Read Библия Церковнославянская а҃ ца́рствъ 2 Bible Online

а҃ ца́рствъ 2 - Библия Церковнославянская bible

а҃ ца́рствъ 2

¹И҆ помоли́сѧ а҆́нна и҆ речѐ: ѹ҆тверди́сѧ се́рдце моѐ въ гд҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ ѹ҆ста̀ моѧ҄ на врагѝ моѧ҄, возвесели́хсѧ ѡ҆ спасе́нїи твое́мъ:

²ѩ҆́кѡ нѣ́сть ст҃ъ ѩ҆́кѡ гд҇ь, и҆ нѣ́сть првднъ ѩ҆́кѡ бг҃ъ на́шъ, и҆ нѣ́сть ст҃ъ па́че тебє̀:

³не хвали́тесѧ и҆ не глаго́лите высѡ́каѧ въ горды́ни, нижѐ да и҆зы́детъ велерѣ́чїе и҆з̾ ѹ҆́стъ ва́шихъ: ѩ҆́кѡ бг҃ъ ра́зѹмѡвъ гд҇ь, и҆ бг҃ъ ѹ҆готовлѧ́ѧй начина҄нїѧ своѧ҄:

⁴лѹ́къ си́льныхъ и҆знемо́же, и҆ немощствѹ́ющїи препоѧ́сашасѧ си́лою:

⁵и҆спо́лненнїи хлѣ́ба лиши́шасѧ, и҆ а҆́лчѹщїи прише́лствоваша зе́млю: ѩ҆́кѡ непло́ды родѝ се́дмь, и҆ мно́гаѧ въ ча́дѣхъ и҆знемо́же:

⁶гд҇ь мертви́тъ и҆ живи́тъ, низво́дитъ во а҆́дъ и҆ возво́дитъ,

⁷гд҇ь ѹ҆бо́житъ и҆ богати́тъ, смирѧ́етъ и҆ вы́ситъ,

⁸возставлѧ́етъ ѿ землѝ ѹ҆бо́га и҆ ѿ гно́ища воздвиза́етъ ни́ща посади́ти є҆го̀ съ могѹ́щими люді́й, и҆ престо́лъ сла́вы даѧ̀ въ наслѣ́дїе и҆̀мъ:

⁹даѧ́й моли́твѹ молѧ́щемѹсѧ и҆ блг҇вѝ лѣ҄та првднагѡ, ѩ҆́кѡ не въ крѣ́пости си́ленъ мѹ́жъ:

¹⁰гд҇ь не́мощна сотворѝ сопоста́та є҆гѡ̀, гд҇ь ст҃ъ: да не хва́литсѧ премѹ́дрый премѹ́дростїю свое́ю, и҆ да не хва́литсѧ си́льный си́лою свое́ю, и҆ да не хва́литсѧ бога́тый бога́тствомъ свои́мъ: но ѡ҆ се́мъ да хва́литсѧ хвалѧ́йсѧ, є҆́же разѹмѣ́ти и҆ зна́ти гд҇а, и҆ твори́ти сѹ́дъ и҆ пра́вдѹ посредѣ̀ землѝ: гд҇ь взы́де на нб҃са̀ и҆ возгремѣ̀: то́й сѹ́дитъ концє́мъ землѝ, првднъ сы́й, и҆ да́стъ крѣ́пость царє́мъ на́шымъ и҆ вознесе́тъ ро́гъ хрїста̀ своегѡ̀.

¹¹И҆ ѡ҆ста́виша є҆го̀ та́мѡ пред̾ гд҇емъ и҆ ѿидо́ша во а҆рмаѳе́мъ въ до́мъ сво́й: ѻ҆троча́ же бѣ̀ слѹжа̀ лицѹ̀ гд҇ню пред̾ лице́мъ и҆лі́и жерца̀.

¹²Сы́нове же и҆лі́и жерца̀ (бы́ша) сы́нове поги́белнїи, не вѣ́дѹще гд҇а,

¹³ни ѡ҆правда́нїѧ жре́ческа пред̾ людьмѝ всѣ́ми жрѹ́щими. И҆ прихожда́ше ѻ҆́трокъ жре́ческъ, є҆гда̀ варѧ́тсѧ мѧса̀, и҆ ѹ҆́дица трезѹ́бна въ рѹкѹ̀ є҆гѡ̀,

¹⁴и҆ влага́ше ю҆̀ въ коно́бъ вели́кїй, и҆лѝ въ мѣ́дѧный сосѹ́дъ, и҆лѝ горне́цъ, и҆ всѐ є҆́же вонзе́сѧ на ѹ҆́дицѹ, взима́ше є҆̀ себѣ̀ жре́цъ: и҆ та́кѡ творѧ́хѹ всемѹ̀ ї҆и҃леви приходѧ́щемѹ пожре́ти гд҇еви въ силѡ́мѣ.

¹⁵И҆ пре́жде кажде́нїѧ тѹ́ка, прихожда́ше ѻ҆́трокъ жре́ческъ и҆ глаго́лаше мѹ́жеви жрѹ́щемѹ: да́ждь мѧ́са и҆спещѝ жерцѹ̀, и҆ не возмѹ̀ ѿ тебє̀ мѧ́са варе́нагѡ ѿ коно́ба.

¹⁶И҆ глаго́лаше мѹ́жъ жрѧ́й: да покади́тсѧ пе́рвѣе тѹ́къ, ѩ҆́коже подоба́етъ, и҆ тогда̀ во́змеши себѣ̀ ѿ всѣ́хъ, є҆́же хо́щетъ дѹша̀ твоѧ̀. И҆ речѐ: нѝ, нн҃ѣ да́ждь: а҆́ще же не да́си, возмѹ̀ си́лою.

¹⁷И҆ бѣ̀ пред̾ гд҇емъ грѣ́хъ ѻ҆трокѡ́въ ве́лїй ѕѣлѡ̀, ѩ҆́кѡ ѿмета́хѹ же́ртвѹ гд҇ню.

¹⁸И҆ самѹи́лъ бѣ̀ слѹжа̀ пред̾ гд҇емъ, ѻ҆́трочищь сы́й ѡ҆поѧ́санъ во є҆фѹ́дъ льнѧ́нъ.

¹⁹И҆ хламѵ́дѹ ма́лѹ сотворѝ є҆мѹ̀ ма́ти є҆гѡ̀, и҆ приноша́ше є҆мѹ̀ ѿ дні́й во дни҄, є҆гда̀ восхожда́ше съ мѹ́жемъ свои́мъ пожре́ти же́ртвѹ дні́й.

²⁰И҆ благословѝ и҆лі́й є҆лканѹ̀ и҆ женѹ̀ є҆гѡ̀, глаго́лѧ: да возда́стъ тѝ гд҇ь сѣ́мѧ ѿ жены̀ сеѧ̀ за да́ръ, є҆го́же дарова́лъ є҆сѝ гд҇еви. И҆ ѿи́де человѣ́къ въ мѣ́сто своѐ.

²¹И҆ посѣтѝ гд҇ь бг҃ъ а҆́ннѹ, и҆ зача̀, и҆ родѝ є҆щѐ трѝ сы́ны и҆ дщє́ри двѣ̀. И҆ возвели́чисѧ ѻ҆́трокъ самѹи́лъ пред̾ гд҇емъ.

²²И҆лі́й же состарѣ́сѧ ѕѣлѡ̀: и҆ ѹ҆слы́ша, ѩ҆̀же творѧ́хѹ сы́нове є҆гѡ̀ всѣ҄мъ сынѡ́мъ ї҆и҃лєвымъ, и҆ ѩ҆́кѡ быва́хѹ съ жена́ми предстоѧ́щими ѹ҆ две́рїй ски́нїи свидѣ́нїѧ,

²³и҆ речѐ и҆̀мъ: почто̀ твори́те по глаго́лѹ семѹ̀, є҆го́же а҆́зъ слы́шѹ и҆з̾ ѹ҆́стъ всѣ́хъ люді́й гд҇нихъ (ѡ҆ ва́съ);

²⁴нѝ, ча҄да, нѝ: ѩ҆́кѡ не бла́гъ слѹ́хъ, є҆го́же а҆́зъ слы́шѹ ѡ҆ ва́съ: не твори́те та́кѡ, ѩ҆́кѡ не добры̀ слѹ́хи, ѩ҆̀же а҆́зъ слы́шѹ, є҆́же не рабо́тати лю́демъ бг҃ѹ:

²⁵а҆́ще согрѣша́ѧ согрѣши́тъ мѹ́жъ мѹ́жеви, помо́лѧтсѧ ѡ҆ не́мъ ко гд҇ѹ: а҆́ще же гд҇еви согрѣши́тъ, кто̀ помо́литсѧ ѡ҆ не́мъ; И҆ не послѹ́шаста гла́са ѻ҆тца̀ своегѡ̀, ѩ҆́кѡ хотѧ́й восхотѣ̀ гд҇ь погѹби́ти ѧ҆̀.

²⁶Ѻ҆́трокъ же самѹи́лъ хожда́ше пред̾ѹспѣва́ѧ, и҆ бѣ̀ бла҄гъ пред̾ гд҇емъ и҆ челѡвѣ́ки.

²⁷И҆ прїи́де человѣ́къ бж҃їй ко и҆лі́ю и҆ речѐ: сїѧ҄ гл҃етъ гд҇ь: ѿкрыва́ѧсѧ ѿкры́хсѧ въ домѹ̀ ѻ҆тца̀ твоегѡ̀, сѹ́щымъ и҆̀мъ въ землѝ є҆гѵ́петстѣй рабѡ́мъ въ до́мѹ фараѡ́ни,

²⁸и҆ и҆збра́хъ до́мъ ѻ҆тца̀ твоегѡ̀ ѿ всѣ́хъ домѡ́въ ї҆и҃левыхъ мнѣ̀ слѹжи́ти, є҆́же восходи́ти ко ѻ҆лтарю̀ моемѹ̀ и҆ кади́ти кади́ломъ и҆ носи́ти є҆фѹ́дъ, и҆ да́хъ до́мѹ ѻ҆тца̀ твоегѡ̀ всѧ҄, ѩ҆̀же ѻ҆гнѧ̀ же́ртвєннаѧ сынѡ́въ ї҆и҃левыхъ, въ снѣ́дь:

²⁹и҆ почто̀ ты̀ воззрѣ́лъ є҆сѝ на ѳѷмїа́мъ мо́й и҆ на же́ртвѹ мою̀ безстѹ́днымъ ѻ҆́комъ, и҆ просла́вилъ сы́ны твоѧ҄ па́че менє̀, є҆́же благословлѧ́ти нача́токъ всѧ́кїѧ же́ртвы ї҆и҃левы предо мно́ю;

³⁰сегѡ̀ ра́ди сїѧ҄ гл҃етъ гд҇ь бг҃ъ ї҆и҃левъ, гл҃ѧ: реко́хъ, до́мъ тво́й и҆ до́мъ ѻ҆тца̀ твоегѡ̀ пре́йдетъ предо мно́ю до вѣ́ка: а҆ нн҃ѣ гл҃етъ гд҇ь: ника́коже мнѣ̀, занѐ то́кмѡ прославлѧ́ющыѧ мѧ̀ просла́влю, и҆ ѹ҆ничижа́ѧй мѧ̀ безче́стенъ бѹ́детъ:

³¹сѐ, дні́е и҆́дѹтъ, и҆ потреблю̀ сѣ́мѧ твоѐ и҆ сѣ́мѧ до́мѹ ѻ҆тца̀ твоегѡ̀, и҆ не бѹ́детъ ста́рца въ домѹ̀ твое́мъ во всѧ҄ дни҄,

³²и҆ ѹ҆́зриши держа́вѹ мою̀ во всѣ́хъ, и҆́миже разблажа́етъ ї҆и҃лѧ, и҆ не бѹ́детъ ста́рца въ домѹ̀ твое́мъ во всѧ҄ дни҄:

³³и҆ мѹ́жа не и҆стреблю̀ тебѣ̀ ѿ ѻ҆лтарѧ̀ моегѡ̀, во є҆́же ѡ҆скѹдѣ́ти ѻ҆чесє́мъ є҆гѡ̀ и҆ и҆ста́ѧти дѹшѝ є҆гѡ̀: и҆ всѝ про́чїи до́мѹ твоегѡ̀ падѹ́тъ ѻ҆рѹ́жїемъ мѹ́жескимъ:

³⁴и҆ сїѐ тебѣ̀ зна́менїе, є҆́же прїи́детъ на ѻ҆́ба сы҄на твоѧ҄ сїѧ҄ ѻ҆фнї̀ и҆ фїнее́са: въ де́нь є҆ди́нъ ѹ҆́мрѹтъ ѻ҆́ба:

³⁵и҆ возста́влю себѣ̀ жерца̀ вѣ́рна, и҆́же всѧ҄ ѩ҆̀же въ се́рдцы мое́мъ и҆ ѩ҆̀же въ дѹшѝ мое́й сотвори́тъ, и҆ сози́ждѹ є҆мѹ̀ до́мъ вѣ́ренъ, и҆ пред̾и́детъ пред̾ хрїсто́мъ мои́мъ во всѧ҄ дни҄:

³⁶и҆ бѹ́детъ всѧ́къ ѡ҆ста́вшїйсѧ въ домѹ̀ твое́мъ прїи́детъ поклони́тисѧ є҆мѹ̀ съ ца́тою сребра̀ и҆ хлѣ́бомъ є҆ди́нымъ, глаго́лѧ: прїими́ мѧ къ є҆ди́номѹ ѿ свѧщеннослѹже́нїй твои́хъ, є҆́же ѩ҆́сти хлѣ́бъ.