Read Библия Церковнославянская а҃ ца́рствъ 8 Bible Online

а҃ ца́рствъ 8 - Библия Церковнославянская bible

а҃ ца́рствъ 8

¹И҆ бы́сть є҆гда̀ состарѣ́сѧ самѹи́лъ, и҆ поста́ви сы́ны своѧ҄ сѹди́ти ї҆и҃леви.

²И҆ сїѧ҄ и҆мена̀ сынѡ́мъ є҆гѡ̀: пе́рвенецъ ї҆ѡи́ль, и҆ и҆́мѧ второ́мѹ а҆ві́а, сѹдїи҄ въ вирсаве́и.

³И҆ не поидо́ша сы́нове є҆гѡ̀ пѹте́мъ є҆гѡ̀: и҆ ѹ҆клони́шасѧ в̾слѣ́дъ лихоима́нїѧ, и҆ прїима́хѹ да́ры, и҆ развраща́хѹ сѹды̀.

⁴И҆ собра́шасѧ мѹ́жїе ї҆и҃лєвы, и҆ прїидо́ша къ самѹи́лѹ во а҆рмаѳе́мъ

⁵и҆ рѣ́ша є҆мѹ̀: сѐ, ты̀ состарѣ́лсѧ є҆сѝ, сы́нове же твоѝ не хо́дѧтъ по пѹтѝ твоемѹ̀: и҆ нн҃ѣ поста́ви над̾ на́ми царѧ̀, да сѹ́дитъ ны̀, ѩ҆́коже и҆ про́чїи ѩ҆зы́ки.

⁶И҆ бы́сть лѹка́въ глаго́лъ пред̾ ѻ҆чи́ма самѹи́ловыма, ѩ҆́кѡ рѣ́ша: да́ждь на́мъ царѧ̀, да сѹ́дитъ ны̀. И҆ помоли́сѧ самѹи́лъ ко гд҇ѹ.

⁷И҆ речѐ гд҇ь самѹи́лѹ: послѹ́шай гла́са люді́й, ѩ҆́коже глаго́лютъ къ тебѣ̀, ѩ҆́кѡ не тебѐ ѹ҆ничижи́ша, но менѐ ѹ҆ничижи́ша, є҆́же не ца́рствовати мѝ над̾ ни́ми:

⁸по всѣ҄мъ дѣлѡ́мъ, ѩ҆̀же сотвори́ша мѝ, ѿ негѡ́же днѐ и҆зведо́хъ и҆̀хъ и҆з̾ землѝ є҆гѵ́петски до дне́шнѧгѡ днѐ, и҆ ѡ҆ста́виша мѧ̀, и҆ послѹжи́ша богѡ́мъ и҆ны҄мъ, та́кѡ ті́и творѧ́тъ и҆ тебѣ̀:

⁹и҆ нн҃ѣ послѹ́шай гла́са и҆́хъ: ѻ҆ба́че засвидѣ́телствѹѧ засвидѣ́телствѹеши и҆̀мъ и҆ возвѣсти́ши и҆̀мъ пра́вдѹ царе́вѹ, и҆́же ца́рствовати бѹ́детъ над̾ ни́ми.

¹⁰И҆ речѐ самѹи́лъ всѧ҄ словеса̀ гд҇нѧ къ лю́демъ просѧ́щымъ ѿ негѡ̀ царѧ̀,

¹¹и҆ глаго́ла (и҆̀мъ): сїѐ бѹ́детъ ѡ҆правда́нїе царе́во, и҆́же ца́рствовати и҆́мать над̾ ва́ми: сы́ны ва́шѧ во́зметъ и҆ поста́витъ ѧ҆̀ колесни́чники своѧ҄, и҆ на ко́ни вса́дитъ и҆̀хъ, и҆ предтекѹ́щихъ пред̾ колесни́цами є҆гѡ̀:

¹²и҆ поста́витъ ѧ҆̀ себѣ̀ со́тники и҆ ты́сѧщники и҆ жа́телми жа́твы своеѧ̀, и҆ ѡ҆б̾и́мѹтъ ѡ҆б̾има́нїемъ грѡ́здїѧ є҆гѡ̀, и҆ твори́ти ѻ҆рѹ҄дїѧ вѡ́инскаѧ є҆гѡ̀ и҆ ѻ҆рѹ҄дїѧ колесни́цъ є҆гѡ̀:

¹³и҆ дщє́ри ва́шѧ во́зметъ въ мѷрова҄рницы и҆ въ пова҄рницы и҆ въ хлѣ҄бницы:

¹⁴и҆ се́ла ва҄ша и҆ вїногра́ды ва́шѧ и҆ ма҄сличины ва́шѧ благї҄ѧ во́зметъ и҆ да́стъ рабѡ́мъ свои҄мъ:

¹⁵и҆ сѣ́мена ва҄ша и҆ вїногра́ды ва́шѧ ѡ҆десѧ́тствѹетъ и҆ да́стъ скопцє́мъ свои҄мъ и҆ рабѡ́мъ свои҄мъ:

¹⁶и҆ рабы̀ ва́шѧ и҆ рабы҄ни ва́шѧ и҆ стада̀ ва҄ша блага҄ѧ и҆ ѻ҆слы̀ ва́шѧ ѿи́метъ и҆ ѡ҆десѧ́тствѹетъ на дѣла̀ своѧ҄:

¹⁷и҆ па́жити ва́шѧ ѡ҆десѧ́тствѹетъ, и҆ вы̀ бѹ́дете є҆мѹ̀ рабѝ:

¹⁸и҆ возопїе́те въ де́нь ѡ҆́нъ ѿ лица̀ царѧ̀ ва́шегѡ, є҆го́же и҆збра́сте себѣ̀, и҆ не ѹ҆слы́шитъ ва́съ гд҇ь въ де́нь ѡ҆́нъ, ѩ҆́кѡ вы̀ са́ми и҆збра́сте себѣ̀ царѧ̀.

¹⁹И҆ не восхотѣ́ша лю́дїе послѹ́шати самѹи́ла и҆ рѣ́ша є҆мѹ̀: нѝ, но ца́рь да бѹ́детъ над̾ на́ми,

²⁰и҆ бѹ́демъ и҆ мы̀ ѩ҆́коже всѝ ѩ҆зы́цы: и҆ сѹди́ти и҆́мать на́съ ца́рь на́шъ, и҆ и҆зы́детъ пред̾ на́ми, и҆ побо́ретъ поборе́нїемъ ѡ҆ на́съ.

²¹И҆ слы́ша самѹи́лъ всѧ҄ глаго́лы люді́й и҆ глаго́ла ѧ҆̀ во ѹ҆́шы гд҇еви.

²²И҆ речѐ гд҇ь къ самѹи́лѹ: послѹ́шай гла́са и҆́хъ, и҆ поста́ви и҆̀мъ царѧ̀. И҆ речѐ самѹи́лъ къ мѹжє́мъ ї҆и҃лєвымъ: да и҆́детъ кі́йждо ва́съ во сво́й гра́дъ.