Read Библия Церковнославянская а҃ ца́рствъ 19 Bible Online

а҃ ца́рствъ 19 - Библия Церковнославянская bible

а҃ ца́рствъ 19

¹И҆ глаго́ла саѹ́лъ къ ї҆ѡнаѳа́нѹ сы́нѹ своемѹ̀ и҆ ко всѣ҄мъ ѻ҆трокѡ́мъ свои҄мъ, да ѹ҆мертвѧ́тъ даві́да. Ї҆ѡнаѳа́нъ же сы́нъ саѹ́ловъ любѧ́ше даві́да ѕѣлѡ̀.

²И҆ возвѣстѝ ї҆ѡнаѳа́нъ даві́дѹ, глаго́лѧ: ѻ҆те́цъ мо́й саѹ́лъ и҆́щетъ тѧ̀ ѹ҆би́ти: сохрани́сѧ ѹ҆̀бо заѹ́тра ра́нѡ, и҆ скры́йсѧ, и҆ сѧ́ди вта́йнѣ:

³и҆ а҆́зъ и҆зы́дѹ, и҆ ста́нѹ при ѻ҆тцѣ̀ мое́мъ на селѣ̀, и҆дѣ́же є҆сѝ ты̀: и҆ а҆́зъ возглаго́лю ѻ҆тцѹ̀ моемѹ̀ ѡ҆ тебѣ̀, и҆ ѹ҆зрю̀, что̀ бѹ́детъ, и҆ возвѣщѹ̀ тебѣ̀.

⁴И҆ глаго́ла ї҆ѡнаѳа́нъ ѡ҆ даві́дѣ блага҄ѧ къ саѹ́лѹ ѻ҆тцѹ̀ своемѹ̀, и҆ речѐ къ немѹ̀: да не согрѣша́етъ ца́рь на раба̀ своего̀ даві́да, ѩ҆́кѡ не согрѣшѝ пред̾ тобо́ю, и҆ дѣла̀ є҆гѡ̀ бла҄га сѹ́ть ѕѣлѡ̀:

⁵и҆ положѝ дѹ́шѹ свою̀ въ рѹцѣ̀ свое́й и҆ побѣдѝ и҆ноплеме́нника, и҆ сотворѝ гд҇ь сп҇нїе вели́ко всемѹ̀ ї҆и҃лю, и҆ всѝ ви́дѣша и҆ возра́довашасѧ: и҆ почто̀ согрѣша́еши въ кро́вь непови́ннѹ, є҆́же ѹ҆би́ти даві́да тѹ́не;

⁶И҆ послѹ́ша саѹ́лъ гла́са ї҆ѡнаѳа́нѧ: и҆ клѧ́тсѧ саѹ́лъ, глаго́лѧ: жи́въ гд҇ь, ѩ҆́кѡ не ѹ҆́мретъ (даві́дъ).

⁷И҆ призва̀ ї҆ѡнаѳа́нъ даві́да и҆ возвѣстѝ є҆мѹ̀ всѧ҄ глаго́лы сїѧ҄, и҆ введѐ ї҆ѡнаѳа́нъ даві́да къ саѹ́лѹ, и҆ бѣ̀ пред̾ ни́мъ ѩ҆́кѡ вчера̀ и҆ тре́тїѧгѡ днѐ.

⁸И҆ приложи́сѧ бра́нь бы́ти на саѹ́ла, и҆ ѹ҆крѣпи́сѧ даві́дъ, и҆ побѣдѝ и҆ноплеме́нники, и҆ и҆збѝ ѩ҆́звою вели́кою ѕѣлѡ̀, и҆ бѣжа́ша ѿ лица̀ є҆гѡ̀.

⁹И҆ бы́сть ѿ бг҃а дѹ́хъ лѹка́вый на саѹ́лѣ, и҆ то́й въ домѹ̀ свое́мъ сѣдѧ́ше, и҆ копїѐ въ рѹцѣ̀ є҆гѡ̀, даві́дъ же и҆гра́ше рѹка́ми свои́ми:

¹⁰и҆ и҆ска́ше саѹ́лъ копїе́мъ порази́ти даві́да, и҆ ѿстѹпѝ даві́дъ ѿ лица̀ саѹ́лѧ, и҆ ѹ҆да́ри саѹ́лъ копїе́мъ въ стѣ́нѹ: даві́дъ же ѿше́дъ спасе́сѧ въ но́щь тѹ̀.

¹¹И҆ посла̀ саѹ́лъ вѣ́стники въ до́мъ даві́довъ стрещѝ є҆го̀, є҆́же ѹ҆би́ти є҆го̀ ра́нѡ. И҆ возвѣстѝ даві́дѹ мелхо́ла жена̀ є҆гѡ̀, глаго́лющи: а҆́ще ты̀ не спасе́ши дѹшѝ твоеѧ̀ въ но́щь сїю̀, заѹ́тра ѹ҆́мреши.

¹²И҆ свѣ́си мелхо́ла даві́да ѻ҆ко́нцемъ, и҆ ѿи́де, и҆ ѹ҆бѣжа̀, и҆ спасе́сѧ:

¹³и҆ прїѧ́тъ мелхо́ла тщепогреба҄лнаѧ, и҆ положѝ на ѻ҆дрѣ̀, и҆ пе́чень ко́зїю положѝ на возгла́вїи є҆гѡ̀, и҆ покры̀ ѧ҆̀ ри́зами.

¹⁴И҆ посла̀ саѹ́лъ вѣ́стники, да и҆́мѹтъ даві́да, и҆ реко́ша, ѩ҆́кѡ бо́ленъ є҆́сть.

¹⁵И҆ посла̀ саѹ́лъ, да ѡ҆глѧ́даютъ даві́да, глаго́лѧ: принеси́те є҆го̀ на ѻ҆дрѣ̀ ко мнѣ̀, є҆́же ѹ҆мертви́ти є҆го̀.

¹⁶И҆ прїидо́ша слѹги҄, и҆ сѐ, тщепогреба҄лнаѧ на ѻ҆дрѣ̀ и҆ ко́зїѧ пе́чень при возгла́вїи є҆гѡ̀.

¹⁷И҆ речѐ саѹ́лъ къ мелхо́лѣ: почто̀ та́кѡ ѡ҆бманѹ́ла мѧ̀ є҆сѝ, и҆ ѿпѹсти́ла є҆сѝ врага̀ моего̀, и҆ гонзѐ менѐ; И҆ речѐ мелхо́ла саѹ́лѹ: са́мъ мѝ речѐ: ѿпѹсти́ мѧ: а҆́ще же нѝ, погѹблю́ тѧ.

¹⁸И҆ даві́дъ ѹ҆бѣжа̀ и҆ спасе́сѧ, и҆ и҆́де къ самѹи́лѹ во а҆рмаѳе́мъ и҆ повѣ́да є҆мѹ̀ всѧ҄, є҆ли҄ка сотворѝ є҆мѹ̀ саѹ́лъ. И҆ и҆до́ста даві́дъ и҆ самѹи́лъ и҆ сѣдо́ста въ наѵа́ѳѣ въ ра́мѣ.

¹⁹И҆ возвѣсти́ша саѹ́лѹ, глаго́люще: сѐ, даві́дъ въ наѵа́ѳѣ въ ра́мѣ.

²⁰И҆ посла̀ слѹги҄ саѹ́лъ ѩ҆́ти даві́да, и҆ ви́дѣша собо́ръ про҇ро́кѡвъ, и҆ самѹи́лъ стоѧ́ше настоѧ́тель над̾ ни́ми: и҆ бы́сть дх҃ъ бж҃їй на слѹга́хъ саѹ́лихъ, и҆ нача́ша прорица́ти.

²¹И҆ возвѣсти́ша саѹ́лѹ, и҆ посла̀ дрѹгї҄ѧ слѹги҄, и҆ прорица́ти нача́ша и҆ ті́и. И҆ приложѝ саѹ́лъ посла́ти слѹги҄ трє́тїѧ, и҆ нача́ша и҆ ті́и прорица́ти.

²²И҆ разгнѣ́васѧ гнѣ́вомъ саѹ́лъ, и҆ и҆́де и҆ са́мъ во а҆рмаѳе́мъ, и҆ прїи́де да́же до кла́дѧзѧ гѹмна̀, є҆́же є҆́сть въ се́фѣ, и҆ вопросѝ и҆ речѐ: гдѣ̀ є҆́сть самѹи́лъ и҆ даві́дъ; И҆ рѣ́ша: сѐ, въ наѵа́ѳѣ въ ра́мѣ.

²³И҆ и҆́де ѿтѹ́дѹ въ наѵа́ѳъ (и҆́же) въ ра́мѣ: и҆ бы́сть и҆ на не́мъ дх҃ъ бж҃їй, и҆ и҆дѧ́ше и҆ды́й и҆ прорица́ѧ, до́ндеже прїитѝ є҆мѹ̀ въ наѵа́ѳъ и҆́же въ ра́мѣ.

²⁴И҆ совлечѐ ри҄зы своѧ҄ и҆ прорица́ше пред̾ ни́ми: и҆ падѐ на́гъ ве́сь де́нь то́й и҆ всю̀ но́щь. Тогѡ̀ ра́ди глаго́лахѹ: є҆да̀ и҆ саѹ́лъ во проро́цѣхъ;