Read Библия Церковнославянская а҃ ца́рствъ 15 Bible Online

а҃ ца́рствъ 15 - Библия Церковнославянская bible

а҃ ца́рствъ 15

¹И҆ речѐ самѹи́лъ къ саѹ́лѹ: посла́ мѧ гд҇ь пома́зати тѧ̀ на ца́рство въ лю́дехъ є҆гѡ̀ во ї҆и҃ли: и҆ нн҃ѣ послѹ́шай гла́са слове́съ гд҇нихъ:

²сїѧ҄ речѐ гд҇ь саваѡ́ѳъ: нн҃ѣ ѿмщѹ̀, ѩ҆̀же сотворѝ а҆мали́къ ї҆и҃лю, є҆гда̀ срѣ́те є҆го̀ на пѹтѝ, восходѧ́щѹ є҆мѹ̀ ѿ є҆гѵ́пта:

³и҆ нн҃ѣ ты̀ и҆дѝ, и҆ порази́ши а҆мали́ка и҆ ї҆ері́ма, и҆ всѧ҄ ѩ҆̀же сѹ́ть є҆гѡ̀, и҆ не снабди́ши ѿ ни́хъ (ничто́же), и҆ и҆скорени́ши є҆го̀: и҆ проклене́ши є҆го̀ и҆ всѧ҄ сѹ҄щаѧ є҆гѡ̀, и҆ не пощади́ши є҆гѡ̀: и҆ да ѹ҆бїе́ши ѿ мѹ́жеска по́лѹ и҆ до же́нска и҆ ѿ ю҆́ношъ и҆ до ссѹ́щихъ млеко̀, и҆ ѿ говѧ́дъ до ѻ҆ве́цъ и҆ ѿ велблю҄дъ до ѻ҆слѧ́тъ.

⁴И҆ собра̀ лю́ди саѹ́лъ и҆ сочтѐ ѧ҆̀ въ галга́лѣхъ двѣ́стѣ ты́сѧщъ пѣ́шихъ и҆ де́сѧть ты́сѧщъ ѿ ї҆ѹ́ды въ полцѣ́хъ:

⁵и҆ прїи́де саѹ́лъ до градѡ́въ а҆мали́ковыхъ и҆ засѧ́де въ пото́цѣ.

⁶И҆ речѐ саѹ́лъ ко кїне́ови: и҆дѝ и҆ ѹ҆клони́сѧ ѿ среды̀ а҆мали́ка, да не погѹблю̀ тѧ̀ съ ни́мъ, ты́ бо сотвори́лъ є҆сѝ ми́лость съ сынмѝ ї҆и҃левыми, є҆гда̀ и҆схожда́хѹ и҆з̾ є҆гѵ́пта. И҆ ѹ҆клони́сѧ кїне́й ѿ среды̀ а҆мали́ка.

⁷И҆ поразѝ саѹ́лъ а҆мали́ка ѿ є҆ѵїлы̀ да́же до сѹ́ра, и҆́же пред̾ лице́мъ є҆гѵ́пта:

⁸и҆ ѩ҆́тъ а҆га́га царѧ̀ а҆мали́кова жи́ва, и҆ всѧ҄ лю́ди и҆збѝ, и҆ ї҆ері́ма ѹ҆бѝ мече́мъ.

⁹И҆ сохранѝ саѹ́лъ и҆ всѝ лю́дїе а҆га́га царѧ̀ жи́ва и҆ блага҄ѧ ѿ ста́дъ и҆ бѹ́йволѡвъ, и҆ снѣ́дей (и҆ ѻ҆де́ждъ), и҆ вїногра́дѡвъ и҆ ѿ всѣ́хъ благи́хъ: и҆ не хотѧ́хѹ и҆скорени́ти ѧ҆̀, то́чїю хѹ́ждшее и҆ ѹ҆ничиже́ное и҆стреби́ша.

¹⁰И҆ бы́сть гл҃го́лъ гд҇ень къ самѹи́лѹ, гл҃ѧ:

¹¹раска́ѧхсѧ, ѩ҆́кѡ пома́захъ саѹ́ла на ца́рство, поне́же ѿврати́сѧ ѿ менє̀ и҆ слове́съ мои́хъ не соблюдѐ. И҆ ѡ҆печа́лисѧ самѹи́лъ и҆ вопїѧ́ше ко гд҇ѹ всю̀ но́щь.

¹²И҆ воста̀ ра́нѡ самѹи́лъ, и҆ и҆дѧ́ше на срѣ́тенїе ї҆и҃лтѧнѡмъ ра́нѡ. И҆ возвѣсти́ша самѹи́лѹ, глаго́люще: и҆́детъ саѹ́лъ въ карми́лъ, и҆ сѐ, воздви́же рѹ́кѹ себѣ̀, и҆ возвратѝ колесни́цѹ, и҆ сни́де въ галга́лы. И҆ прїи́де самѹи́лъ къ саѹ́лѹ, и҆ сѐ, то́й возноша́ше всесожже́нїе гд҇ѹ, пє́рваѧ ѿ коры́стей, и҆̀хже взѧ̀ ѿ а҆мали́кѡвъ.

¹³И҆ прїи́де самѹи́лъ къ саѹ́лѹ, и҆ речѐ є҆мѹ̀ саѹ́лъ: блг҇ве́нъ ты̀ гд҇ѹ, сотвори́хъ бо всѧ҄, є҆ли҄ка (мѝ) гл҃а гд҇ь.

¹⁴И҆ речѐ самѹи́лъ: и҆ кі́й гла́съ ста́дъ си́хъ во ѹ҆́шїю моє́ю, и҆ гла́съ говѧ́дъ, є҆го́же а҆́зъ слы́шѹ;

¹⁵И҆ речѐ саѹ́лъ: ѿ а҆мали́ка пригна́хъ ѧ҆̀, и҆̀хже сохрани́ша лю́дїе лѹ҄чшаѧ ѿ ста́дъ и҆ ѿ волѡ́въ, є҆́же пожре́ти ѧ҆̀ гд҇ѹ бг҃ѹ твоемѹ̀, прѡ́чаѧ же и҆зби́хъ.

¹⁶И҆ речѐ самѹи́лъ къ саѹ́лѹ: потерпѝ, и҆ возвѣщѹ́ ти, ѩ҆̀же гл҃а гд҇ь ко мнѣ̀ но́щїю.

¹⁷И҆ речѐ є҆мѹ̀ (саѹ́лъ): глаго́ли. И҆ речѐ самѹи́лъ къ саѹ́лѹ: є҆да̀ не ма́лъ бы́лъ є҆сѝ ты̀ пред̾ ни́мъ, и҆ не властели́на ли тѧ̀ поста́ви хорѹ́гви колѣ́на ї҆и҃лева; и҆ пома́за тѧ̀ гд҇ь на ца́рство ї҆и҃лево:

¹⁸и҆ посла́ тѧ гд҇ь пѹте́мъ и҆ речѐ тебѣ̀: и҆дѝ и҆ и҆скоренѝ а҆мали́ка, и҆ погѹбѝ согрѣ́шшихъ предо мно́ю, и҆ вою́й и҆̀хъ, до́ндеже сконча́еши и҆̀хъ:

¹⁹и҆ почто̀ не послѹ́шалъ є҆сѝ гла́са гд҇нѧ по всемѹ̀, є҆ли́кѡ гл҃а тебѣ̀, но ѹ҆стреми́лсѧ є҆сѝ на кѡры́сти и҆ сотвори́лъ є҆сѝ лѹка́вое пред̾ гд҇емъ;

²⁰И҆ речѐ саѹ́лъ къ самѹи́лѹ: послѹ́шахъ гла́са люді́й и҆ и҆до́хъ пѹте́мъ, и҆́мже посла́ мѧ гд҇ь, и҆ приведо́хъ а҆га́га царѧ̀ а҆мали́кова, и҆ а҆мали́ки и҆скорени́хъ:

²¹и҆ взѧ́ша лю́дїе кѡры́сти ѿ ста́дъ и҆ бѹ́йволы, пє́рваѧ ѿ и҆стреблѧ́емыхъ на пожре́нїе гд҇ѹ бг҃ѹ на́шемѹ въ галга́лѣхъ.

²²И҆ речѐ самѹи́лъ: є҆да̀ ѹ҆гѡ́дны гд҇ѹ всесожжє́нїѧ и҆ жє́ртвы, ѩ҆́коже послѹ́шати гла́са гд҇нѧ; сѐ, послѹша́нїе па́че же́ртвы бла́ги, и҆ покоре́нїе па́че тѹ́ка ѻ҆́внѧ:

²³ѩ҆́коже грѣ́хъ є҆́сть чарова́нїе, та́кѡ (грѣ́хъ є҆́сть) противле́нїе, и҆ ѩ҆́коже грѣ́хъ є҆́сть ї҆дѡлопоклоне́нїе, та́кѡ непокоре́нїе: поне́же ѹ҆ничижи́лъ є҆сѝ гл҃го́лъ гд҇ень, и҆ ѹ҆ничижи́тъ тѧ̀ гд҇ь не бы́ти тебѣ̀ царе́мъ во ї҆и҃ли.

²⁴И҆ речѐ саѹ́лъ къ самѹи́лѹ: согрѣши́хъ, ѩ҆́кѡ престѹпи́хъ сло́во гд҇не и҆ глаго́лъ тво́й, ѹ҆боѧ́хсѧ бо люді́й и҆ послѹ́шахъ гла́са и҆́хъ:

²⁵и҆ нн҃ѣ возмѝ грѣ́хъ мо́й и҆ возврати́сѧ со мно́ю, да поклоню́сѧ гд҇ѹ бг҃ѹ твоемѹ̀.

²⁶И҆ речѐ самѹи́лъ къ саѹ́лѹ: не возвращѹ́сѧ съ тобо́ю, ѩ҆́кѡ ѹ҆ничижи́лъ є҆сѝ гл҃го́лъ гд҇ень, и҆ ѹ҆ничижи́тъ тѧ̀ гд҇ь не бы́ти тебѣ̀ царе́мъ во ї҆и҃ли.

²⁷И҆ ѿвратѝ самѹи́лъ лицѐ своѐ є҆́же ѿитѝ: и҆ ѩ҆́тъ саѹ́лъ за воскри́лїе ри́зы є҆гѡ̀ и҆ раздра̀ є҆̀.

²⁸И҆ речѐ є҆мѹ̀ самѹи́лъ: раздра̀ гд҇ь ца́рство ї҆и҃лево ѿ рѹкѹ̀ твоє́ю дне́сь, и҆ да́стъ є҆̀ бли́жнемѹ твоемѹ̀, лѹ́чшемѹ па́че тебє̀,

²⁹и҆ раздѣли́тсѧ ї҆и҃ль на дво́е: и҆ не ѡ҆брати́тсѧ, нижѐ раска́етсѧ ст҃ы́й ї҆и҃левъ, зане́же не ѩ҆́кѡ человѣ́къ є҆́сть, є҆́же раска́ѧтисѧ є҆мѹ̀, запрети́тъ, и҆ не пребѹ́детъ.

³⁰И҆ речѐ саѹ́лъ: согрѣши́хъ, но просла́ви мѧ̀ нн҃ѣ пред̾ старѣ҄йшины ї҆и҃лєвы и҆ пред̾ людьмѝ мои́ми, и҆ возврати́сѧ со мно́ю, и҆ поклоню́сѧ гд҇ѹ бг҃ѹ твоемѹ̀.

³¹И҆ возврати́сѧ самѹи́лъ в̾слѣ́дъ саѹ́ла, и҆ поклони́сѧ саѹ́лъ гд҇ѹ.

³²И҆ речѐ самѹи́лъ: приведи́те мѝ а҆га́га царѧ̀ а҆мали́кова. И҆ прїи́де къ немѹ̀ а҆га́гъ трепе́ща, и҆ речѐ а҆га́гъ: та́кѡ ли горька̀ сме́рть;

³³И҆ речѐ самѹи́лъ ко а҆га́гѹ: ѩ҆́коже ѡ҆безча́дствова же́нъ ѻ҆рѹ́жїе твоѐ, та́кѡ ѡ҆безча́дитсѧ въ жена́хъ ма́ти твоѧ̀. И҆ закла̀ самѹи́лъ а҆га́га пред̾ гд҇емъ въ галга́лѣхъ.

³⁴И҆ ѿи́де самѹи́лъ во а҆рмаѳе́мъ: и҆ саѹ́лъ ѿи́де въ до́мъ сво́й въ гаваю̀.

³⁵И҆ не приложѝ самѹи́лъ ктомѹ̀ ви́дѣти саѹ́ла да́же до днѐ сме́рти своеѧ̀, поне́же пла́каше самѹи́лъ ѡ҆ саѹ́лѣ, зане́же раска́ѧсѧ гд҇ь, ѩ҆́кѡ поста́ви саѹ́ла царѧ̀ во ї҆и҃ли.