Read Библия Церковнославянская а҃ ца́рствъ 29 Bible Online

а҃ ца́рствъ 29 - Библия Церковнославянская bible

а҃ ца́рствъ 29

¹И҆ собра́ша и҆ноплемє́нницы всѧ҄ полкѝ своѧ҄ во а҆фе́къ, ї҆и҃лтѧне же ѡ҆полчи́шасѧ во а҆ендѡ́рѣ и҆́же во ї҆езрае́ли.

²И҆ воевѡ́ды и҆ноплемє́нничи пред̾идѧ́хѹ со ста́ми и҆ ты́сѧщами, даві́дъ же и҆ мѹ́жїе є҆гѡ̀ и҆дѧ́хѹ въ послѣ́днихъ со а҆гхѹ́сомъ.

³И҆ рѣ́ша воевѡ́ды и҆ноплемє́нничи кто̀ сѹ́ть и҆дѹ́щїи сі́и; И҆ речѐ а҆гхѹ́съ къ воево́дамъ и҆ноплеме́нничимъ: не се́й ли даві́дъ ра́бъ саѹ́ла царѧ̀ ї҆и҃лева, и҆́же бы́сть съ на́ми дні́й сїѐ второ́е лѣ́то; и҆ не ѡ҆брѣто́хъ въ не́мъ ничто́же, ѿ днѐ въ ѻ҆́ньже прїи́де ко мнѣ̀ да́же до сегѡ̀ днѐ.

⁴И҆ приско́рбни бы́ша ѡ҆ не́мъ воевѡ́ды и҆ноплемє́нничи и҆ глаго́лаша є҆мѹ̀: возвратѝ мѹ́жа, и҆ да возврати́тсѧ на мѣ́сто своѐ, и҆дѣ́же поста́вилъ є҆сѝ є҆го̀ та́мѡ, и҆ да не и҆́детъ съ на́ми на бра́нь, и҆ да не бѹ́детъ навѣ́тникъ въ полцѣ́хъ: и҆ чи́мъ примири́тсѧ се́й господи́нѹ своемѹ̀; не глава́ми ли мѹже́й си́хъ;

⁵не се́й ли є҆́сть даві́дъ, є҆мѹ́же и҆зыдо́ша съ ли҄ки, глаго́люще: побѣдѝ саѹ́лъ съ ты́сѧщами свои́ми, и҆ даві́дъ со тма́ми свои́ми;

⁶И҆ призва̀ а҆гхѹ́съ даві́да и҆ речѐ є҆мѹ̀: жи́въ гд҇ь, ѩ҆́кѡ пра́въ ты̀ и҆ бла́гъ пред̾ ѻ҆чи́ма мои́ма, и҆ вхо́дъ тво́й и҆ и҆схо́дъ тво́й со мно́ю въ полцѣ̀, и҆ ѩ҆́кѡ не ѡ҆брѣто́хъ въ тебѣ̀ ѕло́бы, ѿне́лѣже є҆сѝ прише́лъ ко мнѣ̀ до дне́шнѧгѡ днѐ, но пред̾ ѻ҆чи́ма воево́дъ не бла́гъ є҆сѝ ты̀:

⁷и҆ нн҃ѣ возврати́сѧ и҆ и҆дѝ съ ми́ромъ, и҆ да не сотвори́ши ѕла̀ пред̾ ѻ҆чи́ма воево́дъ и҆ноплеме́нничихъ.

⁸И҆ речѐ даві́дъ ко а҆гхѹ́сѹ: что̀ сотвори́хъ тѝ; и҆ что̀ ѡ҆брѣ́лъ є҆сѝ въ рабѣ̀ твое́мъ, ѿ негѡ́же днѐ бѣ́хъ пред̾ тобо́ю, и҆ да́же до сегѡ̀ днѐ, да не и҆дѹ̀ воева́ти врагѡ́въ господи́на моегѡ̀ царѧ̀;

⁹И҆ ѿвѣща̀ а҆гхѹ́съ даві́дѹ: вѣ́мъ, ѩ҆́кѡ бла́гъ ты̀ пред̾ ѻ҆чи́ма мои́ма ѩ҆́кѡ а҆́гг҃лъ бж҃їй, но воевѡ́ды и҆ноплемє́нничи глаго́лютъ: да не и҆́детъ съ на́ми на бра́нь:

¹⁰и҆ нн҃ѣ воста́ни ра́нѡ ты̀ и҆ ѻ҆́троцы господи́на твоегѡ̀ ходѧ́щїи съ тобо́ю и҆ и҆ди́те на мѣ́сто, и҆дѣ́же поста́вихъ ва́съ, и҆ словесѐ па́гѹбна да не положи́ши на се́рдцы твое́мъ, ѩ҆́кѡ бла́гъ є҆сѝ ты̀ предо мно́ю: и҆ воста́ните ра́нѡ въ пѹ́ть, є҆гда̀ разсвѣта́етъ ва́мъ, и҆ и҆ди́те.

¹¹И҆ ѹ҆ра́ни даві́дъ са́мъ и҆ мѹ́жїе є҆гѡ̀ ѿитѝ и҆ стрещѝ землѝ и҆ноплеме́нничи, и҆ и҆ноплемє́нницы взыдо́ша на бра́нь во ї҆езрае́ль.