Read Библия Церковнославянская а҃ ца́рствъ 9 Bible Online

а҃ ца́рствъ 9 - Библия Церковнославянская bible

а҃ ца́рствъ 9

¹И҆ бѣ̀ мѹ́жъ ѿ сынѡ́въ венїамі́новыхъ, є҆мѹ́же и҆́мѧ кі́съ, сы́нъ а҆вїи́ловъ, сы́на ї҆а́редова, сы́на вахі́рова, сы́на а҆фе́кова, сы́на мѹ́жа ї҆емїне́ова, мѹ́жъ си́ленъ крѣ́постїю.

²И҆ семѹ̀ бѣ̀ сы́нъ, и҆́мѧ є҆мѹ̀ саѹ́лъ, добровели́ченъ, мѹ́жъ бла́гъ: и҆ не бѣ̀ въ сынѣ́хъ ї҆и҃левыхъ бла́гъ па́че є҆гѡ̀, ѿ ра́менъ и҆ вы́ше высо́къ па́че всѣ́хъ люді́й.

³И҆ заблѹди́ша ѻ҆слѧ́та кі́са ѻ҆тца̀ саѹ́лова. И҆ речѐ кі́съ къ саѹ́лѹ сы́нѹ своемѹ̀: возмѝ съ собо́ю є҆ди́наго ѿ ѻ҆́трѡкъ, и҆ воста́вше и҆ди́те и҆ поищи́те ѻ҆слѧ́тъ.

⁴И҆ проидо́ша го́рѹ є҆фре́млю, и҆ проидо́ша зе́млю селха̀, и҆ не ѡ҆брѣто́ша: и҆ проидо́ша зе́млю сегалі́млю, и҆ не бѣ̀: и҆ проидо́ша зе́млю ї҆амі́ню, и҆ не ѡ҆брѣто́ша.

⁵И҆ прише́дшымъ и҆̀мъ въ зе́млю сі́фовѹ, и҆ речѐ саѹ́лъ ко ѻ҆́трокѹ своемѹ̀ и҆́же съ ни́мъ: грѧдѝ и҆ возврати́мсѧ, да не ка́кѡ ѻ҆те́цъ мо́й ѡ҆ста́вѧ ѻ҆слѧ́та, пече́тсѧ ѡ҆ на́съ.

⁶И҆ речѐ є҆мѹ̀ ѻ҆́трокъ: сѐ, здѣ̀ человѣ́къ бж҃їй во гра́дѣ се́мъ, и҆ человѣ́къ сла́венъ: всѐ є҆́же а҆́ще рече́тъ приходѧ́щымъ къ немѹ̀, бѹ́детъ и҆̀мъ: и҆ нн҃ѣ по́йдемъ та́мѡ, да возвѣсти́тъ на́мъ пѹ́ть на́шъ, и҆́мже по́йдемъ.

⁷И҆ речѐ саѹ́лъ ѻ҆́трокѹ своемѹ̀ и҆́же съ ни́мъ: сѐ, по́йдемъ, и҆ что̀ принесе́мъ къ человѣ́кѹ бж҃їю; ѩ҆́кѡ хлѣ́бы ѡ҆скѹдѣ́ша ѿ вре́тищъ на́шихъ, и҆ ктомѹ̀ нѣ́сть ѹ҆ на́съ, є҆́же внестѝ къ человѣ́кѹ бж҃їю ѿ и҆мѣ́нїѧ на́шегѡ.

⁸И҆ приложѝ ѻ҆́трокъ ѿвѣща́ти саѹ́лѹ и҆ речѐ: сѐ, ѡ҆брѣта́етсѧ въ рѹцѣ̀ мое́й четве́ртаѧ ча́сть сі́клѧ сребра̀, и҆ да́си человѣ́кѹ бж҃їю, и҆ возвѣсти́тъ на́мъ пѹ́ть на́шъ.

⁹Пре́жде бо во ї҆и҃ли си́це глаго́лаше кі́йждо, є҆гда̀ кто̀ и҆дѧ́ше вопроша́ти бг҃а: грѧдѝ, да и҆́демъ къ прозорли́вцѹ: ѩ҆́кѡ проро́ка нарица́хѹ лю́дїе пре́жде прозорли́вцемъ.

¹⁰И҆ речѐ саѹ́лъ ѻ҆́трокѹ своемѹ̀: до́бръ глаго́лъ тво́й: грѧдѝ, да и҆́демъ. И҆ и҆до́ша во гра́дъ, и҆дѣ́же бѣ̀ человѣ́къ бж҃їй.

¹¹Восходѧ́щымъ же и҆̀мъ на восхо́дъ гра́да, и҆ сѐ, ѡ҆брѣто́ша дѣви́цъ и҆зше́дшихъ почерпстѝ воды̀, и҆ рѣ́ша и҆̀мъ: є҆́сть ли здѣ̀ прозорли́вецъ;

¹²И҆ ѿвѣща́ша и҆̀мъ дѣви҄цы, глаго́лющѧ: є҆́сть, сѐ пред̾ лице́мъ ва́шимъ: нн҃ѣ же потщи́тесѧ, ѩ҆́кѡ днѐ ра́ди грѧде́тъ во гра́дъ, ѩ҆́кѡ же́ртва дне́сь лю́демъ въ ва́мѣ:

¹³и҆ є҆гда̀ вни́дете во гра́дъ, та́кѡ ѡ҆брѧ́щете є҆го̀ во гра́дѣ, пре́жде не́же взы́ти є҆мѹ̀ въ ва́мѹ ѩ҆́сти: ѩ҆́кѡ не и҆́мѹтъ ѩ҆́сти лю́дїе, до́ндеже вни́детъ се́й, ѩ҆́кѡ то́й благослови́тъ же́ртвѹ, и҆ по си́хъ ѩ҆дѧ́тъ стра́ннїи: и҆ нн҃ѣ взы́дите, ѩ҆́кѡ днѐ ра́ди ѡ҆брѧ́щете є҆го̀.

¹⁴И҆ взыдо́ша во гра́дъ. И҆́мже входѧ́щымъ средѝ гра́да, и҆ сѐ, самѹи́лъ и҆зы́де во срѣ́тенїе и҆̀мъ, є҆́же взы́ти въ ва́мѹ.

¹⁵И҆ гд҇ь ѿкры̀ во ѹ҆́хо самѹи́лѹ дне́мъ є҆ди́нымъ пре́жде прише́ствїѧ къ немѹ̀ саѹ́лѧ, гл҃ѧ:

¹⁶ѩ҆́коже вре́мѧ сїѐ, ѹ҆́трѡ послю̀ къ тебѣ̀ мѹ́жа ѿ пле́мене венїамі́нова, и҆ да пома́жеши є҆го̀ царѧ̀ над̾ людьмѝ мои́ми ї҆и҃лемъ, и҆ спасе́тъ лю́ди моѧ҄ ѿ рѹкѝ и҆ноплеме́нничи: ѩ҆́кѡ призрѣ́хъ на смире́нїе люді́й мои́хъ, ѩ҆́кѡ взы́де во́пль и҆́хъ ко мнѣ̀.

¹⁷И҆ ви́дѣ самѹи́лъ саѹ́ла, и҆ гд҇ь речѐ къ немѹ̀: сѐ, человѣ́къ, ѡ҆ не́мже реко́хъ тѝ: се́й бѹ́детъ въ лю́дехъ мои́хъ ца́рствовати.

¹⁸И҆ прибли́жисѧ саѹ́лъ къ самѹи́лѹ посредѣ̀ гра́да и҆ речѐ: возвѣсти́ ми, кото́рый до́мъ прозорли́вца.

¹⁹И҆ ѿвѣща̀ самѹи́лъ саѹ́лѹ и҆ речѐ: а҆́зъ са́мъ є҆́смь: взы́ди предо мно́ю въ ва́мѹ, и҆ ѩ҆́ждь со мно́ю дне́сь, и҆ ѿпѹщѹ́ тѧ заѹ́тра, и҆ всѧ҄ ѩ҆̀же въ се́рдцы твое́мъ возвѣщѹ́ ти:

²⁰и҆ ѡ҆ ѻ҆слѧ́тѣхъ твои́хъ заблѹди́вшихъ дне́сь тре́тїй де́нь, не помышлѧ́й въ се́рдцы свое́мъ ѡ҆ ни́хъ, и҆́бо ѡ҆брѣто́шасѧ: и҆ комѹ̀ кра҄снаѧ ї҆и҃лєва; не тебѣ̀ ли и҆ до́мѹ ѻ҆тца̀ твоегѡ̀;

²¹И҆ ѿвѣща̀ саѹ́лъ и҆ речѐ: не сы́нъ ли є҆́смь а҆́зъ мѹ́жа ї҆емїне́а, ме́ншагѡ ски́птра пле́мене ї҆и҃лева; и҆ пле́мене малѣ́йшагѡ ѿ всегѡ̀ ски́птра венїамі́нова; и҆ ѻ҆те́чество моѐ ме́ншее па́че всѣ́хъ ѻ҆те́чествъ венїамі́новыхъ; и҆ вскѹ́ю глаго́лалъ є҆сѝ ко мнѣ̀ по глаго́лѹ семѹ̀;

²²И҆ поѧ́тъ самѹи́лъ саѹ́ла и҆ ѻ҆́трока є҆гѡ̀, и҆ введѐ ѧ҆̀ во ѡ҆бита́лище, и҆ дадѐ и҆̀мъ та́мѡ мѣ́сто въ пе́рвыхъ зва́ныхъ, ѩ҆́кѡ въ седми́десѧти мѹже́хъ.

²³И҆ речѐ самѹи́лъ по́варѹ: да́ждь мѝ ча́сть, ю҆́же да́хъ тѝ, и҆ ѡ҆ не́йже рѣ́хъ тѝ положи́ти ю҆̀ ѹ҆ себє̀.

²⁴И҆ взѧ̀ по́варъ плечѐ, и҆ предложѝ є҆̀ саѹ́лови. И҆ речѐ самѹи́лъ саѹ́лѹ: сѐ, и҆збы́токъ, предложѝ пред̾ сѧ̀ и҆ ѩ҆́ждь, ѩ҆́кѡ во свидѣ́телство предложи́сѧ тебѣ̀ па́че и҆ны́хъ, прикосни́сѧ. И҆ ѩ҆дѐ саѹ́лъ съ самѹи́ломъ въ то́й де́нь.

²⁵И҆ сни́де ѿ ва́мы во гра́дъ, и҆ постла́ша саѹ́лови на го́рницѣ, и҆ спа̀.

²⁶И҆ бы́сть є҆гда̀ приближа́шесѧ ѹ҆́тро, и҆ воззва̀ самѹи́лъ саѹ́ла на го́рницѣ, и҆ речѐ: воста́ни, и҆ ѿпѹщѹ́ тѧ. И҆ воста̀ саѹ́лъ, и҆ и҆зы́де са́мъ и҆ самѹи́лъ во́нъ.

²⁷И҆́мже и҆сходѧ́щымъ въ ча́сть гра́да, и҆ речѐ самѹи́лъ къ саѹ́лѹ: рцы̀ ю҆́ноши, да пред̾и́детъ пред̾ на́ми: а҆ ты̀ ста́ни ѩ҆́коже дне́сь, и҆ слы́шанъ сотворю̀ тебѣ̀ гл҃го́лъ бж҃їй.