Read Библия Церковнославянская а҃ ца́рствъ 28 Bible Online

а҃ ца́рствъ 28 - Библия Церковнославянская bible

а҃ ца́рствъ 28

¹И҆ бы́сть во дни҄ ѡ҆́ны, и҆ собра́шасѧ и҆ноплемє́нницы въ полкѝ своѧ҄ и҆зы́ти бра́тисѧ со ї҆и҃лтѧны. И҆ речѐ а҆гхѹ́съ къ даві́дѹ: разѹмѣ́ѧ разѹмѣ́й, ѩ҆́кѡ со мно́ю и҆зы́деши на бра́нь ты̀ и҆ мѹ́жїе твоѝ.

²И҆ речѐ даві́дъ ко а҆гхѹ́сѹ: та́кѡ нн҃ѣ ѹ҆разѹмѣ́еши, ѩ҆̀же сотвори́тъ ра́бъ тво́й. И҆ речѐ а҆гхѹ́съ къ даві́дѹ: тѣ́мже нача́лника храни́телей тѣ́лѹ (моемѹ̀) поста́влю тѧ̀ во всѧ҄ дни҄.

³И҆ самѹи́лъ ѹ҆́мре, и҆ рыда́ше по не́мъ ве́сь ї҆и҃ль, и҆ погребо́ша є҆го̀ во а҆рмаѳе́мѣ во гра́дѣ є҆гѡ̀: и҆ саѹ́лъ и҆збѝ чревоба́сники и҆ волхвы̀ землѝ своеѧ̀.

⁴И҆ собра́шасѧ и҆ноплемє́нницы и҆ прїидо́ша и҆ ѡ҆полчи́шасѧ въ сѡна́мѣ: и҆ собра̀ саѹ́лъ всѧ҄ мѹ́жы ї҆и҃лєвы, и҆ ѡ҆полчи́шасѧ въ гелвѹѐ.

⁵И҆ ви́дѣ саѹ́лъ полкѝ и҆ноплемє́нничи, и҆ ѹ҆боѧ́сѧ, и҆ ѹ҆жасе́сѧ се́рдце є҆гѡ̀ ѕѣлѡ̀.

⁶И҆ вопросѝ саѹ́лъ гд҇а, и҆ не ѿвѣща̀ є҆мѹ̀ гд҇ь ни во снѣ̀, ни во ѩ҆вле́нїихъ, ни во проро́цѣхъ.

⁷И҆ речѐ саѹ́лъ ѻ҆трокѡ́мъ свои҄мъ: поищи́те мѝ жены̀ волше́бницы, и҆ по́йдѹ къ не́й, и҆ вопрошѹ̀ є҆ѧ̀. И҆ рѣ́ша ѻ҆́троцы є҆гѡ̀ къ немѹ̀: сѐ, жена̀ волше́бница во а҆ендѡ́рѣ.

⁸И҆ прикры́сѧ саѹ́лъ и҆ ѡ҆блече́сѧ въ ри҄зы и҆́ны, и҆ и҆́де са́мъ и҆ два̀ мѹ҄жа съ ни́мъ, и҆ прїи́де но́щїю къ женѣ̀ и҆ речѐ є҆́й: поволхвѹ́й мѝ чревоволше́бствомъ, и҆ возведи́ ми, є҆го́же рекѹ́ ти.

⁹И҆ речѐ є҆мѹ̀ жена̀: сѐ, нн҃ѣ ты̀ са́мъ вѣ́си, є҆ли҄ка сотворѝ саѹ́лъ, ка́кѡ и҆стребѝ чревоба́сники и҆ волхвы̀ ѿ землѝ, и҆ вскѹ́ю ты̀ ло́виши дѹ́шѹ мою̀, є҆́же ѹ҆мертви́ти ю҆̀;

¹⁰И҆ клѧ́тсѧ є҆́й саѹ́лъ, глаго́лѧ: жи́въ гд҇ь, а҆́ще срѧ́щетъ тѧ̀ непра́вда ѡ҆ словесѝ се́мъ.

¹¹И҆ речѐ жена̀ саѹ́лѹ: кого̀ возведѹ́ ти; И҆ речѐ саѹ́лъ: самѹи́ла возведи́ ми.

¹²И҆ ви́дѣ жена̀ самѹи́ла, и҆ возгласѝ гла́сомъ ве́лїимъ, и҆ речѐ жена̀ къ саѹ́лѹ: почто̀ мѧ̀ прельсти́лъ є҆сѝ; и҆ ты̀ є҆сѝ саѹ́лъ.

¹³И҆ речѐ є҆́й ца́рь: не бо́йсѧ, рцы̀ кого̀ ви́дѣла є҆сѝ; И҆ речѐ є҆мѹ̀ жена̀: бо́ги ви́дѣхъ восходѧ́щыѧ ѿ землѝ.

¹⁴И҆ речѐ є҆́й: что̀ позна́ла є҆сѝ; И҆ речѐ є҆мѹ̀ (жена̀): (ви́дѣхъ) мѹ́жа ста́ра восходѧ́ща ѿ землѝ, и҆ се́й ѡ҆болче́нъ ѡ҆дѣѧ́нїемъ до́лгимъ. И҆ ѹ҆разѹмѣ̀ саѹ́лъ, ѩ҆́кѡ се́й самѹи́лъ (є҆́сть), и҆ преклонѝ лицѐ своѐ на зе́млю и҆ поклони́сѧ є҆мѹ̀.

¹⁵И҆ речѐ є҆мѹ̀ самѹи́лъ: почто̀ понѹ́дилъ є҆сѝ мѧ̀ взы́ти мѝ; И҆ речѐ саѹ́лъ: скорблю̀ ѕѣлѡ̀, ѩ҆́кѡ и҆ноплемє́нницы вою́ютъ на мѧ̀, и҆ бг҃ъ ѿстѹпѝ ѿ менє̀, и҆ не ѹ҆слы́ша менѐ ктомѹ̀ ни въ рѹка́хъ проро́ческихъ, ни во снѣ́хъ, ни во ѩ҆вле́нїихъ: и҆ нн҃ѣ призва́хъ тѧ̀, да ска́жеши мѝ, что̀ сотворю̀.

¹⁶И҆ речѐ самѹи́лъ: почто̀ вопроша́еши мѧ̀, а҆ гд҇ь ѿстѹпѝ ѿ тебє̀ и҆ бы́сть со бли́жнимъ твои́мъ;

¹⁷и҆ сотворѝ гд҇ь тебѣ̀, ѩ҆́коже гл҃а гд҇ь рѹко́ю мое́ю, и҆ и҆сто́ргнетъ гд҇ь ца́рство твоѐ и҆з̾ рѹкѹ̀ твоє́ю и҆ вда́стъ є҆̀ бли́жнемѹ твоемѹ̀ даві́дѹ,

¹⁸поне́же не послѹ́шалъ є҆сѝ гла́са гд҇нѧ и҆ не и҆спо́лнилъ є҆сѝ гнѣ́ва ѩ҆́рости є҆гѡ̀ на а҆мали́кѣ, глаго́ла ра́ди тогѡ̀ сотворѝ тебѣ̀ гд҇ь въ де́нь се́й:

¹⁹и҆ преда́стъ гд҇ь ї҆и҃лѧ съ тобо́ю въ рѹ́ки и҆ноплемє́нничи, и҆ заѹ́тра ты̀ и҆ сы́нове твоѝ падѹ́тъ съ тобо́ю, и҆ по́лкъ ї҆и҃левъ преда́стъ гд҇ь въ рѹ́ки и҆ноплемє́нничи.

²⁰И҆ потща́сѧ саѹ́лъ, и҆ падѐ стоѧ́щь на зе́млю, и҆ ѹ҆боѧ́сѧ ѕѣлѡ̀ ѿ слове́съ самѹи́ловыхъ, и҆ не бы́сть ктомѹ̀ крѣ́пости въ не́мъ: ѩ҆́кѡ не ѩ҆дѐ хлѣ́ба во ве́сь де́нь то́й и҆ во всю̀ но́щь тѹ̀.

²¹И҆ вни́де жена̀ къ саѹ́лѹ, и҆ ви́дѣ є҆го̀, ѩ҆́кѡ смѧте́сѧ ѕѣлѡ̀, и҆ речѐ къ немѹ̀: сѐ, нн҃ѣ послѹ́ша раба̀ твоѧ̀ гла́са твоегѡ̀, и҆ положи́хъ дѹ́шѹ мою̀ въ рѹ́цѣ моѝ, и҆ послѹ́шахъ слове́съ, ѩ҆̀же мѝ глаго́лалъ є҆сѝ:

²²и҆ нн҃ѣ послѹ́шай гла́са рабы̀ твоеѧ̀, и҆ положѹ̀ пред̾ тобо́ю ѹ҆крѹ́хъ хлѣ́ба, и҆ ѩ҆́ждь, и҆ бѹ́детъ въ тебѣ̀ крѣ́пость, ѩ҆́кѡ и҆́деши въ пѹ́ть.

²³И҆ не хотѧ́ше ѩ҆́сти: и҆ понѹ́диша є҆го̀ ѻ҆́троцы є҆гѡ̀ и҆ жена̀, и҆ послѹ́ша гла́са и҆́хъ, и҆ воста̀ ѿ землѝ, и҆ сѣ́де на сѣда́лищи.

²⁴Женѣ́ же бѧ́ше ю҆́ница пито́маѧ въ домѹ̀: и҆ потща́сѧ, и҆ закла̀ ю҆̀: и҆ взѧ̀ мѹкѹ̀ и҆ смѣсѝ, и҆ и҆спечѐ ѡ҆прѣсно́ки,

²⁵и҆ принесѐ пред̾ саѹ́ла и҆ пред̾ ѻ҆́троки є҆гѡ̀: и҆ ѩ҆до́ша, и҆ воста́ша и҆ ѿидо́ша въ но́щь ѻ҆́нѹ.