Read Библия Церковнославянская Рѹ́ѳь 4 Bible Online

Рѹ́ѳь 4 - Библия Церковнославянская bible

Рѹ́ѳь 4

¹И҆ воо́зъ прїи́де ко вратѡ́мъ и҆ сѣ́де та́мѡ: и҆ сѐ, ѹ҆́жикъ мимоидѧ́ше, ѡ҆ не́мже глаго́ла воо́зъ. И҆ речѐ є҆мѹ̀ воо́зъ: ѹ҆клони́всѧ сѧ́ди здѣ̀. Ѻ҆́нъ же ѹ҆клони́сѧ и҆ сѣ́де.

²И҆ поѧ̀ воо́зъ де́сѧть мѹже́й ѿ старѣ́йшинъ гра́да, и҆ речѐ: сѧ́дите здѣ̀. И҆ сѣдо́ша.

³И҆ речѐ воо́зъ ѹ҆́жикѹ: ча́сть села̀, ѩ҆́же є҆́сть бра́та на́шегѡ є҆лїмеле́ха, ѩ҆́же даде́сѧ ноеммі́нѣ возврати́вшейсѧ ѿ села̀ мѡа́влѧ:

⁴а҆́зъ же реко́хъ: ѩ҆влю̀ тебѣ̀ сїѐ во ѹ҆́хо твоѐ, глаго́лѧ, пристѧжѝ пред̾ сѣдѧ́щими и҆ пред̾ старѣ҄йшины люді́й мои́хъ: и҆ а҆́ще ѹ҆́жичествѹеши, ѹ҆́жичествѹй: а҆́ще же не ѹ҆́жичествѹеши, повѣ́ждь мѝ, да вѣ́даю: ѩ҆́кѡ нѣ́сть ра́звѣ тебє̀ є҆́же ѹ҆́жичествовати бли́жшїй, и҆ а҆́зъ є҆́смь по тебѣ̀. Ѻ҆́нъ же речѐ: а҆́зъ є҆́смь, ѹ҆́жичествѹю.

⁵И҆ речѐ воо́зъ: въ де́нь въ ѻ҆́ньже пристѧ́жеши село̀ ѿ рѹкѝ ноеммі́ни, и҆ ѿ рѹ́ѳы мѡаві́тѧныни жены̀ ѹ҆ме́ршагѡ, и҆ сїю̀ досто́итъ тѝ поѧ́ти, да возста́виши и҆́мѧ ѹ҆ме́ршагѡ въ наслѣ́дїе є҆гѡ̀.

⁶И҆ речѐ ѹ҆́жикъ: не возмогѹ̀ ѹ҆́жичествовати себѣ̀, да не разсы́плю наслѣ́дїѧ моегѡ̀: ѹ҆́жичествѹй себѣ̀ ты̀ ѹ҆́жичество моѐ, а҆́зъ бо не возмогѹ̀ ѹ҆́жичествовати.

⁷И҆ сїѐ ѹ҆правле́нїе бы́сть пре́жде во ї҆и҃ли ѡ҆ ѹ҆́жичествованїи и҆ ѡ҆ премѣне́нїи, є҆́же ѹ҆крѣпи́ти всѧ́кое сло́во: и҆ и҆ззѹва́ше мѹ́жъ сапо́гъ сво́й, и҆ даѧ́ше по́дрѹгѹ своемѹ̀ ѹ҆́жичествѹющѹ ѹ҆́жичество є҆гѡ̀: и҆ сїѐ бѧ́ше свидѣ́телство во ї҆и҃ли.

⁸И҆ речѐ ѹ҆́жикъ воо́зѹ: пристѧжѝ себѣ̀ ѹ҆́жичество моѐ. И҆ и҆ззѹ́въ сапо́гъ сво́й, дадѐ є҆мѹ̀.

⁹И҆ речѐ воо́зъ старѣ́йшинамъ и҆ всѣ҄мъ лю́демъ: свидѣ́телє вы̀ дне́сь, ѩ҆́кѡ пристѧжа́хъ дне́сь всѧ҄, ѩ҆̀же є҆лїмеле́хѡва, и҆ всѧ҄ є҆ли҄ка сѹ́ть хелеѡ́нѡва и҆ маалѡ́нѡва, ѿ рѹкѝ ноеммі́ни:

¹⁰ксемѹ́ же рѹ́ѳь мѡаві́тѧныню женѹ̀ маалѡ́ню пое́млю себѣ̀ въ женѹ̀ возста́вити и҆́мѧ ѹ҆ме́ршагѡ въ наслѣ́дїе є҆гѡ̀, да не поги́бнетъ и҆́мѧ ѹ҆ме́ршагѡ ѿ бра́тїи є҆гѡ̀ и҆ ѿ пле́мене люді́й є҆гѡ̀: свидѣ́телє вы̀ дне́сь.

¹¹И҆ ѿвѣща́ша всѝ лю́дїе и҆̀же ѹ҆ вра́тъ: свидѣ́телє є҆смы̀. И҆ старѣ҄йшины рѣ́ша: да да́стъ гд҇ь женѣ̀ твое́й, входѧ́щей въ до́мъ тво́й, ѩ҆́коже рахи́ли и҆ ѩ҆́кѡ лі́и, ѩ҆̀же созда́ша ѻ҆́бѣ до́мъ ї҆и҃левъ, и҆ сотвори́ша си́лѹ во є҆фра́ѳѣ, и҆ бѹ́детъ и҆́мѧ въ виѳлее́мѣ:

¹²и҆ бѹ́ди до́мъ тво́й ѩ҆́коже до́мъ фаре́совъ, є҆го́же родѝ ѳама́рь ї҆ѹ́дѣ, ѿ сѣ́мене твоегѡ̀ да́стъ тебѣ̀ гд҇ь ѿ рабы̀ сеѧ̀ ча҄да.

¹³И҆ поѧ̀ воо́зъ рѹ́ѳь, и҆ бы́сть є҆мѹ̀ жена̀, и҆ вни́де къ не́й: и҆ дадѐ є҆́й гд҇ь зача́ти, и҆ родѝ сы́на.

¹⁴И҆ реко́ша жєны̀ къ ноеммі́нѣ: блг҇ве́нъ гд҇ь, и҆́же не разсы́па ѹ҆́жика твоегѡ̀ дне́сь, и҆ прозове́тсѧ и҆́мѧ твоѐ во ї҆и҃ли,

¹⁵и҆ бѹ́детъ тебѣ̀ во ѡ҆браща́ющаго дѹ́шѹ и҆ въ прекормле́нїе ста́рости твоеѧ̀, ѩ҆́кѡ сноха̀ твоѧ̀, возлюби́вшаѧ тебѐ, родѝ сы́на, ѩ҆́же є҆́сть блага̀ тебѣ̀ па́че седмѝ сынѡ́въ.

¹⁶И҆ взѧ̀ ноеммі́нь ѻ҆троча̀, и҆ положѝ є҆̀ на ло́нѣ свое́мъ, и҆ бы́сть є҆мѹ̀ корми́лица.

¹⁷И҆ прозва́ша сосѣ́ди и҆́мѧ є҆гѡ̀, глаго́люще: роди́сѧ сы́нъ ноеммі́нѣ. И҆ нареко́ша и҆́мѧ є҆мѹ̀ ѡ҆ви́дъ: се́й є҆́сть ѻ҆те́цъ ї҆ессе́а, ѻ҆тца̀ дв҃дова.

¹⁸И҆ сїѧ҄ рѡдства̀ фаре́сѡва: фаре́съ родѝ є҆срѡ́ма:

¹⁹є҆срѡ́мъ же родѝ а҆ра́ма: а҆ра́мъ же родѝ а҆мїнада́ва:

²⁰а҆мїнада́въ же родѝ наассѡ́на: наассѡ́нъ же родѝ салмѡ́на:

²¹салмѡ́нъ же родѝ воо́за: воо́зъ же родѝ ѡ҆ви́да:

²²ѡ҆ви́дъ же родѝ ї҆ессе́а: ї҆ессе́й же родѝ дв҃да.