́ти ѩ҆зы́ки сѹ́щыѧ на четы́рехъ ѹ҆́глѣхъ землѝ, гѡ́га и҆ магѡ́га, собра́ти и҆̀хъ на бра́нь, и҆́хже число̀ ѩ҆́кѡ песо́къ морскі́й.

⁸И҆ взыдо́ша на широтѹ̀ землѝ и҆ ѡ҆быдо́ша ст҃ы́хъ ста́нъ и҆ гра́дъ возлю́бленный.

⁹И҆ сни́де ѻ҆́гнь ѿ бг҃а съ небесѐ и҆ поѧдѐ ѧ҆̀:

¹⁰и҆ дїа́волъ льстѧ́й и҆̀хъ вве́рженъ бѹ́детъ въ є҆́зеро ѻ҆́гненно и҆ жѹ́пелно, и҆дѣ́же ѕвѣ́рь и҆ лжи́вый проро́къ: и҆ мѹ́чени бѹ́дѹтъ де́нь и҆ но́щь во вѣ́ки вѣкѡ́въ.

¹¹И҆ ви́дѣхъ пр҇то́лъ вели́къ бѣ́лъ и҆ сѣдѧ́щаго на не́мъ, є҆гѡ́же ѿ лица̀ бѣжа̀ не́бо и҆ землѧ̀, и҆ мѣ́сто не ѡ҆брѣ́тесѧ и҆̀мъ.

¹²И҆ ви́дѣхъ мертвецы̀ ма҄лыѧ и҆ вели҄кїѧ стоѧ́щѧ пред̾ бг҃омъ, и҆ кни҄ги разгнѹ́шасѧ: и҆ и҆́на кни́га ѿве́рзесѧ, ѩ҆́же є҆́сть живо́тнаѧ: и҆ сѹ́дъ прїѧ́ша мертвецы̀ ѿ напи́саныхъ въ кни́гахъ, по дѣлѡ́мъ и҆́хъ.

¹³И҆ дадѐ мо́ре мертвецы̀ своѧ҄, и҆ сме́рть и҆ а҆́дъ да́ста своѧ҄ мертвецы̀: и҆ сѹ́дъ прїѧ́ша по дѣлѡ́мъ свои҄мъ,

¹⁴и҆ сме́рть и҆ а҆́дъ вве́ржєна бы́ста въ є҆́зеро ѻ҆́гненное. И҆ сѐ є҆́сть втора́ѧ сме́рть.

¹⁵И҆ и҆́же не ѡ҆брѣ́тесѧ въ кни́зѣ живо́тнѣй напи́санъ, вве́рженъ бѹ́детъ въ є҆́зеро ѻ҆́гненное.