Read Новый Завет на церковнославянском языке От Матфея 15 Bible Online

От Матфея 15 - Новый Завет на церковнославянском языке bible

От Матфея 15

¹Тогда приступиша ко Иисусови иже от иерусалима книжницы и фарисее, глаголюще:

²почто ученицы твои преступают предание старец? не умывают бо рук своих, егда хлeб ядят.

³Он же отвeщав рече им: почто и вы преступаете заповeдь Божию за предание ваше?

⁴Бог бо заповeда, глаголя: чти отца и матерь: и: иже злословит отца или матерь, смертию да умрет.

⁵Вы же глаголете: иже аще речет отцу или матери: дар, имже бы от мене пользовался еси:

⁶и да не почтит отца своего или матере (матере своея): и разористе заповeдь Божию за предание ваше.

⁷Лицемeри, добрe пророчествова о вас исаиа, глаголя:

⁸приближаются мнe людие сии усты своими и устнами чтут мя: сердце же их далече отстоит от мене:

⁹всуе же чтут мя, учаще учением, заповeдем человeческим.

¹⁰И призвав народы, рече им: слышите и разумeйте:

¹¹не входящее во уста сквернит человeка: но исходящее изо уст, то сквернит человeка.

¹²Тогда приступльше ученицы его рeша ему: вeси ли, яко фарисее слышавше слово соблазнишася?

¹³Он же отвeщав рече: всяк сад, егоже не насади Отец мой небeсный, искоренится:

¹⁴оставите их: вожди суть слeпи слeпцем: слeпец же слeпца аще водит, оба в яму впадетася.

¹⁵Отвeщав же петр рече ему: скажи нам притчу сию.

¹⁶Иисус же рече (им): единаче (еще) ли и вы без разума есте?

¹⁷не у ли разумeваете, яко всяко, еже входит во уста, во чрево вмeщается и афедроном исходит?

¹⁸исходящая же изо уст, от сердца исходят, и та сквернят человeка:

¹⁹от сердца бо исходят помышления злая, убийства, прелюбодeяния, любодeяния, татьбы, лжесвидeтелства, хулы:

²⁰сия суть сквернящая человeка: а еже неумовенныма рукама ясти, не сквернит человeка.

²¹И изшед оттуду Иисус, отиде во страны тирския и сидонския.

²²И се, жена хананейска, от предeл тeх изшедши, возопи к нему глаголющи: помилуй мя, Господи, Сыне давидов, дщи моя злe бeснуется.

²³Он же не отвeща ей словесе. И приступльше ученицы его, моляху его, глаголюще: отпусти ю, яко вопиет вслeд нас.

²⁴Он же отвeщав рече: нeсмь послан, токмо ко овцам погибшым дому Израилева.

²⁵Она же пришедши поклонися ему, глаголющи: Господи, помози ми.

²⁶Он же отвeщав рече: нeсть добро отяти хлeба чадом и поврещи псом.

²⁷Она же рече: ей, Господи: ибо и пси ядят от крупиц падающих от трапезы господей своих.

²⁸Тогда отвeщав Иисус рече ей: о!, жено, велия вeра твоя: буди тебe якоже хощеши. И исцeлe дщи ея от того часа.

²⁹И прешед оттуду Иисус, прииде на море галилейское, и возшед на гору, сeде ту.

³⁰И приступиша к нему народи мнози, имуще с собою хромыя, слeпыя, нeмыя, бeдныя и ины многи, и привергоша их к ногама Иисусовыма: и исцeли их:

³¹якоже народом дивитися, видящим нeмыя глаголюща, бeдныя здравы, хромыя ходящя и слeпыя видящя: и славляху Бога Израилева.

³²Иисус же призвав ученики своя, рече (им): милосердую о народe (сем), яко уже дни три присeдят мнe и не имут чесо ясти: и отпустити их не ядших не хощу, да не како ослабeют на пути.

³³И глаголаша ему ученицы его: откуду нам в пустыни хлeби толицы, яко да насытится толик народ?

³⁴И глагола им Иисус: колико хлeбы имате? Они же рeша: седмь, и мало рыбиц.

³⁵И повелe народом возлещи на земли,

³⁶и приемь седмь хлeбы и рыбы, хвалу воздав преломи и даде учеником своим, ученицы же народом.

³⁷И ядоша вси и насытишася: и взяша избытки укрух, седмь кошниц исполнь:

³⁸ядших же бяше четыре тысящы мужей, развe жен и дeтей.

³⁹И отпустив народы, влeзе в корабль и прииде в предeлы магдалински.